Yanda okukala wu na ombepo yethigathanopo, e to kala ho humitha komeho ombili

1. Ombepo yethigathanopo otayi vulu okuningitha omuntu a ninge shike?

KUNENA aantu oyendji muuyuni oye na ombepo yethigathanopo, ndjoka yi li iikala yokwiihola mwene. Pashiholelwa, omunangeshefa otashi vulika a kale a hala okupondola e vule aanangeshefa ooyakwawo, onkene otashi vulika a ninge iinima mbyoka tayi vulu okweetela yalwe uupyakadhi. Omunasikola otashi vulika a yake ekonakono, opo a taambwe kouniveesiti yontumba. Tu li Aakriste, otu wete kutya okuninga iinima ya fa mpoka okwa puka, oshoka oyi li “iilonga yuuhalu wopantu.” (Gal. 5:19-21) Nonando ongawo, otashi vulika ooitaali yamwe ya tameke okukala ye na ombepo yethigathanopo inaaye shi nongela. Osha simana tu kundathaneni oshinima shoka, oshoka ombepo yethigathanapo otayi vulu okuteya po uukumwe wegegongalo.

2. Oshike tatu ka kundathana moshitopolwa shika?

² Moshitopolwa shika, otatu ka kundathana kombinga yiinima mbyoka hayi tu ningitha tu kale tu na ombepo yethigathanopo megongalo. Otatu ka tala wo kiiholelwa yaalumentu naakiintu aadhiginini yopethimbo lyOmbiimbeli, mboka kaaya li yi iyetha ya kale ye na ombepo yethigathanopo. Tango natu ka taleni nkene tatu vulu okutalulula omainyengotompelo getu.

KALA HO TALULULA OMAINYENGOTOMPELO GOYE

3. Omapulo geni twa pumbwa okwiipula?

³ Omathimbo nomathimbo, oshi li pandunge tu kale hatu talulula omainyengotompelo getu. Otatu vulu okwiipula tatu ti: ‘Mbela ohandi kala ndu uvite nawa uuna tandi dhiladhila kutya ondi vule yalwe? Mbela ohandi longo nuudhiginini megongalo, molwaashoka owala nda hala okukala ndi vule yalwe? Nenge ohandi longo nuudhiginini, molwaashoka owala nda hala okunyanyudha Jehova?’ Omolwashike tu na okwiipula omapulo ngoka? Ndhindhilika shoka Oohapu dhaKalunga tadhi ti.

4. Ngaashi sha popiwa mAagalati 6:3, 4, omolwashike tu na okuyanda okwiiyelekanitha nayalwe?

⁴ Ombiimbeli oye tu ladhipika tu yande okwiiyelekanitha nayalwe. (Lesha Aagalati 6:3, 4.) Omolwashike mbela? Etompelo limwe olyo kutya ngele otwa kala tatu dhiladhila kutya otu vule omwiitaali gwontumba, otashi vulika tu kwatwe kuuntsa. Shimwe ishewe, ngele otwa kala hatu iyelekanitha nayalwe, otashi vulika shi tu teye owala omukumo. Okudhiladhila ngawo kaku li pandunge. (Rom. 12:3) Omumwameme gwedhina Katerinab ngoka ha zi moGreece, okwa ti: “Onda li handi i yelekanitha naamwameme mboka nda li nda tala ko ya shitika, haye shi enditha nawa muukalele nohaya panga wo uukuume nayalwe nuupu. Shoka osha ningitha ndje ndi kale ndi itala ko kaandi na oshilonga.” Otwa pumbwa okudhimbulukwa kutya Jehova okwe tu nanena kuye, hamolwaashoka tu li aantu ya shitika, ye shi okupopya nenge tu shiwike nawa, ihe omolwaashoka a mona kutya otatu vulu okukala tu mu hole nokuvulika kOmwana.​—Joh. 6:44; 1 Kor. 1:26-31.

5. Oshike to ilongo moshimoniwa shomumwatate gwedhina Hyun?

⁵ Epulo lilwe tatu vulu okwiipula olyo ndika kutya: ‘Mbela ooitaali ooyakwetu oya tala ndje ko ndi li omuntu ngoka e hole ombili, nenge oya tala ndje ko ndi li omuntu ngoka e hole oontamanana?’ Natu ka taleni koshimoniwa shimwe shomumwatate gwedhina Hyun, gwokoSouth Korea. Pompito yimwe, okwa li ha kala a tala ko mboka ye na iinakugwanithwa yontumba megongalo kutya otaya kambadhala okwiiyulika kutya oye mu vule. Okwa ti: “Onda li aluhe handi popile aamwatate mboka muuwinayi, nokanda li handi tsu kumwe naashoka haya popi.” Shoka oshe etitha shike? Omumwatate Hyun okwa zimine a ti: “Iikala yandje mbyoka oya li ye etitha etopoko megongalo.” Ookuume ke yamwe oya li ye mu kwathele a mone kutya okwa pumbwa okulundulula iikala ye. Okwa ningi omalunduluko, noku li ngashingeyi omukuluntugongalo a pyokoka. Ngele otwa ndhindhilike kutya momutima gwetu otamu iyakele ombepo yethigathanopo, otwa pumbwa okukatuka oonkatu nziya tu ninge omalunduluko.

YANDA OKUKALA WU NA UUNTSA NOSHO WO EFUPA

6. Shi ikolelela kAagalati 5:26, uukwatya wuni uuwinayi tawu vulu okuningitha omuntu a kale e na ombepo yethigathanopo?

⁶ Lesha Aagalati 5:26. Uukwatya wuni uuwinayi tawu vulu okuningitha omuntu a kale e na ombepo yethigathanopo? Wumwe womuwo uuntsa. Omuntu ngoka e na uuntsa oha kala i itala ko e vule yalwe nokwi ihole mwene. Uukwatya wulwe efupa. Omuntu ngoka e na efupa iha kala owala a hala shoka shi niwe kugulwe, ihe oha kala wo inee shi mu halela. Odhoshili kutya omuntu ngoka ha kala a sila yalwe efupa oha kala wo e ya tonde. Osha yela kutya otwa hala okwiikaleka kokule niikala mbyoka iiwinayi.

7. Oshiholelwa shini tashi ulike nkene uuntsa nefupa tayi vulu okweeta iilanduliko iiwinayi?

⁷ Uuntsa nosho wo efupa otayi vulu okufaathanithwa niiyagaya mbyoka ya ya momahooli gondhila. Ondhila ndjoka otashi vulika yi tuke, ihe iiyagaya mbyoka yi li momahooli otayi vulu okuthitika ominino ndhoka hadhi ende omahooli, shoka tashi ka ningitha ooindjina dhondhila kaadhi longe we sho yi li pokunambela, e tayi gu mo mombanda. Sha faathana, gumwe otashi vulika a longele Jehova uule wethimbo, ihe ngele okwa tameke okukala e na uuntsa nosho wo efupa, ita ka ya kokule. (Omayel. 16:18) Ote ke etha po okulongela Jehova note ki iyetela owala uupyakadhi nosho wo yalwe. Oshike tashi vulu oku tu kwathela tu yande okukala tu na uuntsa nosho wo efupa?

8. Ongiini tatu vulu okuyanda okukala twi itala ko tu vule yalwe?

⁸ Otatu vulu okuyanda okukala twi itala ko tu vule yalwe, ngele otwa kala hatu tula miilonga omayele gaPaulus ngoka a li a pe Aafilippi, sho a ti: “Inamu longa nando osha mombepo yokwiihola nenge yokukonga esimano lyowala, ihe ifupipikeni kiipala yayakweni, ne mwaa dhiladhile kutya one aawanawa mu ya vule.” (Fil. 2:3) Ngele otwa kala hatu tula miilonga omayele ngoka, itatu ka kambadhala okukala tu vule mboka ye na owino nenge iipewa ye tu vule. Pehala lyaashono otatu ka kala twe ya nyanyukilwa, unene tuu ngele ohaya longitha owino nenge iipewa mbyoka miilonga yaJehova, opo ye mu simanekithe. Ngele aamwatate naamwameme mboka oya kala haya tula miilonga omayele ngoka gaPaulus, otashi ke ya kwathela ya kale wo ye wete omaukwatya getu omawanawa. Shoka otashi ke tu kwathela atuheni tu humithe komeho ombili nuukumwe megongalo.

9. Ongiini tatu vulu okuyanda okukala tu nine yalwe efupa?

⁹ Otatu vulu okuyanda okukala tu nine yalwe efupa, ngele otwa kala tu na eifupipiko nokukala tu shi omangambeko getu. Ngele otu li aaifupipiki, itatu ka kambadhala okuulika kutya otu vule yalwe. Pehala lyaashono, otatu ka kambadhala okwiilonga sha kowino yawo. Pashiholelwa, ngele omumwatate gwontumba oha gandja iipopiwa yomontaneho iiwanawa, otatu vulu oku mu pula kutya ohi ilongekidhile ngiini iipopiwa ye. Ngele omumwameme oku shi lela okuteleka, otatu vulu oku mu pula e tu kwathele tu kale wo tu shi okuteleka nawa. Ngele Omukriste omugundjuka ohe shi mono oshidhigu okupanga uukuume nayalwe, ota vulu okupula omayele kugulwe ngoka ha panga uukuume nayalwe nuupu. Ngele otwa kala hatu ningi ngawo, otatu ka yanda okukala tu uvitile yalwe efupa notashi ke tu kwathela tu hwepopale.

ILONGA KIIHOLELWA YOPAMBIIMBELI

10. Gideon okwa li a taalele uupyakadhi wuni?

¹⁰ Dhiladhila kwaashoka sha li sha holoka pokati kaGideon, ngoka a li gwomezimo lyaManasse naalumentu yomezimo lyaEfraim. Kekwatho lyaJehova, Gideon naalumentu ye 300 oya li ya sindana molugodhi, oshinima shoka ya li taya vulu okukala yu uvitile etumba. Aalumentu yomezimo lyaEfraim oye ya kuGideon, hanelalakano lyoku mu pandula, ihe olyoku mu nyenyetela. Oya li ya geya sho Gideon inee ya hiya ya kondjithe aatondi yaKalunga pamwe naye. Oya li unene ye na ko nasha nesimano lyezimo lyawo nokaya li ya gandja eitulomo kwaashoka Gideon naalumentu ye ya pondola, ano okusimanekitha edhina lyaJehova nokugamena oshigwana She.​—Aatok. 8:1.

11. Gideon okwa li a yamukula ngiini aalumentu yomezimo lyaEfraim?

¹¹ Gideon okwa li a lombwele aalumentu yomezimo lyaEfraim neifupipiko a ti: “Shoka nda li te vulu okuninga, kashi shi sha nokuyelekwa naashoka mwe shi ningi.” Okuza mpono okwe ya pe oshiholelwa shankene Jehova e ya yambeke, naashoka oshe ya kwathele “kaaya kale we ya geya.” (NW) (Aatok. 8:2, 3) Gideon okwa li i ifupipike, opo oshigwana shaKalunga shi tsikile okukala shi na ombili.

12. Oshike tatu ilongo koshiholelwa shaalumentu yomezimo lyaEfraim nosho wo shaGideon?

¹² Oshike tatu vulu okwiilonga moshiholelwa shoka? Moshiholelwa shaalumentu yomezimo lyaEfraim otatu ilongo mo kutya otu na okukala hatu pititha komeho okusimanekitha Jehova, pehala lyokukala twa hala okwiikongela esimano. Omitse dhomaukwanegumbo nosho wo aakuluntugongalo otaya vulu okwiilonga sha koshiholelwa shaGideon. Ngele gumwe okuuvithwa nayi kwaashoka wa popya nenge wa ninga, kambadhala oku mu uva ko. Oto vulu wo oku mu pandula omolwoshinima shontumba shoka a ninga nawa. Shoka otashi ka pula eifupipiko, unene tuu ngele omuntu ngoka oye e na epuko. Ihe okukaleka po ombili pokati ketu nayalwe okwa simana ku vule okuulika kutya hatse tu na epuko.

13. Hanna okwa li a taalele eshongo lini, nokwe li sindi ngiini?

¹³ Dhiladhila wo koshiholelwa shaHanna. Okwa li a hokanwa kOmulevi gwedhina Elkana, ngoka a li e mu hole noonkondo. Ihe Elkana okwa li wo e na omukulukadhi gulwe gwedhina Peninna. Elkana okwa li e hole Hanna shi vulithe Peninna, ihe ‘Peninna okwa li e na aanona, omanga Hanna kee na sha.’ Omolwoshinima shoka, Peninna okwa li he ‘mu sitha ohoni, opo e mu uvithe nayi.’ Hanna okwa li hi inyenge ngiini? Okwa li ha kala a yemata noonkondo!, ‘nolundji okwa li ha lili nokwa li ha tindi okulya.’ (1 Sam. 1:2, 6, 7) Nonando ongawo, kapu na shoka tashi ulike kutya Hanna okwa li a kambadhala okugalulila Peninna uuwinayi. Pehala lyaashono, okwa li a mbumbulile Jehova omutima gwe nokukala i inekela kutya ote ku ukitha iinima. Mbela Peninna okwe ke etha po ngaa okuungaunga nayi naHanna? Ombiimbeli inayi shi popya. Shoka tu shi osho kutya Hanna okwa ka kala ishewe e na ombili yokomwenyo. ‘Ina kala we a sa oluhodhi.’​—1 Sam. 1:10, 18.

14. Oshike tatu ilongo koshiholelwa shaHanna?

¹⁴ Oshike tatu vulu okwiilonga koshiholelwa shaHanna? Ngele gumwe okwa tameke okuninga ethigathanopo nangoye, dhimbulukwa kutya oto vulu okuninga po sha. Oto vulu okuhogolola wu kandule po uupyakadhi mboka wu li pokati keni. Pehala lyoku mu galulila uuwinayi, kambadhala wu pange ombili naye. (Rom. 12:17-21) Nonando okwa tindi okupanga ombili, okukala wu shi kutya owa kambadhala okukandula po uupyakadhi mboka wu li pokati keni, otaku ke ku kwathela wu kale wu na ombili yokomwenyo.

15. Omomikalo dhini Apollos naPaulus ya li ya faathana?

¹⁵ Hugunina, natu ka taleni shoka tatu vulu okwiilonga koshiholelwa shaApollos nosho wo shomuyapostoli Paulus. Aalumentu ayehe mboka yaali oya li ye shi nawa Omanyolo. Ayehe oya li ye shiwike nawa noya li aalongi ya pyokoka. Ayehe oya li wo ya kwathele aantu oyendji ya ninge aalongwa. Nonando ongawo, kapu na ngoka a li u uvite e vule mukwawo.

16. Apollos okwa li omulumentu e na omaukwatya geni?

¹⁶ Apollos okwa li ‘omvalele yaAleksandria,’ oshilongo shoka sha li ondingandinga yelongo methelemumvo lyotango. Okwa li enyakwa mokupopya ‘nokwa li e shi nawa Omanyolo.’ (Iil. 18:24) Sho Apollos a li muKorinto, ooitaali yamwe megongalo oya li yu ulike kutya oye mu hole shi vulithe aamwatate yalwe, mwa kwatelwa Paulus. (1 Kor. 1:12, 13) Mbela Apollos okwa li a tsu kumwe nooitaali mboka? Otashi vulika hasho. Sho nokuli Apollos a zi mo muKorinto, Paulus okwa li e mu ladhipike a galukile mo ishewe. (1 Kor. 16:12) Shoka andola Paulus ine shi ninga, ando okwa li e wete kutya Apollos ota topola egongalo. Osha yela kutya Apollos okwa li ha longitha omagano ge momukalo omuwanawa, ano mokuuvitha onkundana ombwanawa nomokutsa omukumo aamwahe. Otatu vulu wo okukala nuushili kutya Apollos okwa li omulumentu omwiifupipiki. Pashiholelwa, Ombiimbeli inayi popya nando kutya okwa li a geye sho Akula naPriskila ye “mu longo noku mu yelithila nawalela ondjila yaKalunga.”​—Iil. 18:24-28.

17. Paulus okwa li a humitha komeho ngiini ombili?

¹⁷ Omuyapostoli Paulus okwa li e shi iilonga iiwanawa mbyoka Apollos a longa. Ihe Paulus ka li a tila kutya aantu otaya ka dhiladhila kutya oku vulike kuApollos. Ngele otwa tala komayele ngoka Paulus a li a pe egongalo lyomuKorinto, oshi iwetikile kutya okwa li omwiifupipiki noku na ondjele. Ka li a panda sho yalwe ya li tayi ti kutya ‘oya gama kuPaulus.’ Pehala lyaashono okwa li u ukitha esimano kuJehova nokuJesus Kristus.​—1 Kor. 3:3-6.

18. Shi ikolelela kAakorinto yotango 4:6, 7, oshike tatu ilongo koshiholelwa shaApollos naPaulus?

¹⁸ Oshike tatu vulu okwiilonga koshiholelwa shaApollos naPaulus? Otashi vulika tu longele Jehova nuudhiginini notu kwathele aantu oyendji ya thike poshitsa shokuninginithwa. Ihe otu na okudhimbulukwa kutya ashihe shoka otwa vulu owala oku shi ninga kekwatho lyaJehova. Koshiholelwa shaApollos naPaulus otatu ilongo ko wo kutya ngele otwa kala tu na iinakugwanithwa yontumba megongalo, otatu ka pumbwa wo okulonga nuudhiginini tu humithe komeho ombili megongalo. Otwa pandula noonkondo sho aakuluntugongalo naayakuligongalo haye tu kwathele tu kale tu na ombili nayalwe. Shoka ohaye shi ningi, moku tu pa omayele ga kankamena kOmbiimbeli. Ihaya kambadhala okukala ya hala okutalika ko ya simana, ihe ohaya kwathele ayehe megongalo ya vulike kuJesus noya landule oshiholelwa she.​— Lesha 1 Aakorinto 4:6, 7.

19. Atuheni otatu vulu okuninga shike? (Tala wo oshimpungu “Yanda okukala wu na ombepo yethigathanopo.”)

¹⁹ Kehe gumwe gwomutse oku na owino nenge omagano gontumba. Otatu vulu okulongitha owino nenge omagano ngoka ‘tu kwathele ooyakwetu.’ (1 Pet. 4:10) Otashi vulika tu kale tu uvite kutya shoka hatu ningi inashi simana nenge itashi kwatha sha. Ihe dhimbulukwa kutya niinima iishona mbyoka to vulu okuninga, otayi vulu okukwathela egongalo li kale lya hangana noli kale li na ombili. Natu kale hatu longo nuudhiginini tu yande okukala nombepo yethigathanopo. Natu kale twa tokola toko tu ninge ngaashi tatu vulu tu humithe komeho ombili nuukumwe megongalo.​—Ef. 4:3.