1921 Pwa pita ngashingeyi omimvo ethele

OSHUNGOLANGELO 1 Januali 1921, oya li ya pula ya ti: “Mbela omumvo nguka otu na iilonga yini ye tu tegelela?” Oya yamukula epulo ndyoka mokutotha Jesaja 61:1, 2, ngoka a dhimbulukitha aamwatate naamwameme kutya oye na oshinakugwanithwa shokuuvitha. Enyolo ndyoka olya ti: “Ombepo yOmuwa Omupangeliawike oya lambele ndje, oshoka oye a gwayeke ndje, ndi uvithile oohepele onkundana ombwanawa . . . , ndi uvithe kutya ethimbo olya thikana, uuna Omuwa ta hupitha aantu ye nota dhenge aatondi yawo.”

AAUVITHI AALADHI

Opo Aakonakoni yOmbiimbeli ya gwanithe po oshinakugwanithwa shawo shokuuvitha, oya li taya ka pumbwa uulaadhi. Oya li ye na okuuvitha kombinga ‘yonkundana ombwanawa,’ nosho wo kombinga ‘yethimbo ndyoka uuna Omuwa ta ka dhenga aatondi ye.’

Omumwatate J. H. Hoskin, ngoka a li ha zi moKanada, okwa li u uvitha nuulaadhi nonando opwa li omapataneko. Mo 1921, okwa li a tsakanene nomusita gwontumba. Omumwatate Hoskin okwa lombwele omusita ngoka, a ti: “Otwa pumbwa okukundathana kombinga yOmbiimbeli kaapu na okugeya, nongele itatu tsu kumwe miinima yontumba, otashi ka kala nawa ngele otwa hulitha po oonkundathana dhetu momukalo gwombili tu li ookuume.” Ihe shoka hasho sha ningwa po. Omumwatate Hoskin okwa ti: “Konima owala sho twa kundathana uule wominute dhontumba, omusita ngoka okwa dhenge po omweelo gwegumbo lye, nonda li te dhiladhila kutya omahalasa gomweelo gwe otaga gumo e tagi idhenge pevi.”

Omusita ngoka okwa li i igidha a ti:“Omolwashike itoo ku uvithila mboka kaaye shi Aakriste?” Omumwatate Hoskin ka li e mu yamukula, nokwa yi. Sho ta yi okwa li ti ipopile ta ti: ‘Onda fa owala nda li tandi popi nomuntu ngoka kee shi Omukriste.’

Esiku lya landula ko, omusita ngoka okwa londodha aakwanegongalo ye kombinga yomumwatate Hosikin. Omumwatate Hoskin okwa ti: “Okwa li e ya lombwele kutya ngame omufundja ye mwenemwene nosho wo kutya onda pumbwa okudhipagwa.” Shoka kasha li she mu tilitha, ihe okwa tsikile owala nokuuvitha nokwa li a mono iizemo iiwanawa. Okwa ti: “Onda kala ndi hole noonkondo okuuvithila moshitopolwa shoka. Yamwe oya li nokuli ya lombwele ndje ya ti, ‘Otu shi kutya ngoye omulongeli gwaKalunga shili!’ noya pula ndje ngele onda pumbwa ekwatho lyasha.”

OKUKONAKONA OMBIIMBELI PAUMWENE NOSHO WO NUUKWANEGUMBO

Opo ya kwathele mboka ye na ohokwe ya ninge ehumokomeho, Aakonakoni yOmbiimbeli oya li haya longekidha omapulo gontumba moshifo The Golden Age.a Opwa li wo hapu longekidhwa omapulo gaagundjuka, ngoka aavali ya li haya vulu okulongitha uuna taya konakona nayo. Aavali oya li ye na “okupula oyana omapulo ngoka noku ya kwathela ya konge omayamukulo okuza mOmbiimbeli.” Omapulo ngaashi, “Ombiimbeli oyi na omambo gangapi?,” oga li haga kwathele aagundjuka yi ilonge oshili yopetameko. Omapulo galwe ngaashi, “Mbela Aakriste ayehe oye na okwiilongekidha okutaalela omapataneko gontumba?,” oga li haga kwathele aagundjuka ya kale aauvithi aalaadhi.

Opwa li wo hapu longekidhwa omapulo gaamboka ye shi nale oshili yOmbiimbeli, nomayamukulo gomapulo ngoka oga li haga adhika membo lyotango lyedhina Studies in the Scriptures. Aaleshi yetu omayovi oya li haya mono mo uuwanawa momapulo ngoka, ihe oshifo The Golden Age sho 21 Desemba 1921, osha li sha tseyitha kutya omapulo ngoka itaga longekidhwa we. Omolwashike mbela?

EMBO EPE!

Embo The Harp of God

Okakalata ka nyolwa uuyelele

Uukalata wa nyolwa omapulo

Aamwatate mboka taya kwatele komeho oya ndhindhilike kutya aantu oya pumbwa okwiilonga oshili yOmbiimbeli kashonanakashona. Onkene opwa nyanyangidhwa embo The Harp of God, ndyoka lya piti muNovomba 1921. Mboka ya li ya pewa embo ndyoka oya li wo haya pewa uuyelele mboka taya vulu okukonakona kuyo yene. Uuyelele mboka owa li hawu kwathele aaleshi ya mone nkene “Kalunga ta ka yambeka aantu noku ya pa omwenyo gwaaluhe.” Mbela osha li hashi ende ngiini?

Uuna omuntu a taamba ko embo ndyoka, okwa li wo ha pewa okakalata ke na uuyelele mboka e na oku ka lesha. Ngele pwa piti oshiwike shimwe, okwa li ha tuminwa ishewe okakalata kamwe hoka ke na omapulo ga kankamena kuuyelele mboka a lesha. Okakalata hoka oka li wo haka kala ke na uuyelele mboka omuntu e na okulesha oshikando tashi landula.

Omuntu okwa li ha tuminwa okakalata uule wiiwike 12 kegongalo ndyoka li li popepi naye. Olundji uukalata mboka owa li hawu tumwa kaakokele nenge kwaamboka ihaaya vulu okuza mo megumbo. Pashiholelwa, omumwameme Anna K. Gardner, ngoka a za koMillvale, Pennsylvania, moAmerika, okwa ti: “Sho embo The Harp of God lya piti, olye tu kwathele tse nomumwamemekadhona, Thayle, ngoka ihaa vulu okweenda, tu kale twi ipyakidhila kehe oshiwike nokutuma uukalata mboka wu na omapulo.” Uuna omuntu a mana ko uukalata awuhe, okwa li ha talelwa po, opo a tsikile okukonakona Ombiimbeli.

IILONGA MBYOKA YI LI KOMEHO

Pehulilo lyomumvo, Omumwatate J. F. Rutherford okwa tumine omagongalo agehe ontumwafo. Montumwafo ndjoka okwa nyola a ti:“Omumvo nguka otu uvitha notwa kwathela aantu oyendji ya tseye oshili shi vulithe omimvo adhihe dha ka pita.” Opo nduno okwa gwedha ko a ti: “Natango opu na iilonga oyindji ye tu tegelela. Ladhipikeni yalwe ye tu wayimine miilonga yaJehova.” Aakonakoni yOmbiimbeli oya li ya tula miilonga omayele ngoka. Mo 1922 oya li yu uvitha kombinga yUukwaniilwa nuulaadhi inaashi monika nando onale.

Ookuume aalaadhi

Aakonakoni yOmbiimbeli oya li haya ulukilathana ohole yuumwayinathana mokukwathelathana. Oya li ookuume aalaadhi mboka haya ‘kwathelathana moluhepo,’ ngaashi oshimoniwa tashi landula tashi ke shi ulika. — Omayel. 17:17.

MEtiyali, 31 Mei 1921, esiku ndyoka lya ka kala hali ithanwa Tulsa Race Massacre, mOklahoma, moAmerika, omulumentu gumwe omuluudhe okwa li a kwatwa po konima sho a dhenge omukulukadhi oshilumbu. Sho ongundu yaalumentu iilumbu 1 000 ya tameke okukondja nongundu yaalumentu aaluudhe, olugodhi olwa yi sigo okolukanda halu ithanwa Greenwood, hoka omagumbo noongeshefa dhi vulithe 1 400 dha tewa nokufikwa po. Molugodhi ndwoka omwa sile aantu 36, ihe otashi vulika ye vulithe po mpoka.

Omumwatate omuluudhe gwedhina Richard J. Hill, ngoka ha zi moGreenwood, okwa ti: “Uusiku mboka aantu ya li taya kondjo, otwa li tu na okugongala ngaashi shito. Konima sho okugongala kwa piti mo, otu uvu oondjembo tadhi umbwa lwokondoolopa. Naasho twa ka lala odha tsikile owala.” Okupendukila Etitatu, 1 Juni, onkalo oya li ya nayipala noonkondo. Okwa gwedha ko a ti: “Aantu yamwe oye tu lombwele kutya ngele otwa hala okwiigamena, otwa pumbwa okuya kOshinyanga shokuningila iigongi mbalambala.” Onkene omumwatate Hill pamwe nomukadhi noyana yatano oye endelele ya ye kOshinyanga shoka. KOshinyanga hoka oya adha ko aalumentu naakiintu 3 000 ya gamenwa kaapolisi mboka yi ithanwa ya kaleke po ombili moshitopolwa shoka.

Pethimbo opo tuu mpoka, Omumwatate Arthur Claus, ngoka a li oshilumbu, okwa ningi etokolo ndyoka lyu ulike kutya omulaadhi. Okwa ti: “Sho ndu uvu shoka sha ningwa moGreenwood, onda tokola ndi ye ko ndi ka tale kutya kuume kandje Hill oku li po ngiini.”

Omumwatate Arthur Claus, ta longo aagundjuka ye li 14, membo The Harp of God

Sho a thiki pegumbo lyOmumwatate Hill, okwa mono omushiinda shawo e na ondjembo. Omulumentu ngoka e li wo kuume kOmumwatate Hill okwa li e shi ngele Omumwatate Arthur oku li gumwe gwomaalumentu mboka taya ponokele aaluudhe, nokwe mu igidha a ti: “Oto kongo shike pegumbo ndyono?”

Omumwatate Arthur okwa ti: “Andola kanda li nde mu yelithile kutya otandi kongo shike, ando okwa yaha ndje. Onde mu yelithile kutya Omumwatate Hill okuume kandje nohandi ya paandjawo olundji.” Omumwatate Arthur nomulumentu ngoka oya li ya gamene egumbo lyOmumwatate Hill kaali tewe nenge li fikwe po.

Konima yaashono, Arthur okwa mono kutya Omumwatate Hill noyaandjawo oye li kOshinyanga shokuningila iigongi. Okwa lombwelwa wo kutya, opo omuluudhe a pitikwe a ze mo mOshinyanga shoka, okwa pumbwa okupewa epitikilo komukuluntu gwopolisi yomoshitopolwa shoka, gwedhina Barrett. Omumwatate Arthur okwa ti: “Osha li oshidhigu okupopya nomulumentu ngoka. Sho nde mu lombwele shoka nda hala okwa pula ndje a ti: ‘Ngele uukwanegumbo mboka otwe wu etha wu shune kegumbo, oto ka vula ngaa oku wu gamena noku wu sila oshimpwiyu?’ Onde mu yamukula kutya eeno.”

Sho a pewa ombapila yepitikilo, Omumwatate Arthur okwa yi nziya Koshinyanga shoka. Ombapila ndjoka okwa yi pe omupolisi, ngoka e mu lombwele a ti: “Oshe ende ngiini wu pewe ombapila ndjika komukuluntu gwopolisi? Owu shi ngaa kutya ongoye gwotango to ile ko omuntu huka?” Nziya konima yaashono, Omumwatate Hill noyaandjawo oya monika. Ayehe oya londo mohauto yOmumwatate Arthur noya yi kegumbo.

Omumwatate Claus okwa li a shilipaleke kutya Omumwatate Hill nuukwanegumbo we oya gamenwa. Oshiholelwa she shuulaadhi osha kumitha oyendji. Omumwatate Arthur okwa ti: “Omushiinda ngoka a li a kwathele mokugamena egumbo lyOmumwatate Hill, lwanima okwa kala a simaneka noonkondo Oonzapo dhaJehova. Aantu oyendji oya tameke wo okuulika ohokwe metumwalaka lyUukwaniilwa sho ya mono kutya otu na uumwayinathana wopahole nosho wo kutya ohatu longele Kalunga twa hangana.”

a Mo 1937, oshifo The Golden Age osha li sha lukululwa Consolation, e tashi lukululwa ishewe Awake! mo 1946.