Kapu na ngoka ha dhimine po ngaashi Jehova

1. Ngaashi sha popiwa mOmuuvithi 7:20, omukwaniilwa Salomo okwa popi oshili yini?

OMUKWANIILWA Salomo okwa nyola a ti: “Kombanda yevi kaku na omuyuuki ngoka ta longo uuwanawa auhe ihe ita yono.” (Omuuv. 7:20) Shoka oshoshili lela! Atuheni aalunde. (1 Joh. 1:8) Onkee otwa pumbwa okukala hatu dhiminwa po kuKalunga nokaantu ooyakwetu.

2. Oho kala wu uvite ngiini ngele kuume koye kopothingo okwe ku dhimine po?

² Mbela oto dhimbulukwa oshikando shimwe wa li wu uvitha nayi kuume koye kopothingo. Owa li wa hala okwoopaleka epuko lyoye nokukala ishewe wu na ekwatathano naye, onkee owe mu pe ombili tashi zi lela komutima. Owa li wu uvite ngiini sho kuume koye e ku dhimine po? Mbela owa li wu uvite wa pepelelwa? Eeno, nowu na okukala wa li wa nyanyukwa!

3. Oshike tatu ka kundathana moshitopolwa shika?

³ Otwa hala Jehova a kale Kuume ketu kopothingo, ihe omathimbo gamwe ohatu popi nenge tu ninge iinima mbyoka hayi mu uvitha nayi. Nonando ongawo, omolwashike tatu vulu okukala nuushili kutya Jehova oha kala a hala oku tu dhimina po? Eyooloko lini li li pokati kokudhimina po kwaJehova nokudhimina po kwetu? Nolwahugunina, Jehova oha dhimine po oolye?

JEHOVA OKWI ILONGEKIDHA OKU TU DHIMINA PO

4. Omolwashike tatu vulu okukala nuushili kutya Jehova okwi ilongekidha oku tu dhimina po?

⁴ Jehova ote tu shilipaleke mOohapu dhe kutya okwi ilongekidha oku tu dhimina po. Okwa li i ipopi puMoses kutya oye lye okupitila momuyengeli a ti: “Ongame Omuwa, ongame Kalunga omunamutimahenda, omunalukeno nomutalanteni, ihandi geye mbala nondu udha esilohenda nuudhiginini. Ohandi dhiginine ohole yandje koluvalo lwomayuvi note dhimi po uukolokoshi omayono noondjo.” (Eks. 34:6, 7) Eeno shili, Jehova oKalunga omunambili nomunahenda, noha kala aluhe i ilongekidha okudhimina po aayoni mboka yi iyela ombedhi. — Neh. 9:17; Eps. 86:15.

5. Molwaashoka Jehova oku tu shi nawa, ohashi mu inyengitha a ninge shike ngaashi sha popiwa mEpisalomi 103:13, 14?

⁵ E li Omushiti gwetu, Jehova oku shi kehe shimwe kombinga yetu. Oshikumithi lela sho tu shi kutya oku shi okanima kehe kombinga yomuntu kehe kombanda yevi. (Eps. 139:15-17) Onkee ano, oha kala e wete okwaagwanenena hoka twa thigulula kaavali yetu. Shimwe ishewe, oku shi oonkalo adhihe moka twe enda, ndhoka dhe tu ningitha tu kale tu na omaukwatya gontumba. Molwaashoka Jehova oku tu shi nawa, ohashi mu inyengitha a ninge shike? Ohashi mu inyengitha e tu sile ohenda. — Eps. 78:39; lesha Episalomi 103:13, 14.

6. Jehova oku ulike ngiini kutya okwa halelela oku tu dhimina po?

⁶ Jehova okwe shi ulika kutya okwa halelela oku tu dhimina po. Oku shi kutya molwaashoka omuntu gwotango, Adam, okwa yono, atuhe aalunde nohatu si. (Rom. 5:12) Aantu kaya li taya vulu okuninga po sha yi imangulule muulunde nenge ya mangulule mo yalwe. (Eps. 49:7-9) Ihe Kalunga ketu omunahole oku ulike kutya ye omunahenda e ta ningi po sha, opo e tu mangulule. Okwa ningi po shike? Ngaashi tashi popiwa muJohannes 3:16, Jehova okwa tumu Omwana awike a se pehala lyetu. (Mat. 20:28; Rom. 5:19) Jesus okwa si pehala lyetu, opo a mangulule muulunde kehe ngoka te mu itaale. (Heb. 2:9) Kasha li tuu sha ehameke Jehova sho a mono Omwana omuholike ta si eso tali uvitha omwenyo omutoye lyo otali sitha ohoni! Osha yela kutya Jehova kali ta vulu okupitika Omwana a se, ngele andola ka li A hala oku tu dhimina po.

7. Aantu yamwe yeni ya popiwa mOmbiimbeli ya li ya dhiminwa po kuJehova?

⁷ MOmbiimbeli omu na iiholelwa oyindji yaantu mboka ya li ya dhiminwa po kuJehova. (Ef. 4:32) Olye heya momadhiladhilo goye? Otashi vulika omukwaniilwa Manasse. Omulumentu ngoka omukolokoshi okwa li a yono nayi kuJehova momikalo odhindji. Okwa li a longele iikalunga e ta ladhipike yalwe ye shi ninge. Okwa dhipaga oyana, e taya gandja po omafikilondjambo kiikalunga. Okwa li wo nokuli a tula oshihongwathano shoshikalunga motempeli yaJehova ondjapuki. Ombiimbeli otayi mu popi tayi ti: “Okwa yono nayi kOmuwa e ta tukulutha ondjahi ye.” (2 Ondjal. 33:2-7) Ihe sho Manasse i itedhulula shili, Jehova okwe mu dhimine po. Okwa li ishewe e mu galulile ondondo ye yuukwaniilwa. (2 Ondjal. 33:12, 13) Otashi vulika wo wu dhiladhile kombinga yomukwaniilwa David, ngoka a li a yono omayono ga kwata miiti, ngaashi oluhondelo nedhipago. Ihe sho David i iyele shili ombedhi e ta zimine omayono ge, Jehova okwe mu dhimine po. (2 Sam. 12:9, 10, 13, 14) Eeno, otatu vulu okukala nuushili kutya Jehova oha kala a halelela oku tu dhimina po. Ngaashi wo tatu ke shi mona, okudhimina po kwe okwa yooloka ko kokudhimina po kwaantu.

JEHOVA OHA DHIMINE PO AANTU MOMUKALO GWI IKALEKELWA

8. Molwaashoka Jehova Omupanguli i ikalekelwa, ohashi mu kwathele ngiini a dhimine po aantu?

⁸ Jehova “Omupanguli guuyuni auhe.” (Gen. 18:25) Omupanguli omwaanawa okwa pumbwa okukala e shi nawa ompango. Jehova naye osho e li ngaaka, molwaashoka nonando oye Omupanguli gwetu, oye wo Omugandjimpango gwetu. (Jes. 33:22) Kapu na omuntu e shi nawa lela shoka shi li mondjila nenge sha puka ngaashi Jehova. Omupanguli omwaanawa okwa pumbwa ishewe okukala e li ngiini? Okwa pumbwa okukala ha vulu okutala kuuyelele awuhe mboka wa kwatelwa mo moshinima shontumba manga inaa ninga etokolo. Onkee Jehova oye Omupanguli a shiga ko, molwaashoka oha kala e shi uuyelele awuhe mboka wa kwatelwa mo.

9. Jehova oha tala kuuyelele wuni uuna ta tokola ngele ota dhimine po omuntu nenge hasho?

⁹ Jehova ina fa aapanguli yopantu, molwaashoka oha kala e shi uuyelele awuhe mboka wa kwatelwa mo monkalo yontumba. (Gen. 18:20, 21; Eps. 90:8) Iha tala owala kwaashoka aantu ye wete nenge haya uvu. Oku shi thiluthilu kutya omuntu gwontumba oha ningi iinima ta nwethwa mo kuukwatya we nenge kiikala mbyoka a thigulula kaavali ye, kelongo lye, moshitopolwa moka e li nosho wo komaiyuvo nokomadhiladhilo ge. Jehova oha lesha wo omitima. Oha kala e shi omainyengotompelo gomuntu kehe, omalalakano ge, nomahalo ge. Kapu na shoka tashi vulu okuholekwa Jehova. (Heb. 4:13) Onkee ano, uuna Jehova ta dhimine po omuntu, ohe shi ningi shi ikolelela kuuyelele awuhe mboka wa kwatelwa mo monkalo yontumba.

10. Omolwashike tatu vulu okutya Jehova oha pangula aantu pauyuuki? (Deuteronomium 32:4)

¹⁰ Jehova oha pangula aantu pauyuuki. Ke na nandonando okatongo. Iha dhimine po omuntu molwaashoka e na ondjelo ombwanawa, omuyamba, e na ondondo yopombanda nenge molwaashoka e na iipewa oyindji. (1 Sam. 16:7; Jak. 2:1-4) Kapu na omuntu ta vulu okuthiminika Jehova nenge e mu pe ombumbo e mu dhimine po. (2 Ondjal. 19:7) Iha ningi nando omatokolo shi ikolelela komaiyuvo ge. (Eks. 34:7) Onkee ano, Jehova oye omupanguli omwaanawa a shiga ko, molwaashoka oha kala e shi kehe shimwe kombinga yetu nosho wo oonkalo dhetu. — Lesha Deuteronomium 32:4.

11. Omukalo moka Jehova he tu dhimine po ogwa yooloka ko ngiini kwaangoka aantu haya dhiminathana po?

¹¹ Aanyoli yOmanyolo gOshihebeli oye shi ndhindhilika kutya Jehova oha dhimine po aantu momukalo gwi ikalekelwa. Poompito dhimwe, oya longitha oshitya shOshihebeli shoka embo limwe lyuuyelele lye shi popi kutya “osha longithwa owala sha ukithwa komukalo moka Jehova ha dhimine po aalunde. Oshitya shoka itashi popi nando omukalo moka aantu haya dhiminathana po.” Jehova oye owala e na oonkondo dhokudhimina po thiluthilu omuyoni ngoka i iyela ombedhi. Oshizemo ohashi kala shini ngele Jehova e tu dhimine po?

12-13. (a) Uuwanawa wuni omuntu ha mono ngele okwa dhiminwa po kuJehova? (b) Uuwanawa mboka ohawu kala po sigo uunake?

¹² Ngele otwe shi taamba ko kutya Jehova okwe tu dhimina po, ohashi tu ‘hekeleke’ nohatu kala tu na ombili yopamadhiladhilo neiyuvo lya yela. Ohatu kala owala tu uvite ngawo, ngele ‘Kalunga oye’ e tu dhimine po. (Iil. 3:19) Uuna Jehova e tu dhimine po, ohe tu pitike tu ninge ookuume ke ishewe twa fa mboka inaatu yona kuye.

¹³ Ngele Jehova okwe tu dhimine po, iha kala we te tu pe ombedhi nenge e tu geele ishewe omolweyono lyetu. (Jes. 43:25; Jer. 31:34) Oha kaleke oondjo dhetu kokule natse “ngaashi uuzilo u li kokule nuuninginino.”b (Eps. 103:12) Uuna hatu dhiladhila kunkene Jehova he tu dhimine po, ohatu kala twe mu pandula notwe mu simaneka. (Eps. 130:4) Ihe Jehova oha dhimine po oolye?

OOLYE HAYA DHIMINWA PO KUJEHOVA?

14. Sigo oompaka, otwi ilongo shike kombinga yankene Jehova ha tokola a dhimine po omuntu?

¹⁴ Ngaashi twe shi ilongo, Jehova iha dhimine po omuntu shi ikolelela keyono lye kutya enene nenge eshona. Shimwe ishewe, otwi ilongo kutya Jehova oha longitha owino ye e li Omushiti gwetu, Omugandjimpango nOmupanguli uuna ta tokola ngele ota dhimine po omuntu. Okiinima yini Jehova ha tala?

15. Shi ikolelela kuLukas 12:47, 48, Jehova oha tala koshinima shimwe shini?

¹⁵ Oshinima shimwe shoka Jehova ha tala kusho, osho ngele omuyoni okwa li e shi kutya ngele shoka ta ningi osha puka. Jesus okwe shi popi sha yela muLukas 12:47, 48 (Lesha.) Omuntu ngono ha ningi ompangela a ninge oshinima oshiwinayi owina noku shi lela kutya Jehova oku shi tonde, oku li moshiponga shokukala inaa dhiminwa po. (Mark. 3:29; Joh. 9:41) Ihe otu na oku shi zimina kutya omathimbo gamwe ohatu kala tu shi kutya shoka twa ninga osha puka. Ihe mbela otatu vulu ngaa okukala tu na etegameno kutya Jehova ote tu dhimine po? Eeno, naashika otashi tu eta poshitsa oshikwawo kutya Jehova oha tala kushike.

16. Okwiitedhulula oshike, nomolwashike kwa simana opo tu dhiminwe po kuJehova?

¹⁶ Oshinima shimwe shoka Jehova ha tala kusho, osho ngele omuyoni okwi iyela shili ombedhi. Okwiitedhulula oshike? Omuntu ngele okwi itedhulula ‘oha lundulula okudhiladhila kwe, iikala, nenge elalakano lye.’ Okwa kwatela mo okwiipa ombedhi nokukala e uvitile nayi noonkondo iinima iiwinayi mbyoka a ninga nenge sho inaa ninga shoka shi li mondjila. Omuntu ngoka i itedhulula iha kala owala e uvitile nayi iinima iiwinayi mbyoka a ninga, ihe oha kala wo e uvite nayi sho ekwatathano lye naJehova lya nkundipala, shoka mu ningitha a yone. Omukwaniilwa Manasse nosho wo David oya li ya yono omayono ga kwata miiti, ihe Jehova okwa li e ya dhimine po molwaashoka oya li yi iyela shili ombedhi. (1 Aak. 14:8) Jehova oku na okumona uumbangi mboka tawu ulike kutya omuntu okwi iyela shili ombedhi opo e mu dhimine po. Ihe inashi gwana owala okukala tu uvitile nayi omayono getu ngoka twa ninga. Otu na okukala twi ilongekidha okukatuka onkatu.c Naashoka otashi tu eta poshitsa shetu oshikwawo shoka Jehova ha tala kusho.

17. Eigaluluko oshike, nomolwashike lya simana ngele otwa hala okuyanda okweendulula omayono getu? (Jesaja 55:7)

¹⁷ Oshinima shilwe sha simana shoka Jehova ha tala kusho, eigaluluko. Eigaluluko oshike? ‘Okugalukila kuJehova.’ Niitya yimwe, omuntu oha lundulula eihumbato lye ewinayi e ta kala ha ningi shoka Jehova a hala aantu ya ninge. (Lesha Jesaja 55:7.) Omuntu ngoka oku na okulundulula omadhiladhilo ge, opo a kale ta wilikwa komadhiladhilo gaJehova. (Rom. 12:2; Ef. 4:23) Oku na wo okukala a tokola toko okweetha po omadhiladhilo ge omawinayi neihumbato lye ewinayi. (Kol. 3:7-10) Uushili owo kutya eitaalo lyetu mekuliloyambo lyaKristus olyo hali tu ningitha tu dhiminwe po kuJehova noku tu yoge omayono getu. Jehova ote ke tu dhimina po shi ikolelela kekuliloyambo, ngele okwa mono kutya otatu ningi oonkambadhala dha mana mo tu lundulule eihumbato lyetu ewinayi. — 1 Joh. 1:7.

KALA WU NA EINEKELO KUTYA JEHOVA OTE KU DHIMINE PO

18. Iinima yini twa konakona kombinga yokudhimina po kwaJehova?

¹⁸ Natu ka taleni paufupi iitsa yimwe ya simana mbyoka twa kundathaneni. Jehova oye owala ha dhimine aantu momukalo gwa dhenga mbanda meshito alihe. Omolwashike tatu tile ngawo? Shotango, oha kala aluhe i ilongekidha oku tu dhimina po. Oshitiyali, oku tu shi nawanawa. Oku shi kutya otu li ngiini, noha vulu wo okumona lela ngele otwi itedhulula shili. Oshititatu, uuna Jehova te tu dhimine po, ohatu kala twa fa inaa tu yona sha kuye. Shika ohashi tu ningitha tu kale tu na eiyuvo lya yela nokukala twa hokiwa kuye.

19. Nonando inatu gwanenena nohatu tsikile okuyona, omolwashike tatu vulu okukala twa nyanyukwa?

¹⁹ Odhoshili kutya molwaashoka inatu gwanenena, otatu ka tsikila aluhe okuyona. Ihe nonando ongawo, oohapu dhimwe dhomembo Insight on the Scriptures, Volume 2, epandja 771, otadhi vulu oku tu hekeleka. Otadhi ti: “Jehova omunahenda noku shi kutya aapiya ye aankundi, onkee inaya pumbwa okukala aluhe ya yemata omolwomapuko ngoka ya ninga omolwokwaagwanenena hoka ya thigulula. (Eps. 103:8-14; 130:3) Ngele ohatu ningi ngaashi tatu vulu tu kale metsokumwe nehalo lyaKalunga, otatu ka kala twa nyanyukwa. (Fil. 4:4-6; 1 Joh. 3:19-22).” Shoka itashi tu tsu tuu omukumo!

20. Oshike tatu ka kundathana moshitopolwa tashi landula?

²⁰ Otwa pandula noonkondo sho Jehova i ilongekidha aluhe oku tu dhimina po ngele otu uvitile nayi shili omayono getu ngoka twa ninga. Ihe ongiini nduno tatu vulu okuholela okudhimina po kwaJehova? Omomikalo dhini okudhimina po kwetu kwa faathana nokudhimina po kwaJehova, ihe opu na eyooloko lini? Omolwashike sha simana okukala tu shi eyooloko ndyoka? Oshitopolwa tashi landula ko otashi ka yamukula omapulo ngoka.