Nkene Jehova ha yamukula omagalikano getu

1-2. Omolwashike hatu kala tu na omaipulo, ngele tashi ya pomagalikano getu?

MBELA owi ipulile nale ngele Jehova oha yamukula omagalikano goye? Ngele osho, hangoye awike. Aamwameme naamwatate oyendji oyi ipula ngele Jehova oha yamukula ngaa omagalikano gawo, unene tuu sho ye li muudhigu. Ngele otatu mono iihuna, natse otashi vulika tu shi mone oshidhigu okumona nkene Jehova ta yamukula omagalikano getu.

² Natu ka taleni kutya omolwashike tatu vulu okukala tu na uushili kutya Jehova oha yamukula omagalikano gaalongeli ye. (1 Joh. 5:15) Otatu ka tala wo komapulo ngaka: Omolwashike omathimbo gamwe Jehova ha monika a fa itaa yamukula omagalikano getu? Omomikalo dhini Jehova ha yamukula omagalikano kunena?

JEHOVA OTASHI VULIKA KAA YAMUKULE OMAGALIKANO GETU MOMUKALO MOKA TWA LI TWA TEGELELA

3. Omolwashike Jehova a hala tu galikane kuye?

³ Omanyolo otage tu shilipaleke kutya Jehova oku tu hole noonkondo nosho wo kutya otu na ongushu kuye. (Hag. 2:7; 1 Joh. 4:10) Nomolwaashono he tu hiya tu mu pule ekwatho megalikano. (1 Pet. 5:6, 7) Okwa hala oku tu kwathela tu kale popepyeelela naye notu ungaunge nomupondo nomaupyakadhi getu.

4. Otu shi shi ngiini kutya Jehova oha yamukula omagalikano gaalongeli ye? (Tala wo ethano.)

⁴ MOmbiimbeli olundji ohatu lesha mo kombinga ya nkene Jehova a yamukula omagalikano gaalongeli ye. Mbela oshiholelwa shini to dhimbulukwa po? Ongiini kombinga yomukwaniilwa David? Okwa li e na aatondi oyendji ya nika oshiponga momukokomoko gwonkalamwenyo ye nolundji okwa li i indile Jehova nomutima aguhe e mu kwathele. Pompito yimwe, okwa li a indile Jehova a ti: “Omuwa, uva egalikano lyandje, pulakena, sho tandi ku kugile ekwatho. Ila, u kwathe ndje omoluudhiginini nuuyuuki woye.” (Eps. 143:1) Jehova okwa yamukula egalikano lyaDavid lyoku mu hupitha. (1 Sam. 19:10, 18-20; 2 Sam. 5:17-25) David okwa li a vulu okupopya nomukumo ta ti: “Omuwa oku li popepi naayehe mboka taye mu ithana.” Natse otatu vulu okukala tu na uushili mboka. — Eps. 145:18.

5. Omagalikano gaalongeli yaJehova yomonakuziwa oga li ngaa aluhe haga yamukulwa momukalo ngono ya li ya tegelela? Gandja oshiholelwa. (Tala wo ethano.)

⁵ Jehova otashi vulika kaa yamukule omagalikano getu momukalo moka twa li twa tegelela. Shoka osho sha li sha ningilwa omuyapostoli Paulus. Okwa li a pula Kalunga e mu kuthe “uuwehame uunene wopalutu.” Iikando ayihe itatu Paulus okwa li a galikana kondandalunde kombinga yuupyakadhi mboka. Jehova okwa li ngaa a yamukula omagalikano ge? Eeno, ihe hamomukalo moka Paulus a li a tegelela. Pehala lyokukutha po uupyakadhi we, Jehova okwe mu pe oonkondo ndhoka a pumbwa opo a tsikile oku mu longela nuudhiginini. — 2 Kor. 12:7-10.

6. Omathimbo gamwe, omolwashike tashi vulika tu kale tu wete Jehova a fa itaa yamukula omagalikano getu?

⁶ Natse omathimbo gamwe ohatu kala tu wete kutya Jehova iha yamukula omagalikano getu momukalo moka twa li twa tegelela. Otatu vulu okukala nuushili kutya oku shi lela nkene ta vulu oku tu kwathela. Ota vulu ‘okulonga oshindji shi vule pwaashoka tatu shi indile nenge tatu shi dhiladhila.’ (Ef. 3:20) Omolwetompelo ndyoka, omayamukulo ge komagalikano getu otashi vulika ge ye pethimbo ndyoka twa li inaatu tegelela nenge e ga yamukule momukalo moka twa li inaatu tegelela.

7. Omolwashike tashi vulika tu kale twa pumbwa okugalikana kombinga yoshinima shilwe? Gandja oshiholelwa.

⁷ Omathimbo gamwe otashi vulika tu kale twa pumbwa okugalikana kombinga yoshinima shilwe, uuna twa mono kutya ehalo lyaJehova olini lelalela. Tala koshiholelwa shomumwatate Martin Poetzinger. Nziya konima sho a hokana, omumwatate Poetzinger okwa li a tulwa mondholongo mokamba yimwe yoonkwatwa yaNazi. Petameko, okwa li a pula Jehova e mu mangulule mo mokamba ndjoka, opo a ka vule okusila oshimpwiyu omukulukadhi gwe nokutameka ishewe iilonga yokuuvitha. Ihe konima yiiwike iyali, ka li nando a mono shoka tashi ulike kutya Jehova okwa li te ke mu mangulula. Onkee okwa tameke okugalikana ta ti: “Jehova, kwathela ndje wu ulukile ndje kutya owa hala ndi ninge shike.” Opo nduno okwa tameke okudhiladhila kombinga yonkalo moka aamwatate yalwe ye li, mokamba ndjoka. Oyendji yomuyo oya li lela ye na omaipulo kombinga yaakulukadhi naanona yawo. Opo nduno omumwatate Poetzinger okwa galikana a ti: “Jehova, tangi sho wa pe ndje oshinakugwanithwa shika oshipe. Kwathela ndje ndi nkondopaleke nokutsa omukumo aamwatate.” Omumwatate Poetzinger okwa li a kala omimvo omugoyi mokamba ndjoka, ta ningi naanaa ngaaka.

8. Iinima yini ya simana tu na okukaleka momadhiladhilo, uuna tatu galikana?

⁸ Otu na okudhimbulukwa kutya Jehova oku na elalakano note ke li gwanitha po pethimbo ndyoka a tula po. Elalakano ndyoka olya kwatela mo okuhulitha po thiluthilu omaupyakadhi ngoka hage tu monitha iihuna kunena, ngaashi iiponga yopaunshitwe, uuwehame neso. Jehova ota ka gwanitha po elalakano ndyoka okupitila mUukwaniilwa we. (Dan. 2:44; Eh. 21:3, 4) Nonando ongawo, sigo opethimbo ndyoka, Jehova okwa etha Satana a pangele uuyuni.b (Joh. 12:31; Eh. 12:9) Ando Jehova okwa hulithile po omaupyakadhi gaantu ngashingeyi, ando osha kala sha fa Satana ta pangele nawa uuyuni. Onkee manga twa tegelela euvaneko ndyoka li gwanithwe, shono itashi ti kutya Jehova ite tu kwathele ngashingeyi. Natu ka taleni komikalo dhontumba moka Jehova he tu kwathele.

OMIKALO MOKA JEHOVA HA YAMUKULA OMAGALIKANO KUNENA

9. Jehova ota vulu ngiini oku tu kwathela, uuna twa pumbwa okuninga omatokolo? Shi thaneka.

⁹ Oha gandja owino. Jehova okwe tu uvanekele kutya ote tu pe owino ndjoka twa pumbwa tu ninge omatokolo omawanawa. Ohatu kala unene twa pumbwa owino yopakalunga, uuna tatu ningi omatokolo ngoka taga ka guma onkalamwenyo yetu ayihe, ngaashi okukala inaatu ya mondjokana nenge okuya mo. (Jak. 1:5) Tala koshimoniwa shomumwameme gumwe inaa hokanwa, gwedhina Maria.c Okwa li ta longo e li omukokolindjila gwondjigilile a nyanyukwa, sho a monathana nomumwatate gumwe. Okwa ti: “Sho uukuume wetu wa koko, otwa tameke okukala twa hokwathana. Onda li ndi shi kutya onda pumbwa okuninga etokolo. Onda galikana olundji kombinga yoshinima shoka. Onda li nda pumbwa ewiliko lyaJehova, ihe onda li wo ndi shi kutya Jehova ita ningile ndje etokolo.” Maria oku uvite kutya Jehova okwa yamukula omagalikano ge goku mu pa owino. Ngiini mbela? Sho a ningi omapekapeko miileshomwa yetu, okwa li a vulu okumona iitopolwa yokondandalunde mbyoka ye mu kwathele a mone omayamukulo gomapulo ge ngoka a li e na. Okwa pulakene wo komayele gopandunge gayina omudhiginini. Omayele ngono oga kwathele Maria a talulule omaiyuvo ge. Pehulilo, okwa li a vulu okuninga etokolo li li pandunge.

10. Shi ikolelela kAafilippi 4:13, Jehova ota ka ninga shike, opo a kwathele aalongeli ye? Gandja oshiholelwa. (Tala wo ethano.)

¹⁰ Ohe tu pe oonkondo tu idhidhimike. Ngaashi a li e shi ningile omuyapostoli Paulus, Jehova ote ke tu pa oonkondo ndhoka twa pumbwa tu idhidhimikile omamakelo. (Lesha Aafilippi 4:13, yelekanitha NW.) Tala nkene Jehova a li a kwathele omumwatate Benjamin i idhidhimikile oonkalo oondhigu. Ethimbo olindji lyuugundjuka we, Benjamin noyaandjawo, oya li ya kala mookamba dhoontauki muAfrika. Benjamin okwa ti: “Onda li handi galikana aluhe kuJehova, tandi mu pula a pe ndje oonkondo ndi ninge shoka she mu opalela. Jehova okwa li a yamukula omagalikano gandje, sho a pe ndje ombili yopamadhiladhilo, uulaadhi ndi tsikile okuuvitha nosho wo iileshomwa mbyoka ya kwathele ndje ndi kale popepi naye.” Okwa tsikile ko a ti: “Okulesha iimoniwa yaamwatate naamwameme nokutseya nkene Jehova a li e ya kwathele yi idhidhimike, osha kwathele ndje ndi kale nda tokola toko okukala omudhiginini.”

11-12. Jehova ohashi vulika a longithe ngiini aamwatate naamwameme a yamukule omagalikano getu? (Tala wo ethano.)

¹¹ Oha longitha aamwatate naamwameme. Ongulohi ndjoka ya tetekele okuyamba po omwenyo gwe, Jesus okwa li a galikana a mana mo. Okwa li a pula Jehova kaa pitike yalwe ya dhiladhila kutya ye oha tukana noku mu tokola omolwoshinima shoka. Pehala lyokuninga ngawo, Jehova okwa kwathele Jesus moku mu tumina gumwe gwomaamwahe aayengeli ye mu nkondopaleke. (Luk. 22:42, 43) Jehova otashi vulika wo e tu kwathele okupitila mokudhengelwa ongodhi nenge okutalelwa po kugumwe gwomaamwatate nenge gwomaamwameme. Atuheni otatu vulu okukonga oompito tu lombwele ooitaali ooyakwetu “oohapu dhuukuume.” — Omayel. 12:25.

¹² Tala koshimoniwa shomumwameme Miriam. Konima yiiwike iishona sho omusamane gwe a si, Miriam okwa li e li megumbo oye awike, a yemata nokwa gwililwa po. Okwa li ta lili itaa vulu okumwena nokwa li a pumbwa gumwe a popya naye. Okwa ti: “Kanda li ndi na oonkondo dhokudhengela nando omuntu, onkee onda galikana kuJehova. Omanga tandi lili, ngame otandi galikana, onda dhengelwa ongodhi. Ngoka a li ta dhenge, omukuluntugongalo gumwe, kuume kandje kopothingo.” Miriam okwa li a hekelekwa komukuluntugongalo ngoka nokunekulu lye. Okwa li a tompwa kutya Jehova oye i inyengitha omumwatate ngoka e mu dhengele.

13. Gandja oshiholelwa shankene Jehova ha vulu okulongitha mboka ihaaye mu longele mokuyamukula omagalikano getu.

¹³ Ota vulu okulongitha aantu mboka ihaaye mu longele. (Omayel. 21:1) Omathimbo gamwe, Jehova oha yamukula omagalikano gaapiya ye, mokwiinyengitha mboka ihaaye mu longele ye ya kwathele. Pashiholelwa, okwa li i inyengitha omukwaniilwa Artakserkses a ethe Nehemia a shune kuJerusalem, opo a vule oku ka kwathela mokutungulula oshilando shoka. (Neh. 2:3-6) Kunena, Jehova oha vulu wo nokuli okwiinyengitha mboka ihaaye mu longele ye tu kwathele, uuna tu li mompumbwe.

14. Oshimoniwa shomumwameme Soo Hing, oshe ku tsa ngiini omukumo? (Tala wo ethano.)

¹⁴ Omumwameme Soo Hing okwa li u uvite kutya Jehova okwe ya kwathela okupitila mundohotola gwe. Omwanamati oku na uuvu wopamadhiladhilo. Sho omwanamati ngoka a li moshiponga oshinyanyalithi shohauto, omumwameme ngoka nomusamane gwe oya etha po iilonga yawo, ye mu sile oshimpwiyu. Omolwoshinima shono, oya ka kala ye na uupyakadhi wopashimaliwa. Soo Hing okwa ti okwa li u uvite kutya ita vulu we okwiidhidhimika. Okwa mbumbulile Jehova omutima gwe megalikano, te mu pula e mu kwathele. Ndohotola gwe okwa tokola okutala kutya na kwathele ngiini omumwameme ngoka nosho wo yaandjawo. Omolwoshinima shono oya pewa ekwatho kepangelo nehala lyokukala ndyoka taya vulu oku li futila. Konima yaashono, Soo Hing okwa ti: “Otwa mona nkene Jehova te tu kwathele. Oku li shili ‘Omuuvi gwomagalikano.’” — Eps. 65:2.

OTWA PUMBWA EITAALO TU MONE NOKUTAAMBA KO OMAYAMUKULO GAJEHOVA KOMAGALIKANO GETU

15. Oshike sha kwathele omumwameme gumwe a mone kutya Jehova okwa yamukula omagalikano ge?

¹⁵ Omagalikano getu olundji ihaga yamukulwa momikalo omindhindhilikwedhi. Ihe omayamukulo ngoka hatu mono ogo owala hatu kala twa pumbwa tu tsikile okukala aadhiginini kuTate yetu gwomegulu. Onkee kala ho tala nkene Jehova ta yamukula omagalikano goye. Omumwameme gwedhina Yoko okwa li e uvite kutya Jehova iha yamukula omagalikano ge. Ihe okwa li a tameke okunyola mokambo ke shoka a pula Jehova. Konima yethimbo lyontumba, okwa li a tala mo nokwa li a mono nkene Jehova a yamukula omagalikano ge ogendji naangoka nokuli a li a dhimbwa. Omathimbo nomathimbo otwa pumbwa okumwena po nokutala nkene Jehova ta yamukula omagalikano getu. — Eps. 66:19, 20.

16. Ongiini tatu vulu okuulika eitaalo ngele tashi ya pokugalikana? (Aahebeli 11:6)

¹⁶ Ihatu ulike owala eitaalo mokugalikana kuJehova, ihe nomokutaamba ko wo omayamukulo ge komagalikano getu kutya nduno omayamukulo ngoka oge li ngiini. (Lesha Aahebeli 11:6.) Tala koshimoniwa sha Mike nomukulukadhi gwe, Chrissy. Oya li ye na elalakano lyoku ka longa koBetel. Mike okwa ti: “Otwa kala nokuninga eindilo uule womimvo odhindji nokugalikana kuJehova iikando niikando kombinga yelalakano ndyoka. Ihe katwa li twa hiywa ko koBetel.” Mike naChrissy oya kala ye na omukumo kutya Jehova oku shi omukalo gwa dhenga mbanda gwankene te ya longitha miilonga ye. Oya tsikile okuninga ngaashi taya vulu mokulonga ye li aakokolindjila yondjigilile kehala kehe hoka kwa li ku na ompumbwe nokukutha ombinga mooproyeka dhokutunga mehangano lyaJehova. Kunena, oye li miilonga yuuyendi. Mike okwa ti: “Jehova ina kala aluhe ta yamukula omagalikano getu momukalo moka twa li twa tegelela. Ihe okwe ga yamukula nokwe shi ninga momikalo omiwanawa dhi vule po nokuli mpoka twa li twa tegelela.”

17-18. Shi ikolelela kEpisalomi 86:6, 7, otatu vulu okukala tu na uushili wuni?

¹⁷ Lesha Episalomi 86:6, 7. Omupisalomi David okwa li e na uushili kutya Jehova oku uva nokwa yamukula omagalikano ge. Nangoye oto vulu okukala wu na uushili mboka. Iiholelwa mbyoka twa kundathana moshitopolwa shika otayi tu shilipaleke kutya Jehova ota vulu oku tu pa uunongo nosho wo oonkondo ndhoka twa pumbwa tu vule okwiidhidhimika. Ota vulu wo okulongitha aamwatate naamwameme nenge nokuli mboka ihaaye mu longele ngashingeyi ye tu kwathele momikalo dhontumba.

¹⁸ Nonando Jehova otashi vulika ihaa yamukula omagalikano getu momukalo moka twa tegelela, otu na uushili kutya ote ke ga yamukula. Ohe tu pe shoka twa pumbwa nopethimbo lela mpoka twe shi pumbwa. Onkee tsikila nokugalikana lela wu na eitaalo nuushili kutya Jehova ote ke ku sila oshimpwiyu ngashingeyi nota ka “kutitha iinamwenyo ayihe” muuyuni uupe. — Eps. 145:16.