Omolwashike tu na okutila Jehova?

1-2. Shi ikolelela kEpisalomi 25:14, oshike tu na okuninga ngele otwa hala okukala tu na ekwatathano lyopothingo naJehova?

UUKWATYA wuni wu wete owo wa simana, ngele owa hala okukaleka po ekwatathano ewanawa nagumwe? Otashi vulika wu tye ookuume aawanawa oye na okukala ye holathane nohaya ambidhidhathana. Otashi vulika kuu dhiladhile kutya uumbanda owu li uukwatya wa simana ngele tashi ya puukuume uuwanawa. Ihe ngaashi oshipalanyolo shoshitopolwa shika tashi ti, mboka ya hala okupanga uukuume naJehova oye na ‘okuvulika kuye.’ — Lesha Episalomi 25:14.

² Kutya nduno otwa longela Jehova uule wethimbo li thike peni, atuheni otwa pumbwa okukala tu na etilosimaneko. Ihe okutila Kalunga osha hala okutya shike? Ongiini tatu vulu okwiilonga okutila Jehova? Oshike tatu vulu okwiilonga kombinga yokutila Kalunga komutonateli Obadia, kOmuyambi Omukuluntu Jehoiada nosho wo komukwaniilwa Joas?

OKUTILA KALUNGA OSHA HALA OKUTYA SHIKE?

3. Yelitha nkene uumbanda hawu vulu oku tu gamena.

³ Otashi vulika tu kale twa tila ngele otwi itaala kutya otashi vulika tu mone oshiponga shontumba. Uumbanda mboka uuwanawa, oshoka otawu vulu oku tu kwathela tu ninge omatokolo gomondjila. Ngele otwa kala twa tila okwiihata po, otashi ke tu kwathela kaatu ende komungenge gwetayimanya. Uuna twa tila okwiiyehameka otashi ke tu ningitha, opo kaatu kale pehala lya nika oshiponga. Uumbanda wokukala twa tila okuteya po uukuume wetu nagumwe, ngoka tu hole ohawu tu gamane kaatu popye nenge tu ninge sha tashi mu uvitha nayi.

4. Satana okwa hala tu kale tu na uumbanda wuni wokutila Jehova?

⁴ Satana okwa hala aantu ya kale ye na uumbanda uuwinayi wokutila Jehova. Okwa hala tu itaale kutya Jehova oha kala aluhe a geya, noke na einekelo mutse noitatu vulu oku mu nyanyudha. (Job 4:18, 19) Satana okwa hala tu kale nuumbanda uuwinayi wokutila Jehova notu ethe po oku mu longela. Opo tu yande omwigo ngoka, otwa pumbwa okwiilonga okusimaneka Jehova nokukala twa tila oku mu uvitha nayi.

5. Okutila Kalunga osha hala okutya shike?

⁵ Omuntu ngoka ha tila Kalunga oha kala e Mu hole noiha kala a hala okuninga sha shoka tashi yono po ekwatathano lye Naye. Jesus okwa li e na evuliko lya tya ngawo. (Heb. 5:7) Ka li nando ha tila Jehova netilo ewinayi. (Jes. 11:2, 3) Pehala lyaashono okwa li e mu hole noonkondo, nokwa li a hala okuvulika kuye. (Joh. 14:21, 31) Ngaashi Jesus, natse otwa hala lela okusimaneka Jehova, molwaashoka omunahole, omunandunge, omuyuuki nomunankondo. Otu shi wo kutya Jehova oku tu hole noonkondo, noku na ko nasha nankene hatu inyenge uuna te tu longo. Ngele otwa kala inaatu vulika kuJehova, Jehova oha kala u uvite nayi, ihe ngele otwa vulika kuye ohashi mu nyanyudha. — Eps. 78:41; Omayel. 27:11.

OTATU VULU OKWIILONGA OKUTILA KALUNGA

6. Omomukalo gumwe guni tatu vulu okwiilonga okutila Jehova? (Episalomi 34:11)

⁶ Inatu valwa tu na uukwatya wokutila Kalunga, ihe otu na oku wu kokeka. (Lesha Episalomi 34:11.) Omukalo gumwe tatu vulu oku shi ninga omokukonakona eshito. Ngele otwa mono kutya ‘iinima mbyoka Jehova a shita’ otayi ulike uunongo we oonkondo dhe, nonokutya oku tu hole lela, otatu ka kala twe mu simaneka noonkondo notu mu hole. (Rom. 1:20) Omumwameme gwedhina Adrienne okwa ti: “Uuna nda tala kukehe shimwe shoka Jehova a shita nokumona nkene Jehova omunandunge, ohashi kwathele ndje ndi mone kutya oku shi shoka oshiwanawa kungame.” Molwaashoka okwa li ha dhiladhila aluhe kwaashoka, okwa ti: “Inandi hala okuninga sha shoka tashi yono po ekwatathano lyandje naJehova, ngoka a pa ndje omwenyo.” Kala ho kongo ethimbo moshiwike wu dhiladhile kombinga yashimwe shomiinima mbyoka Jehova a shita. Ngele owe shi ningi, oto ka kala wa simaneka Jehova noonkondo. — Eps. 111:2, 3.

7. Ongiini egalikano tali vulu oku tu kwathela tu kale hatu tila lela Jehova?

⁷ Omukalo gumwe tatu vulu okukala hatu tila Jehova, omokugalikana aluhe. Ngele otwa kala hatu galikana Jehova aluhe, otatu mu tseya nawa. Ethimbo kehe tatu pula Jehova e tu pe oonkondo opo tu vule okwiidhidhimikila omashongo, kungawo otatu idhimbulukitha kutya omunankondo. Uuna tatu mu pandula sho e tu pa Omwana omagano, ohatu idhimbulukitha kutya Jehova oku tu hole. Uuna tatu indile Jehova e tu kwathele muupyakadhi wetu, ohatu idhimbulukitha kutya ye omunandunge lela. Omagalikano ga tya ngawo ohage tu kwathele tu simaneke Jehova noonkondo. Ohaga koleke wo etokolotoko lyetu lyokuyanda okuninga shoka tashi yono po ekwatathano lyetu naye.

8. Oshike tatu vulu okuninga, opo tu kaleke po etilo lyetu lyokutila Jehova?

⁸ Otatu vulu okukaleka po etilo lyetu lyokutila Kalunga mokukonakona Ombiimbeli nelalakano lyokwiilonga sha miiholelwa iiwanawa niiwinayi mbyoka yi li mo. Natu kundathaneni kiiholelwa yaapiya yaJehova aadhiginini yaali, shomutonateli gwegumbo lyomukwaniilwa Ahab noshOmuyambi Omukuluntu Jeoiada. Opo nduno natu ka taleni shoka tatu vulu okwiilonga komukwaniilwa Joas gwaJuda, ngoka a li ha longele nawa Jehova, ihe konima yethimbo okwa etha po oku mu longela.

NGAASHI OBADIA NGOKA A LI HA TILA KALUNGA, KALA OMULAADHI NGAASHI YE

9. Ongiini etilo lyokutila Jehova lya li lya kwathele Obadia? (1 Aakwaniilwa 18:3, 12)

⁹ Oshikando shotango Ombiimbeli ya tumbula Obadiab oya ti: “Okwa li omusimaneki gwOmuwa omuyuuki.” (Lesha 1 Aakwaniilwa 18:3, 12.) Etilokalunga ndika ewanawa olya li lya kwathele ngiini Obadia? Olye mu kwathele a kale omuyuuki noku shi okwiinekelwa, onkee elenga olye mu ningi omutonateli mombala. (Yelekanitha Nehemia 7:2.) Etilokalunga olye mu pe wo uulaadhi wa gwedha po, ano uukwatya mboka a li a pumbwa lela. Okwa li ko pethimbo omukwaniilwa omukolokoshi Ahab ta pangele, ngoka a “yono kOmuwa e vule aatetekeli ye ayehe.” (1 Aak. 16:30) Omukulukadhi gwaAhab, Jesebel, ngoka ha galikana Baal, okwa li wo e tonde Jehova noonkondo e ta hanagula po elongelokalunga lyashili muukwaniilwa wokuumbugantu. Okwa li a dhipaga nokuli aahunganeki oyendji yaKalunga. (1 Aak. 18:4) Kapu na omalimbililo kutya okwa li ta longele Jehova pethimbo edhigu.

10. Obadia okwa li a ulike ngiini uulaadhi wa gwedhwa po?

¹⁰ Obadia okwa li ulike ngiini uulaadhi wa gwedhwa po? Sho Jesebel a tameke okukonga aahunganeki yaKalunga e ya dhipage, okwa kutha mo ethele yomuyo e te ya ‘holeke mekololo moongundu mbali dhomilongo oontano. Okwe ya sile oshimpwiyu e te ya pe iikulya nomeya.’ (1 Aak. 18:13, 14) Ando Jesebel okwa li e shi shoka Obadia a ninga, andola okwe mu dhipaga. Odhoshili kutya okwa li a tila nokali a hala okusa. Ihe okwa li e hole Jehova naamboka ya li haye mu longele, shi vulithe puye mwene.

11. Omomukalo guni aapiya yaJehova yopethimbo lyetu ya fa Obadia? (Tala wo ethano.)

¹¹ Kunena oyendji yomaapiya yaJehova oye li miilongo moka iilonga yetu yi indikwa. Ngaashi owala aamwatate naamwameme mbaka aaholike, oya tindi okweetha po okulongela Jehova, nohaya tsikile okusimaneka mboka ye na oonkondopangelo. (Mat. 22:21) Ohaya ulike kutya ohaya tila Kalunga mokuvulika kuye pehala lyokuvulika kaantu. (Iil. 5:29) Shika ohaye shi ningi mokuuvitha onkundana ombwanawa nosho wo okugongala pamwe. (Mat. 10:16, 28) Ohaya ningi oonkambadhala ya mone kutya aamwatate naamwameme oye na shoka ya pumbwa, opo ya tsikile okulongela Jehova. Natu taleni koshiholelwa shaHenri, ngoka ha zi moAfrika moshilongo moka iilonga yetu ya li yi indikwa uule wethimbo lyontumba. Okwa ti: “Ngame omuntu e na lela oohoni. Onkee onda li nda tompwa kutya Jehova oye a li a pe ndje uulaadhi mboka nda pumbwa.” Mbela nangoye oho itala ko wu na uulaadhi ngaashi Henri? Oto vulu okukala wu wu na, ngele owa kala ho tila Jehova.

KALA OMUDHIGININI NGAASHI OMUYAMBI OMUKULUNTU NGOKA A LI OMUTILIKALUNGA, JEHOIADA

12. Omuyambi Omukuluntu Jehoiada nomukulukadhi gwe oyu ulike ngiini uudhiginini lela kuJehova?

¹² Omuyambi Omukuluntu Jehoiada okwa li ha tila Jehova, nuumbanda mboka owa li we mu inyengitha a kale omudhiginini nokuladhipika aantu ya longele Jehova. Shika osha li shi iwetikile sho omwanakadhona gwaJesebel, Atalia, a tameke okupangela kaashi li paveta e li omukwaniilwa muJuda. Aantu oya li haya tila Atalia netompelo ewanawa. Atalia okwa li e na onyanya noonkondo nokwa li a halelela okukala omukwaniilwakiintu, e ta kambadhala okudhipagitha aatekulu, opo a kale oye ta vulu okupangela. (2 Ondjal. 22:10, 11) Kamwe komaatekulu mboka, kedhina Joas, oka hupu, molwaashoka omukulukadhi gwaJehoiada, Jehosheba, okwe ka hupitha. Jehosheba nomusamane gwe oya li ye ka holeke noye ka sile oshimpwiyu. Komukalo ngoka, Jehosheba okwa kwathele okuhupitha gumwe gwomezimo lyaDavid, opo a ninge omukwaniilwa. Jehoiada okwa li omudhiginini kuJehova noka li e na uumbanda washa wokutila, Atalia. — Omayel. 29:25.

13. Sho Joas a li e na omimvo heyali, Jehoiada okwa li a ulike ishewe ngiini uudhiginini?

¹³ Sho Joas a li e na omimvo heyali, Jehoiada oku ulike natango kutya oku li omudhiginini kuJehova. Okwa kongo po ondungedhiladhilo. Uuna ya pondola, Joas okwa li ta ka ninga omukwaniilwa nomuthigululi gwuuthembahenda waDavid. Ihe ngele ondungedhiladhilo ndjono inayi pondola, osha yela kutya Jehoiada okwa li ta ka dhipagwa. Kekwatho lyaJehova, ondungedhiladhilo ndjoka oya pondola. Jehoiada, ngoka a li a yambidhidhwa komalenga nokAalevi, okwa ningi Joas omukwaniilwa, na Atalia okwa dhipagwa. (2 Ondjal. 23:1-5, 11, 12, 15; 24:1) Opo nduno Jehoiada “okwa hanganitha omukwaniilwa Joas noshigwana e te ya fala mehangano nOmuwa, ya ninge oshigwana shOmuwa.” (2 Aak. 11:17) Jehoiada “okwa langeke wo aalangeli piiyelo yotempeli, opo ya keelele mo ngoka kee na uuyogoki pamisindilo.” — 2 Ondjal. 23:19.

14. Omomikalo dhini Jehoiada a li a simanekwa, molwaashoka a simaneke Jehova?

¹⁴ Nale Jehova okwa popile a ti: “Ngame ote simaneke mboka haa simaneke ndje.” Odhoshili kutya Jehova okwa li a yambeke Jehoiada. (1 Sam. 2:30) Pashiholelwa, okwa li a nyolitha mOmbiimbeli ehokololo ndyoka tali popi kombinga Jehoiada, opo tu ilonge mo sha mulyo. (Rom. 15:4) Sho Jehoiada a si, okwa li a pewa esimano lyi ikalekelwa, “molwokusimaneka iilonga mbyoka a ningile Aaisraeli, Kalunga notempeli, okwa fumvikwa moombila dhaakwaniilwa moshilando shaDavid.” — 2 Ondjal. 24:15, 16.

15. Oshike tatu ilongo mehokololo ndyoka tali popi kombinga yaJehoiada? (Tala wo ethano.)

¹⁵ Ehokololo kombinga Jehoiada otali vulu oku tu kwathela atuhe tu kale hatu tila Kalunga. Aakuluntugongalo otaya vulu okuholela Jehoiada mokukala aluhe haya kongo omikalo dhokugamena egongalo lyaKalunga. (Iil. 20:28) Aakokele otaya vulu okwiilonga sha kuJehoiada, opo ngele oya kala haya tila Jehova nokukala aadhiginini, ota vulu oku ya longitha ya gwanithe po ehalo lye. Ite ke ya idhimbika. Aagundjuka otamu vulu okutala kunkene Jehova a li a ungaunga naJehoiada, e tamu Mu holele mokuungaunga nawa naakokele nesimaneko, unene tuu mboka ya longela Jehova ethimbo ele. (Omayel. 16:31) Hugunina, atuheni otatu vulu okwiilonga sha komalenga nokAalevi mboka ya li ya yambidhidha Jehoiada. Natu yambidhidheni nuudhiginini “aawiliki” yetu mokuvulika kuyo. — Heb. 13:17.

INO KALA NGAASHI OMUKWANIILWA JOAS

16. Oshike tashi ulike kutya omukwaniilwa Joas okwa li a nkundipala pambepo?

¹⁶ Omukwaniilwa Joas okwa li a mono uuwanawa menwethomo ewanawa lyaJehoiada. (2 Aak. 12:2) Oshizemo, omukwaniilwa ngoka omugundjuka okwa li a hala okukala a hokiwa kuJehova. Ihe konima sho Jehoiada a si, Joas okwa li a pulakene kaawiliki Aajuda aashunimonima. Oshizemo osha li shike? Ye naalelwa ye, oya “tameke okusimaneka iimenka niiyelekela yoshikalungakiintu.” (2 Ondjal. 24:4, 17, 18) Nonando Jehova okwa li e shi geela noonkondo, “okwa tumu aahunganeki oku ya londodha, ya galukile kuye, ihe aantu oya tindi okupulakena.” Inaya pulakena nokuli komwanamati Sakaria, ngoka a li omuhunganeki gwaJehova nomuyambi, ihe okwa li wo omumwayinagona gwaJoas. Omukwaniilwa Joas okwa dhipagitha nokuli Sakaria, nonando yaandjaSakaria oyo ya li ye mu hupitha. — 2 Ondjal. 22:11; 24:19-22.

17. Iinima oya li ya endele ngiini Joas?

¹⁷ Joas ina kala ha tila lelalela Jehova, niinima oya li ye mu endele nayi. Jehova okwa ti: ‘Ote tondo mboka taa dhini ndje.’ (1 Sam. 2:30) Konima yethimbo, etangakwiita eshona lyAasiria olya dhenge “etangakwiita lyaJuda enene,” na Joas okwa li “e ehamekwa unene.” Konima sho Aasiria ya yi, Joas okwa dhipagwa komupiya gwe, molwaashoka a dhipaga Sakaria. Omukwaniilwa ngoka omukolokoshi ka li nokuli a talika ko a gwana okufumvikwa ‘moombila dhaakwaniilwa.’ — 2 Ondjal. 24:23-25.

18. Shi ikolelela kuJeremia 17:7, 8, ongiini tatu vulu okuyanda okukala twa fa Joas?

¹⁸ Oshike tatu vulu okwiilonga koshiholelwa shaJoas? Okwa li a fa omuti gwa mena omidhi dhi li kombanda hagu ambidhidhwa owala noshiti. Sho Jehoiada ngoka a li te mu kwathele a si, Joas okwa tameke okupulakena kaashunimonima, e ta kala kee shi we omudhiginini kuJehova. Oshiholelwa shika otashi ulike kutya katu na okuvulika kuKalunga molwaashoka owala yaandjetu nosho wo yalwe megongalo ye tu tulila po oshiholelwa oshiwanawa tu shi ninge. Opo tu kale popepi naJehova, otu na okukoleka ohole yetu yoku mu hola nokukala twe mu simaneka mokukala hatu konakona pandjigilile Oohapu Dhe, hatu tedhatedha kudho nohatu galikana. — Lesha Jeremia 17:7, 8; Kol. 2:6, 7.

19. Jehova okwa tegelela tu ninge shike?

¹⁹ Jehova ihe tu pula tu ninge oshindjishindji. Ihe shoka a tegelela tu ninge otashi adhika mOmuuvithi 12:13, ngoka ta ti: “Tila Kalunga nou dhiginine iipango ye, oshoka aantu ayehe osho ye na okuninga.” Ngele otwa kala hatu tila Kalunga, otatu ka vula okukala aadhiginini kuye monakuyiwa ngaashi Obadia naJehoiada, kutya nduno otu ka adhike komashongo ga tya ngiini. Kapu na sha tashi vulu oku ka yona po ekwatathano lyetu naJehova.