Otatu vulu okwiinekela shoka Ombiimbeli ya ti kombinga yaashoka shi li mondjila naashoka sha puka

Itatu vulu okukala nuushili kutya omatokolo getu ge na sha neihumbato lyetu otaga ka kala gopandunge, ngele otwe ga kankamekele kunkene tu uvite nenge kunkene yalwe ye uvite. Ombiimbeli oya popya kutya omolwashike. Oyi na wo ewiliko li shi okwiinekelwa, ndyoka hali tu kwathele tu tseye shoka shi li mondjila naashoka sha puka, notu kale twa nyanyukwa.

EWILIKO NDYOKA TWA PUMBWA

Mombiimbeli, Jehovaa Kalunga okwa yelitha kutya aantu oya pumbwa ekwatho lye, noitaya vulu okuninga sha koonkondo dhawo yene. (Jeremia 10:23) Nomolwaashoka e tu pa omithikampango dhopamikalo tadhi adhika mOmbiimbeli. Oku hole aantu noina hala tu ninge omatokolo omawinayi ngoka tage ke tu uvitha nayi nokudhigupaleka onkalamwenyo yetu. (Deuteronomium 5:29; 1 Johannes 4:8) Kakele kaashono, e li Omushiti gwetu, oku na owino nuunongo mboka twa pumbwa. (Episalomi 100:3; 104:24) Ihe nonando ongawo, Kalunga ke na esiku a thiminike aantu ya kale metsokumwe nomithikampango dhe.

Jehova okwa li a pe aantu yotango, Adam naEva, kehe shimwe shoka ya li ya pumbwa, opo ya vule okukala ya nyanyukwa shili. (Genesis 1:28, 29; 2:8, 15) Okwa li wo e ya pa omalombwelo ganathangwa ngono a li a tegelela ya vulike kugo. Ihe nonando ongawo, okwe ya etha ya tokole kuyo yene ngele otaya landula omalombwelo ngoka nenge hasho. (Genesis 2:9, 16, 17) Shiyemateka, Adam naEva oya hogolola okulandula omithikampango dhawo yene, pehala lyokulandula omithikampango dhaKalunga. (Genesis 3:6) Oshizemo osha li shike? Mbela aantu ohaya kala ngaa ya nyanyukwa, uuna taya tokola kuyo yene shoka shi li mondjila naashoka sha puka? Aawe. Ondjokonona oye shi ulika kutya okwiidhimbika omithikampango dhaKalunga ihashi eta ombili nenyanyu tali kalelele. — Omuuvithi 8:9.

Ombiimbeli oyi na ewiliko ndyoka twa pumbwa opo tu ninge omatokolo gopandunge, kashi na nduno mbudhi kutya otwa za meputuko lini. (2 Timoteus 3:16, 17; Tala oshimpungu “Embo lyaantu ayehe.”) Tala nkene Ombiimbeli ye shi popya.

Ilonga oshindji kutya omolwashike taku tiwa kutya Ombiimbeli “Oohapu dhaKalunga.” — 1 Aatessalonika 2:13. Tala okavidio “Ombiimbeli oya nyolwa kulye?” ko jw.org.

OMOLWASHIKE YAMWE HAYA DHILADHILA KUTYA OMBIIMBELI ITAYI VULU OKU YA KWATHELA?

Aantu yamwe ohaya ti kutya Ombiimbeli itayi vulu oku ya kwathela ya kale ye na eihumbato ewanawa. Natu taleni kiinima yimwe po tayi landula mbyoka aantu haya popi.

Gumwe otashi vulika a tye: “Ombiimbeli otayi kondjithathana.”

Uushili: Otashi vulika iitopolwa yimwe yOmbiimbeli yi kale tayi monika ya fa itaayi tsu kumwe. Ihe ngele owa konakona ehokololo alihe li ihwa po, nonokutya olya nyolwa uunake, oto ka mona kutya otayi tsu lela kumwe.

Opo wu mone iiholelwa yimwe yokondandalunde, lesha oshitopolwa “Mbela Ombiimbeli otayi kondjithathana?” shi li ko jw.org.

Gumwe otashi vulika a tye: “Aantu mboka haya ti kutya ohaya landula shoka shi li mOmbiimbeli ohaya ningi iinima iiwinayi, onkee Ombiimbeli itayi vulu okukwathela aantu ya kale ye na eihumbato ewanawa.”

Uushili: Ombiimbeli hayo yi na okupewa ombedhi omolweihumbato ewinayi lyaamboka ihaaya tula miilonga omalongo gayo. Oya hunganeka kutya aantu oyendji, mwa kwatelwa naawiliki yomalongelokalunga, mboka haya ti kutya ohaya landula shoka Ombiimbeli tayi ti, itaya ka ihumbata metsokumwe naashoka tayi ti. Otayi ti wo kutya omalongo gOmbiimbeli ‘otaga ka shekwa.’ — 2 Petrus 2:1, 2.

Opo wu mone oshiholelwa sha nkene aawiliki yomalongelokalunga ihaaya landula shoka Ombiimbeli tayi longo, lesha oshitopolwa “Is Religion Just Another Big Business?” ko jw org.

Gumwe otashi vulika a tye: “Aantu mboka haya landula Ombiimbeli ihaya simaneke yalwe mboka inaye ya fa.”

Uushili: Ombiimbeli otayi tu ladhipike tu ungaunge nayalwe nesimaneko. Itayi popile iinima ngaashi. . .

okudhiladhila kutya ongoye omwaanawa wu vule yalwe. — Aafilippi 2:3.
okukala wa dhina aantu mboka ye na eitaalo lya yooloka ko kulyoye. — 1 Petrus 2:17.
okuthiminika yalwe ya tse kumwe natse. — Mateus 10:14.

• Ombiimbeli otayi ulike kutya Kalunga aluhe oha ungaunga naantu nombili nonuuyuuki nokwa hala tu ninge sha faathana. — Aaroma 9:14.

Opo wu mone uuyelele owundji, lesha oshitopolwa “Nkene Ombiimbeli tayi tu kwathele tu idhidhimike notu simaneke omataloko gayalwe” shi li ko jw rg.

OMBIIMBELI OYE TU LOMBWELA SHOKA KALUNGA A HALA TU NINGE

Ombiimbeli omu na iiholelwa yashili yankene Jehova ha ungaunga naantu. Shoka tatu ilongo ohashi tu kwathele tu tseye etaloko lyaJehova li na ko nasha naashoka shili mondjila, shoka sha puka, shoka tashi tu etele uuwanawa naashoka sha nika oshiponga. (Episalomi 19:7, 11) MOmbiimbeli omu na omithikampango dhopamikalo, ndhono tadhi vulu oku tu kwathela tu ninge omatokolo gomondjila monkalamwenyo yetu yakehe esiku.

Pashiholelwa, tala omayele ngoka taga adhika mOmayeletumbulo 13:20 ngoka taga ti: “Enda pamwe naanawino, u likole owino, ihe ngoka ta kala paagoya, ota likola uuwinayi.” Ekotampango ndyoka otali longo wo nokutse kunena ngaashi owala lya li tali longo pethimbo lyonale. MOmbiimbeli omwa udha omakotampango ogendji taga longo. — Tala oshimpungu “Ombiimbeli oyi na uunongo tawu kalelele.”

Ihe otashi vulika wu ipule kutya, ‘Ongiini tandi vulu okukala ndi na uushili kutya omayele gOmbiimbeli otaga longo kunena?’ Oshitopolwa tashi landula ko otashi ka kundathana iiholelwa yashili yokunena.

a Jehova olyo edhina lyaKalunga lyopaumwene. — Episalomi 83:18.

OMAYELE GOMBIIMBELI OTAGA KWATHELE NOKUNENA?

Nonando Ombiimbeli oya pwa okunyolwa 2 000 dha ka pita, nokunena otayi tsikile okukwathela aantu. Aantu sigo okunena oya hala okukala ya nyanyukwa nokukala nonkalamwenyo ombwanawa. (Omuuvithi 1:9) Owino ndjoka yi li mOmbiimbeli otayi vulu oku tu kwathela tu adhe elalakano ndyoka.

Uunashili

“Otwa hala aluhe okulonga shoka shi li mondjila.” — Aahebeli 13:18.
“Omufuthi na ethe po okuyaka kwe, ye a tameke okwiilongela sha pamukalo omwaanawa.” — Aaefeso 4:28.

Ekwatathano lyetu nayalwe

“Inaku kala nando omuntu ta longo owala shoka she mu opalela, ihe na tale wo shoka tashi opalele mukwawo.” — 1 Aakorinto 10:24.
“Kwathathaneni, dhiminathanii po oondjo ethimbo kehe.” — Aakolossa 3:13.

Okuninga omatokolo

“Omuntu gwanathangwa oti itaale shaa ohapu, ihe onkotoki ota ndhindhilike oonkatu dhe.” — Omayeletumbulo 14:15.
“Omuntu onkotoki ota tala oshiponga e ta ka holama, ihe mboka yanathangwa omo taa yi e taa yemata.” — Omayeletumbulo 22:3.