Mbela owu na ngaa eitaalo?

Otu na okukala tu na eitaalo, opo tu nyanyudhe Jehova. Ihe Ombiimbeli otayi ti kutya ‘haantu ayehe ye na eitaalo.’ (2 Tes. 3:2) Omuyapostoli Paulus okwa li a popi kutya okwa pumbwa okuhupithwa ‘kaantu aadhudhu naawinayi,’ mboka ya li taye mu hepeke. Ihe shoka a popi kombinga yeitaalo oshi na eityo lya mbwalangandja. Aantu yamwe inaya hala okwiitaala kutya oku na Omushiti ngoka a shita iinima ayihe. (Rom. 1:20) Yamwe otashi vulika ya tye oya itaala moshinima shontumba, nenge momuntu ngoka e na oonkondo oonene dhi vule dhawo. Ihe eitaalo lya tya ngawo halyo lela hali nyanyudha Jehova.

Otu na okukala twa tompwa lela kutya Jehova oko e li nosho wo kutya oha “futu” mboka ye na eitaalo lya kola. (Heb. 11:6) Eitaalo oli li oshiyimati shombepo ye ondjapuki. Opo tu mone ombepo ondjapuki, otu na oku yi indila kuJehova. (Luk. 11:9, 10, 13) Omukalo omukwawo gwa simana moka tatu vulu okumona ombepo ondjapuki, omokulesha Ombiimbeli, ndjoka aanyoli yayo ya li ya wilikwa kombepo ye. Opo ihe otatu vulu okudhiladhila kwaashoka twa lesha nokukambadhala okutula miilonga shoka twa ilonga. Opo nduno ombepo yaJehova otayi ka nwetha mo onkalamwenyo yetu noku tu kwathela tu kale tu na eitaalo, ndyoka hali mu nyanyudha.