Jehova okwa hala aantu ayehe ya itedhulule

1. Okwiitedhulula okwa kwatela mo shike?

UUNA twa ningi oshinima sha puka, osha simanenena tu itedhulule. Ombiimbeli otayi ti kutya omuntu ngoka a itedhulula, oha lundulula omadhiladhilo ge kombinga yeihumbato lyontumba, oha etha po eihumbato ndyoka nokukala a tokola toko kaa ihumbate we momukalo moka.

2. Omolwashike atuheni twa pumbwa okwiilonga kombinga yokwiitedhulula? (Nehemia 8:9-11)

² Kehe gumwe okwa pumbwa okwiilonga kombinga yokwiitedhulula. Omolwashike mbela? Oshoka atuhe ohatu yono esiku kehe. Tu li oluvalo lwaAdam naEva, kehe gumwe gwomutse okwa thigulula uulunde neso. (Rom. 3:23; 5:12) Kapu na nando ogumwe gwomutse ihaa yono. Nokuli naalumentu mboka ya popiwa kutya oya li ye na eitaalo lya kola, ngaashi omuyapostoli Paulus, kasha li oshipu kuyo okupangela omahalo ga puka. (Rom. 7:21-24) Mbela shino osha hala okutya otu na okukala twa yemata ethimbo alihe, omolwomayono getu? Aawe, Jehova omunahenda nokwa hala tu kale twa nyanyukwa. Natu taleni koshimoniwa shAajuda yopethimbo lyaNehemia. (Lesha Nehemia 8:9-11.) Jehova ka li a hala ya kale ya nika oluhodhi, omolwomapuko ngoka ya ninga monakuziwa, ihe okwa li a hala ya kale ya nyanyukwa sho taye mu longele. Jehova oku shi kutya okwiitedhulula ohaku eta enyanyu. Nomolwaashono te tu longo kombinga yako. Ngele otwa itedhulula omolwomayono ngoka twa ninga, otatu vulu okukala nuushili kutya Tate yetu omunahenda ote ke tu dhimina po.

3. Oshike tatu ka kundathana moshitopolwa shika?

³ Moshitopolwa shika, otatu ka ilonga kombinga yokwiitedhulula. Otatu ka kundathana iinima itatu. Shotango, otatu ka ilonga shoka Jehova a li a longo Aaisraeli kombinga yokwiitedhulula. Oshitiyali, otatu ka gandja eitulomo kunkene Jehova a li a kwathele aayoni ya itedhulule. Oshititatu, otatu ka kundathana shoka aalongwa yaJesus ya li ya ilongo kombinga yokwiitedhulula.

SHOKA JEHOVA A LI A LONGO AAISRAELI KOMBINGA YOKWIITEDHULULA

4. Jehova okwa longo oshigwana shaIsraeli shike kombinga yokwiitedhulula?

⁴ Sho Jehova a ningi elongekidho nAaisraeli ya ninge oshigwana she, okwa li a ningi ehangano nayo noya li ya uvaneke kutya otaya ka vulika kuye. Ngele oya kala nokuvulika koompango dhe, ote ke ya gamena noku ya yambeka. Shi na ko nasha noompango ndhoka, okwe ya shilipaleke a ti: “Oshipango shika tandi shi ku pe nena ndjika, kashi shi oshidhigu unene nenge shi li kokule nangoye.” (Deut. 30:11, 16) Pashiholelwa, ngele oye mu tukululile oshipotha, mokuhogolola ya longele iikalunga, ite ke ya yambeka we notaya ka mona iihuna. Ihe shoka inashi hala okutya Jehova okwe ya thiga po thiluthilu. Otaya ka vula ‘okugalukila kOmuwa, notaya ka pulakena kewi lye.’ (Deut. 30:1-3, 17-20) Niitya yimwe, otaya ka vula okwiitedhulula. Ngele oye shi ningi, Jehova ota ka hedha popepi nayo note ke ya laleka nuuyamba ishewe.

5. Jehova okwa ulike ngiini kutya ina iteka po oshigwana she? (2 Aakwaniilwa 17:13, 14)

⁵ Oshigwana shaJehova oshihogololwa osha kala noku mu tukulila oshipotha lwiikando. Shimwe ishewe, oya li ya longele iikalunga nokuninga iinima yilwe iiwinayi. Oshizemo, oya li ya mono iihuna. Ihe Jehova ka li a iteka po oshigwana she oshitangalali. Okwa li a tumu aahunganeki lwiikando, opo ya londodhe oshigwana she shi itedhulule noshi galukile kuye. — Lesha 2 Aakwaniilwa 17:13, 14.

6. Jehova okwa li a longitha ngiini aahunganeki ya longe oshigwana she, nkene sha simana okwiitedhulula? (Tala wo ethano.)

⁶ Jehova okwa li a longitha aahunganeki ye lwiikando, ya londodhe nokupukulula oshigwana she. Pashiholelwa, Kalunga okwa li a popi okupitila muJeremia a ti: “Israel ngoka wi iteka ndje, galukila kungame. Ngame omunamutimahenda noihandi geye osima. Itandi ku geele we sigo aluhe. Zimina owala kutya ngoye omunandjo, nowa tsu ondumbo nOmuwa, Kalunga koye.” (Jer. 3:12, 13) Okupitila muJoel, Jehova okwa ti: ‘Galukileni kungame.’ (Joel 2:12, 13) Okwa longitha Jesaja a nyole ta ti: “Iyogeni, mu yele. Etheni uuwinayi mbuka ndi wete tamu u ningi. Eeno, etheni okulonga iihuna.” (Jes. 1:16-19) Okupitila muHesekiel, Jehova okwa li a pula a ti: “Ondi nyanyukilwe ando eso lyomukeenakalunga? . . . Aawe, ihe onda hala, i itedhulule, opo a kale e na omwenyo. Ngame itandi nyanyukilwa eso lyomuntu. Itedhululeni, opo mu kale mu na omwenyo.” (Hes. 18:23, 32) Ohashi nyanyudha Jehova uuna e wete aantu taya itedhulula, molwaashoka okwa hala ya kale ye na omwenyo sigo aluhe. Onkene Jehova iha tegelele aayoni ya lundulule iikala yawo, opo e ya kwathele? Natu ka taleni kiiholelwa yimwe po kombinga yaashoka.

7. Jehova okwa longitha ehokololo lyomuhunganeki Hosea nomukulukadhi gwe, a longe shike oshigwana she?

⁷ Ndhindhilika shoka Jehova a longo oshigwana she okupitila moshiholelwa shaGomer, omukulukadhi gwomuhunganeki Hosea. Konima sho a yi moluhondelo, okwa thigi po Hosea e ta yi kaalumentu yalwe. Mbela okwa li ta vulu okuninga omalunduluko? Jehova, ngoka ha lesha omitima, okwa li a lombwele Hosea a ti: “Inda natango e to kala ishewe u hole omukiintu e li moluhondelo nomuholi gwe. Kala wu mu hole, ngaashi ngame ndi hole natango oshigwana shalsrael, nando oya yi kiikalunga.” (Hos. 3:1; Omayel. 16:2) Ndhindhilika kutya omukulukadhi gwaHosea okwa li natango ta yono eyono lya kwata miiti. Ihe Jehova okwa li a lombwele Hosea e mu dhimine po noku kale ishewe omukulukadhi gwe.a Okupitila moshiholelwa shika, Jehova okwa li a hala okulonga oshigwana she nkene a li e shi uvitile. Nonando oya kala nokuyona omayono ga kwata miiti, Jehova okwa kala e ya hole nokwa tsikile oku ya kwathela ya itedhulule noya lundulule oonkantu dhawo. Mbela oshiholelwa shino otashi gandja edhiladhilo kutya Jehova, ngoka ha “konakona oomwenyo” ota vulu okukwathela gumwe ngoka ta yono natango eyono lya kwata miiti noku mu kwathela a itedhulule? (Omayel. 17:3) Natu shi taleni.

NKENE JEHOVA HA KWATHELE AAYONI YA ITEDHULULE

8. Jehova okwa li a kambadhala ngiini okukwathela Kain a itedhulule? (Genesis 4:3-7) (Tala wo ethano.)

⁸ Kain oye a li omwanamati gwosheeli gwaAdam naEva. Okwa li a thigulula kaavali ye ehalo lyokuninga shoka sha puka. Shimwe ishewe, Ombiimbeli oya ti kutya ‘iilonga yaKain oya li ya puka.’ (1 Joh. 3:12) Nomolwaashono tashi vulika Jehova a li inaa “hokwa Kain nondjambo ye,” ndjoka a li a gandja. Pehala lyokulundulula oonkatu dhe, “Kain okwa geye a sizimaneka oshipala she kondjahi.” Jehova okwa li a ningi po shike? Okwa popi naKain. (Lesha Genesis 4:3-7.) Ndhindhilika kutya Jehova okwa li a popi naKain nohenda, te mu kwathele a kale e na etegameno noku mu londodha kutya ongeyo ye otayi vulu oku mu ningitha a yone. Shiyemateka, Kain okwa li a tindi okupulakena. Ka li a pitike Jehova e mu kwathele a itedhulule. Molwaashoka Kain ka li a pulakene kuJehova, mbela Jehova okwa li a tokola kutya ita ka kwathela we nando omuntu gumwe a itedhulule? Hasho nando!

9. Jehova okwa li a kwathele ngiini David a itedhulule?

⁹ Jehova okwa li e hole omukwaniilwa David noonkondo. Okwa ti nokuli kutya oku li “omulumentu nde mu hokwa komwenyo gwandje.” (Iil. 13:22, yelekanitha OB-1954) Ihe David okwa li a yono omayono ga kwata miiti, ngaashi oluhondelo nedhipago. Sha ikolelela kOmpango yaMoses, David okwa li a gwana okudhipagwa. (Lev. 20:10; Num. 35:31) Ihe Jehova okwa li a hala okukwathela David a itedhulule.b Okwa li a tumu omuhunganeki gwe Natan a ka talele po omukwaniilwa David, nonando ka li ta ulike natango kutya okwiitedhulula. Natan okwa longitha ethaneko ndyoka lya li lya gumu omutima gwaDavid. Shoka osha li sha inyengitha David a itedhulule. (2 Sam. 12:1-14) Okwa nyola episalomi tali zi komutima, ndyoka lya li lya ulike kutya okwa itedhulula shili. (Eps. 51, enyolo lyopombanda) Episalomi ndyoka olya hekeleka oyendji mboka ya li ya yona nolye ya inyengitha ya itedhulule. Mbela inatu pandula tuu sho Jehova a kwathele pahole, omupiya gwe omuholike David, a itedhulule?

10. Mbela oho kala wu uvite ngiini, sho wu shi kutya Jehova ohe tu idhidhimikile nohe tu dhimine po?

¹⁰ Jehova oku tonde omayono goludhi kehe. (Eps. 5:4, 5) Nonando ongawo, oku shi kutya atuhe ohatu yono. Ihe Jehova oku tu hole, nuuna twa yono oha kala a hala oku tu kwathela tu kondjithe uulunde. Oha kambadhala aluhe okukwathela nokuli naayoni mboka ya yona omayono ga kwata miiti ya itedhulule, noya hedhe popepi naye. Mbela shono itashi hekeleke tuu! Uuna tatu dhiladhila kombinga yeidhidhimiko nedhiminopo lyaJehova, ohatu ka kala twa tokola toko okukala aadhiginini kuye nokwiitedhulula nziya uuna twa yono. Ngashingeyi natu ka taleni nkene egongalo lyopaKriste lya li lya longwa kombinga yokwiitedhulula.

SHOKA AALONGWA YAJESUS YA LI YA ILONGO KOMBINGA YOKWIITEDHULULA

11-12. Jesus okwa longitha ethaneko lini, e tu longe kutya Jehova oku na ehalo lyoku tu dhimina po? (Tala ethano .)

¹¹ Mesiasa okwa li a holoka methelemumvo lyotango E.N. Ngaashi sha popiwa moshitopolwa sha tetekele, Jehova okwa li a longitha Johannes Omuninginithi naJesus Kristus, ya longe aantu nkene sha simana okwiitedhulula. — Mat. 3:1, 2; 4:17.

¹² Momukokomoko gwuukalele we, Jesus okwa li a longo aapulakeni ye kutya He oku na ehalo lyoku tu dhimina po, uuna twa yono. Jesus okwa li e ya longo oshiilongomwa sha simana, sho e ya lombwele kombinga yethaneko lyomumati a kanene. Omumati ngoka omugundjuka, okwa li a hogolola okuza mo megumbo noku ka ninga iinima iiwinayi. Ihe lwanima, okwa li “a dhimbulula kutya ina katuka pandunge” nokwa shuna kegumbo. He okwa li a inyenge ngiini? Jesus okwa ti kutya manga omwanamati “e li kokule, he okwe mu mono, nokwa li e mu uvitile ohenda. Opo nduno he okwa matuka e ke mu tsakaneke e te mu papatele, nokwe mu hupita.” Omumati ngoka okwa li a pula he ngele ota vulu okulonga megumbo e li omupiya, oshoka ka li e shi ngele he ote mu dhimine po. Ihe he okwa li e na ehalo lyoku mu dhimina po. Okwe mu ithana “omumwandje nguka” e te mu taamba ko ishewe megumbo lye. He okwa ti: “Okwa li a kana, ihe okwa monika.” (Luk. 15:11-32) Sho Jesus a li megulu manga inee ya kombanda yevi, okwa li ha mono lwiikando nkene He ta ulukile olukeno aayoni oyendji mboka ya itedhulula. Ehokololo ndyoka Jesus e tu lombwele, otali hekeleke shili notali ulike nkene Tate yetu Jehova, e li omunamutimahenda.

13-14. Omuyapostoli Petrus okwa li a ilongo shike kombinga yokwiitedhulula, nokwa li a longo yalwe shike kombinga yako? (Tala wo ethano.)

¹³ Omuyapostoli Petrus okwa li a ilongo oshiilongomwa sha simana kuJesus kombinga yokwiitedhulula noyokudhimina po. Petrus okwa li a ningi omapuko ogendji, na Jesus okwa li a halelela oku mu dhimina po. Pashiholelwa, konima sho Petrus a idhimbike Omuwa gwe lutatu, okwa li e uvite nayi noonkondo, omolwoshinima shoka a ninga. (Mat. 26:34, 35, 69-75) Ihe konima sho Jesus a yumudhwa, okwa li a ihololele Petrus, manga e li oye awike. (Luk. 24:33, 34; 1 Kor. 15:3-5) Kapu na omalimbililo kutya pompito mpoka, Jesus okwa li e shi kutya Petrus okwa itedhulula, nokwa li e mu shilipaleke kutya okwe mu dhimina po. — Tala Markus 16:7.

¹⁴ Petrus okwa li e uvite ko nkene hashi kala, uuna wa itedhulula nowa dhiminwa po. Onkene okwa li a vulu okulonga yalwe kombinga yaashoka a ilonga. Konima yoshituthi shOpentekoste, Petrus okwa li a gandja oshipopiwa kAajuda mboka kaaye shi oitaali, noku ya yelithila kutya oya li ya dhipaga Mesiasa. Ihe okwa li e ya ladhipike pahole a ti: “Ano itedhululeni, ne mu galuke, oondjo dheni dhi dhimwe po, koshipala shOmuwa opo ku ze omathimbo gomatalaleko.” (Iil. 3:14, 15, 17, 19, 20) Onkene Petrus okwa li a ulike kutya okwiitedhulula ohaku inyengitha omuyoni a igaluluke, ano a lundulule omukalo gwe gwa puka gwokudhiladhila nosho wo iikala ye, nokutameka okuninga shoka tashi nyanyudha Jehova. Petrus okwa li wo a ulike kutya Jehova ota ka dhima po omayono gawo thiluthilu. Omimvo odhindji dha ka landula ko, Petrus okwa li a shilipaleke Aakriste a ti: “Omuwa okwe mu idhidhimikile owala, oshoka ina hala, ku kale nando ogumwe ta geelwa, ihe okwa hala, aantu ayehe ye ethe uulunde wawo.” (2 Pet. 3:9) Uuna twa itedhulula omolwomayono getu, nokuli nonando oga kwata miiti, ohashi tu hekeleke okutseya kutya Jehova ohe tu dhimine po thiluthilu.

15-16. (a) Omuyapostoli Paulus okwa li a ilongo ngiini kombinga yokudhimina po? (1 Timoteus 1:12-15) (b) Oshike tatu ka kundathana moshitopolwa tashi landula?

¹⁵ Paulus gwokuTarsus, okwa li a ningi iinima oyindji iiwinayi. Okwa li ha hepeke noonkondo aalanduli yaKristus. Aakriste oyendji oya li haya dhiladhila kutya ke na esiku a lundulule iikala ye. Ihe Jesus okwa li e shi kutya Paulus ota vulu okulundulula iikala ye nokwiitedhulula. Jesus naHe, oya li ya mono omaukwatya omawanawa gaPaulus. Jesus okwa ti: “Oye oshuma shandje sha hogololwa.” (Iil. 9:15) Jesus okwa li nokuli a longitha oshikumithalonga a kwathele Paulus a itedhulule. (Iil. 7:58–8:3; 9:1-9, 17-20) Paulus okwa li a itedhulula e ta ningi Omukriste. Jesus okwa li e mu pe iilonga a longe e li omuyapostoli. Paulus okwa popya lwiikando nkene a pandula Jehova naJesus sho ye mu ulukila ohenda nolukeno. (Lesha 1 Timoteus 1:12-15.) Paulus okwa lombwele aamwahe a ti: “Uuwanawa waKalunga ou lile po oku ku hila, wi itedhulule.” — Rom. 2:4.

¹⁶ Oshikando shimwe, Paulus okwa li a uvu kutya aamwatate yomegongalo lyomuKorinto, oya li ya pitike omulumentu ngoka a li ha yi momilalo dha nyata, a kale megongalo. Paulus okwa li e ya lombwele ya ninge shike? Shoka a li e ya lombwele otashi tu longo nkene Jehova ha ulike ohole, uuna ta yele ombedhi aapiya ye, nankene ha ulike ohenda, uuna ya itedhulula, nosho wo nkene tatu vulu oku mu holela. Moshitopolwa tashi landula, otatu ka kundathana muule kombinga yaashoka sha li sha ningwa megongalo lyomuKorinto.