Otu na olupandu sho Jehova he tu dhimine po

1-2. Omomukalo guni onkalo yaantu ya faathana naandjoka yomulumentu omugundjuka, ngoka a popiwa mokatendo kotango?

DHILADHILA andola komulumentu omugundjuka, ngoka a putukila muukwanegumbo wa yambapala. Ihe esiku limwe opwa holoka oshiponga, naavali ye oya sile mo. Shoka osha li she mu nikitha oluhodhi noonkondo. Ihe opwa li ishewe onkundana yimwe ombwinayi. Okwa mono kutya aavali ye oya li ye na oondjo odhindji, ndhoka ngashingeyi dhi na okukala komapepe ge. Dhiladhila nduno kutya pehala a thigulule iimaliwa, ota thigulula oondjo, naamboka ya lilwa oondjo ndhoka oya hala dhi futwe nziya. Omulumentu ngoka ke na esiku a ka fute oondjo adhihe ndhoka.

² Sha faathana, onkalo yetu oya faathana naandjoka yomulumentu omugundjuka. Aavali yetu yotango, Adam naEva, oya li ya gwanenena noya li moparadisa ombwanawa. (Gen. 1:27; 2:7-9) Oya li taya vulu okukala ya nyanyukwa sigo aluhe. Ihe shoka inashi ningwa. Oya kanitha uuthembahenda wokukala mOparadisa nosho wo okukala nomwenyo sigo aluhe. Oshike shoka oyana yawo ya thigulula kuyo? Ombiimbeli oye tu lombwela kutya: “Uulunde owe etwa muuyuni komuntu gumwe [Adam], nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Rom. 5:12) KuAdam, otwa thigulula ko uulunde, mboka hawu etitha eso. Uulunde mboka owa fa oondjo odhindjidhindji, ndhoka kaapu na nando ogumwe gwomutse ta vulu oku dhi futa. — Eps. 49:8.

3. Omolwashike omayono getu taga vulu okufaathanithwa ‘noondjo’?

³ Jesus okwa faathanitha uulunde ‘noondjo.’ (Mat. 6:12; Luk. 11:4) Uuna twa yono, ohatu kala twa fa tu na oondjo kuJehova. Okwa li ta vulu oku tu pula tu fute oondjo dhetu. Ando Jehova okwa li inaa ninga elongekidho e tu dhimine po, andola otatu ka futa owala oondjo dhetu ngele twa si noitatu ka vula we okukala nomwenyo. — Rom. 6:7, 23.

4. (a) Nopwaana ekwatho, oshike tashi vulu okuningilwa aalunde ayehe? (Episalomi 49:7-9) (b) MOmbiimbeli, oshitya “uulunde,” osha ukithwa kushike? (Tala oshimpungu “Uulunde.”)

⁴ Mbela otatu vulu ngaa okumona shoka Adam naEva ya kanitha? Itatu vulu oku shi mona kutse yene. (Lesha Episalomi 49:7-9.) Itatu vulu okukala tu na etegameno lyonakuyiwa nenge lyeyumuko, nopwaa na ekwatho lyasha. Uushili owo kutya, eso lyetu andola otali ka kala owala lya fa lyiinamwenyo. — Omuuv. 3:19; 2 Pet. 2:12.

5. Tate yetu omunahole okwe tu kwathele ngiini tu fute oondjo dhetu dhuulunde ndhoka twa thigulula? (Tala ethano.)

⁵ Mbela omulumentu omugundjuka, ngoka a popiwa metetekelo, ota ka kala e uvite ngiini, ngele omulumentu omuyamba okwa uvaneke okufuta oondjo dhe adhihe? Odhoshili kutya omulumentu ngoka ota ka kala a pandula noonkondo, nota ka taamba ko omagano ngoka nomaako agehe. Momukalo gwa faathana, Tate yetu omunahole, Jehova, okwe tu pa omagano ngoka ga futila po omayono ngoka twa thigulula kuAdam. Jesus okwa yelitha oshinima shoka ngeyi: “Kalunga okwa kala e hole uuyuni noonkondo, okwa gandja Omwana epona, opo kehe ngoka ta ulike kutya oku na eitaalo muye kaa hanagulwe po, ihe a ka mone omwenyo gwaaluhe.” (Joh. 3:16) Shimwe ishewe, omagano ngoka ohaga vulu oku tu kwathela tu kale tu na ekwatathano ewanawa naJehova.

6. Iitya yini yomOmbiimbeli tatu ka kundathana moshitopolwa shika, nomolwashike?

⁶ Ongiini tatu vulu okumona mo uuwanawa momagano ngaka omakumithi, opo omayono nenge “oondjo” dhetu dhi dhimwe po? Eyamukulo kepulo ndyoka otali adhika miitya mbyoka ya popiwa mOmbiimbeli ngaashi, ehanganitho, ekwatakanitho, okuhanganitha, ekulilo, ofuto nosho wo okutalika ko omuyuuki. Moshitopolwa shika, otatu ka kundathana eityo lyiitya ayihe mbyoka. Sho tatu tedhatedha kwaashoka Jehova a ninga, opo e tu dhimine po, olupandu lwetu otalu ka koka.

ELALAKANO: JEHOVA OKWA HALA TU HANGANE NAYE

7. (a) Oshike ishewe Adam naEva ya li ya kanitha? (b) Tu li oluvalo lwaAdam naEva, oshike unene twa pumbwa? (Aaroma 5:10, 11)

⁷ Sho Adam naEva ya yono, inaya kanitha owala etegameno lyokukala nomwenyo sigo aluhe, ihe oya kanitha wo ekwatathano lyawo naHe, Jehova. Adam naEva oya li oshitopolwa shuukwanegumbo waKalunga. (Luk. 3:38) Ihe sho inaaya vulika kuJehova, okwe ya tidha mo muukwanegumbo we, manga inaaya tameka okumona aanona. (Gen. 3:23, 24; 4:1) Onkee ano tu li oluvalo lwawo, otwa pumbwa okuhanganithwa naJehova. (Lesha Aaroma 5:10, 11.) Sha hala okutya, otwa pumbwa okukokeka ekwatathano ewanawa naye. Sha ikolelela kembo limwe lyuuyelele, oshitya shOshigreka shoka sha tolokwa “okuhanganitha,” otashi vulu okuukithwa “kokupanga uukuume nomutondi gwoye.” Shoka oshikumithi, Jehova oye a katuka tango onkatu, opo tu vule okuninga ookuume ke. Ngiini mbela?

ELONGEKIDHO: EKWATAKANITHO

8. (a) Ekwatakanitho oshike? (b) Okuhanganitha oshike?

⁸ Ekwatakanitho olyo elongekidho ndyoka Jehova a tula po, opo a kale ishewe e na ekwatathano ewanawa naantu aalunde. Olya kwatela mo okupingena po oshinima shontumba noshinima shoka shi na ongushu yi thike pusho. Momukalo gwa tya ngeyi, shoka sha kanithwa nenge sha hanagulwa po, otashi vulu okupingenwa po. Omanyolo gopaKriste gOshigreka oga longitha oshitya okuhanganitha, shoka shi na eityo lya faathana noshitya “ekwatakanitho.” (Rom. 3:25, yelekanitha NW.) Edhiminopo ohali shi ningitha tashi wapa, opo omuntu a kale e na ombili naKalunga nokukale e na ekwatathano ewanawa naye.

9. Elongekidho lini lyopakathimbo Jehova a li a ningi, opo omayono gAaisraeli ga vule okudhimwa po?

⁹ Opo Aaisraeli ya vule okunyanyukilwa ekwatathano ewanawa naye, Jehova okwa li a tula po elongekidho lyopakathimbo, opo omayono gawo ga dhimwe po. MuIsraeli shonale, Esiku lyEkwatakanitho olya li hali dhimbulukiwa omumvo kehe. Mesiku ndyoka, omuyambi omukuluntu okwa li ha yamba omafikiloyambo giinamwenyo pehala lyaantu. Oshoshili kutya omayambo giinamwenyo kaga li ga vulu okukulila omayono gaantu thiluthilu, oshoka iinamwenyo inayi simana yi vule aantu. Ihe Jehova okwa li e na ehalo lyokudhimina po Aaisraeli, sho taya gandja omayambo ngoka a tegelela kuyo, shampa ashike ya iyela ombedhi. (Heb. 10:1-4) Shimwe ishewe, elongekidho ndyoka nosho wo omayonondjambo ngoka ya li haya gandja pandjigilile, oga li ga kwathele Aaisraeli ya mone kutya yo aalunde noya li ya pumbwa sha shilwe shi kuthe po omayono gawo thiluthilu.

10. Elongekidho lini tali kalelele ndyoka Jehova a li a tula po li na ko nasha nokudhima po omayono?

¹⁰ Jehova okwa li e na momadhiladhilo elongekidho tali kalele, opo a dhime po omayono getu? Okwa li a ningi elongekidho, opo Omwana omuholike a igandje “a ninge eyambo lumwe aluke, opo a kuthe po oondjo dhaantu.” (Heb. 9:28) Jesus okwa gandja “omwenyo gwe, gu li iikulila omolwoyendji.” (Mat. 20:28) Ekulilo oshike?

OFUTO: EKULILOYAMBO

11. (a) Sha ikolelela kOmbiimbeli, ekulilo oshike? (b) Oshike sha li sha pumbiwa, opo ekulilo ndyoka li futwe?

¹¹ PaMbiimbeli, ekulilo olyo ofuto ndjoka ya futwa, opo aantu ya kwatakanithwe noya hanganithwe naKalunga.a Pataloko lyaJehova, ekulilo olye shi ningitha tashi wapa, opo shoka sha li sha kanithwa, shi futilwe po. Omomukalo guni mbela? Dhimbulukwa kutya, Adam naEva, oya li ya kanitha omwenyo gwa gwanenena, netegameno lyokukala nomwenyo sigo aluhe. Onkee ofuto yekulilo oyi na okukala yi na ongushu yi thike pwaashoka sha kanithwa. (1 Tim. 2:6) Ekulilo olya li owala tali vulu okufutwa komulumentu omukuluntu, ngoka (1) a gwanenena; (2) ta vulu okukala nomwenyo sigo aluhe kombanda yevi; (3) e na ehalo lyokugandja po omwenyo gwe omolwetu. Kungawo, omwenyo gwomuntu ngoka, ogwa li tagu vulu okufutila po omwenyo ngoka gwa kanithwa.

12. Omolwashike Jesus a vulu okugandja ofuto yekulilo ndjoka ya li ya pumbiwa?

¹² Natu taleni komatompelo gatatu kutya omolwashike Jesus a li a vulu okufuta ofuto yekulilo. Lyotango, (1) Okwa li a gwanenena, ano “ina yona nando.” (1 Pet. 2:22) Etiyali, (2) Molwaashoka okwa gwanenena, okwa li ta vulu okukala nomwenyo sigo aluhe kombanda yevi. Netitatu, (3) Okwa li e na ehalo lyokugandja po omwenyo gwe omolwetu. (Heb. 10:9, 10) Jesus okwa li omulumentu a gwanenena, ngaashi owala omulumentu gwotango Adam, manga inaa yona. (1 Kor. 15:45) Onkene okupitila meso lye, Jesus okwa li a vulu okufutila po eyono lyaAdam, mokupingena po shoka Adam a kanitha. (Rom. 5:19) Kungawo, Jesus okwa ningi “Adam ngoka a hugunine.” Inapu pumbwa we omuntu gulwe a gwanenena, e ye a futile po shoka sha kanithwa kuAdam. Jesus okwa si “lumwe aluke.” — Heb. 7:27; 10:12.

13. Eyooloko lini li li pokati kelongekidho lyekwatakanitho nekulilo?

¹³ Eyooloko lini nduno li li pokati kelongekidho lyekwatakanitho nekulilo? Elongekidho lyekwatakanitho onkatu ndjoka Kalunga a katuka, opo a kale ishewe nekwatathano ewanawa naantu. Ekuliloyambo olyo ofuto ndjoka ya gandjwa, opo aantu aalunde ya vule okukwatakanithwa naKalunga. Ofuto ndjoka oyi lilwe po kombinzi yaJesus yi na ondilo, ndjoka ya tilwahi omolwetu. — Ef. 1:7; Heb. 9:14.

IIZEMO: OFUTO NOSHO WO OKUTALIKA KO AAYUUKI

14. Oshike tatu ka kundathana ngashingeyi, nomolwashike?

¹⁴ Elongekidho lyekwatakanitho olya eta iizemo yini? Ombiimbeli oya longitha omautumbulilo ogendji, yi yelithe omauwanawa ngoka ge etithwa kelongekidho ndyoka. Nonando omaityo gomautumbulilo ngoka oga faathana, kehe oshitya otashi tsu omuthindo oshitopolwa shontumba shelongekidho lyekwatakanitho, ndyoka lye shi ningitha tashi wapa, opo Jehova e tu dhimine po. Sho tatu konakona iitya mbika, otatu ka mona wo nkene ye tu guma paumwene.

15-16. (a) MOmbiimbeli, uutumbulilo “ofuto ya yeleka,” owa hala okutya shike? (b) Shika ohashi tu gumu ngiini?

¹⁵ Ombiimbeli otayi ti kutya omolwofuto yekulilo, otwa mangululwa ko kuulunde. Omuyapostoli Petrus okwe shi yelitha momukalo nguka: “Omwa tseya iikulila mbyoka ye mu kulile mokukala kweni kwonale, hoka mwe ku thigulula kooho, oyo kaya li oshinima hashi hulu po, ngaashi oshisiliveli nenge oshingoli. One omwa kulilwa nombinzi yi na ondilo yaKristus, ngoka a fa onzigona yaa na oshipo nenge onyata.” — 1 Pet. 1:18, 19.

¹⁶ Omolwekuliloyambo, otatu vulu okumanguluka ko kuulunde neso, iinima mbyoka hayi tu etele okumona iihuna okundji. (Rom. 5:21) Otwa pandula noonkondo Jehova naJesus, molwaashoka otwa mangululwa ko kuulunde neso, omolwa ombinzi nenge omwenyo gwaJesus gu na ondilo. — 1 Kor. 15:22.

17-18. (a) Okutalika ko aayuuki, osha hala okutya shike? (b) Shika ohashi tu gumu ngiini?

¹⁷ Oku talika ko tu li aayuuki, osha hala okutya, Jehova ina tegelela tu fute oondjo dhomayono ngoka ha tu ningi. Nonando ihe tu futitha oondjo dhomayono getu, iha taaguluka omithikampango dhe dhuuyuuki. Jehova ihe tu tala ko aayuuki molwaashoka twe shi ilongela, noiha nyanyukilwa omayono getu. Ihe oku na ehalo lyokudhima po omayono getu, molwaashoka ohatu ulike eitaalo melongekidho lyekwatakanitho nomofuto yekuliloyambo. — Rom. 3:24; Gal. 2:16.

¹⁸ Mbela shino otashi ti shike kutse? Mboka ya hogololwa ya ka pangele pamwe naJesus megulu, oya talika ko nale aayuuki, ye li oyana yaKalunga. (Tit. 3:7; 1 Joh. 3:1) Omayono gawo oga dhimwa po. Oya fa owala inaaya yona omayono ngoka, onkene oya gwana oku ka kala mUukwaniilwa. (Rom. 8:1, 2, 30) Mboka ye na etegameno lyoku ka kala kombanda yevi, oya talika ko aayuuki, ye li ookuume kaKalunga, nomayono gawo oga dhimwa po. (Jak. 2:21-23) Ongundu onene, ndjoka tayi ka hupa puArmagedon, oyi na etegameno lyoku ka kala nomwenyo sigo aluhe. (Joh. 11:26) ‘Aawanawa naawinayi’ mboka ya sa, otaya ka yumudhwa. (Iil. 24:15; Joh. 5:28, 29) Lwahugunina, aapiya ayehe yaJehova aavuliki kombanda yevi otaya ka ya “memanguluko nomeadhimo lyaana yaKalunga.” (Rom. 8:21) Otwa tegelela ethimbo ndyoka sho tatu ka kala tu na ekwatathano ndyoka naTate yetu, Jehova.

19. Onkalo yetu oya lundulukile ngiini kuuwanawa? (Tala wo oshimpungu “Otashi ti shike kutse?”)

¹⁹ Odhoshili kutya onkalamwenyo yetu oya faathana naandjoka yomulumentu omugundjuka ngoka a tumbulwa metetekelo, ngoka a li a kanitha kehe shimwe, e ta thigulula oondjo odhindji, ndhoka a li kee na esiku e dhi fute. Ihe otatu pandula Jehova, sho e tu kwathele. Onkalo yetu oya lunduluka omolwelongekidho lyekwatakanitho nosho wo ofuto yekulilo. Eitaalo lyetu muJesus Kristus, ohali shi ningitha tashi wapa tu hupithwe, nenge tu mangululwe ko kuulunde neso. Uuna Jehova e tu dhimine po omayono getu, ohaga kala ga fa inaaga ningwa. Shoka sha simanenena kwaayihe osho kutya, ngashingeyi otatu vulu okukala nekwatathano ewanawa naTate yetu omunahole gwomegulu, Jehova.

20. Oshike tatu ka kundathana moshitopolwa tashi landula?

²⁰ Uuna tatu tedhatedha kwaashoka Jehova naJesus ye tu ningila, omitima dhetu ohadhi kala dha udha olupandu. (2 Kor. 5:15) Nopwaa na ekwatho lyawo, ando katu na etegameno lyasha. Ihe mbela edhiminopo lyaJehova otali ti naanaa shike kutse pauhandimwe? Shoka osho tatu ka kundathana moshitopolwa tashi landula ko.