Ilonga okudhiladhila ngaashi Jehova naJesus haya dhiladhila

1-2. Oshike sha kwatelwa mo mokukala tu hole Jehova nongiini Jesus a ulike kutya oku hole Jehova?

“HOLA Jehova Kalunga koye nomutima gwoye aguhe, nomwenyo gwoye aguhe, noonkondo dhoye adhihe, nomadhiladhilo goye agehe.” (Luk. 10:27) Jesus okwa yelitha kutya shika osho oshipango shoka sha simanenena mOmpango yaMoses. Ndhindhilika kutya ohole yetu yokuhola Jehova oya kwatela mo omutima gwetu, ngoka gwa kwatela mo omahalo nosho wo omaiyuvo getu. Oya kwatela mo wo eigandjo lyetu kuKalunga nomutima aguhe nosho wo oonkondo dhetu. Ihe ohole ndjoka oya kwatela mo wo omadhiladhilo getu, ngoka ga kwatela mo omukalo moka hatu dhiladhila kombinga yiinima. Odhoshili kutya katu na esiku tu uve ko thiluthilu nkene Jehova ha dhiladhila. Ihe otatu vulu okuuva ko nawa nkene Kalunga ha dhiladhila mokukonakona “omadhiladhilo gaKristus,” molwaashoka Jesus oha dhiladhila thiluthilu ngaashi He. — 1 Kor. 2:16.

² Jesus okwa li e hole Jehova nomadhiladhilo ge agehe. Okwa li e shi shoka Kalunga a tegelela a ninge nokwa li a tokola toko okukala metsokumwe naashoka, nonando okwa li e shi kutya ota ka mona iihuna omolwokulonga shoka shi li mondjila. Jesus okwa kala ta gandja eitulomo kokulonga ehalo lyaHe, noka li a etha nando osha shi ye moshipala elalakano ndyoka.

3. Omuyapostoli Petrus okwa li a ilongo shike kuJesus, nokwa ladhipike Aakriste ooyakwawo ya ninge shike? (1 Petrus 4:1)

³ Petrus naayapostoli ooyakwawo oya li ye na uuthembahenda wokukala pamwe naJesus nokwiilonga nkene ha dhiladhila. Sho Petrus, a nyola ontumwafo ye yotango ya nwethwa mo, okwa li a ladhipike Aakriste ya kale nomadhiladhilo ga fa gaKristus. (Lesha 1 Petrus 4:1.) Petrus okwa longitha oshitya shoka sha li hashi longithwa muukwiita sho a nyola a ti: “Ilongekidheni.” Onkee ano, ngele Aakriste oya kala ye na omadhiladhilo ga fa gaJesus, otashi ke ya kwathela ya kale ye na oshikondjitho shi na oonkondo, opo ya kondjithe egamo lyokuninga shoka sha puka nosho wo uuyuni mbuka tawu pangelwa kuSatana. — 2 Kor. 10:3-5; Ef. 6:12.

4. Ongiini oshitopolwa shika tashi vulu oku tu kwathela tu landule omayele gaPetrus?

⁴ Otatu ka konakona omukalo moka Jesus ha dhiladhila nokutala nkene tatu vulu oku mu holela. Otatu ka ilonga nkene tatu vulu (1) okuholela omukalo moka Jehova ha dhiladhila, shoka tashi ketu kwathela atuheni tu kale medhiladhilo limwe, (2) okukala aaifupipiki noshi (3) okukala hatu i kwata nawa nenge tu na oondunge mokukala twi inekela muJehova okupitila megalikano.

HOLELA OMUKALO GWAJEHOVA GWOKUDHILADHILA

5. Ongiini pompito yimwe, Petrus a ndopa okudhiladhila ngaashi Jehova?

⁵ Natu ka taleni nkene pompito yimwe, Petrus a ndopa okudhiladhila ngaashi Jehova. Jesus okwa lombwele aayapostoli ye kutya oku na okuya kuJerusalem, hoka ta ka gandjwa po kaawiliki yomalongelokalunga, ta ka hepekwa nonyanya nokudhipagwa. (Mat. 16:21) Otashi vulika Petrus, a li e shi mono oshidhigu okwiitaala kutya Jehova ota ka etha Jesus, ngoka e li etegameno lyaIsraeli naMesiasa omuuvanekwa, a dhipagwe. (Mat. 16:16) Onkee ano, Petrus, okwa ithana po Jesus e ta ti kuye: “Omuwa, ino popya iinima ya tya ngaaka; ito ka ningilwa nando iinima mbyoka.” (Mat. 16:22) Molwaashoka Petrus, ka li a dhiladhila ngaashi Jehova moshinima shoka, kaya li medhiladhilo limwe naJesus.

6. Omomukalo guni Jesus a ulike kutya omadhiladhilo ge oge li metsokumwe nomadhiladhilo gaJehova?

⁶ Okudhiladhila kwaJesus, okwa li thiluthilu metsokumwe nokudhiladhila kwaHe gwomegulu. Jesus okwa ti kuPetrus: “Za po pungame, Satana! Ongoye endangalati mondjila yandje, oshoka ito dhiladhila ngaashi Kalunga, ihe ongaashi aantu.” (Mat. 16:23) Otashi vulika Petrus a li e na omatompelo omawanawa, ihe Jesus okwa tindi okutaamba ko omayele ge. Oshinima shoka otashi tu longo sha. Jesus okwa li e shi kutya okukala i ihole mwene, kasha li ehalo lyaJehova. Pompito ndjoka, Petrus okwa ilongo oshiilongomwa sha simana kombinga yokukala ha dhiladhila ngaashi Kalunga.

7. Petrus okwa ka ulika ngiini lwanima kutya okwa hala okukala ha dhiladhila ngaashi Jehova? (Tala ethano )

⁷ Lwanima, Petrus okwa ulike kutya okwa hala okukala ha dhiladhila ngaashi Jehova. Ethimbo osho lya thiki, opo aantu yomiigwana yilwe mboka inaaya pita etanda ya ninge oshitopolwa shoshigwana shaJehova. Petrus okwa li a pewa oshinakugwanithwa shokuuvithila Kornelius, ngoka kee shi Omujuda, nokwa li gumwe gwomwaamboka kaaye shi Aajuda, mboka ya ningi Aakriste yotango. Aajuda kaya li haya endathana naantu mboka kaaye shi Aajuda, onkene itashi kumitha sho Petrus a li a pumbwa ekwatho, opo i ilongekidhile oshinakugwanithwa she. Sho Petrus a uvu ko ehalo lyaKalunga moshinima shika, okwa lundulula etaloko lye. Noshizemo, sho a tumwa e ku uvithile Kornelius, Petrus okwa yi kee na “omalimbililo gasha.” (Iil. 10:28, 29) Okwa uvithile Kornelius naanegumbo lye, e taya ningithwa. — Iil. 10:21-23, 34, 35, 44-48.

8. Ongiini tatu vulu okuulika kutya okudhiladhila kwetu oku li metsokumwe nokudhiladhila kwaJehova? (1 Petrus 3:8)

⁸ Konima yomimvo, Petrus okwa ladhipike Aakriste ooyakwawo ya kale ye na “edhiladhilo limwe” (Lesha 1 Petrus 3:8.) Tu li oshigwana shaJehova, otatu vulu okukala nedhiladhilo limwe mokuholela okudhiladhila kwaJehova, hoka tatu ku adha mOohapu dhe. Pashiholelwa, Jesus okwa li a ladhipike aalanduli ye, ya pitithe komeho Uukwaniilwa monkalamwenyo yawo. (Mat. 6:33) Onkene, otashi vulika omuuvithi megongalo lyeni a tokole okuya miilonga yontumba yethimbo lyuudha. Pehala lyoku mu teya omukumo, natu mu kwathele noku mu lombwela kutya okwiitulila po elalakano ewanawa.

KALA OMWIIFUPIPIKI

9-10. Jesus okwa li a ulike ngiini kutya omwiifupipiki lela?

⁹ Ongulohi ndjoka ya tetekele eso lye, Jesus okwa longo Petrus nosho wo aayapostoli yalwe oshiilongomwa sha simana kombinga yeifupipiko. Ongula yesiku ndyono, Jesus okwa tumu Petrus naJohannes, ya ka longekidhe uulalelo wa hugunina, mboka a li ta ka lya pamwe nayo manga inaa sa. Omalongekidho ngoka otashi vulika ga li ga kwatela mo okushilipaleka kutya oshiyaha noshihanduke opo yi li, opo oompadhi dhaayenda dhi yogwe manga inaaya tameka okulya. Ihe mbela olye a li ta ka yoga oompadhi dhawo, oshilonga shoka tashi pula eifupipiko?

¹⁰ Nopwaa na okukakadhala, Jesus okwa ulike eifupipiko inaali monika nando onale. Aayapostoli oya li ya kumwa, sho Jesus a ningi oshinima shoka olundji hashi ningwa kaayakuli. Jesus okwa ihula onguwo yokombanda, e ta kutha oshihanduke, e te shi idhingile moshiya nokwa tula omeya moshiyaha, e ta tameke okuyoga oompadhi dhawo. (Joh. 13:4, 5) Otashi vulika sha li sha pula ethimbo ele okuyoga oompadhi dhAayapostoli ayehe 12, mwa kwatelwa Judas, ngoka a li te ke mu gwaaleka. Nonando ongawo, Jesus okwa longo oshilonga shoka neifupipiko. Opo nduno Jesus okwe ya yelithile a ti: “Omu shi ngaa kutya omolwashike nda yogo oompadhi dheni? Omu li mondjila, sho hamu ithana ndje ‘Muhongi’ nosho wo ‘Omuwa,’ oshoka ongame naanaa ngoka. Onkee ano ngele ngame, Omuwa nOmuhongi, onda yoga oompadhi dheni, nane wo omu na okukala hamu yogathana koompadhi.” — Joh. 13:12-14.

11. Petrus oku ulike ngiini kutya okwiilonga okukala omwiifupipiki? (1 Petrus 5:5) (Tala wo ethano.)

¹¹ Petrus, okwiilonga okukala omwiifupipiki koshiholelwa shaJesus sheifupipiko. Konima sho Jesus a shuna megulu, Petrus okwa li a longo oshikumithalonga, sho a aludha omulumentu ngoka a valwa oshilema. (Iil. 1:8, 9; 3:2, 6-8) Ongundu onene yaantu oya mono oshikumithalonga shoka noya gongalele Petrus. (Iil. 3:11) Ihe Petrus ka li a hala okupewa esimano kaantu, nonando okwa putukila momudhingoloko moka aantu ya pititha komeho okupewa esimano. Pehala lyaashono, Petrus okwa ulike eifupipiko nokwa lombwele aantu ya gandje esimano kuJehova naJesus, sho a ti : “Omulumentu, nguka mú wete nomu mu shi, okwa aludhwa okupitila medhina lyaJesus nomolweitaalo, ndyoka tu na medhina lye.” (Iil. 3:12-16) Oohapu ndhoka Petrus a longitha montumwafo ndjoka a nyolele Aakriste, yi na ko nasha nokukokeka eifupipiko, otadhi tu dhimbulukitha oshiningwanima sho Jesus a idhingile oshihanduke moshiya nokuyoga oompadhi dhaayapostoli. — Lesha 1 Petrus 5:5.

12. Ngaashi Petrus, ongiini natse tatu vulu okutsikila okukokeka eifupipiko?

¹² Otatu vulu okulandula oshiholelwa shaPetrus, mokukokeka eifupipiko. Dhimbulukwa kutya eifupipiko lyashili olya kwatela mo oshindji shi vulithe owala okulongitha oohapu dhu uka. Oshitya “eifupipiko,” shoka Petrus a longitha, otashi ulike kutya eifupipiko olya kwatela mo omukalo moka twi itala ko nosho wo yalwe. Ohatu ningile yalwe iinima iiwanawa, molwaashoka otu hole Jehova notu hole aantu, ihe hamolwaashoka twa hala esimano. Ngele ohatu longele Jehova nokuyakula aamwatate naamwameme nenyanyu momukalo kehe tatu vulu, nonando yalwe ihaya ndhindhilike shoka hatu ningi, ohatu gandja uumbangi kutya tse aaifupipiki. — Mat. 6:1-4.

OMU NA “OKWIIKWATA NAWA”

13. Yelitha shoka sha kwatelwa mo ‘mokwiikwata nawa.’

¹³ Okukala ho ‘i kwata nawa,’ nenge ‘noondunge,’ yelekanitha NW, okwa kwatela mo shike? (1 Pet. 4:7) Omukriste ngoka ha ikwata nawa nenge e na oondunge, oha ningi ngaashi ta vulu a ninge omatokolo omawanawa ngoka taga ulike omadhiladhilo gaJehova. Omukriste a tya ngawo, oku shi kutya kapu na shoka sha simana unene monkalamwenyo ye, shi vulithe ekwatathano lye naJehova. Oku na etaloko lili pandjele kombinga ye mwene, noku shi kutya ke shi iinima ayihe. Oha ulike kutya okwa inekela muJe hova mokupopya naye aluhe okupitila megalikano.

14. Ongiini pompito yimwe, Petrus a ndopa okwiinekela muJehova?

¹⁴ Ongulohi ya hugunina ndjoka ya tetekele eso lye, Jesus okwa londodha aalongwa ye a ti: “Amuhe otamu ka thiga ndje po uusiku wonena.” Petrus, okwa yamukula nomukumo a ti: “Nonando yalwe oye ku thige po, ngame kandi na siku ndi ku thige po!” Ongulohi ndjoka, Jesus okwa londodha yamwe yomaalongwa ye a ti: “Kaleni mwa tonata nokugalikana aluhe.” (Mat. 26:31, 33, 41) Ando Petrus okwa taambele ko omayele ngoka, andola okwa vulu okukala e na uulaadhi wokuulika kutya ye omulongwa gwaJesus. Ihe pehala lyaashono, Petrus, okwi idhimbike Omuwa gwe nokwa ipe oombedhi. — Mat. 26:69-75.

15. Ongiini Jesus a kala ha ikwata nawa nenge noondunge, pethimbo lyuusiku we wa hugunina wonkalamwenyo ye kombanda yevi?

¹⁵ Jesus okwa li a inekela thiluthilu muJehova. Nonando Jesus okwa li a gwanenena, okwa li a galikana lwiikando. Shoka oshe mu pe uulaadhi, opo a longe ehalo lyaJehova. (Mat. 26:39, 42, 44; Joh. 18:4, 5) Petrus, ka li nando a dhimbwa sho Jesus a galikana lwiikando ongulohi ye ya hugunina kombanda yevi.

16. Ongiini Petrus, a ulike kutya ngashingeyi oha i kwata nawa, nenge oku na oondunge? (1 Petrus 4:7)

¹⁶ Mokweendela ko kwethimbo, Petrus, okwi ilongo okukala a inekela muJehova shi vulithe nale, okupitila megalikano. Sho Jesus a yumuka, okwa shilipaleke Petrus nosho wo aayapostoli yalwe kutya ota ya ka pewa ombepo ondjapuki, opo ya vule okugwanitha po iilonga yawo yokuuvitha. Ihe Jesus okwe ya lombwele ya tegelele muJerusalem, sigo oosho oshinima shoka sha ningwa. (Luk. 24:49; Iil. 1:4, 5) Petrus, okwa li a ningi po shike manga a tegelela? Petrus, nosho wo Aakriste ooyakwawo, “oya kala taya galikana ya mana mo.” (Iil. 1:13, 14) Lwanima, montumwafo ye yotango, Petrus, okwa ladhipike Aakriste ooyakwawo ya kale haya i kwata nawa, nenge ye na oondunge nokukala ya inekela muJehova okupitila megalikano. (Lesha 1 Petrus 4:7.) Petrus okwa ilongo okukala a inekela muJehova, nokwa ningi ongudhi yegongalo. — Gal. 2:9.

17. Nonando otu na uunkulungu wokuninga iinima yi ili noyi ili paunshitwe, oshike tu na okutsikila okuninga? (Tala wo ethano.)

¹⁷ Opo tu kale hatu i kwata nawa nenge tu na oondunge, otwa pumbwa okugalikana kuJehova lwiikando. Otwa pumbwa okutsikila okugalikana kuJehova nonando otu na uunkulungu wokuninga iinima yi ili noyi ili paunshitwe. Onkee ano, otwa pumbwa okugalikana kuJehova e tu pe ewiliko, unene tuu uuna tatu ningi omatokolo ga simana, tu na einekelo kutya oku shi shoka sha dhenga mbanda kutse.

18. Ongiini tatu vulu okukala hatu dhiladhila ngaashi Jehova?

¹⁸ Otu na olupandu sho Jehova e tu shita momukalo moka hatu vulu okuholela uukwatya we. (Gen. 1:26) Odhoshili kutya itatu vulu okuholela Jehova thiluthilu. (Jes. 55:9) Ihe ngaashi Petrus, otatu vulu okukala hatu dhiladhila ngaashi Jehova shi vulithe nale. Natu ningeni ngawo mokutsikila okuholela omukalo moka Kalunga ha dhiladhila, mokukala aaifupipiki nomokukala hatu i kwata nawa nenge noondunge.