Oshikaha shaJehova kashi shi oshifupi

1. Ongiini Moses a ulike kutya okwiinekela muJehova, sho a li ta wilike Aaisraeli okuza muEgipiti?

MOSES oku li gumwe gwomwaamboka ya popiwa membo lyAahebeli, ye na eitaalo endhindhilikwedhi. (Heb. 3:2-5; 11:23-25) Okwa ulike kutya oku na eitaalo, sho a li ta wilike Aaisraeli okuza muEgipiti. Ka li a etha a tilithwe kuFarao netangakwiita lye. Molwaashoka okwa li a inekela muJehova, okwa wilike aantu ya taaguluke Efuta etiligane, nolwanima omombuga. (Heb. 11:27-29) Oyendji yomAaisraeli oya kanitha einekelo muJehova kutya ote ke ya sila oshimpwiyu, ihe Moses okwa tsikile okukala a inekela muKalunga ke. Eitaalo lyaMoses kalya li osima yowala, molwaashoka Kalunga okwa longo oshikumithalonga, sho a gandja iikulya nomeya kaantu mboka ya li mombuga.a — Eks. 15:22-25; Eps. 78:23-25.

2. Omolwashike Kalunga a pula Moses a ti: “Oshikaha shOmuwa oshifupi nani”? (Numeri 11:21-23)

² Nonando Moses okwa li e na eitaalo lya kola, konima yomumvo gumwe sho Aaisraeli ya mangululwa mo muupika waEgipiti, okwa li a limbililwa ngele Jehova ota ka vula ngaa okugandja onyama koshigwana she. Moses ka li a vulu okuuva ko kutya ongiini Jehova a li ta ka gandja onyama ya gwana okukutitha aantu omamiliyona, mboka ya yunga ontanda mombuga. Onkee Jehova okwa pula Moses a ti: “Oshikaha shOmuwa oshifupi nani?” (Lesha Numeri 11:21-23.) Uutumbulilo “oshikaha shOmuwa,” owa ukithwa kombepo ondjapuki yaKalunga nenge koonkondo ndhoka ha longitha. Niitya yimwe, Jehova okwa li ta pula Moses kutya,‘Mbela oto dhiladhila kutya itandi vulu okuninga shoka nda ti otandi ka ninga?’

3. Omolwashike tu na okukala nohokwe moshiholelwa shaMoses nosho wo shaIsraeli?

³ Mbela owu na omalimbililo ngele Jehova ote ke ku pa shoka wa pumbwa nosho wo yaandjeni? Kutya nduno osho nenge hasho, natu ka konakoneni oshimoniwa shaMoses nosho wo shAaisraeli mboka ya li ya kanitha einekelo muKalunga, kutya ote ke ya sila oshimpwiyu. Omakotampango gOmbiimbeli ngoka ga kwatelwa mo, otage ke tu kwathela tu kokeke einekelo lyetu kutya oshikaha shaJehova kashi shi oshifupi.

ILONGA KUMOSES NOKAAISRAELI

4. Oshike tashi vulika sha li sha ningitha oyendji ya kale ya limbililwa ngele Jehova ote ke ya sila oshimpwiyu?

⁴ Natu ka konakoneni ashihe shoka sha kwatelwa mo moshinima shika. Oshigwana shaIsraeli nosho wo “aantu yalwe aayeni,” mboka kaaya li Aaisraeli, oya li mombuga onene uule wethimbo lyontumba, sho ya li taya zi kuEgipiti ya uka kEvi lyEuvaneko. (Eks. 12:38; Deut. 8:15) Ongundu yaamboka kaaye shi Aaisraeli, oya vulwa okulya omanna nosho wo Aaisraeli oyendji mboka ye ya wayimine mokungungutula. (Num. 11:4-6) Aantu oya tameke okukala ya halelela iikulya mbyoka ya li haya li kuEgipiti. Molwaashoka Moses okwa li ta thiminikwa kaantu, okwa li ta dhiladhila kutya oku na oku ya pa iikulya kuye mwene. — Num. 11:13, 14.

5-6. Oshike tatu vulu okwiilonga kunkene ongundu yaayeni ya li ya nwetha mo Aaisraeli oyendji?

⁵ Aaisraeli oya li ya nwethwa mo kokwaa na olupandu hoka kwa ulikwa kongundu yaayeni. Natse wo otatu vulu okunwethwa mo kombepo yaamboka kaaye na olupandu, e tatu kala inaatu gwanenwa kwaashoka Jehova te tu pe. Shoka otashi vulu oku tu ningilwa ngele otwa kala twa halelela shoka twa li tu na nale, nenge ngele otwa kala twa sila yalwe ondumbo omolwiinima mbyoka ye na. Ihe otatu ka kala twa nyanyukwa, ngele otwa ilongo okukala twa gwanenwa kwaashoka tu na, kutya nduno otu li moonkalo dhini.

⁶ Aaisraeli oya li ye na okudhimbulukwa kutya Kalunga okwe ya shilipaleke kutya, uuna ya thiki mevi lyawo epe, otaya ka nyanyukilwa iinima oyindji. Euvaneko ndyoka olya li tali ka gwanithwa po mEvi lyEuvaneko, ihe hapethimbo taya ende mombuga. Sha faathana, pehala lyokugandja eitulomo kwaashoka tashi vulika kaatu likole muuyuni mbuka, osha simana tu dhiladhile kwaashoka Jehova a uvaneka kutya ote ke tu pa muuyuni uupe. Otatu vulu wo okutedhatedha komanyolo ngoka taga vulu oku tu kwathela tu kokeke einekelo lyetu muJehova.

7. Omolwashike tatu vulu okukala tu na einekelo kutya oshikaha shaJehova kashi shi oshifupi?

⁷ Natango otashi vulika wu ipule kutya omolwashike Kalunga a pula Moses a ti: “Oshikaha shOmuwa oshifupi nani?” Jehova otashi vulika a li a hala okukwathela Moses kaa dhiladhile owala kunkene oshikaha She oshinankondo, ihe okudhiladhile wo kwaashoka tashi vulu okuninga. Kalunga okwa li ta vulu okugandja onyama ya gwana kAaisraeli, nonando oya li mokati kombuga. Kalunga okwa ulike kutya oku na oonkondo ‘noshikaha she shoonkondo nokwooko kwe kwa taganana.’ (Eps. 136:11, 12) Onkee ano, uuna tu li momamakelo, katu na okukala twa limbililwa ngele oshikaha shaJehova otashi ke tu yambidhidha pauhandimwe. — Eps. 138:6, 7.

8. Ongiini tatu vulu okuyanda okuninga epuko lya faathana naandyoka lya ningwa koyendji mboka ya li mombuga? (Tala wo ethano.)

⁸ Nziya, Jehova okwa gandja onyama, naantu oya li ye na iimote oyindji. Ihe Aaisraeli kaya li ya pandula Kalunga omolwoshikumithalonga shoka. Pehala lyaashono, oyendji oya kwatwa kolwiho. Oya longo omutenya nuusiku, taya gongele iimote oyindji yi vulithe pwaambyoka ya li ya pumbwa. Jehova okwa li a geyela mboka ye na “omwamwa gwonyama.” (Num. 11:31-34) Otatu vulu okwiilonga sha koshiholelwa shoka. Otwa pumbwa okukala twa kotoka kaatu kwatwe kolwiho. Kutya nduno otu li aayamba nenge otwa hepa, otwa pumbwa okugandja eitulomo ‘kokwiilikolela omaliko megulu,’ mokukoleka uukuume wetu naJehova nosho wo naJesus. (Mat. 6:19, 20; Luk. 16:9) Ngele otwe shi ningi, otatu vulu okukala nuushili kutya Jehova ote ke tu sila oshimpwiyu.

9. Oshike tatu vulu okukala tu na uushili musho, shi nasha nankene Kalunga he tu yambidhidha?

⁹ Jehova oha kwathele oshigwana she kunena, ta longitha oshikaha she. Nonando ongawo, shoka itashi ti kutya itatu ka kala twa pumbwa iimaliwa nenge itatu ka sa ondjala.b Ihe Jehova ke na esiku e tu thige po. Ote ke tu nkondopaleka , kutya nduno otu iyadhe momashongo geni. Otatu vulu okuthaneka uushili woshinima shoka, mokutala koonkalo mbali moka tatu vulu okuulika einekelo lyetu kutya Jehova ota ka longitha oshikaha shee tu kwathele naashoka twa pumbwa; (1)uuna tatu ungaunga nuupyakadhi wopashimaliwa nosho wo (2) uuna tatu ipula nankene tatu ka kala tu na iimaliwa ya gwana ngele twa thiki momimvo dhuukokele.

UUNA TATU UNGAUNGA NUUPYAKADHI WOPASHIMALIWA

10. Uupyakadhi wuni wopashimaliwa tashi vulika tu taalele?

¹⁰ Sho uuyuni mbuka tawu ende wa uka pehulilo, otwa tegelela oonkalo dhuuhupilo dhi nayipale. Omakuyunguto gopapolitika, omaipumomumwe gaantu ya homata, iiponga yopaunshitwe, nenge omikithi dhekomba omipe, otadhi vulu oku tu ningitha tu longithe oshimaliwa oshindji nenge tu kanithe iilonga yetu, omaliko nenge omagumbo getu. Otashi vulika tu konge iilonga yimwe moshitopolwa moka tu li nenge tu tembukile noyaandjetu koshitopolwa shilwe, opo tu ya sile oshimpwiyu. Oshike tashi vulu oku tu kwathela tu ninge omatokolo, ngoka taga ulike kutya otwa inekela moshikaha shaJehova?

11. Oshike tashi vulu oku ku kwathela wu ungaunge nuupyakadhi wopashimaliwa? (Lukas 12:29-31)

¹¹ Oshinima shoka sha simanenena, okulombwela Jehova kombinga yiimpwiyu yoye. (Omayel. 16:3) Mu pula e ku pe uunongo mboka wa pumbwa, wu ninge omatokolo omawanawa nowu kale wu na omutima gwa ngungumana, opo wu yande “oshimpwiyu sha pitilila,” kombinga yonkalo yoye. (Lesha Lukas 12:29-31.) Tsikila oku mu pula e ku kwathele wu kale wa gwanenwa noompumbwe dhakehe esiku. (1 Tim. 6:7, 8) Ninga omapekapeko miileshomwa yetu, nkene to vulu okuungaunga nomupondo nuupyakadhi wopashimaliwa. Oyendji mboka taya ungaunga nuupyakadhi wopashimaliwa, oya mona mo uuwanawa miitopolwa mbyoka tayi adhika kepandja lyetu, jw.org.

12. Omapulo geni taga vulu okukwathela Omukriste, opo a ningile aanegumbo ye etokolo lya dhenga mbanda?

¹² Yamwe oya li ya iyadha meshongo lyokutaamba ko ompito yiilonga ndjoka ye ya ningitha ya tembukile kokule noyaandjawo, ihe konima oyendji oye ke shi ndhindhilika mo kutya etokolo ndyoka ka lya li pandunge. Manga inoo taamba ko iilonga yontumba, ino dhiladhila owala koshimaliwa shoka to ka mona, ihe dhiladhila wo ngele otayi ke ku kwathela nosho wo yaandjeni mu kale popepi naJehova. (Luk. 14:28) Ipula ngeyi: ‘Mbela ondjokana yandje otayi ka kala ya tya ngiini, ngele onda kala ndi li kokule nakuume kandje kopandjokana? Etembu ndyoka ota li ka guma ngiini eendathano lyandje nAakriste ooyakwetu nosho wo uukalele wandje?’ Ngele owu na aanona, owa pumbwa wo okwiipula epulo ndika lya simana: ‘Ongiini tandi ka ‘putudha nokukumagidha paukriste,’ aanona yandje ngele kandi li nayo?’ (Ef. 6:4) Kala to wilikwa kunkene Kalunga ha dhiladhila, ihe hakaakwanezimo nenge kookuume mboka inaaya simaneka omakotampango gOmbiimbeli.c Tony, ngoka ha zi kuuninginino waAsia, okwa li a iyadha meshongo lyokupewa oompito odhindji dhiilonga dhoku ka longa koshilongo shilwe. Ihe konima sho a galikana kombinga yoshinima shoka noku shi kundathana nomukulukadhi gwe, okwa tokola kaa taambe ko nando iilonga mbyoka, ihe pehala lyaashono okwa dhiladhila nkene taya ka lundulula onkalamwenyo yawo, opo ya kale itaaya longitha oshimaliwa oshindji. Tony okwa ti: “Oshi li uuthembahenda sho nda vulu okukwathela aantu oyendji ya tseye Jehova, naanona yetu oye hole Jehova noonkondo. Ngame noyaandjetu otwa ilonga kutya uuna twa tula miilonga oohapu ndhoka tadhi adhika muMateus 6:33, Jehova ote ke tu sila oshimpwiyu.”

UUNA TATU IPULA NANKENE TATU KA KALA TU NA IIMALIWA YA GWANA NGELE TWA THIKI MOMIMVO DHUUKOKELE

13. Oonkatu dhini dha simana tatu vulu okukatuka ngashingeyi, dhi tu kwathele tu ungaunge noompumbwe dhetu dhopashimaliwa, uuna twa thiki momimvo dhuukokele?

¹³ Einekelo lyetu moshikaha shaJehova, otali vulu wo okumakelwa ngele otwa ipula nankene onkalo yetu tayi ka kala yi li ngele twa thiki momimvo dhuukokele. Ombiimbeli otayi tu ladhipike tu longe nuudhiginini, opo tu kale tu na iimaliwa ya gwana yi ke tu kwathele momimvo dhuukokele. (Omayel. 6:6-11) Ngele iiniwe yetu otayi shi pitike, oshi li pandunge okupungula oshimaliwa shontumba shomonakuyiwa. Odhoshili kutya iimaliwa otayi vulu oku tu pa egameno lyontumba. (Omuuv. 7:12) Ihe inatu pumbwa okweetha iimaliwa oyo yi kale ya simanenena monkalamwenyo yetu.

14. Ongiini Aahebeli 13:5, taya vulu oku tu kwathela ngele tashi ya pokupungula iimaliwa yomonakuyiwa?

¹⁴ Jesus okwa li a yelitha nkene sha nika uugoya okwiilikolela omaliko, ihe ‘momeho gaKalunga katu shi aayamba.’ (Luk. 12:16-21) Kapu na ngoka e shi kutya esiku lyangula otali ka kala lya tya ngiini. (Omayel. 23:4, 5; Jak. 4:13-15) Shimwe ishewe, Jesus okwa ti kutya ayehe mboka ya hala okuninga aalanduli ye, oye na okukala yaa ilongekidha ‘okuthiga po’ iinima yawo ayihe. (Luk. 14:33) Aakriste yomuJudea yomethelemumvo lyotango, oya li ye na ehalo lyokuthiga po iinima yawo nenyanyu. (Heb. 10:34) Pethimbo lyetu, aamwatate oyendji oya kanitha iinima yawo yopamaliko, omolwokutinda okukutha ombinga mopolotika. (Eh. 13:16, 17) Oshike she ya kwathela ya ninge ngawo? Oya inekela thiluthilu meuvaneko lyaJehova ndyoka tali ti: “Itandi ku etha nando; itandi ku thigi po.” (Lesha Aahebeli 13:5.) Ohatu ningi ngaashi tatu vulu, opo tu kale tu na oshimaliwa sha gwana shoku tu sila oshimpwiyu monakuyiwa, ihe ngele opwa ningwa sha shoka kaatwa li twa tegelela, ohatu kala twa inekela mekwatho lyaJehova.

15. Mbela aavali Aakriste oye na okukala ya tala ko ngiini oyana? (Tala wo ethano.)

¹⁵ Miitopolwa yimwe, aaihokani ohaya mono aanona, opo aanona ye ke ya ambidhidhe pashimaliwa, uuna ya thiki momimvo dhuukokele. Ombiimbeli oya ti kutya aavali oye na okusila oshimpwiyu aanona yawo. (2 Kor. 12:14) Odhoshili kutya aavali otashi vulika ya kale ya pumbwa ekwatho, sho taya ende taya koko, naanona oyendji ohaya kala ya nyanyukwa okukwathela aavali yawo. (1 Tim. 5:4) Ihe aavali Aakriste, oye shi kutya enyanyu lyawo ihali zi mokuputudha oyana nelalakano opo ye ke ya ambidhidhe pashimaliwa, ihe omokukwathela oyana ya kale aapiya yaJehova. — 3 Joh. 4.

16. Ongiini aavali taya vulu okukwathela oyana, ya kale ya ilongekidha okwiiyambidhidha pashimaliwa? (Aaefeso 4:28)

¹⁶ Okupitila moshiholelwa shoye, longa aamwoye ya kale ya inekela muJehova, sho to ya kwathele ya kale ya ilongekidha okwiiyambidhidha ngele ya koko. Ya longa esimano lyokulonga nuudhiginini, omanga aashona. (Omayel. 29:21; lesha Aaefeso 4:28.) Sho taya ende taya koko, ya kwathela ya longe nuudhiginini kosikola. Aavali Aakriste otaya vulu okuninga omapekapeko nokutula miilonga omakotampango gOmbiimbeli, opo ya kwathele oyana ya ninge omatokolo ge li mondjila, ge na ko nasha nelongo. Shoka otashi ka longekidha oyana ya ka vule okwiiyambidhidha nosho wo okukutha ombinga miilonga yokuuvitha pakuudha.

17. Otatu vulu okukala tu na uushili mushike?

¹⁷ Aapiya aadhiginini yaJehova, otaya vulu okukala ye na einekelo kutya oku na oonkondo nehalo lyokugwanitha po oompumbwe dhawo. Sho uuyuni mbuka tawu ende wa uka pehulilo, einekelo lyetu muJehova otali ka makelwa. Kutya nduno oshike shi ningwe po, natu kale twa tokola toko okukala tu na einekelo kutya Jehova ota ka longitha oonkondo dhe, e tu kwathele. Otatu vulu okukala nuushili kutya oshikaha she shoonkondo nokwooko kwe kwa taganana, kaku na esiku ku kale okufupi oku tu kwathela.