Otwa kala nokulongwa kOmulongi gwetu Omunenenene, onkalamwenyo yetu ayihe

OSHIHOLELWA SHAAVALI YANDJE

Mo 1950 nasha, aavali yandje oya tembuka okuza moItalia yu uka koKindersley, muSaskatchewan moKanada. Konima yaashono, oya tseya oshili noya kala oshinima sha simana monkalamwenyo yetu. Otandi dhimbulukwa sho nda li okanona, otwa li hatu kala ethimbo ele miilonga yokuuvitha pamwe noyaandjetu, onkene omathimbo gamwe ohandi ningi omashendjo te ti: “Onda tameka nuukwathelikokolindjila,” sho ndi na omimvo hetatu.

Aavali yandje oya li ya hepa, ihe oya li ya tula po oshiholelwa oshiwanawa shokuninga omaiyambo miilonga yaJehova. Pashiholelwa, mo 1963, oya landitha po iinima yawo oyindji ya mone oshimaliwa, opo ya ye koshigongi shopaigwana moPasadena, koCalifornia, moAmerika. Mo 1972 otwa li twa tembukile koTrail, moshitopolwa shedhina Britania Kolombia, moKanada, shoka sha li ookilometa 1 000 okuza koKindersley, tu ka kwathele oshitopolwa shelaka lyOshiitalia. Tate okwa li ha longo e li omwoopaleki. Okwa li ha tindi okupewa oondondo dhopombanda, opo a gandje eitulomo kokulongela Jehova.

Onda pandula sho aavali yetu, ye tu tulila po oshiholelwa oshiwanawa, ngame naamwayina yandje yatatu. Shono osha li sha tulile ndje po ekankameno lya kola, medheulo lyandje lyopaKriste, shoka sha kwatela mo oshiilongomwa sha simana kutya: Ngele onda kongo tango Uukwaniilwa, Jehova ota ka sila ndje oshimpwiyu. — Mat. 6:33.

ETAMEKO LYIILONGA YETHIMBO LYU UDHA

Mo 1980, onda hokana Debbie, omumwameme omwaanawa, ngoka a li i itulila po omalalakano gopambepo. Otwa li twa hala okuya miilonga yethimbo lyu udha, onkee Debbie okwa tameke okukokola ondjila konima yoomwedhi ndatu sho twa hokana. Konima yomumvo gumwe sho twa hokana, otwa tembukile kegongalo eshona hoka kwa li ku na ompumbwe, nonda wayimine Debbie mokukokola ondjila.

Konima yomimvo dhontumba, otwa li twa teka omukumo, notwa li twa hala okutembuka. Ihe tango, otwa li twa popi nomutonatelishikandjo. Okwa popi natse pahole, nokwe tu lombwele oshili a ti: “Otamu dhigupaleke onkalo yeni. Otamu gandja eitulomo komashongo agehe ngoka mu li mugo. Ihe ngele omwa gandja eitulomo kiinima iiwanawa, otamu ke yi mona.” Omayele ngoka ogo twa li twa pumbwa. (Eps. 141:5) Otwe ga tula miilonga nziya, notwa li twa ndhindhilike kutya opu na iinima oyindji iiwanawa. Megongalo omwa li mu na aantu oyendji mboka ya hala okuningila Jehova oshindji, mwa kwatelwa aagundjuka naamboka ookuume kawo kopandjokana kaaye shi ooitaali. Shoka osha li oshiilongomwa sha simanenena kutse. Otwi ilongo okugandja eitulomo kiinima iiwanawa, nokutegelela kuJehova a ukithe oonkalo ndhoka tadhi monika dha fa oondhigu. (Mika 7:7) Otwa li ishewe twa nyanyukwa nonkalo yetu oya lunduluka.

Aanongeki mboka ye tu longa mosikola yetu yotango yaakokolindjila, oya li haya longo kiilongo yilwe. Oye tu ulukile omathano nokupopya kombinga yomashongo ngoka ya li ya iyadha mugo nosho wo omayambeko ngoka ya mona, naashoka oshe tu ningitha tu kale twa halelela okuya miilonga yuutumwa. Onkene otwa tokola tu ye miilonga mbyoka.

Opo tu adhe elalakano ndyoka, mo 1984 otwa tembukile koQuebec, hoka haku popiwa elaka lyOshifulaanisa. Quebec osha li ookilometa dhi vulithe po 4 000 okuza koBritania Kolombia. Otwa li tu na okwiilonga omuthigululwakalo nelaka epe. Eshongo ekwawo olyo ndyono kutya olundji katwa li hatu kala tu na oshimaliwa sha gwana. Opu na ompito yimwe twa li hatu hupu mokugongela iihakautu mepya lyomunafaalama gumwe. Debbie okwa li ha teleke iihakautu mbyoka momikalo dha yoolokathana noya li hayi tokola elaka. Nonando otwa li twa taalela omashongo, otwa li twa gandja eitulomo kokwiidhidhimika nenyanyu. Shimwe ishewe, otwa li twa mono nkene Jehova te tu sile oshimpwiyu. — Eps. 64:10.

Esiku limwe, otwa li twa dhengelwa ongodhi inaatu shi tegelela. Otwa li twa hiywa tu ka longe koBetel yaKanada, ihe opo owala twa adhika twa udhithile kosikola yaGilead. Onkene otwa li tu na omalimbililo kombinga yiilonga yaBetel. Nonando ongawo, otwa taamba ko ehiyo lyokuya koBetel. Sho twa thiki koBetel, otwa pula omumwatate Kenneth Little, oshilyo shOkomitiye yOshitayimbelewa, twa ti: “Ongiini kombinga yeindilo lyetu lyokuya kosikola yaGilead?” Okwa yamukula a ti: “Otatu ka ungaunga nasho, ngele mwa hiywa mu ye ko.”

Konima yoshiwike, ethimbo osho lya thiki tu ungaunge noshinima shoka, oshoka ngame naDebbie otwa hiywa kosikola yaGilead. Onkene otwa li tu na okuninga etokolo. Omumwatate Little okwa ti: “Kehe ehogololo mwa ningi, limwe lyomomasiku otamu ki ipula kutya andola otwa ningile ekwawo.” Etokolo kehe olya simana, na Jehova ota vulu okuyambeka kehe etokolo.” Otwa li ta taamba ko ehiyo lyokuya koGilead, nomomukokomoko gwomimvo, otwa mona uushili womayele gomumwatate Little. Olundji ohatu lombwele yalwe oohapu dhe, mboka kaaye shi kutya naya ninge ehogololo lini.

TU LI AATUMWA

Otwa li twa nyanyukwa okukala yamwe yomaalongwa 24, yongundu onti-83 yaGilead. Shono osha li sha ningwa moBrooklyn shaNew York, muApilili 1987. Omumwatate Ulysses Glass nosho wo Jack Redford, oyo unene ya li aanongeki yetu. Oomwedhi ntano inadhi kala po, notwa li twa pewa oonzapo mo 6 Septemba 1987. Otwa li twa tuminwa koHaiti, pamwe nomumwatate John Goode nomukulukadhi gwe, Marie.

Aatumwa ya za koGilead kaya li we haya tuminwa koHaiti okuza mo 1962, sho mboka ya tumwa hugunina ya tidhwa mo moshilongo. Konima yiiwike itatu sho twa pewa oonzapo, otwa tuminwa tu ka longele koHaiti, koshitopolwa shi li mokati koondundu, moka mu na egongalo eshona li na aauvithi ye li 35. Otwa li aagundjuka nokatu na owino, notwa li hatu kala otse atuke megumbo lyaatumwa. Aantu yomoshitopolwa oya li ya hepa noyendji kaya li ye shi okulesha. Petameko sho twa li miilonga yuutumwa, otwa li hatu taalele omakuyunguto gopapolotika, omililo dha tema moondjila niikungulu yombepo iinene.

Ihe otwa li twi ilongo oshindji kaamwatate naamwameme yomoHaiti, mboka ye na omukumo noya li ya nyanyukwa. Oyendji yomuyo oya li ya taalela omashongo, nonando ongawo, oya li ye hole Jehova nosho wo iilonga yokuuvitha. Omumwameme gumwe omukokele ka li ha vulu okulesha, ihe okwa li e shi omanyolo ge li 150 lwaampono momutse. Oonkalo oondhigu dhesiku kehe, odha li hadhi tu kwathele tu tsikile nokuuvitha onkundana yUukwaniilwa, kutya owo owala tawu ka kandula po uupyakadhi waantu. Osha li she tu nyanyudha okumona yamwe yomaakonakonimbiimbeli yetu yotango, ya ninga aakokolindjila yondjigilile, aakokolindjila yi ikalekelwa nosho wo aakuluntugongalo.

Sho tu li natango moHaiti, onda li nda tsakanene naTrevor, omutumwa Omumormon, notwa li twa mono ompito yokukundathana naye kombinga yOmbiimbeli, omathimbo gamwe. Konima yomimvo dhontumba, onda li nda yakula ontumwafo okuza kuye, ndjoka nda li inaandi tegelela. Okwa nyolwa a ti: “Otandi ka ninginithwa poshigongi shoka tashi ya. Onda hala okushuna koHaiti noku ka longa ndi li omukokolindjila i ikalekelwa, moshitopolwa moka nda li handi longo ndi li omutumwa Omumormon.” Naashoka osho a kala ta ningi uule womimvo, pamwe nomukulukadhi gwe.

EUROPA, NOLWANIMA OKOAFRIKA

Okuuvitha muEuropa okwa li taku ende ta ku ningi okupu, notwa li twa tumwa oko tu ka longele. Mo 1992, otwa thiki moLjubljana, Slovenia, popepi naampoka aavali yandje ya putukila, manga inaaya tembukila koItalia. Pethimbo ndyono, miitopolwa yaYugoslavia shonale, omwa li natango iita. Oshitayimbelewa shaVienna, moAustria, nosho wo oombelewa moZagreb, moCroatia, nomoBelgrade, moSerbia, odha li hadhi tonatele iilonga yokuuvitha moshitopolwa. Ngashingeyi orepablika kehe, oyi na oshitayimbelewa shayo yene.

Otwa li ishewe tu na okwiilonga elaka nosho wo omuthigululwakalo gumwe. Aantu yomoshitopolwa oya li haya ti: “Jezik je težek,” shoka sha hala okutya, “Elaka edhigu.” Nolya li edhigu shili. Otwa li tu hole lela uudhiginini waamwatate naamwameme mboka ya li ya ilongekidha okutaamba ko omalunduluko ngoka ga ningwa kehangano, notwa li twa ndhindhilike nkene Jehova e ya yambeka. Otwa li ishewe twa mono nkene Jehova a ukitha iinima pahole, nopethimbo lyo opala. Otwi ilonga iinima oyindji sho twa li moSlovenia, niinima mbyoka twa li tu shi nale oye tu kwathela tu idhidhimikile omashongo sho twa li moSlovenia.

Ihe otwa li wo twa taalele omashongo galwe. Mo 2000, otwa li twa tumwa tu ka longe koIvory Coast, shi li muAfrika lyokUuninginino. Opo nduno muNovomba 2002, otwa li twa tuminwa koSierra Leone omolwiita yopashigwana. Opo owala twa adha iita yopashigwana ya hulu, mbyoka ya li ya pula omimvo 11. Osha li lela oshidhigu okuthiga po Ivory Coast ombaadhilila. Nonando ongawo, iiyilongomwa mbyoka twi ilonga, oye tu kwathela tu kaleke po enyanyu lyetu.

Otwa li twa gandja eitulomo kiitopolwa mbyoka mu na aantu haya pulakene nawa nosho wo kaamwatate naamwameme aanahole, mboka ya kala nokwiidhidhimikila iita uule woomvula. Oya li ya hepa painiwe, ihe oya li ya hala okutopolelathana nayalwe shoka ye na. Omumwameme gumwe okwa li a hala okupa Debbie oonguwo dhe dhimwe. Sho Debbie a tindi oku dhi taamba ko, omumwameme okwe mu lombwele a ti: “Pethimbo lyiita, aamwatate yokiilongo yilwe oya li haye tu ambidhidha. Ngashingeyi, ompito yetu yokukwathela.” Otwa li twi itulile po elalakano lyokulandula oshiholelwa shawo.

Mokweendela ko kwethimbo, otwa li twa shuna koIvory Coast, ihe omakuyunguto gopapolotika oga li ga holoka po ishewe. Onkene muNovomba 2004, otwa zi mo moIvory Coast nedhagadhaga, nakehe gumwe gwomutse okwa li owala a vulu okuya ontuku nondjato yimwe yookilograma 10. Otwa li twa lala pevi mokamba yetangakwiita lyaFulaanisa ongulohi yimwe, nesiku lya landula ko otwa tuka tu ye koSwitzerland. Sho twa thiki moshitayimbelewa mokati kuusiku, Okomitiye yOshitayimbelewa nosho wo aalongi yOsikola yOkudheula mUukalele pamwe naakulukadhi yawo, oya li ye tu taamba ko nomutima aguhe, ye tu papatele, ye tu telekele iikulya noku tu pa oo-chocolate odhindji dhomoSwitzerland. Shoka osha li she tu ningitha tu kale tu uvite tu holike lela.

Otwa li twa tuminwa tu ka longele koGhana pakathimbo, nokonima otwa tuminwa ishewe koIvory Coast, sho omakuyunguto gopapolotika ga ti po hwepo. Ohole yuumwayinathana oye tu kwathela tu idhidhimike sho twa kala hatu tembukatembuka, naasho tatu gwanitha po iinakugwanithwa yetu yopakathimbo. Nonando ngame naDebbie, otu shi kutya oshi li omukalondjigilile mehangano lyaJehova okuulukilathana ohole yuumwayinathana, otwa pumbwa aluhe okuulika kutya otwa lenga ohole ndjoka. Uushili owo kutya, otwa li twa ndhindhilike kutya omathimbo ngoka omadhigu, oga li oshitopolwa sha simana shedheulo lyetu.

TU UKA KUUZILO WOPOKATI

Mo 2006, otwa li twa yakula ontumwafo okuza koombelewa dhetu oonene muuyuni, tayi tu lombwele kutya otu na oshinakugwanithwa oshipe shoku ka longela kUuzilo wOpokati. Shono osha hala okutya otwa li ishewe tu na okutaalela oonkalo oompe, omashongo, okwiilonga omalaka omape nosho wo omithigululwakalo. Otwa li tu na oshindji okwiilonga momudhingoloko ngoka mwa li omaupyakadhi ogendji, ga etithwa kopolotika nosho wo komalongelokalunga. Otwa li tu hole omalaka ga yoolokathana momagongalo, notwa li twa mono uukumwe mboka hawu etithwa kokulandula omalombwelo ngoka haga zi kehangano lyaJehova. Otwa li twa simaneka aamwatate naamwameme, molwaashoka oyendji yomuyo oya li yi idhidhimikile omapataneko nuulaadhi okuza kuyaandjawo, kaanasikola pamwe nayo, kaaniilonga pamwe nayo nosho wo kaashiinda yawo.

Mo 2012, otwa li twa yi koshigongi shoshitopolwa shi ikalekelwa moTel Aviv, shaIsraeli. Oshigongi shoka osho sha li oshikando shotango kOombangi dhaJehova dha gongala momwaalu omunene, okuza pOpentekoste 33 E.N. Oshiningwanima shoka osha li oshindhindhilikwedhi lela.

Momukokomoko gwomimvo ndhoka, sho twa li kUuzilo wOpokati, otwa tumwa tu ka talele po koshilongo shimwe moka iilonga yetu yi indikwa. Otwa faalele iileshomwa yetu, twa kutha ombinga miilonga yokuuvitha nokuya kiigongi iishona yoshikandjo. Aakwiita ya homata nosho wo oomboloka odha li kehe pamwe, ihe otwa li tu uvite twa gamenwa, sho tatu ende nuukeka pamwe naauvithi aashona yomoshitopolwa.

TATU SHUNA KUAFRIKA

Mo 2013, otwa li twa pewa oshinakugwanithwa shi ili shoku ka longela koshitayimbelewa shaKinshasa, moCongo. Oshilongo shoka oshinene noshiwanawa lela, ihe osha hepa unene nosha li sha taalele iita oyindji lela. Molwaashoka moAfrika omo twa li nale, otwa li tatu dhiladhila kutya, “Otwa ilongekidha okuya ko ishewe.” Ihe otwa li tu na oshindji okwiilonga, unene tuu ngele tashi ya pokuhinga momahala moka kaamu na oopate noontopa. Opwa li iinima oyindji mbyoka tatu vulu okugandja eitulomo kuyo, ngaashi sho aamwatate ya kala aadhiginini noya nyanyukwa, nonando oya taalela uuhupilo tawu nyangwanyangwa nosho wo ohole yawo yokuhola iilonga yokuuvitha noonkambadhala ndhoka haya ningi ya kale po pokugongala nopiigongi yoshikandjo. Kekwatho lyaJehova nosho wo omayambeko ge, otwa mona nkene iilonga yUukwaniilwa ya kala tayi humu komeho. Omimvo ndhoka twa kala tatu longo moCongo, miilonga yethimbo lyuudha, odhe tu longa iiyilongomwa ya simana notwa mona ookuume mboka ya fa aantu yaandjetu.

Pehulilo lyo 2017, otwa yi ishewe koshinakugwanithwa shimwe moSouth Afrika. Shika osho oshitayimbelewa oshinenenene twa longa musho, nokuli niinakugwanithwa mbyoka twa li twa pewa, inatu yi longa nando onale. Otwa li natango tu na okwiilonga iinima oyindji, ihe iiyilongomwa mbyoka twi ilonga monakuziwa oya li ye tu kwathele. Otu hole aamwatate naamwameme oyendji, sho ya kala tayi idhidhimike nuudhiginini uule womimvo odhindji. Oshihokithi wo okumona uukwanegumbo waBetel tawu longo pamwe muukumwe, nonando owa za momihoko nomomaputuko ga yoolokathana. Eyambeko lyaJehova lyombili oli iwetikile, sho oshigwana she hashi zala omuntu omupe, nokutula miilonga omakotampango gOmbiimbeli.

Momukokomoko gwomimvo adhihe ndhoka, ngame naDebbie, otwa li twa pewa iinakugwanithwa iihokithi, twa igilile omithigululwakalo dha yoolokathana nokwiilonga omalaka omape. Kasha li aluhe hashi kala oshipu, ihe otwa li hatu mono nkene Jehova te tu ulukile ohole ye yi na uudhiginini okupitila mehangano lye nosho wo maamwatate naamwameme. (Eps. 144:2) Otu na einekelo kutya edheulo lyetu miilonga yethimbo lyuudha, olye tu kwathela tu kale aapiya yaJehova ye li hwepo.

Onda pandula unene shoka aavali yandje ya longa ndje, ekwatho lyomukulukadhi gwandje omuholike, Debbie, nosho wo iiholelwa iiwanawa yaamwatate naamwameme muuyuni auhe. Sho omimvo tadhi ende dhu uka komeho, ngame nomukulukadhi gwandje, otwa tokola toko okutsikila okwiilonga iiyilongomwa mbyoka tatu longwa kOmulongi gwetu Omunenenene.