Ombiimbeli otayi ti ngiini kombinga yokudhipaga aantu noondjembo moosikola?

Mo 24 Mei 2022, mondoolopa onshona yedhina Uvalde, yi li moTexas, moAmerika, omwa li mwa ningwa oshiponga shombaadhilila. Oshifo shedhina The New York Times, osha ti kutya “omulumentu a homata ondjembo okwa dhipaga aanasikola ye li 19 nosho wo aalongisikola yaali . . . posikola yedhina Robb.”

Iiponga iinyanyalithi yoludhi ndono ohayi holoka olundji. Oshifokundaneki shomoAmerika hashi ithanwa USA Today, osha ti kutya ‘mo 2021, moAmerika omo amuke omwa lopotwa iiningwanima yokudhipaga aantu noondjembo momalugumbo goosikola yi li 249, omwaalu ngoka ogwa londa pombanda noonkondo okuyelekanitha niiningwanima yoludhi ndoka, mbyoka ya ningwa okuza mo 1970 sigo okunena.’

Omolwashike aantu haya longo iikulumuna mbyoka tayi zitha omahwilili? Ongiini tatu vulu okwiidhidhimikila iilonga yomilema ya tya ngawo? Mbela opu na ngaa etegameno lyasha kutya omiyonena onadhi ka hule po? Ombiimbeli otayi tu pe omayamukulo.

Omolwashike uukolokoshi tawu lundu pombanda muuyuni?

•  Ombiimbeli oya hunganeka kutya otu li ‘momasiku gahugunina,’ moka aantu oyendji taya ka kala “yaa na olukeno nohenda” nosho wo “aapwidhi.” Onkee ano, ohaya longo iihuna nosho wo iinima tayi halutha aantu. Ombiimbeli oya ti kutya aantu mboka otaya ka tsikila “okuza muuwanawa yu uka muuwinayi.” (2 Timoteus 3:1-5, 13) Opo wu mone uuyelele wa gwedhwa po lesha oshitopolwa: “Did the Bible Predict the Way People Think and Act Today?” (Mbela Ombiimbeli oya hunganeka iikala nomadhiladhilo gaantu kunena?)

Aantu oyendji ohaya pula kutya ‘omolwashike Kalunga ihaa keelele iiponga iinyanyalithi, ngaashi mbyoka yokudhipaga aantu noondjembo moosikola?’ Opo wu mone eyamukulo okuza mOmbiimbeli, lesha oshitopolwa “Bad Things Happen to Good People—Why?” (Omolwashike aantu aawanawa nayo haya ningilwa iinima iiwinayi?)

Oshike tashi tu kwathele tu idhidhimikile uuwinayi mbono?

•  Aaroma 15:4 otayi ti: “Oshoka ashihe shoka sha nyolwa mOmanyolo, osha nyolwa, shi tu longe, opo tu kale tu na etegameno . . . notu mone omukumo, ngele tatu lesha oohapu dhaKalunga.”

Omakotampango gOmbiimbeli otaga vulu oku ku kwathela wu idhidhimikile omiyonena muuyuni mbuka wa yonana. Opo wu mone uuyelele wa gwedhwa po, tala oshifo Awake! shi na oshipalanyolo: “Will Violence Ever End?” (Uukolokoshi onawu ka hule po ngaa?)

Opu na wo oshitopolwa shi na oshipalanyolo: “Disturbing News Reports and Your Children” (Aamwoye noonkundana ndhoka tadhi halutha), shoka sha nuninwa aavali nkene ye na okukwathela oyana, opo kaaya nuke mo omitima koonkundana oombwiinayi.

Mbela uukolokoshi onawu ka hule ngaa?

•  Ombiimbeli otayi ti kutya Kalunga aantu “ote ya hupitha methiminiko nomepiyagano.” — Episalomi 72:14.

•  “Oye ta loteke oontamanana mokati kiigwana, mokati kiigwana iinankondo popepi nokokule. Otaa ka hambula omagonga gawo omatemo nomagongamwele gawo iimwitho. Iigwana itayi ka ya we kiita, itayi ilongekidhile we olugodhi.” — Mika 4:3.

Kalunga ota ka eta po omalunduluko ngoka aantu itaaya vulu okweeta po. Epangelo lyUukwaniilwa we womegulu otali ka hanagula po iikondjitho yomaludhi agehe, mwa kwatelwa nuukolokoshi. Opo wu mone shoka Uukwaniilwa waKalunga tawu ka tompola po, lesha oshitopolwa, “Under God’s Kingdom ‘Peace Will Abound’” (Ombili otayi ka pangela kohi yUukwaniilwa waKalunga).