Ombiimbeli otayi ngiini kombinga yoondando dhiinima ndhoka tadhi londo pombanda noonkondo?

Omupresidende gwehangano hali ithanwa World Bank Group okwa popi molopota yaJuni 2022, a ti: “Uuhupilo muuyuni otawu kanda omapunya. Iinima otayi ende tayi ningi ondilo noonkondo naantu kaye na iimaliwa ya gwana yoku yi landa.”

Ehangano lyokugandja omakwatho lyedhina International Monetary Fund olya ti: “Oondando dhomahooli nosho wo dhiikulya odha londo noonkondo meni lyethimbo efupi, naashika osha guma unene iilongo mbyoka ya hepa.”

Ombiimbeli otayi tu kwathele tu tseye kutya omolwashike tu na omaupyakadhi ngaashi uuhupilo tawu kanda omapunya, nkene tatu vulu oku ga idhidhimikila notayi tu pe wo etegameno kutya otaga ka hula po thiluthilu.

Oondando dhiinima tadhi londo ‘momasiku gahugunina’

•  Ombiimbeli otayi ti kutya otu li ‘momasiku gahugunina.’ — 2 Timoteus 3:1, OB-1954.

•  Jesus okwa ti kutya pethimbo ndika otapu ka ningwa iinima “iitilithi iinene” nenge tu tye iiningwanima iitilithi. (Lukas 21:11) Aantu ohaya kala ya tila uuna ye wete oondando dhiinima tadhi londo pombanda noonkondo. Ohaya kala tayi ipula kutya onakuyiwa yawo otayi ka kala ya tya ngiini nongele otaya ka vula ngaa okusila oshimpwiyu aanegumbo lyawo.

•  Membo lyEhololo omwa hunganekwa kutya pethimbo lyetu iikulya otayi ka kala yi na ondilo. Olya ti ngeyi: ‘Ondu uvu ewi lya ti: “Okatungwa kiilyawala oke thike pondjambi yomesiku nosho wo uutungwa utatu womahangu.”’ — Ehololo 6:6.

Opo wu ilonge oshindji kombinga ‘yomasiku gahugunina’ nosho wo yehunganeko ndyoka lya popiwa mEhololo, tala okavidio The World Has Changed Since 1914 (Uuyuni owa lunduluka okuza mo 1914). Lesha wo oshitopolwa, “Aakayili yuukambe yane oolye?”

Nkene uupyakadhi wopamahupilo tawu ka kandulwa po

•  Ombiimbeli otayi ti: “Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene. Itaa ka tunga omagumbo, yalwe ya kale mo, nenge ya tsike omiviinu dhi ka liwe kuyalwe.” — Jesaja 65:21, 22.

•  “Moshilongo namu kale eloolo lyiilya; kiikulundundu naku kale omapya.” — Episalomi 72:16.

•  “‘Ihe ngashingeyi otandi ya,’ Omuwa osho ta ti, ‘oshoka omapongo oga thiminikwa naatidhaganwa otaa tongo kuuwehame.’” — Episalomi 12:5.

Masiku Jehovaa ota ka hulitha uupyakadhi wopamahupilo muuyuni awuhe. Opo wu tseye kutya ote ke shi enda ngiini, lesha oshitopolwa, “Is a Fair Economic System Possible?”

Nonando iinima otayi ende tayi ningi ondilo, Ombiimbeli otayi vulu oku ku kwathela wu tseye shoka to vulu okuninga po. Ngiini mbela? Oyi na omayele ngoka taga popi kombinga yankene wu na okulongitha iimaliwa nawa. (Omayeletumbulo 23:4, 5; Omuuvithi 7:12) Opo wu tseye oshindji, lesha iitopolwa mbika: “Protect Your Livelihood” nosho wo “How to Live on Less.”