Iikungulu yomvula iinyanyalithi — Ombiimbeli otayi ti ngiini?

Muuyuni awuhe, aantu oyendji ohaya gumwa kiikungulu. Tala koolopota tadhi landula:

Momasiku 2 Auguste 2023, oonkundana dho-AP, odha ti: “Oshilandopangelo shaChiina osha lokwa komvula onene noonkondo, . . . yoomilimeta 744.8, pokati kOlyomakaya nEtatatu, omvula ndjoka inaayi loka mo uule womimvo 140 dha ka pita.”
Momasiku 3 Auguste 2023, oshikundaneki shedhina Deutsche Welle, osha ti: “Oshikungulu shedhina Typhoon Khanun, osha li sha eta omvula nombepo onene muumbugantu waJapani mEtine, nosha li sha dhipaga aantu yaali. . . . Oshikungulu shoka okwa tegelelwa shi ka etithe omvula yoometa 0.6, miitopolwa yopokati yomoondundu moTaiwan.”
Momasiku 24 Juli 2023, oonkundana dho-BBC, odha ti: “Oshikungulu shoka sha li moNova Scotia mehuliloshiwike, osha etithwa komvula onene yepoola, ndjoka ya loka moshitopolwa shaKanada shoka shi li pefuta lyaAtlantika, ndjoka yi ihulwa omimvo 50 dha ka pita.”

Ombiimbeli otayi ti ngiini kombinga yiiningwanima mbyoka?

Omandhindhiliko ‘gomasiku gahugunina’

Ombiimbeli oya popya kutya otu li methimbo ndyoka tali ithanwa ‘omasiku gahugunina.’ (2 Timoteus 3:1) Jesus okwa hunganeka kutya pethimbo lyetu otatu ka mona iinima “iitilithi iinene” nenge iiningwanima iitiliti. (Lukas 21:11) Elunduluko lyonkalo yombepo olyo unene hali etitha iiningwanima iitilithi mbyoka hayi holoka olundji, ya nika oshiponga noihaayi vulu okutengenekwa.

Etompelo lyokukala tu na etegameno

Ombiimbeli oya popya kutya iinima oyindji iitilithi mbyoka tayi holoka kombanda yevi kunena, otayi tu pe etompelo lyokukala tu na etegameno. Omolwashike mbela? Jesus okwa ti: “Ngele tamu mono ayihe mbika tayi ningwa, kaleni mu shi shi kutya Oshilongo shaKalunga oshi li popepi.” — Lukas 21:31; Mateus 24:3.

Iiningwanima mbyoka tu wete tayi holoka, otayi ulike kutya masiku Uukwaniilwa waKalunga otawu ka pangela thiluthilu oonkondo dhomeshito, mwa kwatelwa edhingoloko lyomeya. — Job 36:27, 28; Episalomi 107:29.

Opo wu ilonge oshindji kombinga yankene Uukwaniilwa waKalunga tawu ka kandula po omaupyakadhi kombanda yevi, tala oshitopolwa “Who Will Save the Earth?”