“AATANGO oyendji otaa ningi aahugunini,” Jesus opo owala e shi popi, “naahugunini oyendji otaa ningi aatango.” Ngashingeyi ote shi yelitha mokuhokolola ehokololo. Ota tameke ta ti: “[Uukwaniilwa wegulu wa] fa omusamane [mwene gwegumbo], a meneka, a ka kongele eyana lye lyomiviinu aalongi.”—Yelekanitha NW.

Mwene gwegumbo, nenge mwene gweyana lyomiviinu, oJehova Kalunga, neyana olyo oshigwana shaIsrael. Aalongi meyana lyomiviinu oyo aantu mboka ya taambwa mehangano lyOmpango; oyo naanaa Aajuda mboka ya li po pethimbo lyaayapostoli. Opwa ningwa owala euvathano naalongi mboka ya longo esiku alihe oyo ya pewe ondjambi. Ondjambi oyo ondenari yimwe mesiku. Molwashoka “otundi ontitatu,” oyo 9:00 gwongula, mboka yi ithanwa potundi onti-3, onti-6, onti-9 nonti-11 palandulathano, oya longo owala oowili 9, 6, 3 no 1.