Oolye tayu uvitha onkundana ombwanawa?

‘ . . . otayi ku uvithilwa aantu ayehe.’—MATEUS 24:14.

ONKUNDANA ombwanawa otayi uvithilwa uuyuni auhe kOonzapo dhaJehova. Shika otadhi shi ningi momikalo dhi ili nodhi ili. Omukalo gumwe ogwo okupitila . . .

Mokupopya naantu. Ngaashi Jesus naalongwa ye, Oonzapo dhaJehova ohadhi yi kaantu nonkundana ombwanawa. (Lukas 8:1; 10:1) Ihadhi tegelele aantu oyo ye ye kudho. Okugandja uunzapo kaantu kombinga yUukwaniilwa waKalunga okwo oshinima shoka Oonzapo adhihe dha konda pomamiliyona gaheyali hadhi kutha ombinga musho. Ohadhi uvitha egumbo negumbo, momapandaanda, okupitila mongodhi nosho wo miinima yilwe. Omvula ya zi ko, Oonzapo odha li dha longo oowili dhi vulithe pebiliyona limwe netata miilonga mbika yokuuvitha.

Ihadhi longo owala aantu kombinga yUukwaniilwa waKalunga, ihe okombinga wo ‘yaayihe mbyoka Jesus e dhi lombwele.’ (Mateus 28:20) Ohadhi ningi omakonakonombiimbeli gopegumbo goshali ge vulithe pomamiliyona gahetatu.

Oonzapo ohadhi uvitha muuyuni auhe miilongo 236. Ohadhi uvithile aantu yomomaputuko agehe. Ohadhi uvitha miilongo nomiilando nosho wo miiheke yaAmazon nokomahala gaSiberia, moombuga dhaAfrika nokOondundu dhaHimalaya. Ihadhi futwa sho tadhi longo iilonga mbika; ohadhi yi longo tadhi longitha iiniwe yadho yene nosho wo ethimbo lyadho, tadhi inyengithwa kohole yokuhola Kalunga naantu ooyakwawo. Ohadhi tseyitha wo onkundana ombwanawa okupitila . . .

Miileshomwa. Oshifo shika, shedhina Oshungolangelo tayi tseyitha Uukwaniilwa waJehova, ngashingeyi ohashi nyanyangidhwa momalaka 185 momuyalu gu vulithe pomamiliyona 42 oshikando kehe. Oshifo oshikwawo shoka hashi endele pamwe nasho osho o-Awake! ndjoka tayi tseyitha wo Uukwaniilwa, hayi nyanyangidhwa momalaka 83 nomomuyalu gu thike pomamiliyona 40 lwaampono oshikando kehe.

Omambo, uubroshure, uutraktate, uu-CD/MP3 nosho wo uu-DVD mboka tawu yelitha omalongo gOmbiimbeli otawu monika momalaka 540 lwaampono. Oonzapo odha li dha longekidha nodha taandelitha iileshomwa mbika yi vulithe pomabiliyona 20 muule owala woomvula omulongo dha piti, shoka otashi ulike kutya omuntu kehe a kala kombanda yevi okwa mona iileshomwa itatu lwaampono.

Oonzapo dhaJehova odha nyanyangidha wo nenge odha nyanyangidhitha Ombiimbeli momatoloko gi ili nogi ili. O-New World Translation of the Holy Scriptures ndjoka ya tolokwa, ya nyanyangidhwa noya taandelithwa kOonzapo, ngashingeyi otayi monika yi ihwa po nenge miitopolwa yayo momalaka 96. Oombiimbeli dhi vulithe pomamiliyona 166 odha li dha taandelithwa. Oonzapo ohadhi tseyithile wo yalwe onkundana ombwanawa yUukwaniilwa . . .

Pokugongala kwopaKriste. Okugongala kwokoshiwike hoka haku ningilwa mIinyanga yUukwaniilwa kaku shi owala elongelokalunga lyowala; ihe okwa nuninwa okulonga aantu. Iipopiwa ohayi gandjwa ya kankamena kOmbiimbeli, niishewe Ombiimbeli ohayi konakonwa kekwatho lyoshifo shOshungolangelo niileshomwa yilwe. Pokugongala, Oonzapo ohadhi ilongo wo okukala aauvithi ya pyokoka yonkundana ombwanawa.

Oonzapo ohadhi konakona uuyelele wa faathana momagongalo ge vulithe 107 000 muuyuni auhe nohadhi humitha komeho uukumwe wadho. Okugongala kwadho okwa mangulukila kehe gumwe noihapu umbwa ongalo. Dhoshili, ngele Oonzapo odha kala ihaadhi tula miilonga shoka tadhi longo aantu, ayihe mbyoka otayi ka kala osima. Onkee ano, ohadhi kambadhala okupopila onkundana ombwanawa okupitila . . .

Moshiholelwa shadho. Ohadhi kambadhala okukala oshiholelwa oshiwanawa meihumbato lyopaKriste, mokuungaunga nawa nayalwe momukalo moka nadho dha hala dhu ungaungwe nadho. (Mateus 7:12) Nokuli nonando inadhi gwanenena nomathimbo gamwe ohadhi punduka, odha halelela okwiihumbatela aantu ayehe komukalo gwohole, hangele owala tadhi ya tseyithile onkundana ombwanawa, ihe omoku ya kwathela wo momikalo dhilwe mpoka tashi vulika.

Oonzapo dhaJehova itadhi kambadhala okulundulula uuyuni nokuuvitha kwadho. Pehala lyaashono, uuna iilonga mbyoka ya longwa ngaashi Jehova a hala, ehulilo otali ke ya, ngaashi Jesus a hunganeka. Mbela shika otashi ka tya shike kevi nokaantu mboka ye li ko?

[Ethano pepandja 7]

Onkundana ombwanawa oyi li tayi uvithwa muuyuni auhe kOonzapo dhaJehova

“Ehulilo” oshike?

“. . . notaku ya ihe ehulilo.”—MATEUS 24:14.

KUNENA ehulilo lyuuyuni ohali popiwa apuhe. Omambo, oomuvi nosho wo iifo yi na ko nasha niiyolitha nosho wo mbyoka yi na ko nasha nuunongononi ohayi popi kombinga yiiningwanima yinikitha oluhodhi mbyoka tayi ka ningwa mesiku enene etilithi lyehulilo. Ohayi popi kutya uuyuni otawu ka hanagulwa po okupitila miita mbyoka tayi kondjwa niikondjitho yopalute, omaipomomumwe goopulanete, omikithi dhomukwayu dha nika oshiponga, elunduluko lyonkalombepo itaayi vulu okupangelwa nenge iinima iikwawo mbyoka yi li mewangandjo.

Omataloko gomalongelokalunga oga yoolokathana wo; ogendji otaga longo aantu kutya “ehulilo” otali ka hulitha po oshinamufudho kehe kombanda yevi. Omuteolohi gumwe okwa popi kombinga yaMateus 24:14 sho a nyola oohapu ndhika oonkumithi a ti: “Ovelise ndjika oyo yimwe ya simana noonkondo mOohapu dhaKalunga adhihe . . . Epipi lyongashingeyi olya taalela ehanagulo enene noonkondo nonando aantu owala aashona yomutse haya dhiladhila kombinga yoshinima shoka oshitilithi.”

Aantu mboka ye na omataloko ga tya ngaaka oya nyengwa okumona oshili ya simana: Jehova Kalunga okwa ‘pameka’ evi; “ine li shita li mbugale, ihe ehala lyokukala aantu.” (Jesaja 45:18) Onkee ano, Jesus sho a li a popi “ehulilo,” ka li a hala okutya evi olyo tali ka hanagulwa po; noka li a hala okutya aantu oyo taya ka hanagulwa po. Okwa li owala a hala okutya aakolokoshi, sha hala okutya, aantu mboka inaya hala okukala metsokumwe nomalombwelo gaJehova gopahole, oyo taya ka hanagulwa po.

Tala ethaneko limwe. Natu tye ando owu na egumbo ewanawa nowa pitika aantu ya kale mo itaaya futu. Yamwe yomaakalimo yamo oye na ombili nayakwawo nohaye li tonatele nawa. Ihe yalwe ohaye etele yakwawo omaupyakadhi ogendji mokukala taya kondjo nayo noku ya ninga nayi. Ohaya yonagula iiniwe yoye nonando oho kambadhala oku ya keelela.

Mbela oto ka ninga po shike opo wu kandule po uupyakadhi mboka? Mbela oto ka hanagula po egumbo lyoye? Hasho nando. Osha yela kutya oto ka tidha mo mboka ihaayi ihumbata nawa e to opaleke iinima mbyoka ya yonagula.

Jehova ota ka katuka onkatu komukalo gwa faathana. Okwa nwetha mo omupisalomi a nyole ta ti: “Mboka haa inekele OMUWA, otaa ka thigulula evi, ihe aakolokoshi otaa ka tidhwa po. Aadhudhu otaa ka kana po mbala; nando u ya konge, ito ya mono. Aaifupipiki otaa ka thigulula evi notaa ka mona uulinawa nombili.”—Episalomi 37:9-11.

Omuyapostoli Petrus okwa li a popi kombinga yoshinima sha faathana. Okwa nwethwa mo a nyole ta ti: “Nalenale Kalunga okwa li a popi, omagulu nevi e tayi shitwa. Evi olyu umbwa momeya nolyu umbwa nomeya, nokomeya geyelu wo uuyuni owa hanagulwa po.” (2 Petrus 3:5, 6) Omuyapostoli okwa li ta popi shi na ko nasha nEyelu lyopethimbo lyaNoowa. Uuyuni waakeenakonasha naKalunga owa Ii wa hanagulwa po, ihe evi kalya li lya hanagulwa po. Eyelu ndyoka lyokombanda yevi alihe olya li lyu “ulukile aakeenakonasha naKalunga shoka taa ka ningwa.”—2 Petrus 2:6.

Petrus okwa gwedha ko a ti: “Omagulu nevi sho yi li ko sigo onena, oya gamenwa kohapu tuu ndjoka yaKalunga, yi ka hanagulwe po nomulilo.” Ngele otwa hulile mpoka, otashi vulika tu thike pehulithodhiladhilo lya puka. Ndhindhilika kutya ovelise oya tsikile ko tayi ti: ‘Aakeenakonasha naKalunga otaa ka yonagulwa po.’ Evi halyo tali ka hanagulwa po, ihe aakeenakonasha naKalunga. Oya tsikile ko tayi ti ngiini? Petrus okwa nyola a ti: “Otwa tegelela shoka Kalunga e shi uvaneka: egulu epe [Uukwaniilwa waKalunga wopaMesiasa] nevi epe [uulipamwe waantu aayuuki], moka tamu ka kala uuyuuki.”—2 Petrus 3:7, 13.

Ehunganeko lyOmbiimbeli otali ulike wo kutya “ehulilo” oli li pokuya. Lesha Mateus 24:3-14 nosho wo 2 Timoteus 3:1-5 opo wu mone iinima mbyoka tayi ulike kutya shika otashi ka ningwa shili.a

Mbela owa kumwa sho aantu ya ngwangwana noonkondo shi na ko nasha naMateus 24:14, ovelise ndjoka tayi vulu okuuviwa nokuli nokokanona okashona? Opu na omatompelo gontumba kombinga yegwangwano ndyoka. Satana okwa posipaleka aantu kaaya mone ooshili dhi na ongushu ndhoka tadhi adhika mOohapu dhaKalunga. (2 Aakorinto 4:4) Kalunga okwa holeka wo elalakano lye aanuuntsa nokwe li hololele aaifupipiki. Shi na ko nasha naashika, Jesus okwa ti: “Otandi ku hambelele, Tate, Omuwa gwegulu nogwevi, oshoka iinima mbika ongoye we yi holeke aanongo naanamayele nowe yi hololele mboka ya fa uunona.” (Mateus 11:25) Kashi li tuu esimano okukala mokati kaamboka yi ifupipika mboka yu uvite ko kutya Uukwaniilwa waKalunga oshike naanaa notaya vulu okutegelela nenyanyu omalaleko nuuyamba ngoka tawu ke etela ayehe mboka taye wu ambidhidha!