Oohapu dhaJehova odhi na omwenyo
Omanenedhiladhilo okuza membo lyaJohannes
JOHANNES, “omulongwa ngoka Jesus a li e hole,” oye gwahugunina a nyola ehokololo lya nwethwa mo lyonkalamwenyo yaKristus nuukalele we. (Joh. 21:20) Evaangeli lyaJohannes ndyoka lya nyolwa lwomo 98 E.N. olye endulula owala iinima iishona mbyoka ya popiwa nale mOmavaangeli galwe gatatu.
Omuyapostoli Johannes okwa nyola Evaangeli lye e na elalakano lyokondandalunde. Okwa popi kombinga yiinima mbyoka a nyola a ti: “Mbika oya nyolwa, opo mu itaale kutya Jesus oye Kristus, Omuna gwaKalunga, nongele mwi itaala, otamu mono omwenyo omolwe.” (Joh. 20:31) Etumwalaka ndyoka li li mo oli na lela ongushu onene kutse.—Heb. 4:12.
“TALA, ONZIGONA YAKALUNGA”
Johannes Omuninginithi sho a mono Jesus, okwa popi e na uushili a ti: “Tala, Onzigona yaKalunga, tayi kutha po oondjo dhuuyuni!” (Joh. 1:29) Sho Jesus a li e ende muSamaria, Galilea, Judea nosho wo miilongo mbyoka yi li kuuzilo waJordan tu uvitha, ta longo aantu nosho wo okulonga iikumithalonga, “aantu oyendji yaankoka oye mu itaale.”—Joh. 10:41, 42.
Shimwe shomiikumithalonga ya dhenga mbanda mbyoka Jesus a longo osha li okuyumudha Lasarus. Aantu oyendji oya li yi itaale Jesus sho ya mono omulumentu ngoka a ningi omasiku gane a sa e na omwenyo. Ihe aasaaseri aakuluntu nAafarisayi oya li yu uvanene okudhipaga Jesus. Onkee ano, Jesus okwa li a zi po puyo e ta “yi komukunda gu li popepi nombuga, koshilando shi ithanwa Efraim.”—Joh. 11:53, 54.
Omapulo gopamanyolo taga yamukulwa:
1:35, 40—Kakele kaAndreas, omulongwa guni ishewe a li a thikama pamwe naJohannes Omuninginithi? Omuhokololi ngoka okwa kala ta popi aluhe Johannes Omuninginithi ta ti “Johannes,” ihe ini ipopya ye mwene kedhina mEvaangeli lye. Onkee ano, osha yela kutya omulongwa ngoka inaa tumbulwa kedhina oye omunyoli gwEvaangeli Johannes.
2:20—Otempeli yini ya li ya “tungwa oomvula omilongo ne nahamano?” Aajuda oya li taya popi okutungululwa kwotempeli yaSerubabel komukwaniilwa Herodes gwaJudea. Pamunandjokonona Josefus, iilonga mbyoka oya li ya tameke momumvo omuti-18 gwelelo lyaHerodes nenge mo 18/17 K.E.N. Ehala lyuuyapuki wotempeli nomahala galwe ga simana oga li ga tungwa muule woomvula hetatu. Ihe iilonga yokutunga otempeli oya li ya tsikile sigo opOpaasa yomo 30 E.N. nokonima yayo shoka osho sha li sha ningitha Aajuda ya tye kutya oya tungwa uule woomvula 46.
5:14—Mbela okulonga uulunde okwo haku eta omikithi? Haaluhe. Omulumentu ngoka Jesus a aludha okwa li a ala uule woomvula 38 omolwuuthigululwalunde. (Joh. 5:1-9) Jesus okwa li a hala okutya, molwaashoka omulumentu ngoka okwa silwa ohenda oku na okulandula ondjila ndjoka tayi fala mehupitho ye kaaha yone we owina opo kaaha adhike kusha oshiwinayi shi vulithe pomukithi ngoka a li e na. Omulumentu ngoka okwa li ta vulu okukala e na ondjo ngele okwa yono eyono ndyoka itaali mu dhiminwa po ndyoka tali mu fala meso moka itaa ka yumuka we.—Mat. 12:31, 32; Luk. 12:10; Heb. 10:26, 27.
5:24, 25—Oolye mboka ya ‘za meso noye ya momwenyo’? Jesus okwa li ta popi mboka ya li nale ya sa pambepo ihe sho yu uvu oohapu dhe oye mu itaale e taye etha okweenda moondjila dhawo dhuulunde. ‘Oya za meso noya ya momwenyo’ sho eso lya kuthwa po puyo e taya pewa etegameno lyomwenyo gwaaluhe molwokwiitaala kwawo Kalunga.—1 Pet. 4:3-6.
5:26; 6:53—Okukala ‘nomwenyo meni lyoye’ osha hala okutya shike? KuJesus Kristus, otashi ti okupewa oonkondo kuKalunga momikalo dhi li mbali: okuninga aantu ya kale ya hokiwa kuJehova nosho wo oonkondo dhokugandja omwenyo mokuyumudha aasi. Kaalanduli yaJesus ‘okukala nomwenyo muyo yene,’ otashi ti kutya okukala nomwenyo gwaaluhe. Aakriste aagwayekwa ohaye gu mono ngele ya yumudhilwa omwenyo gwomegulu. Aadhiginini mboka ye na etegameno lyokukala kombanda yevi otaya ka mona omwenyo gwaaluhe konima owala ngele ya piti mepangulo lyahugunina ndyoka tali ka ningwa pehulilo lyEpangelo lyOmvula Eyuvi lyaKristus.—1 Kor. 15:52, 53; Eh. 20:5, 7-10.
6:64—Mbela Jesus sho a hogolola Judas Iskarioto okwa li e shi shi kutya ote ke mu gwaaleka? Osha yela kutya ka li e shi shi. Ihe pompito yimwe mo 32 E.N., Jesus okwa li a lombwele aayapostoli ye a ti: “Gumwe oye omuhindadhi.” Otashi vulika pompito ndjono Jesus a li a ndhindhilika muJudas Iskarioto ‘etameko’ lyokulonga uuwinayi.—Joh. 6:66-71.
Iiyilongomwa kutse:
2:4. Jesus okwa li a lombwele Maria kutya ye e li Omwana gwaKalunga omugwayekwa a ninginithwa, oku na okutaamba ko ewiliko okuza kuHe gwomegulu. Nonando Jesus okwa adhika owala opo a tameke uukalele we, okwa li e shi nawa owili nenge ethimbo ndyoka e na okulonga iilonga ye, mwa kwatelwa eso lye lyopayambo. Nokuli nomupambele gwopopepi ngaashi Maria ka li ta vulu oku mu imba a longe ehalo lyaKalunga. Otu na okulongela Jehova Kalunga netokolotoko lya fa lyaJesus.
3:1-9. Oshiholelwa shaNikodemus omupangeli gwAajuda otashi tu longo iiyilongomwa iyali. Shotango, Nikodemus okwa li u ulike eifupipiko, omayele nokwa li a tseya kutya oku na ompumbwe yiinima yopambepo nokwa zimina kutya omwanamati gwomuhongi gwiipilangi omwiifupipiki oku li omuhongi a tumwa kuKalunga. Eifupipiko olya pumbiwa kAakriste yashili kunena. Oshitiyali, sho Jesus a li kombanda yevi, Nikodemus ka li a ningi omulongwa gwaJesus. Otashi vulika a li e shi ningithwa kuumbanda wokutila aantu noka li a hala okweetha ondondo ye ndjoka a li e na mOsanhedrin nenge molwohole yokuhola omaliko ge. Otatu vulu okwiilonga mo sha tashi tu londodha kutya katu na okweetha omahalo ga tya ngaaka ge tu imbe ‘tu itsike omuti gwomahepeko nokutsikila okulandula Jesus.’—Luk. 9:23, yelekanitha NW.
4:23, 24. Opo elongelokalunga lyetu li kale lya hokiwa kuKalunga, oli na okukala tali tsu kumwe noshili ndjoka yi li mOmbiimbeli noli na okuwilikwa kombepo ondjapuki.
6:27. Okukonga ‘iikulya mbyoka tayi kalelele sigo omomwenyo gwaaluhe’ otashi ti kutya okuninga oonkambadhala tu gwanithe po oompumbwe dhetu dhopambepo. Otu li aanelago ngele tatu shi ningi.—Mat. 5:3, NW.
6:44. Jehova ohe tu sile oshimpwiyu. Ohe tu hilile kOmwana moku ya kutse pauhandimwe okupitila miilonga yokuuvitha nomoku tu kwathela tu uve ko nokutula miilonga ooshili dhopambepo ta longitha ombepo ye ondjapuki.
11:33-36. Okuulika nkene tu uvite itashi ulike kutya otu li aankundi.
‘MU LANDULA’
Sho Opaasa yomo 33 E.N. ya li popepi, Jesus okwa li a galukile kuBetania. Momasiku 9 gaNisan okwa li e ya kuJerusalem a kayila okasino. Momasiku 10 gaNisan, okwa li e ya ishewe kotempeli. Mokuyamukula egalikano lye opo edhina lyaHe li simanekithwe, ewi olya li lya zi megulu tali ti: “Onde li simanekitha notandi li simanekitha natango.”—Joh. 12:28.
Manga ya li taya li uulalelo wOpaasa, Jesus okwa pe aalanduli ye omayele ga simana molwaashoka okwa li e li pokuza po nokwa galikana omolwawo. Konima sho Jesus a kwatwa, a pangulwa, e ta alelwa komuti gwomahepeko, okwa li a yumudhwa.
Omapulo gopamanyolo taga yamukulwa:
14:2—Ongiini Jesus a li ta ka “longekidhila ehala” aalanduli ye aadhiginini megulu? Shika osha li sha kwatela mo okukoleka kwaJesus ehangano epe mokuholoka koshipala shaKalunga nokugandja kuYe ongushu yombinzi ye. Elongekidho ndyoka olya li lya kwatela mo wo okupewa kwaKristus oonkondo dhopaukwaniilwa, nokonima yaashoka okuyumukila megulu kwaalanduli ye aagwayekwa okwa li kwa tameke.—1 Tes. 4:14-17; Heb. 9:12, 24-28; 1 Pet. 1:19; Eh. 11:15.
19:11—Mbela Jesus okwa li ta popi Judas Iskarioto sho a lombwele Pilatus kombinga yomulumentu ngoka e Mu gandja kuye? Pehala lyokupopya Judas nenge omuntu kondandalunde, osha yela kutya Jesus okwa li ta popi ayehe mboka ya kutha ombinga noye na ondjo medhipago lye. Maantu mboka omwa kwatelwa Judas, “aayambi aakuluntu noshigongi ashihe shaatokoli” nokuli ‘naantu’ mboka ya li ya thiminikwa ya pule ya mangululilwe Barabbas.—Mat. 26:59-65; 27:1, 2, 20-22.
20:17—Omolwashike Jesus a li a lombwele Maria Magdalena kutya ine mu guma? Maria okwa li a gumu Jesus molwaashoka ota dhiladhila kutya oku li pokuya megulu nokwa li itee ke mu mona we. Opo Jesus e mu shilipaleke kutya ita yi manga, okwa li e mu lombwele kutya ine mu guma, ihe na ye a ka lombwele aalongwa ye kutya okwa yumuka.
Iiyilongomwa kutse:
12:36. Opo tu ninge “aantu yuuyelele” nenge aahumbati yuuyelele otwa pumbwa okumona ontseyo yashili yOohapu dhaKalunga, Ombiimbeli. Opo nduno otu na okulongitha ontseyo ndjoka okuhilila mboka ye li momilema dhopambepo kuuyelele waKalunga.
14:6. Kapu na omukalo gulwe tatu vulu okuhokiwa kuKalunga kaagu shi owala okupitila muJesus Kristus. Ongele owala tu na eitaalo tali longo muJesus nokulandula oshiholelwa she tatu vulu okuhedha popepi naJehova.—1 Pet. 2:21.
14:15, 21, 23, 24; 15:10. Okuvulika kehalo lyaKalunga otashi tu kwathela tu kale tu mu hole nosho wo Omwana.—1 Joh. 5:3.
14:26; 16:13. Ombepo ondjapuki yaJehova oyi li omulongi nomudhimbulukithi. Ohayi tu hololele wo oshili. Natango, ohayi tu kwathele tu koke montseyo, muunongo, momayele, moondunge dhokuyoolola nomokudhiladhila kwetu. Onkee ano, otu na okudhiginina megalikano, unene tuu ngele tatu pula ombepo ondjapuki.—Luk. 11:5-13.
21:15, 19, NW. Jesus okwa li a pula Petrus ngele oku mu hole tuu e vulithe “ndhika,” sha hala okutya, oohi ndhoka dha li puyo. Kungeyi Jesus okwa li a tsu omuthindo kutya osha pumbiwa opo Petrus e mu landule ethimbo lyu udha pehala lyokulalakanena iilonga yokuyula oohi. Konima yokukonakona Omavaangeli, natu kale twa tokola toko okukala tu hole Jesus shi vulithe iinima yilwe mbyoka tashi vulika yi tu hile. Onkee ano, natu tsikileni okulandula Jesus nomutima aguhe.
[Ethano pepandja 9]
Oshike tatu vulu okwiilonga moshiholelwa shaNikodemus?