Oohapu dhaJehova odhi na omwenyo
Omanenedhiladhilo okuza membo lyIilonga
EMBO lyOmbiimbeli lyIilonga otali gandja ondjokonona ayihe yedhikopo lyegongalo lyopaKriste nonkene lya kala tali humu komeho. Olya nyolwa kundohotola Lukas notali gandja ehokololo lyituntula lyiilonga yAakriste yuule woomvula dha konda 28, okuza 33 E.N. sigo 61 E.N.
Oshitopolwa shotango shembo lyIilonga otashi popi unene kombinga yiilonga yomuyapostoli Petrus, noshitopolwa sha landula ko otashi popi kombinga yiilonga yomuyapostoli Paulus. Mokulongitha oshityapeha “tse” Lukas otu ulike kutya opo a li sho iiningwanima yimwe ya ningwa. Okugandja eitulomo ketumwalaka lyembo lyIilonga otaku tu kwathele tu kale twa lenga oonkondo dhOohapu dhaKalunga nosho wo ombepo ye ondjapuki. (Heb. 4:12) Otali tu inyengitha wo tu kale hatu iyamba notali koleke eitaalo lyetu metegameno lyUukwaniilwa.
PETRUS TA LONGITHA “IIPATULULO YUUKWANIILWA”
Konima yokutililwa ombepo ondjapuki, aayapostoli oya li ya gandja uunzapo nuulaadhi. Petrus okwa li a longitha shotango ‘shomiipatululo yUukwaniilwa wegulu’ okupatulula pathaneko omweelo opo Aajuda naamboka yi itedhululithwa mboka yi ‘itaala oohapu dhe’ ya mone ompito okuya mUukwaniilwa. (Mat. 16:19, KB; Iil. 2:5, 41) Omahepeko ngoka ga li ga holoka po oga halakanitha aalongwa, ihe shika osha li sha tamununa mo iilonga yokuuvitha.
Aayapostoli muJerusalem sho yu uvu kutya Samaria osha taamba ko oohapu dhaKalunga, oya tumu Petrus naJohannes ya ye kuyo. Petrus okwa li a longitha oshipatululo oshitiyali, sho a gandja ompito kAasamaria okuya mUukwaniilwa. (Iil. 8:14-17) Saulus Omutarso okwa li a lundulula iikala ye e ta ningi Omukriste, tashi vulika momumvo moka Jesus a yumuka. Petrus okwa li a longitha oshipatululo oshititatu, mo 36 E.N., nomagano gombepo ondjapuki oga li ga tililwa aapagani mboka inaaya pita etanda.—Iil. 10:45.
Omapulo gopamanyolo taga yamukulwa:
2:44-47; 4:34, 35—Omolwashike ooitaali ya li ya landitha po omapya gawo e taya topolelathana iimaliwa? Oyendji mboka ya ningi ooitaali oya li ya za kiitopolwa yokokule nokaya li ye na iikulya ya gwana opo ya kale ethimbo ele muJerusalem. Ihe oya li ye na ehalo okukala mo ethimbo ele opo yi ilonge oshindji kombinga yeitaalo lyawo ndyoka epe nokugandja uunzapo kuyalwe. Opo ye ya kwathele, Aakriste yamwe oya li ya landitha po iinima yawo niimaliwa mbyoka ya zi mo oya li ye yi longitha okukwathela mboka ya hepa.
4:13—Mbela Petrus naJohannes oya li inaaya longwa sha? Aawe, oya li ya longwa. Oya li yi ithanwa “aantu inaa longwa sha,” molwaashoka kaya li ya mona elongo lyopalongelokalunga ndyoka hali longwa koosikola dhoshirabbi.
5:34-39—Lukas okwa li a tseya ngiini shoka Gamaliel a li a popi moshigongi shoka mwa li owala iilyo yOsanhedrin? Opu na omikalo ndatu moka tashi vulika a li e shi uvu: (1) Paulus omulongwa omukulu gwaGamaliel, otashi vulika oye a li e shi lombwele Lukas; (2) Otashi vulika a li a pula oshilyo shOsanhedrin oshinambili Nikodemus; (3) Lukas otashi vulika a li a nwethwa mo kuKalunga a mone uuyelele mboka.
7:59—Mbela Stefanus okwa li a galikana kuJesus? Aawe. Ngoka e na okulongelwa oJehova Kalunga awike, onkee ano omagalikano agehe oge na okuukithwa kuye. (Luk. 4:8; 6:12) Stefanus okwa li ha galikana shito Jehova okupitila medhina lyaJesus. (Joh. 15:16) Ihe moshiningwanima shino Stefanus okwa mono emoniko ‘lyOmuna gwOmuntu a thikama kolulyo lwaKalunga.’ (Iil. 7:56) Molwaashoka oku shi shi nokutya Jesus okwa pewa oonkondo dhokuyumudha aasi, Stefanus okwa li a popi naye moku mu pula a dhimbulukwe oku mu yumudha, ihe ina galikana kuye.—Joh. 5:27-29.
Iiyilongomwa kutse:
1:8. Iilonga yokugandja uunzapo muuyuni auhe mbyoka hayi longwa kaalongeli yaJehova itayi vulu okutsakanithwa nopwaahe na ekwatho lyombepo ondjapuki.
4:36–5:11, KB. Josef gwokuKipro okwa li a lukwa Barnabas ndyoka tali ti “omwana gwehekeleko.” Aayapostoli otashi vulika ya li ye mu luku edhina Barnabas molwaashoka okwa li omunahole, omunambili noha kwathele yalwe. Otu na okukala twe mu fa, ihe inatu kala ngaashi Ananias naSafira mboka ya li ye na oshiyele, aafudhime naakengeleledhi.
9:23-25. Ngele tatu henuka aatondi yetu opo tu tsikile niilonga yokuuvitha kashi shi uumbanda.
9:28-30. Ngele otu wete kutya okuuvitha moshitopolwa shontumba nenge oohandimwe otashi tu etele oshiponga palutu, pamikalo nenge pambepo, otu na okukala twa kotoka nokuhogolola kutya openi nuunake tu na okuuvitha.
9:31. Omanga kaapu na omahepeko ga kwata miiti, otu na okukambadhala okukoleka eitaalo lyetu mokukonakona nomokutedhatedha. Shika otashi ke tu kwathela tu kale nokutila Jehova mokutula miilonga shoka tatu ilongo nokukala aalaadhi muukalele.
PAULUS OKWA LI OMULAADHI MUUKALELE
Agabus okwa li a yi kuAntiokia mo 44 E.N., hoka Barnabas naSaulus ya kala nokulonga “uule womumvo gumwe.” Agabus okwa li a hunganeke “ondjala onene” ndjoka ya li ye ya konima yomimvo mbali. (Iil. 11:26-28) Barnabas naSaulus oya li ya shuna kuAntiokia, “sho ya adhika ya tsakanitha oshilongayakulo shawo muJerusalem.” (Iil. 12:25) Konima yoomvula 12 lwaampono dhokwiitedhulula kwaSaulus, Barnabas naSaulus oya li ya tumwa kombepo ondjapuki ya ye molweendo lwiilonga yuutumwa mo 47 E.N. (Iil. 13:1-4) Oya li ya galukile kuAntiokia mo 48 E.N., “hoka ya li ya gandjwa miikaha yesilohenda lyaKalunga.”—Iil. 14:26.
Konima yoomwedhi omugoyi lwaampono, Paulus ngoka a (tseyika nawa Saulus) okwa li a hogolola Silas a kale he ende pamwe naye noya li ya yi naye molweendo lwe olutiyali. (Iil. 15:40) Timoteus naLukas oya li yi imbwanga mumwe naPaulus sho e li molweendo. Lukas okwa li a kala muFilippi sho Paulus a tsikile nolweendo lwe okuya kuAtena nokonima okuKorinto, hoka a tsakaneke Akula naPriskila e ta kala puyo omvula noomwedhi hamano. (Iil. 18:11) Paulus okwa thigi Timoteus naSilas muKorinto e ta kutha Akula naPriskila e taya yi nowato kuSiria petameko lyomumvo 52 E.N. (Iil. 18:18) Akula naPriskila oya li ya yi pamwe naye sigo okuEfeso hoka yo ya li ya thigala.
Konima sho a kala ethimbo lyontumba muAntiokia shomuSiria, Paulus okwa li a tameke nolweendo lwe olutitatu mo 52 E.N. (Iil. 18:23) MuEfeso “oohapu dhaKalunga odha taandele noonkondo, naantu oyendji oye dhi itaale.” (Iil. 19:20) Paulus okwa kala muEfeso uule womimvo ndatu. (Iil. 20:31) Paulus okwa li muJerusalem pOpentekoste yomo 56 E.N. Konima yokukwatwa po kwe, okwa li a gandja uunzapo nokee na uumbanda washa kiipala yaapangeli. Paulus okwa li a tulwa megumbo lyoonkwatwa uule woomvula mbali muRoma (lwomo 59-61 E.N.), nokuza mo okwa li a mono ompito okuuvitha kombinga yUukwaniilwa nokulonga “nokwe ya hokololela Omuwa Jesus Kristus.”—Iil. 28:30, 31.
Omapulo gopamanyolo taga yamukulwa:
14:8-13—Omolwashike aantu yomuListra ya luku ‘Barnabas Zeus, naPaulus Hermes’? Paongano dhOshigreka, Zeus okwa li omupangeli gwiikalunga nomwanamati gwe Hermes okwa li a tseyika e li omupopi omwaanawa. Molwaashoka Paulus okwa li oye ta popi unene, aantu yomuListra oya li ye mu luku Hermes naBarnabas oye mu luku Zeus.
16:6, 7—Omolwashike ombepo ondjapuki ya li ya keelele Paulus naaendi pamwe naye kaayu uvithe moshitopolwa shaAsia naBitinia? Molwaashoka opwa li owala pu na aalongi aashona, ombepo ondjapuki oya li ye ya wilike ya ye kiitopolwa mbyoka tayi imike iiyimati.
18:12-17—Omolwashike omuleli Gallio a li kee na ko nasha sho aatali ya tameke okudhenga Sostenes? Otashi vulika Gallio a li a dhiladhila kutya omulumentu ngoka a li ta wilike ongundu ndjoka yi li ompinge naPaulus okwa li ta mono shoka i ilongela. Ihe oshiningwanima shoka osha li she eta iizemo iiwanawa molwaashoka osha li sha ningitha Sostenes i itedhulule a ninge Omukriste. Konima yethimbo, Paulus okwa popi Sostenes e li ‘omumwatate.’—1 Kor. 1:1.
18:18—Paulus okwa li a ningi egano lyashike? Aalongwantu yamwe otaya dhiladhila kutya Paulus okwa li a ningi egano a ninge omunasiri. (Num. 6:1-21) Ihe Ombiimbeli itayi popi kutya egano lyaPaulus olya li lyashike. Natango Omanyolo inaga popya kutya Paulus okwa li e li ningi manga ini itedhulula nenge konima yaashoka go inaga yelitha ngele opo a adhika te li tula miilonga nenge okwa li te li hulitha. Kashi na mbudhi kutya olya li lyashike, okuninga egano ndyoka kasha li eyono.
Iiyilongomwa kutse:
12:5-11. Otatu vulu notu na okugalikana omolwaamwatate.
12:21-23; 14:14-18. Herodes okwa li a zimine a pewe esimano ndyoka li na owala okupewa Kalunga. Paulus naBarnabas oya li yi inyenge shi ili molwaashoka oya li ya tindi neendelelo okupewa esimano ndyoka lya pitilila. Inatu kala twa hala tu pewe esimano molwaashoka tu na shoka twa pondola miilonga yaJehova.
14:5-7. Okukala twa kotoka otashi vulu oku tu kwathela tu kale twi ipyakidhila muukalele.—Mat. 10:23.
14:22. Aakriste oya tegelela uudhigu tawu ya. Ihaya kambadhala oku wu henuka mokweetha po eitaalo lyawo.—2 Tim. 3:12.
16:1, 2. Aakriste aagundjuka oye na okulonga nuudhiginini miinima yopambepo nokukonga ekwatho lyaJehova opo ya kale ye na edhina ewanawa.
16:3. Opo yalwe ya taambe ko onkundana ombwanawa, otu na okukala metsokumwe nomakotampango gopamanyolo.—1 Kor. 9:19-23.
20:20, 21. Iilonga yokugandja uunzapo egumbo negumbo oyi li oshitopolwa sha simana shuukalele wetu.
20:24; 21:13. Osha simana noonkondo okukala aadhiginini kuKalunga pehala lyokuhupitha oomwenyo dhetu.
21:21-26. Otu na okutaamba ko nehalo ewanawa omayele ngoka ge li mondjila.
25:8-12. Aakriste otaya vulu noye na okulongitha oompangu dhopaveta ndhoka dhi li po “okupopila nokukoleka evaangeli.”—Fil. 1:7.
26:24, 25. Otu na okuuvitha “oohapu dhoshili nodhi shi okwiinekelwa,” nonando odhi li uugoya ‘kaantu mboka kaye na Ombepo yaKalunga.’—1 Kor. 2:14.
[Ethano pepandj 30]
Uunake Petrus a li a longitha “iipatululo yUukwaniilwa”?
[Ethano pepandj 31]
Iilonga yokuuvitha muuyuni auhe itayi vulu okulongwa nopwaahe na ekwatho lyombepo ondjapuki