“Inamu alulila omunhu owii”

15. PavaRoma 12:19, omolwetomheno lilipi tuhe na okwaalulila ovanhu owii?

¹⁵ Paulus okwa yandja vali etomheno limwe la fimana kutya omolwashike tuhe na okwaalulila vamwe owii. Ngeenge itatu alulile vamwe owii, otashi ka ulika kutya otu li ovalininipiki. Okwa ti: “Ovaholike, nye vene inamu alulila omunhu owii, ndelenee peni ehandu laKalunga omhito. Shaashi opa shangwa: Ehandu olange, ame handi futu, Omwene osho ta ti.” (Ovaroma 12:19) Omukriste oo ha kendabala okwaalulila vamwe owii omulinenepeki, molwaashi ota longo po oshilonga osho shi na ashike okulongwa po kuKalunga. (Mateus 7:1) Kakele kaasho, mokwaalulila vamwe owii otashi ulike kutya ina itavela meshilipaleko laJehova olo tali ti: “Ame handi futu.” Mepingafano naasho, Ovakriste vashili ove na elineekelo kutya Jehova ota ka ‘yukifila ovahoololwa vaye oshinima shavo.’ (Lukas 18:7, 8; 2 Ovatessaloniki 1:6-8) Nelininipiko, ohava efa Kalunga a alulile ovanhu owii wavo. — Jeremia 30:23, 24; Ovaroma 1:18.

18. Omolwashike okuhaalulila vamwe owii sha yuka, shi li pahole notashi ulike kutya otwe lininipika?

¹⁸ Eshi twa kundafana pauxupi Ovaroma etukulwa eti-12, otwa mona omatomheno onhumba a fimana kutya omolwashike tuhe na ‘okwaalulila nande omunhu owii.’ Etomheno lotete ololo kutya osha yuka okuhaalulila vamwe owii. Molwaashi Kalunga ohe tu file onghenda, osha yuka noshi li pandunge oku mu liyandjela nokudulika nehalo liwa koipango yaye, mwa kwatelwa oshipango shokukala tu hole ovatondi vetu. Etomheno etivali, ohatu ulike kutya otu hole vamwe ngeenge itatu va alulile owii. Mokukala itatu alulile vamwe owii nokukala nombili navo, ohatu ka kwafela pahole ovapataneki vamwe ovakwanyanya va ninge ovalongeli vaKalunga. Etomheno etitatu, ohatu ulike kutya otu li ovalininipiki ngeenge itatu alulile vamwe owii. Ngeenge ohatu alulile vamwe owii ohatu ka kala ovalinenepeki, molwaashi Jehova okwa ti: “Ehandu olange.” Eendjovo daye otadi tu londwele yo tadi ti: “Apa tape uya ounhwa, otape uya yo [okufifwa ohoni], ndelenee ounongo tau kala puava ve lininipika.” (Omayeletumbulo 11:2) Mokweefa Jehova a alulile ovanhu owii otashi ulike kutya otu li ovalininipiki.