Nkene Ombimbeli Hayi Tala Ko Ombili nEgameno

Aantu oyendji oyi itaala nokwaahe na omalimbililo kutya otapu kambadhalwa okumonika uukumwe owindji wuuyuni nosho wo kutya otau ke eta ombili negameno. Yo oyi inekela kutya einyengo lya tya ngaaka otali ka fala sigo omuuyuni u li nawa. Ihe Ombimbeli otayi ulike kutya omwa kwatelwa oshindji shi vulithe pwaashoka.

OMBILI negameno oyo oshipalanyole shoka sha simana noonkondo kAakriste molwoohapu ndhoka omuyapostoli Paulus a nwethwa mo a nyolele omagongalo gopaKriste gomethelemimvo lyotango. Oohapu dhe odha nyolwa mOmbimbeli mu 1 Aatessalonika 5:3 (NW): “Uuna taa ti: ‘Ombili negameno!’ opo nduno ehanagulo otali ya akele ongomusimba ta adhika koshitheta, nokaa na mpoka taa yi ontuku.” Enyolo ndika olye etitha omapulo ga simana.

Ombili nEgameno—Etetekelo lyaShike?

Ngele to lesha ontopolwa ayihe moka mwa kuthwa oohapu dhaPaulus ndhoka dhi li pombanda mpano, oto ka mona kutya mboka taa ti “ombili negameno” kaye shi Aakriste ya tonata, ihe yo shila aantu mboka ya kotha shi na ko nasha naashoka tashi ningwa shili. Oye li monkalo yoshiponga ihe yo kaye shi shi, molwashoka otaa dhiladhila kutya onkalo oyi li nawa shili. Ihe Paulus okwa ti kombinga yAakriste: “Ihe omasiku nomathimbo itamu pumbwa oku ga shangelwa, aamwameme.” (1 Aatessalonika 5:1) Eeno, tse otu na okutseya elandulathano lyaKalunga lyiiningwanima. Omolwashike mbela? Omolwashoka Paulus okwa ti kutya ethimbo lyehanagulo lyombadhilila, ndyoka lya lukwa “esiku lyOmuwa,” otali ke ya “ngomufuthi te ende uusiku.”—1 Aatessalonika 5:2.

Omapopyo ga hunganekwa shi na ko nasha nombili negameno oga kwatela mo shike? Kapu na omalimbililo, oge na okukwatela mo oshindji shaa shi omapopyo gowala. Konyala ethimbo alihe ndyoka aantu ya kala taa kondjo, oya kala taa popi ombili negameno. Oohapu dhaPaulus odhi na okuulika kethimbo ndyoka iigwana tayi monika ya fa shili tayi eta ombili negameno pamukalo omukumithi. Ihe otayi ka kala owala yokombanda. Osha yela kutya ombili negameno yokombanda mbyoka tayi fala mehanagulo lyombadhilila, kayi shi nando ombili yashili nenge egameno lyolela.

Jesus okwa popi wo kombinga yehanagulo ndika lyombadhilila. Okwe li hokolola olyo “uudhigu uunene, inaau kala [ko] oketameko lyuuyuni sigo ongashingeyi nongaashi itau ya we.” Oomvula omathele komeho gaJesus, omuprofeti Daniel okwa popi wo kulyo, nokwe li hokolola olyo “ethimbo edhigu, . . . [inaali] kala ko nale kombanda yevi, hela aantu ya shitilwe.”—Mateus 24:21; Daniel 12:1, OB-1986.

Kutya nee olya lukwa uudhigu uunene nenge ethimbo edhigu—pahunganeko lyo otali ka hanagula po oshinkoti kehe shonkalelo yaSatana yokevi. Pehala lyokuulika okuhokiwa kuKalunga, omapopyo ga hunganekwa shi na ko nasha nombili negameno otage eta lelalela shoka tashi yi kondjitha!—Faathanitha Sefanja 3:8.

Iinima Yi Na Sha nEthimbo Oya Hololwa

Oonkatu dhomasiku ngano ndhoka tadhi monika dha fa tadhi fala kuukumwe uunene wuuyuni noketegameno lyombili negameno ndyoka lye etwa po kudho, odho mbela egwanitho lyelondodho lyopahunganeko lyaPaulus? Oshifo shika osha popi nale olwindji sha yela mo kutya okuza 1914 otwa mono egwanitho lyomahunganeko ogendji gOmbimbeli ngoka ge na sha nekalopo lyaJesus megulu e na oonkondo dhUukwaniilwa. (Mateus, ontopolwa 24, 25; 2 Timoteus 3:1-5; Ehololo 6:1-8) Jesus oku ulike kutya esiku lyaJehova, uuna ehanagulo lyombadhilila tali ka adha aakolokoshi, otali ke ya manga iilyo yepipi lyaantu mboka ya mona etameko lyethimbo ndika oko yi li natango.—Lukas 21:29-33.

Omuyapostoli Paulus okwa popi wo oshinima shi na ko nasha nethimbo. Okwa ti: “Manga yo taa popi kombinga yombili negameno, omupya otagu ya adha ombadhilila.” Elundululo ndika lyoohapu dhaPaulus mo The New English Bible otali ulike sha yela kutya uudhigu uunene otau ka ningwa “manga yo taa popi.” Ngaashi omufuthi te ende uusiku—inaashi tegelelwa—ehanagulo otali ke ya uuna inaali tegelelwa nando, uuna eitulomo lyaantu oyendji lyu ukithwa kombili negameno mbyoka ya tegamenwa. Ano nonando tse itatu vulu okutya shili kutya onkalo yonena yombili negameno otayi gwanitha oohapu dhaPaulus—nenge kutya omapopyo kombinga yombili negameno oge na natango okuhuma komeho shi thike peni—uushili kutya omapopyo ga tya ngaaka ohagu uvika ngashingeyi unene inaashi fa nale otau londodha Aakriste kutya osha simana ya kale ya tonata ethimbo kehe.

‘Ekondjo’ Pokati kOmanenepangelo

Sho omuprofeti Daniel a popi shi na ko nasha nethimbo edhigu, ye okwa tumbula wo oshinima shi na ko nasha nethimbo. Oku ulike kutya ethimbo edhigu otali ka kala ko kehulilo lyekondjo lyethimbo ele pokati komapangelo gaali omanankondo, ngoka limwe lya lukwa “omukwaniilwa gwOsidi” nalilwe “omukwaniilwa gwOnori.” (Daniel 11:5-43) Okuza pehulilo lyIita Iitiyali yUuyuni, omapangelo ngaka gaali omanankondo oga kalelwa po ‘komukwaniilwa gwOsidi’ gwuukapitalisi ‘nokomukwaniilwa gwOnori’ gwuusosiale.

Daniel okwa hunganeke kutya ethigathano lyuutondwe pokati komapangelo ngaka gaali, ndyoka lya li li iwetikile pethimbo lyoomvula 45 dha piti, otali ka kala ngaashi ‘ekondjo,’ ngaashi naanaa aadhani yaali mboka taa kondjele okusindana. Omasiku ngano ekondjo otali monika lya fa lya shuna pevi. Pashiholelwa, muMai gwomvula ya zi ko, oministeli yiikwapondje yaSoviet Union oya yelitha kutya Iita Iitalala oya pita po. MuJuni oshifo Time osha popi kombinga yoshigongi shaapangeli pokati kIilongohangano naSoviet Union e tashi ti: “Ando dhimwe dhomoondjuvaneno dhokungambeka iilwitho nekonakono lyiilwitho yopakerna odha ningilwe oomvula dha zi ko, ando odha monika dha fa oshilonga oshikumithi. Ngashingeyi, oondjuvaneno adhihe kumwe otadhi monika dha fa inaadhi adha oshitsa shopombanda ngaashi sha li sha tegelelwa.”

Ethimbo otali ke shi ulika ngele uukuume mbuka wokombanda u li pokati komanenepangelo gaali owopokathimbo nenge otau kalelele. Ihe opu na oshinima shimwe shoka sha yela. Ethimbo ndyoka Jesus a popi, olya huma komeho noonkondo. Naashoka tashi ningwa muuyuni otashi ulike kutya iiningwanima mbyoka ya hunganekwa komuyapostoli Paulus nomuprofeti Daniel oyi li pokuningwa. Nonando iiningwanima yopapolotika yomasiku ngano oya ningwa unene omolwenwethomo lyoongeleka dhUukwakriste, yo itayi ke eta ombili tayi kalelele. Uunzapo otau ulike kutya otayi ke etela iigwana yuuyuni mbuka sha shoka tashi kondjitha ombili.

[Ethano pepandja 6]

Ethimbo otali ke shi ulika kutya uule u thike peni uukuume mboka wokombanda mboka u li pokati komanenepangelo gaali tau ka kala

[Edhina lyomuthaneki]

USSR Mission to the UN

Tala Handiyaka ‘yOmbili nEgameno’ Mbyoka Ye Etwa Po kAantu

Oshili oyo kutya aantu itaa vulu okweeta nando ombili yashili ndjoka tayi kalelele. Omolwashike mbela? Omolwashoka aantu hayo aayonaguli yashili yombili, nonando yo oye na wo ondjo yeinyateko nombinzi mondjokonona yawo. Omuyonaguli gwashili gwombili oku na oonkondo oonene dhi vule dhomuntu. Ke shi gumwe i ili kee shi Satana Ondiaboli, ngoka ta hokololwa mOmbimbeli oye “ta hongolola evi alihe.”—Ehololo 12:9.

OMBIMBELI otayi ti: “Uuyuni auhe ou li mepangelo lyomuhindadhi [Satana].” (1 Johannes 5:19, OB-1986) Ano okweeta po ombili yashili negameno tali kalelele, Satana oku na okukuthwa po kaa kale po we, pamwe nonkalelo yuuyuni hoka ye a tungila naandjoka sha yela kutya otayi pangelwa kuye. (Faathanitha Jesaja 48:22; Aaroma 16:20.) Aantu itaya vulu oku shi ninga.

Ombili negameno otayi vulu nduno okweetwa po ngiini? Omokupitila moonkondo dhaaNgoka e na oonkondo odhindjidhindji dhi vule dhaSatana. Kalunga Omunankondoadhihe okwa ngambeka ethimbo lyaSatana lyokukala i ipyakidhila mokati kaantu. Ngele ethimbo ndyono lya pu ko, ‘ehanagulo otali ka akela’ uuyuni mboka u li mepangelo lyaSatana. (1 Aatessalonika 5:3-7, faathanitha NW) Uunzapo auhe otau eta ehulithodhiladhilo kutya shika otashi ka ningwa masiku.

Ombili nEgameno Ongashingeyi!

Ihe ongiini nee kombinga yethimbo lyongashingeyi? Ombili negameno yashili otayi vulu okumonika nokuli nando onena. Ngiini mbela? Hangaashi aawiliki yomalongelokalunga oyendji ya li ya kambadhala oku shi ninga, mokukwatathana niinima yoopolotika yuuyuni mbuka, ihe pehala lyaashono omokuvulika koompango dhaKalunga nokomapukululo ge.

Okukatuka ngawo otaku eta ngaa mbela shili ombili? Eeno, otashi yi eta. Pashiholelwa, Oonzapo dhaJehova odhe shi yelekela nodha mona kutya otashi vulika shili okunyanyukilwa ombili yashili nosho wo egameno olindji. Molwashoka yo ohaa vulika koompango dhaKalunga ngaashi dha popiwa mOmbimbeli, ohashi ya vulitha okugongala ye li ehangano lyopaigwana, kutya nee oyomuhoko, oyoshigwana nenge oyelaka lini.—Epsalmi 133:1.

Mokuvulika koompango dhopakalunga, yo oya ‘hambulula omagongamwele gawo omatemo noihayi ilongo we uukwiita’ pamukalo gwopathaneko. (Jesaja 2:2-4) Yo oyu uvite ya gamenwa mohole yaKalunga noye na einekelo kutya aamwahe yopambepo oye na ko nasha nayo. (Aaroma 8:28, 35-39; Aafilippi 4:7) Ngele owa limbililwa kutya shika oshoshili ngaa, otatu ku hiya u ya talele po mushimwe shomIinyanga yawo yUukwaniilwa nou tale ngoye mwene.

Ombili nEgameno mUuyuni Auhe

Ihe shika hasho egwanitho lyahugunina lyeuvaneko lyOmbimbeli lyombili negameno. Nandonando! Otashi ulike owala pamukalo omushona nkene uuyuni mbuka tau ka kala ngele ayehe taa vulika koompango dhaKalunga. Masiku euliko ndika otali ka ninga lyoshili.

Omuyapostoli Paulus okwa ti: “Uuna [mboka ihaa longele Kalunga] taa ti: ‘Ombili negameno!’ [sho taya dhiladhila kutya lwahugunina yo oye eta ombili negameno kuyo yene] opo nduno ehanagulo otali ya akele.” (1 Aatessalonika 5:3, NW) Kalunga oye ta ka tokola kutya Satana okwa pukitha aantu ethimbo ele lya gwana. Notashi ka kala nduno ethimbo lyoku mu kutha po kaa kale po we pamwe nonkalelo ombwinayi yuuyuni ndjoka tayi pangelwa kuye. Opo nduno ehunganeko lyaDaniel otali gwanithwa: “Pomasiku gaakwaniilwa mbeyaka Kalunga komegulu ota dhike oshilongo [“uukwaniilwa,” KB], itashi teka po sigo aluhe, nelelo lyasho itali thigilwa oshilongo [“uukwaniilwa,” KB] oshikwawo. Osho tashi nyanyagula e tashi teyagula iilongo, nosho shene tashi kala sigo aluhe.”—Daniel 2:44.

Otashi ka kala mbela shaa shi shopauyuki kuKalunga okukatuka ngawo? Hasho nando. Ehanagulo lyombadhilila otali ka adha owala mboka ye li ilongela pakupangula kwaKalunga nenge pamithikampango dhaKalunga. Owi inekela mbela kutya etokolo lyOmushiti otali ka kala lyopauyuki moshinima shika? Dhoshili, oshinima otatu vulu oku shi ethela miikaha ye! Oshilanduliko shiilonga ye yepangulo otashi ka kala shike mbela? Eyeletumbulo otali ti: “Aayuuki ohaa ka kala moshilongo, naakaanambudhi ohaa kalele mo; ihe aakolokoshi taa tudhwa moshilongo.” (Omayeletumbulo 2:21, 22) Mbela opu na ngaa ngoka ta ka kala a nika oluhodhi molwashoka aakolokoshi taya ka kala kaaye po we?

Uuna aayonaguli yombili taya ka kala kaaye po we, aantu kombanda yevi alihe otaa ka nyanyukilwa ombili negameno yashili kohi yelelo ewanawa lyUukwaniilwa waKalunga. “Oyo itaa kala nokuningilathana uuwinayi nokuyona sha mevindundu lyandje alihe eyapuki, oshoka evi alihe otali [ka] kala lyu udha okutseya kwOmuwa, kwa fa omeya ga kala ga siikile efuta.” (Jesaja 11:9, faathanitha OB-1986) Euvaneko ndika lyOmbimbeli owe li itaala? Ou na mbela einekelo enene kutya iinima mbika otayi ka ningwa masiku? Ngele owa limbililwa mwaashono, otatu ku ladhipike oku shi konakona natango. Dhoshili, omulandu gwaKalunga ogo awike omulandu gwashili ngoka omuntu ta ka adha elalakano eyuulukiwa lyombili yashili negameno lyashili.

[Ethano pepandja 8]

Oshigwana shaJehova otashi nyanyukilwa ombili yashili negameno olindji nena