Kwathela aantu ya ‘penduke mo moomposi’
“Omwa tseya ethimbo ndika kutya olyo ethimbo lyokupenduka moomposi.”—ROM. 13:11.
OTO VULU OKUYELITHA?
Omolwashike sha simana Aakriste ya kale ya tonata pambepo?
Omolwashike aakalele mboka ya tonata ye na okukala haya pulakene nawa nokukala haya nongele oonkalo dhaantu?
Okukala tu na ohenda nokuungaunga naantu nondjaalela ohaku dhana onkandangala yini muukalele?
1, 2. Omeityo lini aantu oyendji ya pumbwa okupenduka?
OMUMVO kehe, aantu omayuvi ohaya si molwiiponga yoohauto mbyoka hayi ningwa molwaashoka omuhingi a li ta hingi ta lendenda nenge a kotha nokuli. Yalwe oya tidhwa miilonga molwaashoka inaya penduka nziya ya thike kiilonga pethimbo nenge molwaashoka ya li taya kotha miilonga. Ihe oomposi dhopambepo otadhi vulu okweetela omuntu iilanduliko ya kwata miiti yi vulithe mpoka. Nomolwaashono Ombiimbeli tayi ti: “Omunelago oongoka ta kala a tonata.”—Eh. 16:14-16.
2 Esiku enene lyaJehova otali hedha popepi, ihe aantu oyendji oye li moomposi dhopambepo. Nokuli naawiliki yamwe yUukwakriste oya popi kutya aantu yawo oye li ‘moomposi.’ Oomposi dhopambepo oshike? Omolwashike sha simana Aakriste yashili ya kale ya tonata? Ongiini tatu vulu okukwathela yalwe ya penduke mo moomposi ndhoka?
OOMPOSI DHOPAMBEPO OSHIKE?
3. Aantu ya kotha pambepo ohaya kala monkalo yi li ngiini?
3 Aantu ya kotha ihaya vulu okulonga sha. Mekondjithathano naashono, mboka ya kotha pambepo otashi vulika ya kale yi ipyakidhila, ihe haniinima yopambepo. Otashi vulika ya kale yi itula unene miinima yawo yonkalamwenyo nenge taya lalakanene omainyanyudho, etumbalo nenge omaliko. Molwaashoka oye na omaipyakidhilo agehe ngoka, ihaya kala ye na ko nasha lela nompumbwe yawo yopambepo. Aantu mboka ya tonata pambepo oye wete kutya otu li “pomasiku gopehulilo,” onkee ano otaya longo aluhe ehalo lyaKalunga.—2 Pet. 3:3, 4; Luk. 21:34-36.
4. Ekumagidho ndika ta li ti: “Inatu kaleni twa kotha ngaashi yalwe” otali tu longo shike?
4 Lesha 1 Aatessalonika 5:4-8. Omuyapostoli Paulus okwa li a kumagidha ooitaali ooyakwawo menyolo ndika ‘kaa ya kothe ngaashi yalwe.’ Mbela okwa li a hala okutya shike? Omukalo gumwe tatu vulu ‘okukotha’ ongele tatu ipwililikile omithikampango dhaJehova dhopamikalo. Omukalo omukwawo tatu vulu ishewe ‘okukotha’ ongele tatu ipwililikile uushili mboka kutya ethimbo lyaJehova lyokuhanagula po aakolokoshi oli li popepi. Natu shilipaleke kutya aantu mboka kaaye na etilokalunga itaye tu nwetha mo tu landule oondjila dhawo nenge tu kale tu na iikala ya fa yawo.
5. Aantu mboka ya kotha pambepo oye na iikala ya tya ngiini?
5 Aantu yamwe ohaya dhiladhila kutya kaku na Kalunga ngoka te ke ya pangula. (Eps. 53:1) Yalwe ohaya dhiladhila kutya Kalunga ke na ko nasha naantu, onkee ano inashi pumbiwa tu kale tu na ko nasha naye. Yo yalwe ohaya kala yu uvite kutya ngele oya kala mongeleka yontumba otashi ke ya ningitha ookuume kaKalunga. Aantu ayehe mbaka oya kotha pambepo. Onkee ano, oya pumbwa okunuka mo moomposi. Ongiini mbela tatu vulu oku ya kwathela?
NATSE OTU NA OKUKALA TWA TONATA
6. Omolwashike Aakriste ye na okukambadhala ya kale ya tonata pambepo?
6 Opo tu vule okupendula yalwe, natse otu na okukala twa tonata. Mbela shika osha kwatela mo shike? Oohapu dhaKalunga otadhi ulike kutya omuntu ngoka a kotha pathaneko oha longo “iilonga yomomilema” ngaashi uufukedhi, uunkolwe, uuholume, uukeeneidhiliko, oontamanana, nefupa. (Lesha Aaroma 13:11-14.) Okuhenuka eihumbato lya tya ngaaka otaku vulu okukala eshongo. Osha simana tu kale twa tonata. Omuhingi ngoka ha kala kee wete kutya osha nika oshiponga okuhinga ta kotha otashi vulika a tule omwenyo gwe moshiponga. Inashi simana tuu opo Aakriste kaaya kale moomposi dhopambepo ndhoka tadhi vulu oku ya etela eso!
7. Okukala twa tala ko aantu momukalo gwa puka otaku vulu oku tu guma ngiini?
7 Pashiholelwa, Omukriste otashi vulika a dhiladhile kutya aantu ayehe moshitopolwa oya tindilila onkundana ombwanawa. (Omayel. 6:10, 11) Otashi vulika a kale ta ti: ‘Ngele kapu na ngoka e na ohokwe, omolwashike ndi na okwiidhipagela po ndi uvithile aantu nenge ndi ya kwathele?’ Odhoshili kutya otashi vulika yamwe ya kotha pambepo ngashingeyi, ihe oonkalo niikala yawo otayi vulu okulunduluka. Yamwe ohaya nuka mo moomposi e taya taamba ko oshili. Ngele natse otwa kala twa tonata otatu vulu oku ya kwathela tatu longitha omikalo omipe dhokuuvitha onkundana ombwanawa ndhoka tadhi gumu omutima. Otu na okukala tatu idhimbulukitha tse yene kutya omolwashike uukalele wetu wa simana naashono otashi ke tu kwathela tu kale twa tonata.
OMOLWASHIKE UUKALELE WETU WA SIMANA?
8. Omolwashike uukalele wetu wopaKriste wa simanenena?
8 Dhimbulukwa kutya, kutya nduno aantu otayi inyenge ngiini ketumwalaka, iilonga yetu yokuuvitha otayi simanekitha Jehova notayi dhana onkandangala onene mokugwanithwa kwelalakano lye. Masiku, aantu ayehe mboka inaaya hala okupulakena konkundana ombwanawa otaya ka geyelwa. Aantu otaya ka pangulwa shi ikolelela kunkene haya tala ko onkundana ombwanawa. (2 Tes. 1:8, 9) Natango, itashi ka kala pandunge ngele Omukriste ta dhiladhila kutya inashi pumbiwa omuntu u uvithe neitulomo molwaashoka ‘otaku ka kala eyumuko lyaayuuki nolyaalunde.’ (Iil. 24:15) Otu uvite ko nawa shoka Oohapu dhaKalunga tadhi tu lombwele kutya ‘iikombo’ otayi ka ya “mokugeelwa kwaaluhe.” Iilonga yetu yokuuvitha otayi ulike ohenda yaKalunga ndjoka tayi pe aantu ompito ya lundulule oonkalamwenyo dhawo yo ya ka ‘mone omwenyo gwaaluhe.’ (Mat. 25:32, 41, 46; Rom. 10:13-15) Ngele aantu ihatu ya uvithile openi taya ka uva etumwalaka ndyoka tali ke ya etela omwenyo?
9. Okuuvitha onkundana ombwanawa okwe ku etela ngiini uuwanawa nosho wo yalwe?
9 Sho tatu uvithile yalwe natse otatu mono uuwanawa. (Lesha 1 Timoteus 4:16.) Mbela ku wete kutya eitaalo lyoye nohole yoye yokuhola Kalunga oya nkondopala molwaashoka ho popi kombinga yaJehova noyetegameno lyUukwaniilwa we? Mbela okuuvitha inaku ku kwathela wu kale wu na uukwatya wopaKriste? Mbela sho ho ulike kutya owi igandja kuKalunga okupitila mokuuvitha muukalele inashi gwedhela ko kenyanyu lyoye? Aantu oyendji mboka ye na uuthembahenda wokulonga yalwe oshili oya mona enyanyu sho ye wete ombepo yaKalunga tayi kwathele aantu ya hwepopaleke oonkalamwenyo dhawo.
KALA HO NONGELE OONKALO DHAANTU
10, 11. (a) Ongiini Jesus naPaulus ya li haya nongele oonkalo dhayalwe? (b) Gandja ethaneko lyankene okunongela oonkalo dhaantu taku vulu okuhwepopaleka uukalele wetu.
10 Omuntu kehe pauhandimwe otashi vulika a gumwe komukalo gwokuuvitha onkundana ombwanawa gwa yooloka ko kwaangoka tagu gumu gulwe. Onkee ano, aakalele Aakriste oye na okukala haya tala kutya aantu oye li moonkalo dhini. Jesus okwe tu tulila po oshiholelwa. Molwaashoka okwa li a gwanenena okwa li ta vulu okumona omadhiladhilo omawinayi ngoka ga li momutima gwOmufarisayi, eitedhululo lyashili lyomukulukadhi omulunde, nosho wo momutima gwomuselekadhi ngoka a li a gandja tashi zi komutima. (Luk. 7:37-50; 21:1-4) Jesus okwa li ha vulu okusila oshimpwiyu oompumbwe dhomuntu kehe dhopambepo. Ihe omupiya gwaKalunga ina pumbwa okukala a gwanenena opo a kale e shi okunongela nawa oonkalo dhaantu. Omuyapostoli Paulus okwe tu tulila po oshiholelwa. Okwa li ha kundathana iinima yi ili noyi ili opo aantu ya yoolokathana noye na iikala yi ili noyi ili ya taambe ko shoka ta popi.—Iil. 17:22, 23, 34; 1 Kor. 9:19-23.
11 Ngele otwa kala hatu kambadhala okunongela oonkalo dhaantu ngaashi Jesus naPaulus ya li haya ningi, otatu ka mona nkene tatu vulu okupendutha ohokwe maantu mboka hatu popi nayo. Pashiholelwa, manga inoo popya nomuntu gwontumba kambadhala wu tale kutya ogwomeputuko lini, shoka e hole nenge onkalo yomegumbo. Otashi vulika wu tale kwaashoka wa adha ta ningi ngoye to tameke oonkundathana shi ikolelela kwaashoka.
12. Omolwashike tu na okukala twa kotokela shoka tatu popi naangoka tatu longo naye?
12 Omuntu ngoka ha nongele oonkalo dhaantu oha kambadhala kaapiyaganekwe kusha. Sho tu li muukalele otashi vulika tu kale tatu popi iinima tayi tungu naangoka tatu longo naye. Ihe, otwa pumbwa okudhimbulukwa kutya elalakano lyetu lyokuya miilonga yomomapya olyo okuuvithila yalwe. (Omuuv. 3:1, 7) Onkee ano, otu na okukala twa kotoka opo ngele tatu popi sho tu uka kegumbo ekwawo kaashi ye moshipala iilonga yetu yuukalele. Okukundathana kombinga yaashoka tatu ka popya nomunegumbo oku li omukalo omwaanawa oku tu kwathela tu kaleke omadhiladhilo getu koshilonga shetu. Natango, nonando ongodhi yopeke otashi vulika yi tu kwathele tu kale tatu shi enditha nawa muukalele, otu na okushilipaleka kutya okupopya mongodhi itaku ka piyaganeka oonkundathana dhetu nomunegumbo.
KALA WU NA OHOKWE MOMUNTU
13, 14. (a) Ongiini tatu vulu okumona kutya omuntu oku na ohokwe mushike? (b) Oshike tashi vulu okupendutha ohokwe yomuntu miinima yopambepo?
13 Aakalele mboka inaaya kotha ohaya pulakene nawa ngele ngoka taya uvithile ta popi. Omapulo geni to vulu okupula opo wu ningithe omunegumbo a popye omaiyuvo ge? Mbela oti ipula kombinga yomalongelokalunga ngoka ge li po ogendji, kombinga yomuyonena moshitopolwa, nenge okombinga yomapangelo ngoka inaaga vula okugwanitha po shoka ga li ga tegelelwa ga ninge? Mbela ito vulu okupendutha ohokwe yomuntu ngoka miinima yopambepo mokupopya kombinga yiinima yomeshito mbyoka ya shitika nenge kunkene omayele gOmbiimbeli tage tu kwathele? Aantu oyendji, nokuli naamboka inaayi itaala muKalunga oye hole okugalikana. Oyendji ohaya kala tayi ipula ngele opu na ngaa ngoka ha pulakene komagalikano gawo. Yalwe otashi vulika ya kale ye na ohokwe momapulo ngaka: Mbela Kalunga oha pulakene komagalikano agehe? Ngele hasho, oshike tu na okuninga po opo Kalunga a kale he tu uvu?
14 Otatu vulu okwiilonga oshindji kaauvithi ya pyokoka sho taya tameke oonkundatha naantu. Tala kunkene haya henuka okupula aantu okanaku nokwiidhopa moonkalamwenyo dhawo. Ongiini omutono gwewi lye nosho wo einyengo lyokoshipala tali ulike kutya oku na ohokwe mwaashoka omunegumbo ta yamukula?—Omayel. 15:13.
KALA WU NA OHENDA, NUUNONGO
15. Omolwashike tu na okukala tu na ohenda sho tatu uvitha?
15 Mbela oho inyenge ngiini ngele wa pendulwa moomposi oondhigu? Aantu yamwe ngele oya pendulwa moomposi ombadhilila ihaya kala yu uvite nawa. Ohashi kala shi li nawa wu ya pendule to ziilile ko. Osha faathana wo nokupendula aantu moomposi dhopambepo. Pashiholelwa, omomukalo omwanawa guni tu na okuyamukula omunegumbo ngele ine tu taamba ko? Ulika kutya owu mu uvite ko, ngoye to mu pandula sho u ulike shoka shi li momutima gwe e to zi po pegumbo lye nombili. (Omayel. 15:1; 17:14; 2 Tim. 2:24) Ohenda yoye otashi vulika yi ka ningithe omuntu ngoka a pulakene moshikando tashi landula ngele pegumbo lye pwe ya ishewe Oonzapo.
16, 17. Ongiini tatu vulu okulongitha oondunge muukalele?
16 Poompito dhilwe otashi vulika wu pondole okupopya nomuntu ngoka a li inaa hala petameko. Omuntu gumwe otashi vulika a tye, “inandi hala. Ondi na nale ongeleka yandje” nenge “kandi hole iinima mbyo” molwaashoka owala osho e wete oshipu oku ku ningitha kuu tsikile ko sha. Ihe nonando ongawo, oto vulu okupula omunegumbo nuukeka nonohenda epulo tali pendutha ohokwe ye miinima yopambepo.—Lesha Aakolossa 4:6.
17 Omathimbo gamwe ngele otwa adha omunegumbo ta ti okwiipyakidhila, oshi li nawa tu mu uve ko e tatu yi. Omathimbo gamwe otashi vulika wu nongele kutya oto vulu okupopya naye sha paufupi tashi tungu. Aamwatate ohaya lesha enyolo lyOmbiimbeli ndyoka tali ningitha omuntu a dhiladhile noku mu pula epulo yo ye ye ye li yamukule nale, taye shi ningi owala muule woosekonde. Oonkundathana dhawo oofupi omathimbo gamwe odha ningitha aantu ya mone kutya inayi ipyakidhila shili nokukala kaaye na ethimbo lyokupulakena koonkundathana ndhoka. Omolwashike itoo ningi ngaaka ngele onkalo tayi shi pitike?
18. Oshike tatu vulu okuninga opo tu kale tatu pondola mokugandja uunzapo wontukuluka?
18 Uuna tatu popi naantu sho tatu ningi iinima yakwalukehe, otatu vulu oku ya kwathela ya kale ye na ohokwe okuuva onkundana ombwanawa ngele otwa kala twi ilongekidhila uunzapo wontukuluka. Aamwatate naamwameme oyendji ohaya kala aluhe ye na iileshomwa moondjato dhawo. Ohashi vulika wo ya kale ye na omanyolo gontumba momadhiladhilo opo ye ga leshele aantu ngele oya mono ompito. Oto vulu okupula omutonateli gwiilonga nenge aakokolindjila megongalo lyeni ye ku lombwele nkene to vulu oku shi enda.
PENDUTHA AAPAMBELE YOYE TO ZIILILE KO
19. Omolwashike kaatu na okusa uunye ookuuvithila aapambele yetu?
19 Oshi li paunshitwe okukala twa hala okukwathela aapambele yetu ya taambe ko onkundana ombwanawa. (Jos. 2:13; Iil. 10:24, 48; 16:31, 32) Ngele aantu oya tindi okupulakena otashi vulika shi tu ningithe kaatu kale twa hala okukambadhala ishewe oshikando shilwe. Otashi vulika tu dhiladhile kutya kapu na shoka tatu vulu okuninga nenge oku ya lombwela ya lundulule iikala yawo. Ihe iiningwanima yontumba otayi vulu okulundulula onkalamwenyo yomupambele gwoye nenge etaloko lye. Nenge tashi vulika wu mone iizemo iiwanawa molwaashoka owa hwepopala mokuyelitha oshili.
20. Omolwashike sha simana tu kale hatu popi naapambele yetu nondjaalela?
20 Otu na okuhenuka okukala ihaatu yaalele omaiyuvo gaapambele yetu. (Rom. 2:4) Mbela katu na okukala hatu popi nayo nohenda ngaashi owala hatu popi naantu muukalele? Popya nombili nonesimaneko. Ya lombwela nkene oshili ye ku kwathela pehala lyokukala owala to ya lombwele shoka ye na okuninga. (Ef. 4:23, 24) Yelitha kutya molwaashoka Jehova ‘okwe ku longa wu imonene uuwanawa’ onkalamwenyo yoye oya yambapala. (Jes. 48:17, yelekanitha NW.) Aapambele yoye naya mone koshiholelwa shoye oshiwanawa nkene Omukriste e na okukala.
21, 22. Gandja oshimoniwa shoka tashi ulike kutya ngele otwa tsikile okukwathela aapambele pambepo otashi e ta uuwanawa.
21 Omathimbo opo ga zi ko, omumwameme gumwe okwa nyola a ti: “Onda kala aluhe handi uvithile aamwameme yaamati naakadhona 13 okupitila moohapu nomeihumbato lyandje. Ihandi etha pu pite omvula inaandi ya nyolela. Ihe onda kala ongame awike Onzapo uule woomvula adhihe 30.”
22 Omumwameme ngoka okwa tsikile ko ta ti: “Esiku limwe, onda dhengele gumwe gwomaamwamemekadhona ngoka a li ha kala koshitopolwa shi li ookilometa omathele okuza mpoka handi kala. Okwa lombwele ndje kutya okwa li a pula omusita gwawo a konakone naye Ombiimbeli ihe ine shi ninga nando. Sho nde mu lombwele kutya otandi vulu oku mu kwathela, okwa ti: ‘Eewa oshi li nawa, ihe otandi ku lombwele owala ngashingeyi kutya kandi na esiku ndi ninge Onzapo yaJehova.’ Sho nde mu tumine mopoosa embo Omalongo gashili gOmbiimbeli ogeni naanaa?, onda kala handi mu dhengele konima yomasiku gontumba. Ihe ka li ootuu a tala mo natango membo. Hugunina, onde mu lombwele a kuthe embo lye, notwa kala hatu konakona okupitila mongodhi uule wominute 15, tatu lesha omanyolo ngoka ga tothwa mo noku ga kundathana. Konima yomasiku gontumba, okwa ti kutya okwa hala okukonakona uule wominute dha konda po-15. Konima okwa kala oye ha dhengele ndje tu konakone, omathimbo gamwe ihandi kala nokuli nda penduka natango, nomathimbo gamwe okwa li ha dhenge nokuli lwaali moshiwike. Omumvo gwa landula ko okwa ninginithwa nomvula ya ka landula ko okwa tameke uukokolindjila.”
23. Omolwashike kaatu na okweetha po okupendutha mboka ye li moomposi dhopambepo?
23 Okukwathela aantu ya penduke mo moomposi dhopambepo otashi pula uunkulungu noku kala hatu ningi oonkambadhala dha mana mo lwiikando. Ihe natango opu na aanamitima omiwanawa mboka taya penduka mo moomposi sho tatu ya pendula. Uupokati waantu ye vule po 20 000 ohaya ninginithwa omwedhi kehe ya ninge Oonzapo dhaJehova. Onkee natu dhimbulukwe omayele ngoka Paulus a li a pe omumwatate gwopethimbo lye Arkippus a ti: ‘Tsakanitha oshilonga shoka we shi pewa okulongela Omuwa.’ (Kol. 4:17) Oshitopolwa tashi landula otashi ke tu kwathela tu mone nkene iilonga yokuuvitha ya pumbwa okulongwa neendelelo.
[Oshimpungu pepandja 13]
SHOKA TASHI VULU OKU KU KWATHELA WU KALE WA TONATA
▪ Kala aluhe wi ipyakidhila nokulonga ehalo lyaKalunga
▪ Yanda iilonga yomomilema
▪ Kala wu shi iinima ya nika oshiponga mbyoka hayi etithwa kokukotha pambepo
▪ Kala ho tala ko nawa aantu moshitopolwa
▪ Konga omikalo omipe dhokuuvithila yalwe
▪ Dhimbulukwa kutya uukalele woye owa simana