Oohapu dhaJehova odhi na omwenyo
Omanenedhiladhilo okuza moontumwafo dha nyolelwa Aatessalonika naTimoteus
EGONGALO epe muTessalonika olya li tali patanekwa okuza pokutotwa po kwalyo, pethimbo sho omuyapostoli Paulus a li e li talele po. Manga Timoteus a li e na oomvula 20 lwaampono okwa li a galuka kuTessalonika nehokololo ewanawa shoka sha li shi inyengitha Paulus e ya nyolele ontumwafo te ya pandula note ya tsu omukumo. Ontumwafo yotango ndjoka ya nyolelwa Aakriste yomuTessalonika konima mo 50 E.N lwaampono oyi li omanyolo gotango gaPaulus ga nwethwa mo. Konima yethimbo okwa li e ya nyolele ontumwafo ontiyali moka a li a pukulula yamwe mboka ya li ye na etaloko lya puka nokwa li a ladhipike aamwatate ya kale ya kola meitaalo.
Konima yoomvula omulongo lwaampono, Paulus okwa li muMakedonia naTimoteus okwa li muEfeso. Paulus okwa li a nyolele Timoteus te mu ladhipike a kale muEfeso noku kondjithe aalongi aafundja mboka ya li megongalo. Sho Aakriste ya li taya hepekwa konima yomulilo ngoka gwa li gwa hanagula po Roma mo 64 E.N., Paulus okwa li a nyolele Timoteus ontumwafo ontiyali ya nwethwa mo ndjoka ya li yahugunina. Kunena otatu vulu okutsuwa omukumo nokumona omayele moontumwafo ndhoka ne dhaPaulus.—Heb. 4:12.
‘KALENI MWA TONATA’
Paulus okwa li a pandula Aatessalonika ‘omolweitaalo lyawo li na iilonga, iilonga yawo yohole netegameno lyawo lya kola.’ Okwe ya lombwele kutya yo oye li ‘etegameno lye nenyanyu lye nuulenga wesindano.’—1 Tes. 1:3; 2:19.
Konima yokuladhipika Aakriste yomuTessalonika ya hekelekathane netegameno lyeyumuko, Paulus okwa ti: “Esiku lyOmuwa otali ya ongomufuthi te ende uusiku.” Okwa li e ya pe omayele ya kale ya “tonata” nokukala neidhiliko.—1 Tes. 4:16-18; 5:2, 6.
Omapulo gopamanyolo taga yamukulwa:
4:15-17, KB—Oolye taya ka ‘yakulwa po miikogo ya ka tsakaneke Omuwa pombandambanda,’ notashi ka ningwa ngiini? Mbaka Aakriste aagwayekwa mboka taya ka kala ye na omwenyo pethimbo lyokukala po kwaKristus moonkondo dhUukwaniilwa. Ohaya “tsakaneke Omuwa” Jesus mehala lyomegulu ihaali monika. Ihe opo shika shi ningwe, oye na okusa tango nokuyumudhwa ye li iishitwa yopambepo. (Rom. 6:3-5; 1 Kor. 15:35, 44) Okukala po kwaKristus okwa tameka nale, onkee ano Aakriste aagwayekwa mboka taya si kunena ihaya kala moombila, ihe ohaya “yakulwa po” nenge ya yumudhwe mepathimo lyeho.—1 Kor. 15:51, 52.
5:23 (OB-1954)—Paulus okwa li a hala okutya shike sho a galikana “omwenyo nombepo nolutu lu gamenwe”? Paulus okwa li ta popi ombepo, omwenyo nolutu ndoka lwa thikama po miilyo oyindji yegongalo lyopaKriste, mwa kwatelwa iilyo yaagwayekwa yomegongalo lyAatessalonika. Pehala lyokugalikanena owala egongalo li gamenwe, okwa li a galikana “ombepo” yalyo nenge iikala yalyo yopamadhiladhilo yi gamenwe. Okwa li wo a galikanene “omwenyo” gwalyo, sha hala okutya, okukala po kwalyo, “nolutu” lwalyo, sha hala okutya, iilyo yalyo mbyoka ya thikama po mAakriste aagwayekwa. (1 Kor. 12:12, 13) Onkee ano, egalikano ndyoka lyaPaulus olya li tali ulike kutya oku na ko nasha shili negongalo.
Iiyilongomwa kutse:
1:3, 7; 2:13; 4:1-12; 5:15. Omukalo omwaanawa gwokugandja omayele ogwo okupandula nomutima aguhe nokutsa omuntu omukumo a hwepopale.
4:1, 9, 10. Aalongeli yaJehova oye na okutsikila okuninga ehumokomeho lyopambepo.
5:1-3, 8, 20, 21. Sho esiku lyaJehova tali hedha popepi natu “zaleni eitaalo nohole ongehuuyanza, netegameno lyehupitho lyetu ongegala lyosheela.” Kakele kaashono, otu na lela okugandja eitulomo kOohapu dhaKalunga dhopahunganeko, Ombiimbeli.
“KALENI MWI IKOLELELA”
Mokulundulula shoka sha popiwa montumwafo yotango yaPaulus, yamwe megongalo oya li ya ti kutya ‘okugaluka kwOmuwa’ oku li popepi. Opo Paulus a pukulule etaloko ndyoka okwa li e ya lombwele shoka shi na ‘okuya tango.’—2 Tes. 2:1-3, yelekanitha KB.
Paulus okwa kumagidha a ti: “Kaleni mwi ikolelela mwa dhiginina omalongo ngoka twe ge mú longo nomauvitho nomontumwafo yetu.” Okwa li e ya lombwele yi “iteke omumwatate kehe a pota.”—2 Tes. 2:15; 3:6, OB-1954.
Omapulo gopamanyolo taga yamukulwa:
2:3, 8 (Yelekanitha OB-1954)—‘Omuntu gwuulunde’ olye, nongiini ta ka kana? “Omuntu” nguka okwa thikama po mongundu yaawiliki yopambepo yUukwakriste. Gumwe ngoka a pewa oonkondopangelo kuKalunga a pangule aalunde nokwa pewa elombwelo e ya hanagule po oye “Ohapu,” Omupopili ko Omunene gwaKalunga, Jesus Kristus. (Joh. 1:1) Onkee ano, otaku vulu okutiwa kutya Jesus ota ka hulitha po omuntu guulunde “nomuku gwomokana ke,” sha hala okutya, noonkondo dhe.
2:13, 14—Omeityo lini Aakriste aagwayekwa ya li ya ‘hogololwa kuKalunga petameko ya hupithwe’? Aagwayekwa oya li ya nunwa nale ye li ongundu sho Jehova a li a lalakanene oluvalo lwomukiintu lu ka nyanyagule omutse gwaSatana. (Gen. 3:15) Jehova okwa li wo a popi iitegelelwa mbyoka ye na okugwanitha po, iilonga mbyoka taya ka longa nomayeleko ngoka ya li taya ka mona. Onkee ano, meityo ndyoka oya li ya hogololwa kuKalunga petameko ya hupithwe.
Iiyilongomwa kutse:
1:6-9. Jehova iha hanagula po aayuuki pamwe naakolokoshi.
3:8-12. Molwaashoka esiku lyaJehova otali hedha popepi kali na oku tu ningitha tu kale tu na eipopilo kutya katu na okulonga nuudhiginini tu sile oshimpwiyu oompumbwe dhetu dhopalutu opo tu vule okwiiyambidhidha muukalele. Okwaalongasha otaku vulu oku tu ningitha tu kale aananyalo nokukala hatu ‘itula miinima yaantu.’—1 Pet. 4:15.
“PUNGULA NAWA SHOKA WE SHI PEWA”
Paulus okwa li a lombwele Timoteus ‘a kondje ekondjo a mana mo nokudhiginina eitaalo neiyuvo lya yela.’ Omuyapostoli okwa li a tumbula iitegelelwa yaalumentu mboka ye na okulangekwa po megongalo. Okwa li wo a lombwele Timoteus a “yande oongano itaadhi popi Kalunga.”—1 Tim. 1:18, 19; 3:1-10, 12, 13; 4:7.
Paulus okwa nyola a ti: “Ino ganda omusamane omukokele.” Okwa ladhipike Timoteus a ti: “Pungula nawa shoka we shi pewa. Yanda omapopyagano ga nyata nomaludhiko guunongo wuugoya, ngaashi aantu yamwe haye u tala owo oondunge.”—1 Tim. 5:1; 6:20.
Omapulo gopamanyolo taga yamukulwa:
1:18; 4:14—“Oohapu dhehunganeko” dhini dha li dha popiwa shi na ko nasha naTimoteus? Otashi vulika pwa li pwa popiwa omahunganeko ga nwethwa mo kombinga yonkandangala ndjoka Timoteus a li ta ka dhana megongalo lyopaKriste monakuyiwa, sho Paulus a li a talele po muListra pethimbo lyolweendo lwe olutiyali lwuutumwa. (Iil. 16:1, 2) Aakuluntugongalo oya li ya “tenteke iikaha” yawo komugundjuka Timoteus pakankameno ‘lyoohapu ndhika dhehunganeko’ opo ye mu pe iilonga mbyoka yi ikalekelwa.
2:15—Ongiini omukiintu ta “ka hupithwa omolwokuvala uunona”? Okuvala aanona nokuya sila oshimpwiyu nosho wo okutonatela egumbo otayi vulu ‘okuhupitha’ omukiintu a kale ini ipyakidhila ‘nokupopyagana nokwiitula miinima yaantu.’—1 Tim. 5:11-15.
3:16 (NW)—Oshiholekwa oshiyapuki sheigandjo lyometilokalunga oshike? Kutya nduno aantu otaya ka vulika kuunamapangelo waJehova nenge hasho, osha kala oshiholekwa ethimbo ele. Jesus okwa gandja eyamukulo mokukala omudhiginini kuKalunga sigo omeso lye.
6:15, 16—Mbela oohapu ndhika otadhi popi Jehova Kalunga nenge oJesus Kristus? Oohapu ndhika otadhi popi Jesus Kristus, molwaashoka otadhi hokolola eholokopo lye. (1 Tim. 6:14) Moku mu yelekanitha naantu mboka taya pangele ye li aakwaniilwa naawa, Jesus oye ‘Omupangeli awike’ noye awike ihaa si. (Dan. 7:14; Rom. 6:9) Sho a londo megulu ihaali monika, kapu na omuntu kombanda yevi “ta vulu oku mu tala” nomeho ge.
Iiyilongomwa kutse:
4:15. Otu na okukambadhala nokutsikila tu ninge ehumokomeho lyopambepo, kutya nduno opo twa ningi Aakriste nenge otwa kala mo ethimbo ele.
6:2. Ngele ohatu longele omwiitaali omukwetu, pehala lyokukala twe mu dhina, otu na oku mu longela nuudhiginini shi vulithe ngoka kee shi omwiitaali.
“DHIGININA OKUUVITHA”
Opo a longekidhe Timoteus omolwomaupyakadhi ngoka ga li tage ke ya, Paulus okwa nyola a ti: “Kalunga ine tu pa ombepo yoku tu ninga aambanda, ihe okwe tu pe ombepo ye yoku tu pa oonkondo, ohole neikwatonawa.” Timoteus okwa li a pewa omayele taku ti: “Omumati gOmuwa ita pumbwa okutamanana. Oye oku na okukala omulongi omwaanawa, omwiidhidhimiki, e na olukeno naayehe.”—2 Tim. 1:7; 2:24.
Paulus okwa li a kumagidha Timoteus a ti: “Kala mwaambyoka yashili, ngaashi we yi longwa nowe yi itaala.” Omalongo gaashunimonima oga li taga taandele, onkene omuyapostoli okwa li a pe omukuluntugongalo omugundjuka omayele a ti: “Dhiginina okuuvitha . . . , pukulula, ganda, kumagidha.”—2 Tim. 3:14; 4:2.
Omapulo gopamanyolo taga yamukulwa:
1:13 (OB-1954)—“Oshiholelwa shoohapu dha kola” oshike? ‘Oohapu dha kola’ oondhoka “dhOmuwa gwetu Jesus Kristus,” ndhoka dhi li omalongo gashili gopaKriste. (1 Tim. 6:3) Shoka Jesus a li a longo naashoka a li a ningi osha li metsokumwe nOohapu dhaKalunga, onkee ano uutumbulilo ‘oohapu dha kola’ otawu vulu wo okuulika komalongo agehe gOmbiimbeli. Omalongo ngoka ohage tu kwathele tu mone shoka Jehova ta pula kutse. Ohatu dhiginine oshiholelwa shika mokutula miilonga shoka twi ilonga mOmbiimbeli.
4:13—‘Omambo gopergamendi’ oga li shike? Omambo gopergamendi oga li iipa ya hikwa mbyoka ya li ya nyolwa. Otashi vulika Paulus a li ta pula iitopolwa yimwe yOmanyolo gOshihebeli opo a kale te yi konakona sho e li mondjedhililo muRoma. Omambo gamwe otashi vulika ga li ga nyolwa momanenge, ihe galwe omoopergamendi.
Iiyilongomwa kutse:
1:5; 3:15. Etompelo lya simana lyaTimoteus okukala e na eitaalo muKristus Jesus, sha hala okutya, eitaalo ndyoka lya li lya nwetha mo ashihe shoka a li a longo, olya li elongo lyopamanyolo ndyoka a mono okuza megumbo. Osha simanenena opo aavali ya gwanithe po oshinakugwanithwa shika shaKalunga mokulonga aanona yawo.
1:16-18. Uuna ooitaali ooyakwetu taya yelekwa, taya hepekwa nenge ye li mondjedhililo, natu ya kwatele momagalikano getu nokuninga kehe shoka tatu vulu tu ya kwathele.—Omayel. 3:27; 1 Tes. 5:25.
2:22. Aakriste ayehe, unene tuu aagundjuka kaye na okugandja eitulomo lya pitilila komalutu gawo, omaudhano, omusika, omainyanyudho, omalweendo, okupopya hoka itaaku tungu, nosho tuu, molwaashoka iinima mbyoka ohayi ya manene po ethimbo lyokulalakanena iinima yopambepo.
[Ethano pepandj 31]
Ontumwafo ya nwethwa mo ndjoka omuyapostoli Paulus a li a nyola hugunina oyini?