Eteyo Olindji!

JESUS okwa li u uvaneke kutya aalanduli ye, otaya ka nyanyukilwa eteyo olindji pethimbo ndika lyehulilo. (Mat. 9:37; 24:14) Tala nkene oohapu dhe dha gwanithwa shili moshitopolwa shaTranscarpathia, moUkraine. Moondoolopa ndatu dha tegama moshitopolwa moka, omwa li omagongalo 50 naauvithi ye vulithe po 5 400.a Odhoshili kutya aakalimo ayehe ya tulwa kumwe yomoondoolopa ndhika ndatu, omuntu 1 gwomaantu 4, Onzapo yaJehova.

Aantu yomoshitopolwa shoka oye hole shike? Omumwatate gwomoshitopolwa gwedhina Vasile, ota ti: “Aantu muka oya simaneka Ombiimbeli, oya lenga uuyuuki, oye na ekwatathano ewanawa naanegumbo lyawo nohaya kambadhala okukwathelathana.” Okwa gwedha ko a ti: “Ihaya tsu aluhe kumwe naashoka twi itaala. Ihe ngele owe ya ulukile sha mOmbiimbeli, ohaya pulakene neitulomo.”

Odhoshili kutya aamwatate naamwameme ohaya taalelwa komashongo, uuna taya uvitha moshitopolwa shi na omwaalu gwaauvithi gu vule omwaalu gwaakalimo. Pashiholelwa, moshitopolwa shimwe omu na egongalo limwe li na aauvithi 134, ihe omu na owala omagumbo 50. Aauvithi ohayi igilile ngiini onkalo ndjono?

Aamwatate naamwameme oyendji ohaya tamununa mo uukalele wawo, opo ye ku uvithile kiitopolwa hoka ku na ompumbwe onene. Omumwatate Ionash gwomimvo 90, ota ti: “Moshitopolwa moka mu na egongalo lyetu, omuuvithi gumwe oku na owala okuuvithila omagumbo gaali. Sigo onena, ohandi uvithile momukunda, ihe nonando kandi na uukolele, ohandi ku uvithila koshitopolwa ihaashi longwa naanaa, melaka lyOshihongaria, pu na ookilometa 160.” Aauvithi oya pumbwa okwiiyamba ya ka kwathele kiitopolwa yilwe. Omumwatate Ionash ota ti: “Opo ndaa thigwe po keshina lyokolutenda, onda li handi penduka po 4:00 yokoongulasha nokuuvitha sigo 6:00 yokomatango, ethimbo ndyoka eshina tali shuna. Shoka onda li handi shi ningi lwaali nenge lutatu moshiwike.” Mbela okwa li ha kala u uvite kutya oonkambadhala dhe osima yowala? Okwa ti: “Onda mona mo enyanyu momukalo ngoka gwokuuvitha. Onda li nda kwathele uukwanegumbo wumwe wokokule, wi ilonge oshili.”

Odhoshili kutya haantu ayehe momagongalo gomoshitopolwa shika haya vulu oku ku uvithila komahala gokokule. Nonando ongawo, oyendji mwa kwatelwa aakokele, ohaya ningi oonkambadhala ya mane ko oshitopolwa shawo. Oshizemo, mo 2017, pEdhimbuluko moondoolopa ndhika ndatu, opwa li aantu ye vulithe lwaali pomwaalu gwaauvithi, nenge tu tye etata lyomwaalu gwaakalimo. Odhoshili kutya kehe mpoka tashi vulika tu ku uvithile, otatu ka kala twi “ipyakidhila aluhe niilonga yOmuwa.” — 1 Kor. 15:58.