Mbela oto vulu okwiiyamba?
1 Momumvo 778 K.E.N. omwa li mwa ningwa oshiningwanima oshikumithi. Omupolofeti Jesaja okwa li a mono memoniko ‘OMUWA a kuutumba koshipangelapundi she pombanda puule.’ Opo nduno okwa li u uvu aaserafi taya popi eadhimo lyaJehova taya ti: “Omuyapuki, omuyapuki, omuyapuki! OMUWA Omunankondoawike.” Kasha li tuu oshinima oshikumithi! Pethimbo opo tuu mpoka, Jehova okwa li a pula omapulo gomuule a ti: “Olye ngo tandi mu tumu? Olye ta ningi omutumwa gwetu?” Kapwa li uuyelele washa kutya omuntu ngoka ti iyamba ota ka longa shike nenge ota ka mona uuwanawa washike. Ihe nopwaahena okukakadhala Jesaja okwa li a yamukula a ti: “Ota ndi yi! Tuma ndje!” — Jes. 6:1, 3, 8.
2 Ombepo ndjika yokulonga nehalo ewanawa kehe shoka Jehova ta pula ohayi ndhindhilikitha oshigwana she. (Eps. 110:3) Ngashingeyi mboka ye na ombepo yokwiiyamba otaya hiywa ye shi ninge. Mbela owi ilongekidha okwiiyamba nehalo ewanawa ngaashi Jesaja a li a ningi?
3 Opu na ompumbwe onene yaamwatate ya ka longe moBetel.a Eithano ndika otali pula mboka ye na ehalo enene lyokupititha komeho iinima yUukwaniilwa noye na ehalo lyokulonga shaa shoka tashi pulwa opo ya yambidhidhe iilonga yokuuvitha muuyuni auhe. (Mat. 6:33) Odhoshili kutya okulonga wu li oshilyo shuukwanegumbo waBetel ohashi pe omuntu ompito yi ikalekelwa yokulongela Jehova nomutima aguhe. Ngiini mbela?
4 Iilonga mbyoka hayi longwa moBetel: Dhiladhila owala kwaashihe shoka hashi longwa aluhe moBetel yaSouth Africa. Konyala aamwatate naamwameme ye li 700 mboka ye li iilyo yuukwanegumbo waBetel, oye na uuthembahenda wokuyambidhidha ongundu yomupiya omudhiginini nomunandunge nosho wo Olutuwiliki mokunyanyangidha Oombiimbeli niileshomwa ya kankamena kOmbiimbeli yi longithwe miilongo yokuumbugantu waAfrika nomokuninga ekonakono lyopaumwene. (Mat. 24:45, KB) Pashiholelwa, omumvo gwiilonga gwa zi ko, uumbo uushona nuubroshure 7 491 648, iifo 58 065 866 nosho wo Uukalele wetu wUukwaniilwa 8 030 370 oya li ya nyanyangidhwa nokutumwa omolwoonkambadhala ndhoka dha ningwa kiilyo yuukwanegumbo waBetel moSouth Africa. Okulundulukila komukalo gwokugandja iileshomwa nopwaahena okupula oshimaliwa shokondandalunde okwe eta eyopombanda lyenyanyangidho lyiileshomwa. Pashiholelwa, ngashingeyi ohapu nyanyangidhwa iifo 5 000 000 omwedhi kehe. Oshikondo shokutuma ohashi tumu ngashingeyi iileshomwa yi vulithe po 9 000 000 omwedhi kehe mbyoka hayi kala ya pungulwa momangandjina getu komagongalo ngoka ge li moSouth Africa nomoMalawi, Mosambike, Zambia nomoZimbambwe. Ayihe mbika otayi ulike kutya monakuyiwa otapu ka kala iilonga oyindji. Ewiliko otali gandjwa wo komagongalo ge vulithe 1 800 ngoka taga wilikwa koshitayimbelewa shaSouth Africa. Ekwatho ohali gandjwa wo kiitayimbelewa mbyoka yi li muAfrika, mwa kwatelwa uuindjiniya nokutunga omagumbo gaBetel ga gwedhwa po, Iinyanga yiigongi nosho wo Iinyanga yUukwaniilwa yi thike lwopo 3 000 mbyoka ya pumbiwa ngashingeyi miilongo yaAfrika mbyoka ya hepa. Aaiyambi omathele mboka oye na oshinakugwanithwa shokusila oshimpwiyu oshinyanyangidho noshikondo shokutuma iileshomwa, okwoopaleka, okukaleka etungo li li monkalo yi li nawa, okuteleka, okulanda iinima, okugandja esiloshimpwiyu lyopaunamiti niilonga yilwe oyindji moBetel.
5 Nonando okulonga iilonga ayihe mbyoka otaku pula oonkondo, otaku eta wo enyanyu lyopambepo. Okutseya kutya ohatu longitha oonkondo dhetu adhihe mokuyambidhidha iilonga yokuuvitha noyokuninga aantu aalongwa, otaku tu etele enyanyu olindji. Okulonga moBetel otashi tu kwathele tu tseye nawanawa ehangano lyaJehova. Otatu dhimbulukithwa kutya omupisalomi okwa li a ladhipike Aaisraeli ya kale ye shi nawa ehala lyawo lyiinima yopauteokratika kombanda yevi pethimbo lyawo. — Eps. 48:12, 13.
6 Omalaleko nuuyamba miilonga yaBetel: Mboka taya longo moBetel oyu uvitile ngiini uuthembahenda wawo? Tala komatyokosha taga landula giilyo yuukwanegumbo waBetel yomapipi ga yoolokathana. Omumwameme gumwe ngoka a nyanyukilwa okulonga kwe moBetel uule woomvula ndatu ota ti: “Okukala moBetel okwa koleke ekwatathano lyandje naJehova. Mpo ngaa pu thike okulonga kwandje ethimbo ele moBetel opo ngaa pu thike okutseya nkene iinima yamo hayi unganekwa, po opo ngaa pu thike okutseya omaukwatya gaJehova. Okulonga kwandje moBetel okwa monitha ndje wo nkene Jehova ha longitha aantu yomaludhi agehe. Omuntu ino pumbwa okukala wa gwanenena opo a kale e ku hokwa.”
7 Omumwatate gumwe omugundjuka ota ti: “Otandi dhimbulukwa sho nda li tandi dhiladhila tandi ti: ‘Kashi li tuu nawa okuya muuyuni uupe e ta ndi hokololele aantu aadhiginini yomethimbo lyonale kutya onda longa oomvula odhindji moBetel, pehala lyokwiikongela omaliko muuyuni!’ ”
8 Omumwatate gumwe omugundjuka okwa li a dhiladhila kombinga yedheulo ndyoka a li a pewa e ta ti: “Okwiilonga kombinga yandje mwene naampoka ndi na okuninga omalunduluko nosho wo okukala ndi na omaukwatya ngoka oshe etele ndje omalaleko nuuyamba ogendji. Ngashingeyi ondi wete nda gwana okulongela Jehova. Onde shi mona mo kutya ngashingeyi ondi na eidhidhimiko, eipangelo mwene shi vulithe nale nohandi ulukile yalwe ohole onene.”
9 Omumwameme gumwe okwa li ta dhiladhila kombinga yomalaleko nuuyamba ngoka a mona e ta ti: “Elandulathano lyiinima yopambepo moBetel olya longa ndje oshindji kombinga yaJehova nonkene ndi na oku mu holela nawa mokudhiladhila, momaiyuvo nomiilonga ye. Molwaashoka edheulo otali tsikile nomalaleko nuuyamba otaga tsikile wo.”
10 Omumwatate ngoka a kala oomvula 59 miilonga yethimbo lyu udha noomvula dhi vulithe 43 dhomudho okwe dhi kala moBetel ota ti: “Betel kali shi ehala lyaaikaleli ngaashi yamwe haya dhiladhila. Ohatu tsakanitha oshindji molwaashoka otwa tula po elandulathano ewanawa monkalamwenyo yetu. . . . Kapu na esiku nda yile kiilonga e tandi zi ko inaandi nyanyukilwa shoka nda longa esiku ndyoka. Omolwashike mbela? Molwaashoka ngele tatu igandja nomutima aguhe kuJehova, ohatu kala twa nyanyukwa okutseya kutya ‘otwa longa owala shoka twa li tu na oku shi longa.’ ” — Luk. 17:10.
11 Omumwatate gulwe ngoka a longa oomvula 62 moBetel okwa ti: “Ondi itaala kutya Betel ehala lya dhenga mbanda kombanda yevi lya landula Oparadisa ndjoka twa tegelela. Kandi na nando esiku ndi ipe uusama molwaashoka nda kala onkalamwenyo yandje miilonga yethimbo lyu udha. Enyanyu oli thike peni okumona ehangano lyaJehova lyokombanda yevi tali koko nokukala ndi na mo ombinga! Kekwatho lyaJehova, onda tokolatoko okutsikila nokuninga Betel egumbo lyandje nokulonga nomutima aguhe ndi humithe komeho iinima yUukwaniilwa.
12 Iilyo yuukwanegumbo waBetel mbika oya tumbula po owala gamwe gomomalaleko nuuyamba ngoka ngoye to vulu okunyanyukilwa ngele owi iyamba okuya miilonga yaBetel. Ihe ngaashi tu shi shi nawa opo omuntu wu mone uuthembahenda wiilonga kehe, owu na tango okugwanitha po iitegelelwa. Iitegelelwa yimwe oyini ya pumbiwa opo wu kale gumwe gwomuukwanegumbo waBetel?
13 Iitegelelwa yokuya miilonga yaBetel: Iitegelelwa kwaamboka ya hala okuninga eindilo miilonga yaBetel oyu ulikwa moshimpungu shomoshitopolwa shika. Natango, osha simana okukala ye na ehalo lyokulonga nuudhiginini, ihe haku kala “ye hole uuhalu uuwinayi.” (2 Tim. 3:4, KB; 1 Kor. 13:11) Iilyo yUukwanegumbo waBetel oyi na okukala aalumentu naakiintu mboka ye na ondjigilile ombwanawa yekonakono lyopaumwene noya dheula oondunge dhawo dhokuyoolola “shoka shu uka nenge sha puka.” (Heb. 5:14) Okukoka kwawo kwopaKriste oye na okukala ye ku ulika nale mokukalamwenyo kwawo miinima ngaashi okuzala, okwiiyopaleka, omusika ndjoka haya pulakene nosho wo omainyanyudho. Iilyo yuukwanegumbo waBetel ohayi longo nehalo ewanawa kehe mpoka ya pumbiwa. Aagundjuka olundji ohaya pewa iilonga yokomake, ngaashi okulonga pokunyanyangidha, okupakela nokutuma iileshomwa, okukaleka etungo li li nawa, okwoopaleka moondunda nomomahala galwe, okuyoga oonguwo nokuteleka. (Omayel. 20:29, OB-1954) Nonando yo inayi fa iilonga yokwiikongela omboloto, oshilonga kehe shamo otashi eta enyanyu molwaashoka oyi li iilonga iiyapuki mbyoka tayi simanekitha Jehova. — Kol. 3:23.
14 Mboka ya taambwa okulonga moBetel oye na okukala mo uule womvula yimwe inaaya za mo. Shino ohashi ya pe ompito yokudheulwa opo ya ninge aalongi aanekeka. Etegameno olyo kutya ya vule okuninga Betel egumbo lyawo. Ohole yokuhola Jehova oyo hayi inyengitha iilyo yuukwanegumbo waBetel yi pitithe iilonga yUukwaniilwa komeho yiinima yopaumwene, naashoka otashi nyanyudha Jehova. — Mat. 16:24.
15 Oompumbwe ndhoka dhi li po ngashingeyi: Omolwiilonga mbyoka hayi longwa moBetel, ngashingeyi otu na ompumbwe unene tuu yaamwatate mboka inaaya hokana. Nonando kashi shi oshitegelelwa, ohokwe otayi ukithwa unene tuu kwaamboka ye li aakokolindjila yondjigilile, molwaashoka yo oye li nale miilonga yethimbo lyu udha. Omathimbo gamwe ohashi vulika pu ka kale ompito ye egulukila aamwameme inaaya hokanwa nosho wo aaihokani okuza poomvula 19 sigo 35 mboka tashi vulika ye na uunkulungu wontumba mboka wa pumbiwa moBetel. Natango, aamwatate naamwameme yamwe mboka ya konda kashona poomvula 35 ye na uunkulungu wi ikalekelwa noya mona edheulo ndyoka tali vulu okulongithwa moBetel otaya ladhipikwa ya ninge eindilo. Pashiholelwa, okutumbula po owala yamwe, mbaka oya kwatela mo oondohotola, oondohotola dhomayego, aaningithi yomadhewo, aayaluli yiimaliwa, aaindjiniya, aapangi, oomakeninga yiihauto nenge aapangeli yiikwaelektronika. Opu na ompumbwe onene yaatoloki momalaka agehe gomoshitopolwa shomoshitayimbelewa shetu. Onkee ano itatu ladhipike aantu ya mone elongo nenge edheulo lyi ikalekelwa nedhiladhilo kutya shika otashi hwepopaleke oompito dhawo dhokutaambwa moBetel. Mboka ya mona nale edheulo ndyoka lyi ikalekelwa, tashi vulika manga inaaye ya moshili, otashi vulika ya kale ya hala okunyola kombinga yeithano lyawo noku li kopeka kombapila yeindilo lyaBetel.
16 Ngele owa ningi eindilo, ihe ino ithanwa wu ka longe koBetel, ino teka omukumo. Otashi vulika wu kale to ningulula eindilo lyoye kehe omumvo. Aamwatate yamwe mboka ye na elongo nuunkulungu wi ikalekelwa mbyoka tashi vulika ya pumbiwa koBetel ohayi iyamba ya longe iilonga yeiyambo lyopakathimbo. Otashi vulika ya ninge eindilo lyokulonga pakathimbo moBetel iiwike iyali, itatu nenge ine nenge nokuli sigo oomwedhi ndatu. Ngele owu na ohokwe mwaashika, nyolela koshitayimbelewa.
17 Okulongela Jehova tu na ekwatathano lyopothingo nAakriste ooyakwetu oshi li uuthembahenda uukumithi kwaamboka taya longo moBetel. Olutuwiliki ohalu pandula ombepo yeiyambo mwene yaayehe mboka hayi iyamba okuyakula oompumbwe dhuumwayinathana wetu womuuyuni auhe. — Fil. 2:20-22; 2 Tim. 4:11.
18 Aagundjuka ilongekidheni ngashingeyi okuya miilonga yaBetel: Eilongekidho lyokuya miilonga yaBetel ohali tameke kuyele manga omuntu inaa ninga oomvula 19. Aagundjuka oye na okuninga shike opo yi ilongekidhile okuya miilonga yaBetel? Jesus okwa ti: “Ngele ku na gumwe e na edhiladhilo okutunga oshungo, oku na okukuutumba tango, a yalule kutya otayi pula shi thike peni.” (Luk. 14:28) Molwaashoka eilongekidho olya simana noonkondo opo iilonga yetungo yi pondole, inashi simana tuu aagundjuka ya gandje eitulomo lyolela kunkene taya tungu onkalamwenyo yawo yomonakuyiwa miilonga yaJehova! Ekankameno lya kola oli na okutulwa po kuyele monkalamwenyo opo ya vule okwaadha omalalakano gawo gopambepo. Wu li omugundjuka, owa tula po mbela ekankameno ewanawa? Ngele owa hala okulonga koBetel, oto ka mona uuwanawa mokukonakona nawa iinima tayi landula.
19 ‘Taamba ko’ uuthembahenda mbuka wiilonga yi ikalekelwa: Ngaashi sha nyolwa muMateus 19:12 (KB), Jesus okwa li a ladhipike aalongwa ye ya ‘taambe ko’ okwaahahokana. Omolwashike? Hamolwomatompelo gopaumwene, ihe “omolwUukwaniilwa wegulu.” Sha faathana, Paulus okwa ladhipikile wo aantu onkatu ya tya ngaaka “okwiigandja moshilonga shOmuwa.” (1 Kor. 7:32-35) Mupya munene, yamwe ohaya kanitha uuthembahenda wokulonga moBetel ye li aalumentu inaaya hokana omolwokukala ya hala okuhokana manga ye li aagundjuka natango. Otwa hala okuladhipika aamwatate aagundjuka ya longithe oonkondo dhawo mokulalakanena uukalele wethimbo lyu udha manga kaaye na natango iinakugwanithwa yuukwanegumbo. Opo nduno, ngele konima yethimbo ya tokola okuhokana, otaya ka kala aasamane ye li nawa molwaashono oya mona owino owindji monkalamwenyo nosho wo muukalele wopaKriste. Konima yokulonga oomvula dhontumba moBetel, yamwe ohaya hokana nohaya tsikile okulonga moBetel ye li aaihokani. Ngele konima yethimbo taya ka mona uuthembahenda wulwe, ngaashi iilonga yokweenda nenge iilonga yuutumwa, ihaya ka kala nando tayi ipe uusama omolwethimbo ndyoka ya longitha okutaamba ko iilonga yaBetel.
20 Ino piyaganekwa kokulalakanena iinima yopamaliko: Kehe omugundjuka ota ningi nawa ngele ti ipula kutya: ‘Mbela elalakano lyandje konima yokumana osikola yopombanda olyo okulalakanena iilonga yokwiikongela omboloto nenge okulongela Jehova ethimbo lyu udha?’ Dhoshili, okukutha onkatu ndjono ya tumbulwa hugunina otashi pula eiyambo. Ihe otali pumbiwa wo nomiilonga yokwiikongela omboloto. Lwahugunina, onkatu yini tayi ke eta lela oshizemo tashi kalelele noshiwanawa? Jesus okwa gandja eyamukulo lya yela. Pakupopya kwaMateus 6:19-21, okwa ti: “Inamu ilikolela omaliko kombanda yevi, [ngoka] haga yonwa po koothithi nokoshushi noku na aafuthi yokuteya po nokuyaka po. Ihe ilikoleleni omaliko megulu, moka kaamu na oothithi noshushi yokuyona po, nokaamu na aafuthi yokuteya po nokuyaka po. Oshoka kokuma nkoka ku na eliko lyoye, oko ku na nomwenyo gwoye wo.” Omitima dhetu inadhi tu ningitha nando tu lalakanene eithano lyomuuyuni nenge iinima yopamaliko pehala lyokulongela Jehova nomutima aguhe. Atuheni otu na okutseya kutya elalakano li na ongushu olyo okulalakanena ekwatathano ewanawa naJehova, opo tu nyanyudhe omwenyo gwe. (Omayel. 27:11) Mokupititha komeho Jehova monkalamwenyo yetu manga tu li aagundjuka, otatu ulike kutya otwe mu simaneka nonokutya Uukwaniilwa owa simana kutse. Dhimbulukwa kutya “eyambeko lyOMUWA otali yambapaleke, nuupyakadhi wiilonga itau gwedhele ko sha.” (Omayel. 10:22) Aagundjuka oye na ompito ya dhenga mbanda okuulika kutya omitima dhawo odha gama peni mokugandja sha oshiwanawa kuJehova molwaayihe mbyoka e ya pa. Iilonga yaBetel otayi gandja ompito ombwanawa kwaamboka ya gwanitha po iitegelelwa.
21 Mboka taya longo moBetel oye na okukala ya yogoka pamikalo: Omupisalomi okwa pula a ti: “Omugundjuka oto opaleke ngiini okukala kwe, a kale a yela?” Okwa yamukula a ti: “Ongele ta vulika koohapu [dhaJehova].” (Eps. 119:9) Shoka osha kwatela mo okuyanda kehe shono shi na ko nasha neyonuko lyopamikalo lyonkalelo yiinima yaSatana. Omafano giipala gomointernet, eihumbato ewinayi nuukashike ko okantu wi ili, omusika ombwinayi, einyanyudho lya nyata nokunwa iikolitha kohi yoomvula ndhoka dha pitikwa oyo yimwe yomoomwigo ndhoka Satana ha longitha okukeelela aagundjuka yetu ya adhe omalalakano gawo gopambepo. Etokolotoko olya pumbiwa okukeelela omakoto ngoka. Wu li omugundjuka ngele owi iyadha wa kwatelwa muyimwe yomwaambyoka, popya naakuluntu yegongalo lyeni nokukandula po uupyakadhi mboka manga inoo ninga eindilo lyiilonga yaBetel. Okukala neiyuvo lya yogoka okwa simanenena mokulongela Jehova nomutima aguhe. — 1 Tim. 1:5.
22 Ilonga okukala ho vulathana nayalwe: Oshitegelelwa sha simana opo omuntu a pondole miilonga yaBetel osho okwiilonga okukala ha vulathana nayalwe. Uukwanegumbo waBetel moSouth Africa owa thikama po maamwatate naamwameme yomomaputuko agehe ye thike lwopo 700. Nonando omaukwatya ngano ga yoolokathana oge na uuwanawa wopambepo kuBetel, omathimbo gamwe otaga vulu okweeta omashongo. Ngele oto dhiladhila iilonga yaBetel, oto ningi nawa ngele to ipula to ti: ‘Mbela ngame ohandi ningi omwenyo omwiinayi ngele yalwe itaya ningi ngaashi ngame nda hala? Mbela yalwe ohaya vulathana ngaa nangame?’ Ngele owa pumbwa okuninga omalunduluko moonkalo dha tya ngawo shi ninga ngashingeyi. Oku shi ninga otaku ke ku kwathela wu lundulule nuupu opo wu vule okukala nokulonga pamwe niilyo yuukwanegumbo waBetel.
23 Longa nuudhiginini wu kale wu na uupambepo uuwanawa mokuninga ekwatathano lyopothingo naJehova. Ninga elandulathano ewanawa lyekonakono lyopaumwene lya kwatela mo okulesha Ombiimbeli kehe esiku. Kala omuladhi mokutseyithila yalwe onkundana ombwanawa. Mokutula miilonga iinima mbyoka, okuhuma komeho kwoye kwopambepo otaku ka monika. (1 Tim. 4:15) Mboka tayi ilongekidha ngashingeyi okuya miilonga yethimbo lyu udha kaye na tuu etegameno ewanawa!
24 Aavali dheuleni aanona yeni: Oshike aavali ye na okuninga opo ya ladhipike aagundjuka ya lalakanene uukalele wethimbo lyu udha? Jesus okwa ti: “Omulongwa kehe ngoka a pwa okulongwa, oku thike pomulongi gwe.” (Luk. 6:40) Omulongwa a dheulwa nawa ita vulu owala okukwathela, ihe ota vulu wo okuholola omaukwatya gomulongi gwe omudhiginini. Aavali Aakriste oye na okukaleka ekotampango ndika momadhiladhilo sho taya longo nuudhiginini okudheula aanona yawo ‘nelalakano lyokukala neigandjo lyometilokalunga.’ (1 Tim. 4:7, NW) Molwaashoka aanona oye na egamo lyokuholela iikala yaavali yawo miinima yopambepo, aavali otaya ningi nawa ngele tayi ipula taya ti: ‘Mbela ohatu tala ko ngaa iilonga mbyoka hayi longwa koBetel tayi humitha komeho elongelokalunga lyashili lyaJehova? Mbela otwa yalula ngaa omalaleko nuuyamba ngoka haga zi kuJehova okupitila melongekidho lyaBetel? Mbela otwi itaala ngaa kutya onkalamwenyo yokulongela Jehova oyo eithano dhingi ndyoka aanona yetu taya vulu okukutha? Okupandula kwetu tashi zi komutima iilonga ayihe mbyoka hayi longwa moBetel otaku tu kwathele tu thindile olupandu lwa faathana maanona yetu.
25 Elkana naHanna oya li ya pandula noonkondo elongelokalunga lyashili. Oya tulila po aavali Aakriste yokunena oshiholelwa oshindhindhilikwedhi. MuIsraeli shonale, Aaisraeli owala aalumentu ya li ye na “okuholokela koshipala shOmuwa” lutatu momumvo ketsalihangano. Nando ongaaka, Elkana okwa li he ende ookilometa 30, olundji kolupadhi nuukwanegumbo we auhe “omumvo kehe” oku ka ninga omayambo mehala lyokugalikanena Jehova. (Eks. 23:17, OB-1954; 1 Sam. 1:3, 4, 9, 19; 2:19) Osha yela kutya omutse nguka gwuukwanegumbo, Elkana okwa li a hala uukwanegumbo we auhe wu kale wu na etaloko lya fa lye li na ko nasha niinima yopambepo.
26 Hanna okwa li a kutha ombinga pamwe nomusamane gwe melongeloKalunga lyashili. Okwa li u uvite lela e na oshinakugwanithwa shokuyambidhidha elongeloKalunga lyashili metsalihangano. Hanna okwa li u uvaneke kutya ngele Jehova okwe mu pe okanona okamati ote ke ka gandja ka longe metsalihangano. (1 Sam. 1:11) Ompango yaMoses oya li ya pa omusamane uuthemba wokutinda euvaneko kaali li mondjila ndyoka lya ningwa komukulukadhi gwe. (Num. 30:6-8) Ihe osha yela kutya Elkana okwa li a yambidhidha euvaneko lyaHanna, shoka tashi ulike kutya naye okwa li ta yambidhidha elongelokalunga lyashili. — 1 Sam. 1:22, 23.
27 Mbela Samuel okwa li a nwethwa mo kolupandu nokiikala iiwanawa mbyoka yu ulikwa kaavali ye? Eeno, osho naanaa. E li omumati omugundjuka, Samuel okwa li a dhiginine oshilonga she nehalo ewanawa nonuudhiginini nokwa li a dheulilwa natango okukala e hole omauthembahenda giilonga yaKalunga. Ohokwe ndjoka Elkana naHanna ya li yu ulike mokulonga kwaSamuel metsalihangano inayi hula po sho a taamba ko iilonga ye moka. Oya tsikile oku mu talela po pandjigilile opo ye mu tse omukumo noku mu yambidhidha mokulalakanena kwe iilonga yethimbo lyu udha. — 1 Sam. 2:18, 19.
28 Elkana naHanna inaya tulila po tuu aavali Aakriste kunena oshiholelwa sha dhenga mbanda! Uuna aanona yetu tayu uvu tatu popi olupandu lwetu talu zi komutima okupandula iilonga yaBetel nokumona ombepo yeiyambo ndjoka hatu ulike mokuhumitha komeho iinima yUukwaniilwa, nayo otaya ka kala ye na ehalo lyokuyakula yalwe. Aavali oyendji oye shi pondola okuthindila ehalo ndika ewanawa maanona yawo. Okanona koomvula heyali oka nyola taka ti: “Ngele nda koko onda hala okukala moBetel, nondi na iinima yontumba mbyoka nda hala okulonga mo. (1) Okutopatopa iifo yOshungonangelo noAwake, (2) okulonga moshikondo sheni shokuthaneka, (3) okugonya iiyogomwa movasalaye. Kehe tuu oshilonga tandi pewa. Itandi shi tindi.” Itashi nyanyudha tuu omutima okumona ombepo yehalo ewanawa tayi koko momitima dhaanona yetu!
29 Aagundjuka dhimbulukweni kutya “uuyuni niinima ayihe yi li mo mbyoka aantu ye yi hokwa, otayi hulu po. Ihe ngoka ta longo shoka Kalunga e shi hala, ota kala e na omwenyo aluhe.” (1 Joh. 2:17) Tsikila okulalakanena omalalakano gopambepo, mwa kwatelwa uuthembahenda wi ikalekelwa wiilonga yaBetel. Aavali, holeleni iiholelwa yaadhiginini yonale mboka ya li ya ladhipike aanona yawo ya kale ye na etilokalunga. (2 Pet. 3:11, OB-1954) Atuheni natu kwathele aamwatate naamwameme aagundjuka ya longele Omushiti gwetu Omunenenene ngaashi tashi vulika, ‘oshoka muko omu na euvaneko lyomwenyo ngashingeyi nomonakuyiwa.’ — 1 Tim. 4:8; Omuuv. 12:1.
[Enyolo lyopevi]
a KOmbelewa yokutoloka moNamibia oku na ompumbwe onene yaatoloki momalaka ngaashi Oshindonga, Oshikwanyama nOshikwangali. Omadhiladhilo ngoka taga popiwa moshitopolwa shika otaga longo wo nokwaamboka ya hala oku ka longa kOmbelewa yokutoloka moNamibia.