Mbela ito vulu okukala ho kutha ombinga muukalele mOsoondaha?
1. Oshike tatu vulu okwiilonga mwaashoka Paulus nokuume ke ya li ya ningi muFilippi?
1 Osha li esiku lyEsabati, esiku ndyoka Aajuda oyendji muFilippi ya li haya vululukwa. Paulus nokuume ke oya li taya talele po oshilando shoka sho ya li molweendo lwawo luutumwa. Kapu na omuntu ngoka a li ta vulu oku ya popila muuwinayi sho ya li taya vululukwa kiilonga yawo yuukalele mesiku ndyoka. Ihe oya li ye shi shi kutya Aajuda oya li haya gongala pondje yoshilando ya galikane, onkee ano oya li ya longitha ompito ndjoka opo ye yu uvithile. Paulus nokuume ke kaya li tuu ya nyanyukwa sho Lidia nuukwanegumbo we auhe ya pulakene e taya ninginithwa! (Iil. 16:13-15, NW) Molwaashoka aantu oyendji kunena ohaya vululukwa mOsoondaha, omolwashike itoo longitha esiku ndyoka opo wu ya uvithile?
2. Omashongo geni oshigwana shaJehova sha li sha sindi opo shi kale hashi uvitha mOsoondaha nopwaahe na omapiyaganeko gasha?
2 Okuuvitha mOsoondaha: Momumvo 1927, oshigwana shaJehova osha li sha ladhipikwa shi longithe ethimbo okuya muukalele mOsoondaha. Osha li sha patanekwa sho tashi shi ningi. MuAmerika aantu oyendji oya li ya mangwa po omolwokwaaha simaneka ompango yEsabati, molwokupiyaganeka ombili, nokulanditha kaaye na uuthemba. Ihe shoka kasha sha tyololokitha oshigwana shaJehova. Momumvo 1930 nasha osha li shu unganeke pu ningwe “iikonga miitopolwa yi ili noyi ili,” moka aauvithi yomomagongalo gomoshitopolwa shimwe ya li haya hangana opo ya longe oshitopolwa shontumba ashihe. Omathimbo gamwe aakwanepangelo kaya li haya vulu okuya moshipala iilonga yokuuvitha, molwaashoka nonando oya mange po aamwatate yamwe, ohapu kala pu na mboka ya hupa po. Mbela owu na ngaa olupandu omolwomaiyambo ngoka aamwatate ya ninga opo tu kale hatu uvitha mOsoondaha nopwaahe na omapiyaganeko gasha?
3. Omolwashike Osoondaha yi li esiku ewanawa nokuya muukalele?
3 Esiku ewanawa nokuuvitha: Aantu oyendji ihaya ka longa mOsoondaha. Olundji ohaya kala megumbo taya thuwa po. Yamwe mboka haya yi koongeleka otashi vulika ya kale ya hala okupopya kombinga yaKalunga mesiku ndyoka. Ngele ohatu gongala mOsoondaha, omolwashike itatu longekidha tu ye muukalele komeho yokugongala nenge konima molwaashoka ohatu kala twa zala nale oonguwo ndhoka tadhi opalele okuya muukalele? Ngele osha pumbiwa faalela sha shokulya.
4. Enyanyu lini tatu ka mona ngele otwa kala hatu yi muukalele mOsoondaha?
4 Ngele otwa kala hatu yi muukalele ethimbo lyontumba mOsoondaha, otatu ka kala natango tu na ethimbo lyokuvululukwa po ndyoka twa pumbwa. Natango otatu ka kala tu uvite twa gwanenwa, molwaashoka otwa kutha ombinga moshilonga oshiyapuki. (Omayel. 19:23) Otashi vulika nokuli tu ka kale twa nyanyukwa uuna twa mono gumwe ta pulakene ketumwalaka lyetu ngaashi Lidia a li a pulakene.