Kala wi inekela Jehova nomutima aguhe

“Mentu gwandje, tseya Kalunga kaho, ngoye u mu longele nomutima aguhe.”—1 ONDJAL. 28:9.

KONGA OMAYAMUKULO GOMAPULO TAGA LANDULA:

Omutima gwopathaneko oshike?

Omikalo dhini tatu vulu okulongitha tu konakone omitima dhetu?

Oshike tashi ke tu kwathela tu kale twi inekela Jehova nomutima aguhe?

1, 2. (a) Oshilyo sholutu shini hashi popiwa olundji pathaneko mOohapu dhaKalunga shi vulithe iikwawo? (b) Omolwashike sha simana tu uve ko kutya omutima otagu thaneke shike?

IILYO yolutu lwomuntu ohayi popiwa olundji pathaneko mOohapu dhaKalunga. Pashiholelwa, tatekulululwa Job okwa ti: ‘Iikaha yandje oya kwatunuka kondjahi.’ Omukwaniilwa Salom okwa popi a ti: ‘Oonkundana oombwanawa otadhi ondokitha omasipa.’ Jehova okwa lombwele Hesekiel a ti: ‘Oshipala shoye otandi shi kukutike ngaashi ondiyamande.’ Omuyapostoli Paulus okwa li a lombwelwa ngeyi: “Owa popi iinima yimwe mbyoka kaatu yi shi momakutsi getu.”—Job 16:17; Omayel. 15:30; Hes. 3:9, OB-1954; Iil. 17:20, NW.

² Ihe opu na oshilyo shimwe shomuyo hashi popiwa olundji pathaneko mOmbiimbeli shi vulithe iikwawo. Omukiintu omudhiginini Hanna okwe shi popi megalikano lye a ti: ‘OMUWA oku udhitha omutima gwandje enyanyu.’ (1 Sam. 2:1) Aanyoli yOmbiimbeli oya tumbula omutima konyala iikando eyuvi, nolundji oye gu popya pathaneko. Osha simana noonkondo tu uve ko kutya omutima otagu thaneke shike, molwaashoka Ombiimbeli tayi ti kutya otu na oku gu tonatela.—Lesha Omayeletumbulo 4:23.

OMUTIMA GWOPATHANEKO OSHIKE?

3. Ombiimbeli otayi tu kwathele ngiini tu uve ko eityo lyomutima? Shi thaneka.

³ Nonando Ombiimbeli inayi yelitha kutya “omutima” oshike, otayi tu kwathele tu uve ko eityo lyago. Ngiini mbela? Pashiholelwa, dhiladhila owala kethano ewanawa tali fuula li li kekuma lya ningwa muumanya owundji uushona. Opo wu mone nkene uumanya wa tulwa kumwe nawa, owu na okushuna konima kashona wu tale omutholomo gwalyo aguhe. Sha faathana, natse otwa pumbwa okutala pomahala ogendji mOmbiimbeli mpoka pwa popiwa “omutima,” opo tu mone eityo lyagwo. Ano omutima gwopathaneko oshike naanaa?

4. (a) Uutumbulilo “omutima” otawu ulike kushike? (b) Oohapu dhaJesus ndhoka dhi li muMateus 22:37 otadhi ti shike?

⁴ Ombiimbeli oya longitha uutumbulilo “omutima” okuulika kuukwatya womuntu womeni. Owa kwatela mo iinima ngaashi, omahalo, omadhiladhilo, egamo, iikala, okuvula, omainyengotompelo nomalalakano gomuntu. (Lesha Deuteronomium 15:7; Omayeletumbulo 16:9; Iilonga 2:26.) Embo limwe otali fatulula omutima tali ti kutya “uukwatya auhewuhe womuntu womeni.” Ihe ethimbo limwe uutumbulilo “omutima” ihawu kala wa kwatela mo omaukwatya agehe gomeni. Pashiholelwa, Jesus okwa ti: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.” (Mat. 22:37) Uutumbulilo “omutima” moohapu ndhika otawu ulike komadhiladhilo, komahalo nokomaiyuvo gomuntu gwomeni. Sho Jesus a tumbula omutima, omwenyo, nomadhiladhilo okwa li ta tsu omuthindo kutya otu na okuulika kutya otu hole Kalunga pamaiyuvo getu, momukalo moka hatu ihumbata monkalamwenyo nomokudhiladhila kwetu. (Joh. 17:3; Ef. 6:6) Ihe ngele “omutima” tagu tumbulwa ogo aguke, nena otagu thaneke uukwatya auhewuhe womuntu womeni.

OTWA PUMBWA OKUTONATELA OMUTIMA GWETU

5. Omolwashike twa hala okuninga ngaashi tatu vulu tu longele Jehova nomutima aguhe?

⁵ Omukwaniilwa David okwa dhimbulukitha omwana Salomo a ti: “Mentu gwandje, tseya Kalunga kaho, ngoye u mu longele nomutima aguhe nehalo alihe. Omadhiladhilo getu agehe noondjuulukwe dhetu adhihe oku dhi shi.” (1 Ondjal. 28:9) Eeno shili, Jehova oha konakona oomwenyo adhihe, mwa kwatelwa nodhetu. (Omayel. 17:3; 21:2) Ngele okwa hokwa shoka shi li momitima dhetu otatu vulu okukala tu na ekwatathano naye ngashingeyi nomonakuyiwa. Onkee ano, oshi li pandunge tu landule oohapu dhaDavid dha nwethwa mo mokukala hatu ningi ngaashi tatu vulu tu longele Jehova nomutima aguhe.

6. Iinima yini hayi tu imbi tu longele Jehova nomutima aguhe?

⁶ Iilonga yetu yuulaadhi tu li oshigwana shaJehova, ohayu ulike kutya otwa halelela oku mu longela nomutima aguhe. Ihe otu shi kutya omathiminiko okuza kuuyuni waSatana nosho wo onyama yetu inaayi gwanenena ohayi tu imbi tu longele Jehova nomutima aguhe. (Jer. 17:9; Ef. 2:2) Ihe opo tu tsikile nokulongela Jehova tu na uulaadhi natu kale aluhe hatu konakona omutima gwetu. Ongiini tatu vulu oku shi ninga?

7. Oshike hashi holola uukwatya wetu womeni?

⁷ Ngaashi owala olute lwomuti ngoka inaagu kewa po ihaalu monika, nomutima gwamukweni okalongo ki ili. Jesus okwe shi popya mEuvitho lyokOndundu kutya omuti omwaanawa ohagu monika kiiyimati yagwo. Eihumbato lyetu nalyo ohali holola uukwatya wetu washili womeni. (Mat. 7:17-20) Natu ka tale uukwatya wumwe mboka.

NKENE TATU VULU OKUKONAKONA OMITIMA DHETU

8. Oohapu dhaJesus ndhoka dhi li muMateus 6:33, otadhi holola shike kombinga yomitima dhetu?

⁸ Jesus okwa li wo a lombwele aapulakeni ye shoka ye na okuninga, opo yu ulike kutya otaya longele Jehova nomutima aguhe. Okwa popi mEuvitho lyokOndundu a ti: ‘Tangotango kongeni [uukwaniilwa waKalunga, NW] nuuyuuki we, nena mbika ayihe otamu yi gwedhelwa ko.’ (Mat. 6:33) Iinima mbyoka hatu pititha komeho monkalamwenyo ohayi holola shoka twa hala, tatu dhiladhila nosho wo oompangela ndhoka dhi li momitima dhetu. Omukalo gumwe moka tatu vulu okumona ngele otatu longele Kalunga nomutima aguhe ogwo okutala kiinima mbyoka hatu lalakanene monkalamwenyo yetu.

9. Jesus okwa li a hiya aalumentu yamwe ya ninge shike, noya li yu ulike ngiini shoka taya lalakanene?

⁹ Konima owala sho Jesus a lombwele aalanduli ye ‘ya konge tango uukwaniilwa waKalunga,’ opwa li pwa ningwa oshinima shoka tashi ulike kutya iikala yomuntu yomeni ohayi hololwa kwaashoka a pititha komeho monkalamwenyo ye. Lukas okwe shi popi a ti kutya Jesus “okwa tokola okuukilila kuJerusalem,” nokuli nonando okwa li e shi kutya oshike tashi ke mu ningilwa. “Mokweenda kwawo,” Jesus naayapostoli ye oya li ya tsakaneke aalumentu yamwe, mboka a lombwele a ti: ‘Landulii ndje!’ Aalumentu mboka oya li ya taamba ko ehiyo, ihe oya li ye na iinima mbyoka ya hala okuninga tango. Gumwe okwa lombwele Jesus a ti: ‘Pitika ndje tango ndi ka fumvike tate.’ Omukwawo okwa ti wo: ‘Omuwa, onda hala oku ku landula, ihe etha ndje tango ndi ka laleke yaandjetu.’ (Luk. 9:51, 57-61, yelekanitha NW.) Pokati kaJesus naalumentu mboka a li a hiya opu na eyooloko. Aalumentu mboka ayehe oya li ye na omitima dhopaali. Oya li taya lalakanene iinima yopaumwene tango, komeho giinima yUukwaniilwa, shoka tashi ulike kutya kaya li ya hala okulongela Kalunga nomutima aguhe ngaashi Jesus.

10. (a) Tu li aalanduli yaJesus Kristus, ohatu inyenge ngiini kehiyo lye? (b) Ethaneko lini Jesus a li a popi paufupi?

¹⁰ Otu na okuhenuka iikala ya fa yaalumentu mboka ya popiwa metetekelo. Tse ohatu longele Jehova esiku kehe, molwaashoka otwa taamba ko ehiyo lyaJesus tu ninge aalanduli ye. Kungawo, ohatu ulike kutya otu hole Jehova nomutima gwetu aguhe. Nonando ohatu kala twi ipyakidhila megongalo, otu na natango okukala twa kotokela oshiponga shimwe shoka hashi vulu okweetwa komutima gwetu. Oshiponga shoka oshashike? Jesus okwe shi lombwele aalumentu mboka a li a hiya ye mu landule a ti: “Kehe ngoka ta tameke okupulula e ta tala konima, ino opalela [uukwaniilwa waKalunga, NW].” (Luk. 9:62) Otatu ilongo mo shike methaneko ndika?

MBELA OHATU “DHIGININE SHOKA OSHIWANAWA”?

11. Omuniilonga gwomepya ngoka a popiwa methaneko lyaJesus okwa li ta piyaganekwa kushike, nomolwashike?

¹¹ Opo ethaneko lyaJesus li kale lya tsa nawa momadhiladhilo getu, natu li konakone muule. Dhiladhila komuniilonga ngoka i ipyakidhila nokupulula. Ihe omanga ta pulula, oti ipula naashoka a thigi kegumbo lye hoka ku na yaandjawo, ookuume ke ya gondja taya li notaya nu, taya tutula uudhano notaya si iindjola. Okwa hala wo oku ke ya waimina. Sho a pulula po uufoola wontumba, ehalo lye lyaashoka shi li kegumbo lye otali mu hili. Shoka oshe mu ningitha a punguluke e “ta tala konima.” Nonando epya alihe inali pwa okupululwa nokukunwa, omuniilonga ngoka ota piyaganekwa kusha, shoka tashi mu imbi a mane iilonga ye. Osha yela kutya mwene gwepya ota ka kala e mu yematela.

12. Efaathano lini li li pokati komuniilonga gwomethaneko lyaJesus nosho wo nAakriste yamwe kunena?

¹² Ohashi vulika wo natse tu ninge twa fa omuniilonga gwomethaneko lyaJesus. Omuniilonga ngoka ota thaneke Omukriste kehe ngoka a fa te shi enditha nawa, ihe uupambepo we owu li moshiponga. Opo tu shi uve ko nawa, natu dhiladhile komumwatate ngoka ha kala i ipyakidhila muukalele. Nonando oha kala aluhe pokugongala noha kutha ombinga miilonga yokuuvitha, ota nyengwa okweetha po okudhiladhila iinima yimwepo yomuuyuni, mbyoka ya ningina momutima gwe nokwe yi hokwa. Ehalo lyiinima mbyoka yomuuyuni otashi vulika li koke muye e “ta tala konima,” nando okwa longela Kalunga uule womimvo dhontumba. Ita ka kala we a “dhiginina koohapu dhomwenyo,” nonando opu na iilonga oyindji mbyoka yi na okulongwa muukalele. Kungawo, okukutha ombinga kwe miinima yopakalunga otaku ka shuna pevi. (Fil. 2:16) Jehova, “Omuwa gweteyo,” naye oha kala a yemata uuna omupiya gwe itaa tsikile we noku mu longela.—Luk. 10:2.

13. Okulongela Jehova nomutima aguhe okwa kwatela mo shike?

¹³ Ethaneko lyaJesus li na ko nasha nomuniilonga olya yela nawa kutse. Otu na okukala hatu gongala pandjigilile nokuya wo miilonga yomomapya. Okulongela Jehova nomwenyo gwetu aguhe okwa kwatela mo oshindji. (2 Ondjal. 25:1, 2, 27) Ngele omutima gwOmukriste ogwa pwila miinima yimwepo yomuuyuni, nena ‘ota tala konima,’ naashoka otashi ka tula ekwatathano lye naKalunga moshiponga. (Luk. 17:32) Otatu ka kala two “opalela [uukwaniilwa waKalunga, NW],” ngele otu ‘tonde shoka oshiwinayi nokudhiginina shoka oshiwanawa.’ (Rom. 12:9; Luk. 9:62) Onkee ano, atuheni inatu etha nando osha muuyuni waSatana shi tu imbe tu longele Kalunga nomutima aguhe, nonando oshi kale sha fa tashi hokitha noshi na uuwanawa wa tya ngiini.—2 Kor. 11:14; lesha Aafilippi 3:13, 14.

KALENI MWA TONATA

14, 15. (a) Satana oha kambadhala ngiini okunwetha mo omitima dhetu? (b) Gandja ethaneko ndyoka tali ulike kutya iineya yaSatana oya nika oshiponga.

¹⁴ Ohole yetu yokuhola Jehova oye tu inyengitha tu mu iyapulile. Oyendji yomutse otwe shi ulika uule womimvo odhindji kutya otwa tokola toko okulongela Jehova nomutima aguhe. Ihe Satana onkee ngaa ta kambadhala okupukitha omitima dhetu, nopwaa na oluthuwo. (Ef. 6:12) Oku shi shi kutya itatu ka thiga po owala Jehova ohaluka. Onkee ano, oha longitha omaheka ‘guuyuni mbuka,’ opo e ende kashona nakashona ta nkundipaleke ekwatathano lyetu naKalunga. (Lesha Markus 4:18, 19.) Omolwashike iineya niihelele ye hayi pondola?

¹⁵ Natu tale kethaneko tu mone eyamukulo. Natu tye nduno opo wa matula oshigandhi shiilya moka to kala ho kutha. Ihe esiku limwe sho wa kutha mo, uusiku opwe ya wo omufuthi e ta yaka mo okayaha kamwe kiilya. Mbela oto ka mona ngaa kutya omwa kuthwa sha? Ito ke shi mona nuupu. Natu tye nduno omufuthi okwa galukile po ishewe ongulohi yesiku lya landula ko e ta yaka mo natango okayaha kamwe kiilya. Mbela oto ke shi mona mo ngaa? Natango ito ke shi mona lela. Omolwashike mbela? Omolwaashoka ngele wa kutha iilya iishona moshigandhi omuntu iho kala naanaa wu wete kutya omwa kuthwa sha. Sha faathana, enwethomo lyuuyuni waSatana ohali vulu oku tu nkundipaleka kashona nakashona e tatu kala kaatu shi we aalaadhi muukalele nopwaa na oku shi nongela. Ngele oshe tu ningilwa, nena otwa fa twe etha Satana a kuthe mo sha moshigandhi shetu shopathaneko, shoka tashi tu ningitha tu kale ihaatu longele Jehova nuulaadhi. Ngele Omukriste ina kotoka, ita ka nongela nokuli elunduluko ndyoka hali endele ko okaendanampadhi.—Mat. 24:42; 1 Pet. 5:8.

EGALIKANO OLYA SIMANENENA

16. Ongiini tatu vulu okwiigamena, opo Satana kee tu ende mevi?

¹⁶ Ongiini tatu vulu okwiigamena, opo Satana kee tu ende mevi, noshike tashi ke tu kwathela tu kale twi inekela Jehova nomutima aguhe? (2 Kor. 2:11) Egalikano. Paulus okwa ladhipike ooitaali ooyakwawo ya kale ‘nokukandeka omakotokelo omawinayi gomuhindadhi.’ Okwe ya kumike a ti: “Mbika ayihe yi longeni negalikano okwiindila ekwatho. . . .  Galikaneni aluhe.”—Ef. 6:11, 18; 1 Pet. 4:7.

17. Oshike tatu ilongo momikalo moka Jesus a li a galikana?

¹⁷ Opo tu kandeke omakotokelo gaSatana, otu na okukala hatu galikana twa fa Jesus, nokulandula oshiholelwa she shokukala e hole Jehova nomutima gwe aguhe. Lukas okwa nyola nkene Jesus a li a galikana ongulohi ndjoka ya tetekela eso lye a ti: “Oye okwa adhika kuuwehame uunene nokwa galikana a mana mo.” (Luk. 22:44) Jesus okwa li ha galikana shito a mana mo, ihe sho a li e na okwiidhidhimikila emakelo edhigu, okwa galikana “a mana mo” noonkondo. Jehova okwa li a yamukula egalikano lye. Jesus okwe tu tulila po oshiholelwa tu mone kutya katu na okukala hatu galikana momukalo gwa faathana aluhe. Onkee ano, ngele omamakelo gaSatana omadhigudhigu noga kindja otu na okugalikana ‘twa mana mo’ noonkondo, opo Jehova e tu gamene.

18. (a) Otu na okwiipula shike paumwene kombinga yegalikano, nomolwashike? (b) Iinima yini hayi nwetha mo omitima dhetu, nomomikalo dhini? (Tala oshimpungu pepandja 16.)

¹⁸ Omagalikano ngono otage ke tu kwathela ngiini? Paulus okwa ti: ‘Oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni.’ (Fil. 4:6, 7) Opo tu kale twi inekela Jehova nomutima aguhe, otu na okugalikana shili twa mana mo notwaa na ezimbuko. (Luk. 6:12) Ipula to ti: ‘Mbela ohandi galikana nda mana mo nondaa na ezimbuko?’ (Mat. 7:7; Rom. 12:12) Eyamukulo lyoye otali ka ulika kutya ehalo lyoye lyokulongela Jehova nomutima aguhe oli thike peni.

19. Oshike to ka ninga po wu kale wi inekela Jehova thiluthilu?

¹⁹ Eeno shili, iinima mbyoka hatu pititha komeho monkalamwenyo yetu ohayi ulike iikala yomutima gwetu gwomeni. Inatu hala nando iinima mbyoka twa thiga po nosho wo iineya niihelele yaSatana yi kale endangalati mondjila yetu yokulongela Jehova nomutima aguhe. (Lesha Lukas 21:19, 34-36.) Onkee ano, natu tsikile okukala hatu galikana Jehova “nomwenyo aguhe” ngaashi David.—Eps. 86:11.

[Oshimpungu pepandja 16]

IINIMA ITATU MBYOKA TAYI VULU OKUKALEKA OMITIMA DHETU MONKALO YI LI NAWA

Uuna tatu ehama omutima, ohatu ningi oonkambadhala tu ka konge uukolele. Otu na wo okuninga oonkambadhala tu kaleke omutima gwetu gwopathaneko gu li nawa. Tala kiinima itatu ya simana tayi landula:

1 Iipalutha: Opo omutima gwetu gu kale gu na uukolele otwa pumbwa okulya iikulya yi na iitungithi ya gwana. Sha faathana, otwa pumbwa okwiipalutha nawa pambepo okupitila mekonakono lyopaumwene, mokutedhatedha nomokukala pokugongala.—Eps. 1:1, 2; Omayel. 15:28; Heb. 10:24, 25.

2 Omadhewo: Opo omutima gwetu gu kale gu na uukolele, otwa pumbwa okuninga omadhewo. Osha faathana nomutima gwetu gwopathaneko. Opo gu longe nawa, otwa pumbwa okukala hatu kutha ombinga nuulaadhi muukalele.—Luk. 13:24; Fil. 3:12.

3 Omudhingoloko: Aantu mboka hatu longo nayo naamboka hatu kala nayo ohaya nwetha mo nayi omitima dhetu dho dhene nosho wo ndhoka dhopathaneko. Ihe otatu vulu okushonopeka eendathano lyetu naantu mboka mokukala hatu endathana olundji nooitaali ooyakwetu mboka ye na ko nasha natse lela noye hole Jehova nomutima aguhe.—Eps. 119:63; Omayel. 13:20.