OSHITOPOLWA 8

Eso lyaJesus otali ti shike kungoye?

Jesus okwa si opo tu vule okukala tu na omwenyo. Johannes 3:16

Aakiintu ya tala mombila moka mwa li Jesus

Omasiku gatatu konima yeso lyaJesus, aakiintu yamwe oya li ya yi kombila ye, ihe oya adha yi li owala. Jehova okwa li a yumudha Jesus kuusi.

Jesus i ihololele aalongwa ye nokonima e ta londo a ye megulu

Lwanima, Jesus okwi ihololele aayapostoli ye.

Jehova okwa li a yumudha Jesus e li oshishitwa shopambepo oshinankondo ihaashi si. Aalongwa yaJesus oya li ye mu mono sho ta londo ta yi megulu.

Kalunga okwa li a yumudha Jesus nokwe mu ningi Omukwaniilwa gwUukwaniilwa we. Daniel 7:13, 14

Jesus ta pangele aantu moparadisa kombanda yevi e li koshipangelapundi she mUukwaniilwa

Jesus okwa gandja omwenyo gwe gu ninge iikulila yaantu. (Mateus 20:28) Okupitila mekuliloyambo ndyoka, Kalunga okwe shi ningi tashi wapa opo tu vule okukala nomwenyo sigo aluhe.

Jehova okwa langeka po Jesus e li Omukwaniilwa a pangele ombanda yevi. Ota ka pangela pamwe naantu aadhiginini ye li 144 000 mboka haya yumudhilwa omwenyo megulu. Jesus naantu mboka 144 000, otaya ka pangela ye li Aakwaniilwa muukwaniilwa waKalunga womegulu.—Ehololo 14:1-3.

Uukwaniilwa waKalunga otawu ka ninga evi oparadisa. Iita, omiyonena, oluhepo nondjala itayi ka kala po we. Aantu otaya ka kala shili ya nyanyukwa.—Episalomi 145:16.