Kulika elininipiko lashili
“Ove ho xupifa ovanhu ve lininipika.” — 2 SAMUEL 22:28.
1, 2. Oukwatya wa faafana ulipi ovapangeli vahapu vomounyuni va li ve na?
EEMBILA daEgipti odo hadi ifanwa eepiramide, otadi yandje oumbangi u na sha naavo va li nale ovapangeli voshilongo osho. Vamwe vali ovo va li va shiivika apeshe mondjokonona ongaashi Sanherib waAssiria, Alexander Munene waGreka nosho yo Julius Caesar waRoma. Ovapangeli aveshe ovo ova li ve na oukwatya wonhumba wa faafana. Kava li ve na elininipiko lashili. — Mateus 20:25, 26.
2 Mbela oto diladila kutya ovapangeli ovo va tumbulwa metetekelo ova li hava kongo mokati kovapangelwa vavo ovanhu vongaho ovo va li va pumbwa ehekeleko? Hasho nandenande! Noito diladila nokuli kutya ova li hava i keenhele dongaho dovakwashiwana ovo va li meenghalo dii opo ngeno ve ke va twe omukumo. Oikala yavo i na sha novanhu vongaho inai yooloka ko tuu kwaayo yOmupangeli Munenenene weshito alishe, Jehova Kalunga!
Oshihopaenenwa sha denga mbada shelininipiko
3. Ongahelipi Omupangeli Munenenene ha ungaunga novapangelwa vaye vopanhu?
3 Jehova omunenenene nokwa tumbala neenghono, ndele “omesho [aye] taa tale edu alishe, opo a kwafe neenghono ovo have liameke kuye nomutima aushe.” (2 Omafimbo 16:9) Ndele oha ningi po shike ngeenge okwa mono ovanhu vongaho ovo have mu longele va wililwa po omolwomayeleko e lili noku lili? Oha “kala” pamwe navo okupitila momhepo yaye iyapuki “opo [a] hekeleke omhepo yovalininipiki [noku] tululule omwenyo momutima waava va nyanyaulwa.” (Jesaja 57:15) Kungaha, ovalongeli vaye va pepalekwa ohava kala ve na eenghono okutwikila oku mu longela nehafo. Osho itashi holola tuu elininipiko laKalunga!
4, 5. (a) Omupsalme okwa li e uditile ngahelipi onghedi yaKalunga yokupangela? (b) ‘Okunyongama’ kwaKalunga opo a kwafele “ohepele” otaku ti shike?
4 Kape na vali umwe meshito alishe he lininipike opo a kwafele ovanhu ovalunde, ngaashi Omwene Omunamapangelo aeshe he shi ningi. Onghee omupsalme okwa li ta dulu okushanga ta ti: “Omwene okwa tumbala kombada yoiwana aishe yoilongo, oshingefimano shaye osha lunda eulu. Olyelye e fike pOmwene, Kalunga ketu, ou e nonhele yokukala kwaye kombada, ndele ta [nyongama, a tale] meulu nokombada yedu? Ohepele ote i tumbu mondwi yedu, nomufyoona ote mu toola mo monyata.” — Epsalme 113:4-7, yelekanifa OB-1986.
5 Didilika oshitya “nyongama.” Ngeenge tashi yukifwa kovanhu, omafimbo amwe otashi dulika shi kale shi na eityo lii, tashi ulike ‘kokudina ovo ve li pedu kuye ile va hepa.’ Jehova Kalunga ke na nande oikala yelinenepeko ya tya ngaho, molwaashi ye omuyapuki. (Markus 7:22, 23) Ndele “okunyongama” otaku dulu yo okukala ku na eityo lokulunduluka okudja pondodo ya fimana ndele to uya pondodo inini yopanghalafano opo u ungaunge novanhu vongaho. Nomolwaasho, Eembibeli dimwe oda toloka Epsalme 113:6 tadi ti kutya Kalunga okwe lininipika. Osho itashi hokolola tuu nawa Kalunga ketu omulininipiki oo ha file oshisho pahole eemhumbwe dovalongeli vaye vopanhu inava wanenena! — 2 Samuel 22:36.
Etomheno molwaashi Jesus a li omulininipiki
6. Oshike sha li oshilonga shinenenene shelininipiko laJehova?
6 Oshilonga shaKalunga shinenenene shelininipiko noshohole osha li okutuma Omona waye omudalwa wotete omuholike kombada yedu a ninge omunhu opo a dule okuxupifa ovanhu. (Johannes 3:16) Jesus okwa honga ovanhu oshili kombinga yaXe womeulu, opo nee okwa yamba po omwenyo waye wopanhu wa wanenena, opo a kufe po “omatimba ounyuni.” (Johannes 1:29; 18:37) Omolwokuhopaenena filufilu Xe, mwa kwatelwa elininipiko laYe, Jesus okwa li e na ehalo okuwanifa po osho Kalunga e mu pula a ninge. Osho osho sha li oshihopaenenwa shelininipiko noshohole sha denga mbada mondjokonona, osho sha tulwa po kushimwe shomoishitwa aishe yaKalunga. Haaveshe va lenga elininipiko laJesus; ovatondi vaye ova li nokuli ve mu tala ko e li ‘omufyoonelela.’ (Daniel 4:17) Ndele nande ongaho, omuyapostoli Paulus okwa didilika kutya ovaitaveli vakwao ova li va pumbwa okuhopaenena Jesus, nokungaha osha li tashi va dulifa va ungaunge navakwao nelininipiko. — 1 Ovakorinto 11:1; Ovafilippi 2:3, 4.
7, 8. (a) Jesus okwe lihonga peni okukala omulininipiki? (b) Jesus okwa kumaida ovo tashi dulika va li tava ka ninga ovahongwa vaye nekumaido lilipi?
7 Paulus okwa divilika oshihopaenenwa shaJesus sha denga mbada, a shanga a ti: “Omadiladilo eni naa fe enya aKristus Jesus kwa li e a na, Oye nande olupe laKalunga, Oye ina hakana a kale a fa Kalunga, ndelenee okwe lidula Ye mwene nokwa djala olupe lomupika nokufafana novanhu nomokukala kwaye okwa li a fa omunhu; nokwe lininipika Ye mwene a dulika fiyo omefyo, heeno, fiyo mefyo [komuti womahepeko, NW].” — Ovafilippi 2:5-8.
8 Vamwe otashi dulika ve lipule kutya: ‘Jesus okwe lihonga peni okukala omulininipiki?’ Okwe lihonga okukala omulininipiki okupitila meendafano lavo naXe womeulu liwa, eshi a kala te mu longele oule womido dihapuhapu, ofimbo a li ta longo e li “omulongi onghulungu” mokushita oinima aishe. (Omayeletumbulo 8:30, NW) Konima younashibofa womuEden, Omona waKalunga okwa li a mona nghee Xe a ungaunga nelininipiko novanhu ovalunde. Onghee hano, eshi e uya kombada yedu, Jesus okwa li a hopaenena elininipiko laXe nokwa kumaida ovo tashi dulika va li tava ka ninga ovahongwa vaye nekumaido tali ti: “Litwikeni ondjoko yange nye mu lilonge kuame, osheshi Aame omunambili momutima onde lininipika; ndee tamu limonene eemwenyo deni etulumuko.” — Mateus 11:29; Johannes 14:9.
9. (a) Oshike osho Jesus a li a hokwa mounona? (b) Mokuulika kokaana, Jesus okwa honga oshilihongomwa shilipi?
9 Molwaashi Jesus okwa li shili omulininipiki, ounona kava li hava tila okuuya kuye. Ponhele yaasho, ova li hava kala va nanenwa kuye. Okwa li ha ulikile ounona ohole nokwa li he va pe elitulemo. (Markus 10:13-16) Oshike osho Jesus a li a hokwa unene mounona? Doshili, ova li ve na omaukwatya onhumba mawa oo ovahongwa vaye nonande va li ovakulunhu va li ihave a ulike alushe. Oshi shiivike apeshe kutya ounona ohava tale ko ovakulunhu ve va dule. Oto dulu oku shi mona momapulo mahapu oo hava pula. Heeno, moku va yelekanifa novakulunhu vahapu, ounona ohava hongwa noupu noihava kala naanaa ve na ounhwa. Pomhito imwe, Jesus okwa ifanene okaana ndele te ka fikameke komesho yovashikuli vaye ndele ta ti kuvo: “Ngenge itamu lidilulula ndee tamu ningi ngaashi ounona, mu he na apa tamu ka ya mouhamba wokeulu.” Okwa twikila ko a ti: “Ou te lininipike ngaashi okaana aka, oye omunene e dule vakwao mouhamba wokeulu.” (Mateus 18:3, 4) Jesus okwa tumbula efinamhango eli kutya: “Keshe ou te linenepeke ota ninipikwa, naau te lininipike ota ka nenepekwa.” — Lukas 14:11; 18:14; Mateus 23:12.
10. Omapulo elipi hatu ka konakoneni?
10 Oushili oo otau pendula omapulo a fimana. Etimaumbwile letu lokumona omwenyo waalushe ole likolelela yo kokukala tu na elininipiko lashili, ndele mbela omolwashike hashi kala shidjuu kOvakriste okukala ve lininipika? Omolwashike hashi kala shi li eshongo okufinda ounhwa nokuungaunga nomayeleko nelininipiko? Oshike tashi ke tu kwafela tu pondole mokukulika elininipiko lashili? — Jakob 4:6, 10.
Omolwashike shidjuu okukala omulininipiki?
11. Omolwashike itashi kumwifa eshi hashi kala shidjuu kufye okukala ovalininipiki?
11 Ngeenge oho kendabala noudjuu okukala omulininipiki, haave auke to ningi ngaho. Nale, mo 1920, Oshungonangelo imwe oya li ya kundafana omayele Ombibeli e na sha nomhumbwe yokukala ovalininipiki, ya ti: “Molwaashi otu wete nghee Omwene a lenga elininipiko, oshi na okuladipika ovahongwa aveshe vashili va kulike oukwatya oo keshe efiku.” Opo nee Oshungonangelo oyo oya popya sha yukilila ya ti: “Nonande ope na omakumaido mahapu aeshe oo opamishangwa, oukwatya wopanhu wokuhawanenena otau shi ningi shidjuu neenghono kwaavo tava ningi oshiwana shOmwene nova tokola okweenda mondjila oyo okukala noukwatya welininipiko, shi dulife okukala nomaukwatya amwe e lili.” Osho otashi ulike kulimwe lomomatomheno kutya omolwashike hashi kala shidjuu kOvakriste vashili okukala ovalininipiki — oukwatya wopanhu wokuhawanenena oo ohau tu ningifa tu kale twa hala efimano olo inali tu yeleka. Osho osho shi li ngaho, molwaashi otu li oludalo lovalihomboli ovalunde, Adam naEva, ovo va li ve liyandja keamo lokulihola mwene. — Ovaroma 5:12.
12, 13. (a) Ongahelipi ounyuni hau shi ningi shidjuu kOvakriste okukulika elininipiko? (b) Oshike tashi shi ningifa shidjuu unene kufye okukulika elininipiko?
12 Etomheno vali likwao molwaashi hashi kala shidjuu kufye okukala ovalininipiki, omolwaashi otwa dingililwa kounyuni oo hau ladipike ovanhu va kendabale va kale ve dule vamwe. Limwe lomalalakano ounyuni a fimana olo ehalo linene lokumbilipaleka “okahalu kombelela [inai wanenena] nokahalu komesho noifulalala yokukalamwenyo.” (1 Johannes 2:16) Ponhele yokukala tava pangelwa kouhalu wounyuni wa tya ngaho, ovahongwa vaJesus ove na okukaleka eisho lavo li li nawa nokuyandja elitulemo kokulonga ehalo laKalunga. — Mateus 6:22-24, 31-33; 1 Johannes 2:17.
13 Etomheno etitatu molwaashi shidjuu okukulika elininipiko nokukala nalo, omolwaashi Satana Ondiaboli oo a etifa elinenepeko oye ta pangele ounyuni ou. (2 Ovakorinto 4:4; 1 Timoteus 3:6) Satana ota xumifa komesho oikala yaye ii. Pashihopaenenwa, okwa li a hala Jesus e mu ilikane, ye e mu pe ngeno “omauhamba aeshe omounyuni nefimano lao.” Ndele molwaashi Jesus okwa li alushe e lininipika, okwa anya filufilu okutambula ko osho Ondiaboli ya li ya hala oku mu pa. (Mateus 4:8, 10) Sha faafana, Satana oha heke Ovakriste ve likongele efimano. Ndele Ovakriste ovalininipiki ohava kendabala okulandula oshihopaenenwa shaJesus, tava yukifa efimano kuKalunga. — Markus 10:17, 18.
Kulika nokuulika elininipiko lashili
14. “Elininipiko loipupulu” oshike?
14 Monhumwafo yaye kOvakolossi, omuyapostoli Paulus okwa londwela shi na sha nelininipiko lokombada lokulimonikifa. Paulus okwe li popya li li “elininipiko loipupulu.” Ovo have liningifa va fa ve lininipika kave na oupamhepo muwa. Ponhele yaasho, otava ulike kutya paulelalela ova “fulalala” kounhwa. (Ovakolossi 2:18, 23, yelekanifa OB-1986.) Jesus okwa li a popya shi na sha noihopaenenwa yelininipiko loipupulu la tya ngaho. Okwa li a tokola Ovafarisai omolwomailikano avo okulimonikifa nomolwokululika oipala yavo ngeenge kwa li tave lidilike oikulya, opo va monike kovanhu. Mepingafano naasho, opo omailikano etu opaumwene a tambulwe ko kuKalunga, otu na okwiilikana nelininipiko. — Mateus 6:5, 6, 16.
15. (a) Oshike hatu dulu okuninga, opo tu kale noikala yopamadiladilo yelininipiko? (b) Oihopaenenwa imwe iwa yelininipiko oilipi?
15 Ovakriste otava kwafelwa va kale noikala yopamadiladilo yelininipiko lashili mokutala koihopaenenwa yelininipiko ya denga mbada, osho shaJehova Kalunga naasho shaJesus Kristus. Okuninga ngaho okwa kwatela mo okukonakona pandjikilile Ombibeli nosho yo oikwafifo yokukonakona Ombibeli oyo ya yandjwa okupitila ‘momupiya omudiinini nomunaendunge.’ (Mateus 24:45) Okukonakona kwa tya ngaho okwa fimanenena kovapashukili Ovakriste ‘opo omitima davo dihe linenepekele vakwao.’ (Deuteronomion 17:19, 20; 1 Petrus 5:1-3) Dilonga koihopaenenwa ihapu yaavo va li va nangekwa noupuna omolwoikala yavo yelininipiko, ngaashi Rut, Hanna, Elisabet nosho vakwao vahapu. (Rut 1:16, 17; 1 Samuel 1:11, 20; Lukas 1:41-43) Diladila yo koihopaenenwa ihapu iwa yovalumenhu ovo va li va tumbala, ndele ova li ve lininipika moilonga yaJehova, ngaashi David, Josia, Johannes Omuninginifi nosho yo omuyapostoli Paulus. (2 Omafimbo 34:1, 2, 19, 26-28; Epsalme 131:1; Johannes 1:26, 27; 3:26-30; Oilonga 21:20-26; 1 Ovakorinto 15:9) Ndele ongahelipi shi na sha noihopaenenwa ihapu yelininipiko yaavo ve li meongalo lopaKriste lokunena? Okudilonga koihopaenenwa oyo otaku dulu okukwafela Ovakriste vashili va kale ‘nelininipiko mokukalafana kwavo.’ — 1 Petrus 5:5.
16. Oukalele wopaKriste ohau tu kwafele ngahelipi tu kale ovalininipiki?
16 Okukufa ombinga pandjikilile moukalele wopaKriste otaku dulu yo oku tu kwafela tu kale ovalininipiki. Oikala yopamadiladilo yelininipiko otai dulu oku tu kwafela tu pondole eshi hatu popi novanhu ovo inatu shiiva nande onale, ovo hatu shakeneke eshi hatu i eumbo neumbo nosho yo keenhele dimwe di lili. Oikala ya tya ngaho otai dulu oku tu kwafela unene tuu ngeenge ovaneumbo kave na ko nasha netumwalaka lOuhamba ile otave tu nyamukula nai. Eitavelo letu ohali shongwa luhapu, ndele elininipiko otali dulu oku tu kwafela tu kale hatu nyamukula ovanhu ‘nengungumano nosho yo nefimaneko linene.’ (1 Petrus 3:15, yelekaninfa NW.) Ovapiya vaKalunga ve lininipika ova ya koitukulwa ipe nova kwafela ovanhu vomomaputuko e lili noku lili nosho yo vomauxupilo a yoolokafana. Ovakalele va tya ngaho ohava kendabala nelininipiko okulihonga tashi dulika elaka lipe opo va dule okukwafela ovanhu ovo va hala okulombwela onghundana iwa. Oshi shii okupandulwa shili! — Mateus 28:19, 20.
17. Oinakuwanifwa yopaKriste ilipi tai tu pula tu kale ovalininipiki?
17 Omolwelininipiko, vahapu ova dula okuwanifa po oinakuwanifwa yavo yopaKriste, va pitifa ouwa wavamwe komesho yaao wavo vene. Pashihopaenenwa, otashi pula elininipiko kuxe Omukriste okweefa oilalakanenwa yaye yopaumwene opo a lande efimbo lokulilongekidila ekonakonombibeli lounona vaye tali pondola noku li kwatela komesho. Elininipiko ohali kwafele yo ounona va fimaneke ovadali vavo inava wanenena nova dulike kuvo. (Ovaefeso 6:1-4) Ovakainhu ovo ve na ovashamane vehe fi ovaitaveli luhapu ohava shakeneke eenghalo odo tadi pula elininipiko eshi tava kendabala okufinda ovashamane vavo okupitila ‘melihumbato lavo liwa nosho yo efimaneko lavo linene.’ (1 Petrus 3:1, 2, NW) Elininipiko nohole yokuhelihola mwene oi li omaukwatya a fimana yo ngeenge tashi uya pokufila oshisho pahole ovadali tava vele ile va kulupa. — 1 Timoteus 5:4.
Elininipiko ohali kwafele mokukandula po omaupyakadi
18. Ongahelipi elininipiko tali dulu oku tu kwafela tu kandule po omaupyakadi?
18 Ovapiya vaKalunga aveshe vopanhu inava wanenena. (Jakob 3:2) Omafimbo amwe, okuhaudafana otaku dulu okuholoka pokati kOvakriste vavali. Umwe otashi dulika a kale e na etomheno la yuka lokukala a nyematela mukwao. Ndele luhapu, eenghalo da tya ngaho otadi dulu okupongololwa po mokutula moilonga omayele aa taa ti: “Lididimikilafaneni, diminafaneni po omanyono, ngenge mwa ningafana nomukweni, ngaashi [Jehova, NW] e mu dimina po, osho nanye yo mu ninge.” (Ovakolossi 3:13) Oshoshili kutya okutula moilonga omayele oo kashipu, ndele elininipiko otali ke tu kwafela tu a tule moilonga.
19. Oshike tu na okudimbuluka ngeenge hatu popi naumwe oo e tu nyemateka?
19 Omafimbo amwe Omukriste otashi dulika a kale e udite kutya oshinima shonhumba osha kwata moiti unene nomolwaasho ita dulu oku shi mwenena ndele te shi efa ashike ngaho. Monghalo ya tya ngaho, elininipiko otali ke mu kwafela a ka popye naao e wete e mu nyemateka, nelalakano loku ka panga ombili naye. (Mateus 18:15) Etomheno limwe molwaashi Ovakriste tava dulu okutwikila ve na oupyakadi pokati kavo, otashi dulika umwe womuvo ile aveshe va kale ve na ounhwa nomolwaasho kape na umwe womuvo ta ka kala a hala okudimina kutya oku na ondjo. Ile oo a katuka onghatu yotete oku ka popya namukwao otashi dulika e shi ninga monghedi yokukala e lishii ouyuki noyokukembaula. Mepingafano naasho, oikala yelininipiko lashili otai ka kwafela lela mokupongolola po okuhaudafana kuhapu.
20, 21. Oshike tashi dulu oku tu kwafela unene opo tu kale ovalininipiki?
20 Onghatu ya fimanenena mokukulika elininipiko oyo okwiilikana kuKalunga e tu kwafele noku tu pe omhepo yaye. Ndele dimbuluka kutya ‘Kalunga ota file onghenda ovalininipiki,’ mwa kwatelwa oku va pa omhepo yaye iyapuki. (Jakob 4:6) Hano ngeenge ope na okuhaudafana pokati koye nomwiitaveli mukweni, ilikana kuJehova e ku kwafele u dimine nelininipiko epuko keshe olo u na, olo la etifa oupyakadi oo, kutya nee olinini ile olinene. Ngeenge owa li wa nyematekwa ndele mukweni te ku pe ombili tashi di komutima, mu dimina po nelininipiko. Ngeenge kashipu kwoove okuninga ngaho, pula ekwafo kuJehova meilikano opo u ekeleshi oikala keshe yelinenepeko oyo i li momutima woye.
21 Okukala tu shii omauwa mahapu oo taa etifwa kokukala nelininipiko oku na oku tu linyengifa tu kulike oukwatya oo u na ondilo notu u diinine. Ngeenge tashi uya poukwatya oo, katu na tuu oihopaenenwa iwa, osho shaJehova Kalunga naasho shaJesus Kristus! Inatu dimbwa eshilipaleko eli la dja kuKalunga tali ti: “Ondjabi yelininipiko noyokutila Omwene oyo oupuna nefimano nomwenyo.” — Omayeletumbulo 22:4.
Oitwa yokudilonga
• Oolyelye ve li oihopaenenwa ya denga mbada yelininipiko?
• Omolwashike shidjuu okukulika elininipiko?
• Oshike tashi dulu oku tu kwafela tu kale ovalininipiki?
• Omolwashike sha fimana okukala ovalininipiki?
[Efano pepandja 17]
Jesus okwa li omulininipiki shili
[Efano pepandja 19]
Ounyuni ohau ladipike ovanhu va kendabale va kale ve dule vamwe
[Efano pepandja 19]
WHO photo by L. Almasi/K. Hemzǒ
[Efano pepandja 20]
Elininipiko ohali tu kwafele tu popye novanhu ovo inatu shiiva nande onale, ovo hatu shakeneke moukalele wetu
[Efano pepandja 21]
Luhapu, okuhaudafana otaku dulu okupongololwa po mokudiminafana po kwetu pahole nelininipiko