Ongiini to vulu okukwathela megongalo lyeni?

MANGA Jesus inaa ya megulu, okwa li a lombwele aalongwa ye a ti: ‘Otamu ka ninga oonzapo dhokuhokolola ndje paantu ayehe miilongo ayihe yokombanda yevi.’ (Iilonga 1:8) Oya li taye ku uvithila ngiini aantu ayehe kombanda yevi?

Martin Goodman, omuprofesoli kOuniversiti yaOxford okwa ti kutya “pethimbo lyonale mepangelo lyaRoma, iilonga mbyoka ya li hayi longwa kAakriste oya li ye ya yoolola ko komalongelokalunga galwe, mwa kwatelwa gAajuda.” Jesus okwa li hu uvitha momahala gi ili nogi ili. Aakriste yashili oya li ye na okulandula oshiholelwa she, nokuuvitha “elaka etoye lyOshilongo shaKalunga” kehe pamwe. Oya li ye na okukonga aantu mboka ya hala okutseya oshili. (Lukas 4:43) Omimvo 2 000 dha ka pita, aantu mboka haya tumwa ya ka longe sha oya li hayi ithanwa “aayapostoli.” (Markus 3:14) Jesus okwa li a lombwele aalanduli ye a ti: “Indeni ano, ka ningeni aantu ayehe aalongwa yandje.” — Mateus 28:18-20.

Aayapostoli yaJesus 12 kaye ko we kombanda yevi, ihe aapiya yaJehova oyendji ohaya landula oshiholelwa shawo muukalele. Uuna ya lombwelwa ye ku uvithile kiitopolwa hoka ku na ompumbwe, ohaya ti: “Otandi yi! Tuma ndje!” (Jesaja 6:8) Pashiholelwa, aantu oyendji mboka haya zi kOsikola yaGilead, oya tembukila kiilongo yokokule. Yalwe oya tembukila kiitopolwa yilwe miilongo yawo. Oyendji oyi ilonga elaka lilwe, opo ya kwathele megongalo lyontumba nenge ongundu yontumba. Ihashi kala aluhe oshipu, ihe aamwatate naamwameme ayehe mboka ohaya ningi omaiyambo nehalo ewanawa, yu ulike kutya oye hole Jehova nosho wo aantu ooyakwawo. Onkee ano, ohayi iyunganeke nawa nohaya longitha nawa ethimbo lyawo, oonkondo dhawo niimaliwa yawo, opo ye ku uvithile hoka ku na ompumbwe onene. (Lukas 14:28-30) Omaiyambo agehe ngoka haya ningi oga simana noonkondo.

Haatuhe tatu vulu okutembukila hoka ku na ompumbwe onene nenge tu ilonge elaka lilwe. Nonando ongawo, atuheni otatu vulu okukala twa fa aatumwa momagongalo getu.

KALA WA FA OMUTUMWA MEGONGALO LYENI

Omimvo 2 000 dha ka pita, Aakriste oya li aalaadhi miilonga yokuuvitha, nonando oyendji yomuyo oya li hayu uvithile owala miilando yawo nokaya li aatumwa. Paulus okwa li a lombwele Timoteus a ti: “Longa oshilonga shomuuvithi gwelaka etoye, gwanitha ayihe mokulongela Kalunga.” (2 Timoteus 4:5) Oohapu ndhoka odha li tadhi longo kAakriste pethimbo lyonale, ihe otadhi longo natango kutse kunena. Aakriste ayehe oye na okuvulika kelombwelo lyokuuvitha etumwalaka lyUukwaniilwa nokuninga aantu aalongwa. Opu na omikalo odhindji moka tatu vulu okukala twa fa aatumwa momagongalo getu.

Pashiholelwa, uuna aatumwa ya tembukila koshilongo shilwe, iinima ohayi kala ya yooloka ko kwaambyoka yokiilongo yawo. Ohaya kala nokuli ya pumbwa okwiigilila onkalo moshilongo shoka. Nonando tse itatu vulu okutembukila hoka ku na ompumbwe onene, mbela itatu vulu okulongitha omikalo dhilwe tu uvithile aantu? Pashiholelwa, mo 1940, aamwatate oya li ya ladhipikwa ya kale haya uvitha momapandaanda esiku limwe moshiwike. Mbela owa kambadhala ngaa nale okuuvitha mepandaanda? Owa longitha ngaa nale okatemba kiileshomwa? Shoka sha simana osho kutya kambadhala ngaa wu longithe omikalo dhilwe wu uvithe onkundana ombwanawa.

Ngele owu na etaloko ewanawa, oto ka kala omulaadhi nowa hwama muukalele. Mboka haya tembukile hoka ku na ompumbwe nenge hayi ilongo elaka lilwe, oye li aauvithi ya pyokoka notaya vulu okukwathela egongalo. Pashiholelwa, ohaya kwatele komeho iilonga yokuuvitha. Olundji aatumwa ohaya kwatele komeho megongalo sigo aamwatate yomegongalo ndyoka taya kala ya gwana oku shi ninga. Ngele ngoye omumwatate a ninginithwa, mbela ino “hala” oshinakugwanithwa shokuyakula aamwatate naamwameme megongalo lyeni wu li omuyakuligongalo nenge omukuluntugongalo? — 1 Timoteus 3:1.

KALA “EKWATHO ENENE” MEGONGALO LYENI

Otatu vulu wo okukwathela egongalo momikalo dhilwe. Atuheni kutya nduno aanona nenge aakuluntu, aamwatate nenge aamwameme, otatu vulu okukala “ekwatho enene” kooitaali ooyakwetu. — Aakolossa 4:11.

Ngele otwa hala okukwathela aamwatate naamwameme, otu na oku ya tseya nawa. Ombiimbeli otayi tu ladhipike ‘tu silathane oshimpwiyu.’ Sha hala okutya, otu na okukala hatu ipula kombinga yoompumbwe dhawo uuna twa gongala pamwe. (Aahebeli 10:24) Uuna tatu shi ningi, katu na okukala twa hala okuuva iinima yawo yopaumwene. Otu na okukambadhala tu uve ko oonkalo dhawo naashoka ya pumbwa. Otashi vulika ya kale ya pumbwa ekwatho lyopainiwe, lyopamaiyuvo nenge eladhipiko tali zi mOmbiimbeli. Oshoshili kutya moonkalo dhimwe aakuluntugongalo naayakuligongalo oyo owala taya vulu oku ya kwathela. (Aagalati 6:1) Nonando ongawo, atuheni otatu vulu okukwathela aamwatate naamwameme aakokele nenge aanegumbo mboka ye na omaupyakadhi.

Omumwatate Salvatore okwa li a kwathelwa kaamwahe. Okwa li e na uupyakadhi wopashimaliwa, mboka we mu ningitha a landithe po ongeshefa ye, egumbo lye niinima ayihe mbyoka a li e na. Okwa kala ti ipula unene naanegumbo lye. Megongalo lyawo omwa li aanegumbo yamwe mboka ya mono kutya okwa pumbwa ekwatho. Aanegumbo mboka oye mu pe oshimaliwa noye mu kwathele, ye nomukadhi, ya mone iilonga. Aanegumbo mboka oya kala haya tokelwa pamwe naSalvatore naanegumbo lye taye ya pulakene notaye ya ladhipike. Oya kala ye na ekwatathano lyopothingo. Ngashingeyi ayehe ohaya dhimbulukwa sho ya li haya nyanyukilwa okukala pamwe pethimbo lyuudhigu mboka.

Aakriste yashili ihaya kakadhala okulombwela yalwe kombinga yeitaalo lyawo. Otu na okuholela Jesus nokulombwela aantu ayehe kombinga yomauvaneko omawanawa ngoka Kalunga u uvaneka. Kashi na nduno mbudhi kutya otatu vulu okutembukila hoka ku na ompumbwe onene nenge hasho, atuheni otu na okuninga ngaashi tatu vulu tu kwathele yalwe megongalo. (Aagalati 6:10) Uuna tatu shi ningi, otatu ka kala twa nyanyukwa notatu ka “yambekwa miilonga ayihe iiwanawa” mbyoka tatu longo. — Aakolossa 1:10; Iilonga 20:35.