ONTOPOLWA 17
Egalikano omagano ge na ondilo
“Omushiti gwegulu nogwevi” okwa hala okupulakena komagalikano getu. — Episalomi 115:15
1, 2. Omolwashike egalikano li li omagano ge na ondilo, nomolwashike tu na okutala kwaashoka Ombiimbeli tayi ti kombinga yalyo?
EWANGANDJO enene noonkondo li vule evi. Uuna Jehova ta tala kevi, aantu ayehe kuye oya fa owala eta lyomeya meyemele. (Episalomi 115:15; Jesaja 40:15) Nonando tse aashona noonkondo okuyelekanitha newangandjo, Episalomi 145:18, 19, otali ti: “Omuwa oku li popepi naayehe mboka taye mu ithana, naamboka taye mu galikana moshili. Mboka haye mu simaneke, ote ya pe ashihe shoka ye shi pumbwa, notu uvu omaindilo gawo e te ya hupitha.” Jehova, Omushiti omunankondoadhihe, okwa hala okukala popepi natse nokupulakena komagalikano getu. Egalikano omagano ge na ondilo shili, ngoka kehe gumwe a pewa kuJehova.
2 Jehova ota ka pulakena owala komagalikano getu ngele tatu galikana metsokumwe nehalo lye. Mbela ongiini tatu vulu oku shi ninga? Natu tale shoka Ombiimbeli tayi ti kombinga yegalikano.
OMOLWASHIKE TU NA OKUGALIKANA KUJEHOVA?
3. Omolwashike wu na okugalikana kuJehova?
3 Jehova okwa hala wu kale ho popi naye megalikano. Otu shi shi ngiini? Natu leshe Aafilippi 4:6, 7. Menyolo ndika ote tu hiya tu popye naye. Omupangeli gweshito alihe oku ku hole nokwa hala wu mu lombwele omaiyuvo goye nomaupyakadhi goye.
4. Okugalikana ethimbo kehe ohaku koleke ngiini uukuume woye naJehova?
4 Egalikano otali ku kwathele wu kale kuume kopothingo kaJehova. Ookuume kopothingo ohaya lombwelathana omadhiladhilo gawo nomaiyuvo gawo. Shoka ohashi koleke uukuume wawo. Oto ka koleka uukuume weni naJehova uuna to galikana kuye. Ohe ku lombwele omadhiladhilo ge nomaiyuvo ge okupitila mOmbiimbeli. Ohe ku lombwele wo shoka ta ka ninga monakuyiwa. Oto vulu oku mu lombwela omaiyuvo goye gomuule okupitila megalikano ethimbo kehe. Sho to shi ningi, uukuume weni naye otawu kolo. — Jakob 4:8.
OSHIKE TU NA OKUNINGA, OPO KALUNGA A PULAKENE OMAGALIKANO GETU?
5. Otu shi shi ngiini kutya Jehova iha pulakene komagalikano agehe?
5 Mbela Jehova oha pulakene komagalikano agehe? Aawe. Pethimbo lyomupolofeti Jesaja, Jehova okwa li a lombwele Aaisraeli a ti: “Nando mu galikane olule ngiini, itandi ka pulakena, oshoka iikaha yeni oya nika ombinzi.” (Jesaja 1:15) Ngele inatu kotoka otashi vulika tu ninge iinima mbyoka Jehova e tonde, e ta kala inaa pulakena komagalikano getu.
6. Omolwashike eitaalo lya simana? Ongiini to vulu okuulika kutya owu na eitaalo?
6 Ngele otwa hala Jehova a pulakene komagalikano getu, otu na okukala twe mu itaala. (Markus 11:24) Omuyapostoli Paulus okwa ti: “Kape na ngoka ta hokiwa kuKalunga, ngele ke na eitaalo. Oshoka ngoka te ya kuKalunga, oku na okukala i itaala kutya Kalunga oko e li nota futu ayehe mboka taye mu kongo.” (Aahebeli 11:6) Inashi gwana owala okupopya kutya otu na eitaalo. Otu na oku li ulika mokukala hatu vulika esiku kehe kuJehova. — Lesha Jakob 2:26.
7. (a) Omolwashike tu na okugalikana kuJehova neifupipiko nonesimaneko? (b) Ongiini tatu vulu okuulika kutya ohatu galikana tashi zi komutima?
7 Otu na okukala hatu galikana neifupipiko nonesimaneko kuJehova. Omolwashike mbela? Uuna tatu popi nomukwaniilwa nenge nomupelesidende, ohatu shi ningi nesimaneko. Jehova Omunankondoadhihe. Mbela katu na okupopya naye nesimaneko noneifupipiko, shi vulithe omuntu kehe? (Genesis 17:1; Episalomi 138:6) Otu na wo okugalikana tashi zi komutima, ihe katu na okukala hatu endulula iitya. — Mateus 6:7, 8.
8. Uuna twa galikana kombinga ya sha, oshike ishewe tu na okuninga?
8 Uuna twa galikana kombinga yoshinima shontumba, otu na okuninga ngaashi tatu vulu tu katuke metsokumwe negalikano lyetu. Pashiholelwa, ngele otwa galikana Jehova e tu pe oompumbwe dhetu dhakehe esiku, katu na okukala nonyalo. Katu na okutegelela Jehova e tu pe kehe shimwe naashoka tatu vulu okulonga, opo tu shi mone. Otu na okulonga nuudhiginini oshilonga kehe tatu vulu. (Mateus 6:11; 2 Aatessalonika 3:10) Ngele otwa galikana Jehova e tu kwathele tu ethe po okuninga shoka sha puka, otu na okuyanda onkalo kehe tayi vulu oku tu fala meyono. (Aakolossa 3:5) Natu konakone omapulo gamwe ngoka aantu haya pula kombinga yegalikano.
OMAPULO NGOKA HAGA PULWA KOMBINGA YEGALIKANO
9. Otu na okugalikana kulye? Oshike tatu ilongo muJohannes 14:6?
9 Otu na okugalikana kulye? Jesus okwa longa aalanduli ye ya galikane ‘kuTate yetu, ngu e li megulu.’ (Mateus 6:9) Okwa ti ishewe: “Ongame ondjila noshili nomwenyo. Kape na ngoka ta vulu okuya kuTate, okuninga ta pitile mungame.” (Johannes 14:6) Otu na owala okugalikana kuJehova okupitila muJesus. Shoka osha hala okutya ngiini? Jehova opo u uve omagalikano getu, otu na okusimaneka oshinakugwanithwa sha simana shoka a pa Jesus. Otwi ilonga kutya Jesus okwi ile kombanda yevi e tu hupithe muulunde neso. (Johannes 3:16; Aaroma 5:12) Jehova okwa langeka po Jesus e li Omuyambi omukuluntu nOmupanguli. — Johannes 5:22; Aahebeli 6:20.
Oto vulu okugalikana ethimbo kehe
10. Mbela otu na okukala tu li ngiini uuna tatu galikana?
10 Mbela otu na okukala tu li ngiini uuna tatu galikana? Jehova ine tu lombwela kutya otu na okutsa oongolo, okukuutumba nenge okuthikama uuna tatu galikana. Ombiimbeli otayi tu lombwele kutya otatu vulu okugalikana kuJehova momukalo kehe tagu ulike esimaneko. (1 Ondjalulo 17:16; Nehemia 8:6; Daniel 6:10; Markus 11:25) Okupopya nesimaneko oko kwa simana kuJehova, ihe hamukalo moka tu li uuna tatu galikana. Otatu vulu okugalikana muule nenge momwenyo kehe mpoka tu li. Otatu vulu okugalikana ethimbo kehe kutya nduno omutenya nenge uusiku. Uuna tatu galikana kuJehova, natu kale twi inekela kutya oku tu uvite, nonando yalwe kaye tu uvite. — Nehemia 2:1-6.
11. Iinima yini tatu vulu okupula Jehova megalikano?
11 Otu na okugalikana kombinga yashike? Otatu vulu okugalikana kombinga yakehe shoka shi li metsokumwe nehalo lyaJehova. Ombiimbeli otayi ti: “Ngele tatu mu indile shaa shoka she mu opalela, oye ote tu uvu ethimbo kehe ndyoka tatu mu indile.” (1 Johannes 5:14) Mbela otatu vulu okugalikana kombinga yiinima yetu yopaumwene? Eeno. Uuna tatu galikana kuJehova, natu kale twa fa tatu popi nakuume ketu kopothingo. Otatu vulu oku mu lombwela kehe shoka shi li momadhiladhilo getu nomomitima dhetu. (Episalomi 62:8) Otatu vulu oku mu pula e tu pe ombepo ye ondjapuki, yi tu kwathele tu longe shoka shu uka. (Lukas 11:13) Otatu vulu oku mu pula e tu pe oondunge tu ninge omatokolo gomondjila. Otatu vulu wo okugalikana e tu pe oonkondo tu idhidhimikile omaupyakadhi. (Jakob 1:5) Otu na okukala hatu pula Jehova a dhime po oondjo dhetu. (Aaefeso 1:3, 7) Otu na wo okukwatela yalwe momagalikano getu. Otatu vulu okukwatela mo aanegumbo yaandjetu nooitaali ooyakwetu megongalo. — Iilonga 12:5; Aakolossa 4:12.
12. Oshike sha simanenena shoka tu na okukala hatu kwatele momagalikano getu?
12 Oshike sha simanenena shoka tu na okukala hatu kwatele momagalikano getu? Edhina lyaJehova nehalo lye. Otu na okukala hatu pandula Jehova tashi zi komutima, molwiinima ayihe mbyoka e tu ningila. (1 Ondjalulo 29:10-13) Sho Jesus a li kombanda yevi, okwa longo aalanduli ye nkene ye na okugalikana. (Lesha Mateus 6:9-13.) Okwa ti kutya tango oye na okugalikana kombinga yedhina lyaJehova li yapulwe, ano li talike ko eyapuki. Okwa ti wo kutya otu na okugalikana Uukwaniilwa waKalunga wu ye nosho wo ehalo lyaKalunga li gwanithwe kombanda yevi. Jesus okwe tu longa tu galikane tango kombinga yiinima mbyoka ya simana, opo nduno tatu landulitha ko oompumbwe dhetu. Ngele otwa galikana tango kombinga yedhina lyaJehova nehalo lye, otatu ku ulika kutya oshike sha simana kutse.
13. Omagalikano oge na okukala nuule wu thike peni?
13 Omagalikano oge na okukala nuule wu thike peni? Ombiimbeli inayi shi popya. Omagalikano getu otaga vulu okukala omale nenge omafupi, shi ikolelela kutya otatu galikana kombinga yashike. Pashiholelwa, egalikano lyiikulya otashi vulika li kale efupi. Uuna tatu lombwele Jehova kombinga yaashoka tatu ipula nasho nenge tatu mu pandula, otashi vulika li kale ele. (1 Samuel 1:12, 15) Omagalikano kage na okukala omaleeleka nelalakano lyokunyanyudha aantu, ngaashi aalongimpango yopethimbo lyaJesus ya li haya ningi. (Lukas 20:46, 47) Jehova iha hokwa omagalikano ga tya ngawo. Shoka sha simana kuye okukala hatu galikana tashi zi komutima.
14. Otu na okugalikana lungapi, naashoka otashi tu longo shike kombinga yaJehova?
14 Otu na okugalikana lungapi? Jehova ote tu hiya tu popye naye megalikano ethimbo kehe. Ombiimbeli otayi tu lombwele tu mu “galikane,” tu ‘dhiginine okugalikana’ notu kale hatu ‘galikana aluhe.’ (Mateus 26:41; Aaroma 12:12; 1 Aatessalonika 5:17) Jehova oha kala aluhe a pulakena komagalikano getu. Ohatu mu pandula molwohole ye nomolwokugandja kwe. Ohatu tu mu pula wo e tu wilike, e tu pe oonkondo noku tu hekeleke. Natu kale twa lenga uuthembahenda wetu wokugalikana kuye. Shoka otashi tu kwathele tu longithe ompito kehe tu popye naye.
15. Omolwashike tu na okutya “amen” pehulilo lyegalikano?
15 Omolwashike tu na okutya “amen” pehulilo lyegalikano? Oshitya “amen” otashi ti eeno nenge nashi kale ngawo. Ohatu shi longitha tu ulike kutya shoka twa popya megalikano osha za komutima. (Episalomi 41:13) Ombiimbeli otayi ti kutya oshiwanawa wo okutya “amen” pehulilo lyegalikano lyomontaneho. Otatu vulu oku shi popya muule nenge momwenyo, opo tu ulike kutya otatu tsu kumwe naashoka sha popiwa. — 1 Ondjalulo 16:36; 1 Aakorinto 14:16.
NKENE JEHOVA HA YAMUKULA OMAGALIKANO GETU
16. Mbela Jehova oha yamukula ngaa omaglikano getu? Shi yelitha.
16 Mbela Jehova oha yamukula ngaa omagalikano getu? Eeno. Ombiimbeli otayi ti kutya ohu “uvu omagalikano.” (Episalomi 65:2) Jehova ohu uvu noha yamukula omagalikano gaantu omamiliyona ngoka taga zi komutima. Ohe shi ningi momikalo odhindji dha yoolokathana.
17. Jehova oha longitha ngiini aayengeli naapiya ye kombanda yevi, a yamukule omagalikano getu?
17 Jehova oha longitha aayengeli naapiya ye kombanda yevi, a yamukule omagalikano getu. (Aahebeli 1:13, 14) Opu na iiholelwa yaantu oyendji mboka ya galikana, opo ya kwathelwe yu uve ko Ombiimbeli. Konima owala yokugalikana, oya talelwa po kOonzapo dhaJehova. Ombiimbeli otayi ti kutya aayengeli nayo ohaya uvitha “elaka etoye” nenge onkundana ombwanawa kombanda yevi. (Lesha Ehololo 14:6.) Otashi vulika to dhimbulukwa wa li wa lombwela Jehova megalikano kombinga yuupyakadhi wontumba nenge yompumbwe yontumba. Otashi vulika a longitha gumwe gwomooitaali ooyakweni e ku kwathele. — Omayeletumbulo 12:25; Jakob 2:16.
Jehova oha yamukula omagalikano getu mokulongitha ooitaali ooyakwetu yetu kwathele
18. Jehova oha longitha ngiini ombepo ondjapuki nOmbiimbeli, a yamukule omagalikano getu?
18 Jehova oha longitha ombepo ye ondjapuki, a yamukule omagalikano getu. Otashi vulika tu mu pule e tu kwathele tu idhidhimikile uupyakadhi wontumba. Oha longitha ombepo ondjapuki yi tu wilike noyi tu nkondopaleke. (2 Aakorinto 4:7) Oha longitha wo Ombiimbeli, a yamukule omagalikano getu. Ohayi tu kwathele tu ninge omatokolo ngoka ge li mondjila. Uuna tatu lesha Ombiimbeli, ohatu mono mo omanyolo ngoka tage tu kwathele. Jehova ohi inyengitha aantu kokugongala ya popye kombinga yoshinima shoka twa li twa pumbwa ekwatho musho. Otashi vulika a longithe omukuluntugongalo e tu ladhipike niitsa yontumba tayi zi mOmbiimbeli. — Aagalati 6:1.
19. Omolwashike omathimbo gamwe hatu kala tu uvite kutya Jehova iha yamukula omagalikano getu?
19 Omathimbo gamwe ohashi vulika tu ipule kutya ‘omolwashike Jehova inaa yamukula natango omagalikano gandje?’ Dhimbulukwa kutya oye mwene e shi kutya uunake nongiini te ke ga yamukula. Oku shi shoka twa pumbwa. Otashi vulika tu kale twa pumbwa okugalikana lwiikando, opo tu ulike kutya egalikano lyetu olya za komutima shili. Tse tu ulike wo kutya otu na lela eitaalo muye. (Lukas 11:5-10) Omathimbo gamwe Jehova oha yamukula omagalikano getu momukalo ngoka inaatu tegelela. Pashiholelwa, otashi vulika tu mu lombwele kombinga yonkalo ondhigu tu li muyo. Pehala lyokukutha po uupyakadhi, otashi vulika e tu pe oonkondo tu wu idhidhimikile. — Lesha Episalomi 121:1, 2.
20. Omolwashike tu na okukala hatu galikana Jehova olundji?
20 Otu na uuthembahenda uunene wokupopya naJehova megalikano. Natu kale nuushili kutya ota ka pulakena omagalikano getu. (Episalomi 145:18) Otatu ka kala ookuume kopothingo kaJehova, ngele otwa kala hatu mu galikana aluhe tashi zi komutima.