Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
4-10 NOVOMBA
OMALIKO OKUZA MOOHAPU DHAKALUNGA | 1 JOHANNES 1–5
“Inamu kala mu hole uuyuni nenge iinima ayihe yomuuyuni”
(Johannes 2:15, 16) Inamu kala mu hole uuyuni nenge iinima ayihe yomuuyuni. Ngele omu hole uuyuni, ohole yokuhola Tate kayi mo mune. 16 Iinima ayihe mbyoka yi li muuyuni, inayi za muTate, ihe oyomuuyuni. Iinima mbika oyo uuhalu wopantu okuhola mbyoka aantu taye yi tala notaye yi itangele.
Dhiginina oshiholelwa shoka Jesus a tula po
13 Yamwe otashi vulika ya dhiladhile kutya hainima ayihe yomuuyuni ya puka. Nonando shoka oshoshili, uuyuni nomaheka ngoka ge li mo otayi vulu oku tu piyaganeka nuupu mokulongela Jehova. Nokapu na sha muuyuni sha nuninwa oku tu hedhitha popepi naKalunga. Onkee ano, ngele otwa kokeke ohole yokuhola iinima mbyoka yi li muuyuni, nokuli niinima mbyoka muyo yene inaayi puka, otu li moshiponga. (1 Timoteus 6:9, 10) Kakele kaashono, iinima mbyoka yi li muuyuni iiwinayi notayi vulu shili oku tu yona po. Ngele ohatu tala oomuvi nenge oopolohalama dhotiivii ndhoka hadhi ulike elongitho lyoonkondo, ohole yokuhola omaliko nenge oluhondelo, iinima ya tya ngawo otayi vulu okutalika ko yi li nawa, ihe konima yethimbo otayi ka kala emakelo kutse. Ngele ohatu endathana naantu mboka elalakano lyawo lya simana okuhwepopaleka owala okukalamwenyo kwawo nenge okulalakanena oongeshefa, iinima mbyoka otayi vulu oku tu nwetha mo e ta yi kala ya simanenena wo nokutse. — Mateus 6:24; 1 Aakorinto 15:33.
(1 Johannes 2:17) Uuyuni niinima ayihe yi li mo mbyoka aantu ye yi hokwa, otayi hulu po. Ihe ngoka ta longo shoka Kalunga a hala, ota kala e na omwenyo aluhe.
Ikonakona kutya ngoye omuntu wa tya ngiini
18 Oshinima oshikwawo shoka hashi tu kwathele tu kondjithe “iinima ayihe yomuuyuni” osho kutya ohatu kaleke momadhiladhilo oohapu dhaJohannes ndhoka tadhi ti: “Uuyuni niinima ayihe yi li mo mbyoka aantu ye yi hokwa, otayi hulu po. Ihe ngoka ta longo shoka Kalunga e shi hala, ota kala e na omwenyo aluhe.” (1 Joh. 2:17) Onkalelo yaSatana otayi monika ya fa yolela notayi kalelele. Ihe, otayi ka hanagulwa po esiku limwe. Kapu na nando osha tashi ka hupa muuyuni waSatana. Okukaleka oshinima shoka momadhiladhilo otaku ke tu kwathela kaatu gwile momaheka gOndiapoli.
Konga omaliko mOmbiimbeli
(1 Johannes 2:7, 8) Ookuume kandje aaholike, oshipango shika tandi shi mu nyolele, kashi shi oshipe. Osho oshipango sha tseyika shoka mwa kala nasho okuza ketameko. Oshipango shoka osho Ohapu ndjoka mwe yi uvu okuza ketameko. 8 Onkene tuu oshipango shika tandi shi mu nyolele, osho oshipe, noshili yasho oya monika muKristus nomune wo. Oshoka omilema odhi li pokuhula, nuuyelele washili otau minikile nale nokuli.
Omalombwelo gaJehova oge shi okwiinekelwa
14 Omanyolo gopaKriste gOshigreka ogu udha omalombwelo ge tu nuninwa tu kale tu holathane. Jesus okwa li a popi kutya oshipango oshinene oshitiyali osho ‘okuhola mukweni ngaashi ngoye wi ihole mwene.’ (Mat. 22:39) Sha faathana, Jakob omumwayinagona gwaJesus okwa li a ti kutya ohole oyi li ‘ompango yoshilongo.’ (Jak. 2:8) Omuyapostoli Johannes okwa nyola a ti: “Aaholike yandje, ongame itandi mú nyolele oshipango oshipe, aawe, ooshika tuu oshikulu, mwa kala nasho oketameko.” (1 Joh. 2:7, 8, OB-1954) Johannes okwa li tu ulike kushike sho a popi ‘oshipango oshikulu’? Okwa li tu ulike koshipango shohole. Osha li “oshikulu” meityo ndyoka kutya Jesus okwa li e shi gandja oomvula omilongo dha ka pita, okuza ‘ketameko.’ Ihe osha li wo “oshipe” molwaashoka osha li tashi pula ohole yeiyambo, ndjoka aalongwa ya li taya ka kala ya pumbwa sho ye li moonkalo oompe. Tu li aalongwa yaKristus, mbela katu na olupandu lwomalondodho ngoka hatu mono ngoka hage tu kwathele tu henuke okukokeka ombepo yokwiihola mwene, uukwatya mboka wu niwe kuuyuni mbuka, mboka tawu vulu oku tu ningitha tu kale kaatu hole yakwetu?
(1 Johannes 5:16, 17) Ngele ope na omuntu ta mono mukwawo ta yono eyono ndyoka itaali mu fala meso, oye ne mu galikanene koshipala shaKalunga, oye note mu tula omwenyo. Shika oshi na sha noondjo ndhoka itaadhi fala meso. Ihe oku na oondjo ndhoka tadhi fala meso, naantu ya tya ngaaka hayo tandi popi kutya naa galikanenwe. 17 Eyono kehe olyo ondjo, ihe oku na oondjo ndhoka itaadhi fala meso.
it-1-E ep. 862, okat. 5
Edhiminopo
Oshu uka okugalikanena yalwe ya dhiminwe po kuKalunga, nokuli negongalo alihe. Moses naye okwa li a galikanene oshigwana shaIsraeli shi dhiminwe po omayono gasho moku ga hempulula, na Jehova okwe mu uvu. (Num 14:19, 20) Peyapulo lyotempeli, Salomo naye okwa li a galikana kuJehova a dhimine po oshigwana she ngele sha yono e tashi etha po eihumbato lyasho ewinayi. (1Aak 8:30, 33-40, 46-52) Esra okwa li a galikana montaneho mokuhempulula omayono gAajuda mboka ya li ya mangululwa muupongekwa. Egalikano lye tali zi komutima nomayele ngoka a popi megalikano ndyoka, oga ningitha aantu ya katuke onkatu opo ya dhiminwe po kuJehova. (Esra 9:13–10:4, 10-19, 44) Jakob okwa li a ladhipike ngoka ekwatathano lye naJehova lya nkundipala i ithane aakuluntugongalo ye mu galikanene, nongele okwa yona, ‘oondjo dhe otadhi dhimwa po.’ (Jak 5:14-16) Ihe opu na ‘oondjo ndhoka tadhi fala meso,’ ndhoka omuntu ha yonene owina kombepo ondjapuki, noondjo ndhoka ihadhi dhimwa po. Omukriste ke na okugalikanena mboka taya yono momukalo ngoka. — 1Joh 5:16; Mat 12:31; Heb 10:26, 27; tala EYONO, I; OMBEPO.
Elesho lyOmbiimbeli
(1 Johannes 1:1–2:6) Otse otatu mu tseyithile Ohapu yomwenyo ya li ko okuza ketameko, ndjoka twe yi uva notwe yi mona nomeho getu yene. Eeno, tse otwe yi mona, niikaha yetu oye yi guma. 2 Omwenyo nguka sho gwa holoka, otwe gu mono, onkee otatu gu popi notatu mu hokololele omwenyo gwaaluhe, ngoka gwa li puTate notwe gu tseyithilwa. 3 Shoka twe shi mono notwe shi uvu, otatu shi mu hokololele wo, opo mu kale pamwe natse muukumwe mboka tse tu u na naTate nOmwana Jesus Kristus. 4 Shika otatu shi mu nyolele, opo enyanyu lyetu li kale lya gwanenena. 5 Ano elaka ndyoka tse twa uvu kOmwana, otatu li mu tseyithile kutya Kalunga oye uuyelele, muye kamu na nando omilema dhasha. 6 Onkee ano ngele otatu ti kutya otu na uukumwe naye, ihe natango otu li momilema, nena otu na iifundja moohapu dhetu nosho wo miilonga yetu, tse ihatu longo sha shoshili. 7 Ihe ngele tatu kala muuyelele, ngashika naanaa ye e li muuyelele, nena otu na uukumwe mokati ketu, nombinzi yOmwana Jesus otayi tu yogo oondjo dhetu adhihe. 8 Ngele otatu ti kutya katu na oondjo, nena otatu ipukitha tse yene, noshili kayi mo mutse. 9 Ihe ngele tatu hempululile Kalunga oondjo dhetu, nena otatu vulu oku mu inekela, oshoka oye ota longo shoka shu uka. Oye ote tu dhimine po oondjo dhetu e te tu yogo omayono getu agehe. 10 Ngele tatu ti kutya inatu yona sha, nena otatu lundile Kalunga kutya oye omufundja, notashi holola kutya oohapu dhe kadhi mo mutse.
2 Aamwandje, otandi mu nyolele oohapu ndhika, opo mwaa yone. Ihe ngele ku na ngoka a yono, nena otu na Omupopili Kristus, omuyuuki ngoka te tu galikanene puTate. 2 Oshoka Kristus ye mwene oye eyambo lyokudhima po oondjo dhetu, lyo kali shi ashike lyoondjo dhetu, ihe nolyaandhoka wo dhaantu ayehe. 3 Ngele otatu vulika kiipango yaKalunga, nena otu shi shi ihe kutya otu mu shi. 4 Ngele ope na ngoka ta ti: “Ngame ondi mu shi,” ihe ita vulika kiipango ye, omuntu a tya ngaaka oye omufundja, noshili kayi mo muye. 5 Ihe ngoka ta vulika koohapu dhe, oye tuu ngoka ohole yokuhola Kalunga yu udha mo muye. Opo mpoka ihe tse tatu vulu okutseya nawa kutya tse otu li muKalunga. 6 Ngoka ta ti kutya okwa kala muKalunga, oye na kale ngashika Jesus Kristus a li.
11-17 NOVOMBA
OMALIKO OKUZA MOOHAPU DHAKALUNGA | 2 JOHANNES 1–JUDAS
“Otu na okukondja opo tu kale moshili”
(Judas 3) Ookuume kandje aaholike, sho shene onda li nda hala oku mu nyolela kombinga yehupitho lyetweni atuheni, sho nda dhimbulula ompumbwe yoku mu nyolela, opo ndi mu tse omukumo, mu vule okukondjela eitaalo ndyoka Kalunga e li pe aantu ye polumwe aluke.
“Ikoleleleni mOmuwa”
Omakoto gaSatana otu ga shi molwaashoka Omanyolo otage ga aneke pomutenya. (2 Aakorinto 2:11) Mokuponokela omulumentu omuyuki Job, Omuhindadhi okwa li a longitha omaupyakadhi gopamahupilo ga kwata miiti, okusilwa aaholike, okupatanekwa muukwanegumbo, uuwehame wopalutu nosho wo okupewa ombedhi kaaku li pauyuuki kookuume ke aaniifundja. Job okwa li a polimana nokwa li e uvite kutya Kalunga okwe mu ekelahi. (Job 10:1, 2) Nonando otashi vulika Satana kee tu etele omaupyakadhi shu ukilila kunena, omaupyakadhi ga tya ngaaka ohaga gumu Aakriste oyendji, naSatana ota vulu okupitila mugo opo a gwanithe po omalalakano ge.
9 Iiponga yopambepo oya ninga oyindji pethimbo ndika lyehulilo. Otu li muuyuni moka okulalakanena omaliko taku yi moshipala omalalakano gombepo. Iikundaneki ohayi ulike aluhe oluhondelo lu li onzo yokwiinyanyudha pehala lwokukala onzo yomaupyakadhi. Naantu oyendji oye “hole iihulo peha lyokuhola Kalunga.” (2 Timoteus 3:1-5) Okudhiladhila ku li ngawo otaku vulu oku tu ningitha tu kale kaatu na ondjele yetu yopambepo ngele itatu ‘kondjele eitaalo.’ — Judas 3.
Konga omaliko mOmbiimbeli
(Judas 4) Oshoka mokati keni omwi iyakela aakeenakonashanakalunga yamwe mboka taa goyokitha elaka lyesilohenda lyaKalunga ketu nokwaaneidhiliko kwawo. Otaa dhini Jesus Kristus, Omulongi omunene nOmuwa awike gwetu. Omanyolo oga hunganeke nale nokuli egeelo ndyoka ya pewa.
(Judas 12) Oyo oya fa [“omamanya ga holama kohi yomeya,” NW] piililo yeni yuukumwe yo ihaa si ohoni okugongalela iikolitha. Aantu ya tya ngeyi ihaa sile yakwawo oshimpwiyu. Oyo oya fa iikogo tayi matukithwa kombepo noitayi eta omvula. Oya fa omiti dhopokufu, ihaadhi imi iiyimati, ongomiti dha vudhwa mo nomidhi dhadho e tadhi si.
it-2-E ep. 279
Iililo yuukumwe
Ombiimbeli inayi yelitha kutya iililo yuukumwe oshike yo inayi ulika kutya oya li hayi ningwa lungapi. (Judas 12) Omuwa Jesus Kristus kali a tula po ompango yi kale hayi ningwa nenge aayapostoli ye, nosha yela kutya kayi na okukala ya tali ko kutya oyi na okukala hayi ningwa. Yamwe ohaya ti kutya poompito ndhoka Aakriste mboka ya li ye na sha oya li haya hiya ooitaali ooyakwawo mboka ya hepa komatelekela. Oothigwa, aaselekadhi, aayamba naathigona oya li haya li pamwe mombepo yuumwayinathana.
it-2-E ep. 816
Omamanya
Oshitya shilwe shOshigreka spilas, otashi ulike kemanya ndyoka lya holama kohi yomeya. Olya longithwa kuJudas tali ulike kaalumentu mboka yi iyakela megongalo lyopaKriste nelalakano lyoku li teya po. Ngaashi owala omamanya ga holama ga li ga nika oshiponga koosikepa, aalumentu mboka nayo oye li lela oshiponga kuyalwe megongalo. Okwa ti kutya oya fa ‘omamanya ga nika oshiponga ga holama kohi yomeya piililo yuukumwe.’ — Judas 12, yelekanitha NW.
(Judas 14, 15) Enok, omutiheyali gwoluvalo lwaAdam, okwa hunganeke nalenale kombinga yaantu ya tya ngeyi: “Tala! Omuwa ote ke ya pamwe naayengeli ye aayapuki yomayuvi ogendji 15 okupangula ayehe nokugeela aakeenakonashanakalunga ayehe omolwiilonga yawo ayihe yokudhina Kalunga, sho haa popi oohapu dhomatukano dha tsa ondumbo naKalunga.”
“Okwa li a hokiwa kuKalunga”
Ehunganeko lyaEnok olya li tali popi kombinga yashike? Ehunganeko ndyoka otali ti: “Tala! Omuwa ote ke ya pamwe naayengeli ye aayapuki yomayuvi ogendji okupangula ayehe nokugeela aakeenakonashanakalunga ayehe omolwiilonga yawo ayihe yokudhina Kalunga, sho haa popi oohapu dhomatukano dha tsa ondumbo naKalunga.” (Judas 14, 15) Enok okwa li i itaala thiluthilu kutya iinima mbyoka otayi ka gwanithwa shili. Kuye osha li sha fa Kalunga a gwanitha nale shoka sha popiwa mehunganeko ndika. Edhiladhilo olyo kutya ehunganeko ndika otali popi oshinima shoka tashi ka ningwa, nosha hokololwa sha fa sha ningwa nale. — Jesaja 46:10.
“Okwa li a hokiwa kuKalunga”
Eitaalo lyaEnok otashi vulika li tu inyengithe tu ipule ngele uuyuni mbuka tu li muwo otwe wu tala ko ngaa ngaashi Kalunga e wu tala ko. Epangulo ndyoka Enok a popi otali longo nokunena, ngaashi owala lya li tali longo kaantu yopethimbo lye. Jehova okwa longitha Eyelu pethimbo lyaNoa, a hulithe po aakeenakonashanakalunga, ngaashi naanaa Enok a li e ya londodha. Ngaashi owala aantu ya li ya hanagulwa po pethimbo lyEyelu, opu na natango ehanagulo enene ndyoka tali ya. (Mateus 24:38, 39; 2 Petrus 2:4-6) Kalunga pamwe naayengeli ye omayovi ogendji otaye ya ya hanagule po aakeenakonashanakalunga. Kehe gumwe gwomutse okwa pumbwa okukaleka elondodho lyaEnok momadhiladhilo, noku li lombwela yalwe. Otashi vulika aanegumbo yetu nookuume ketu ya kale ye li ompinge natse, shoka tashi vulu oku tu ningitha tu kale tu uvite uuwike omathimbo gamwe. Nonando ongawo, Jehova ka li e ekelehi Enok, ye ke na siku e ke ekelehi aapiya ye aadhiginini kunena!
Elesho lyOmbiimbeli
(2 Johannes 1-13) Ontumwafo ndjika ya zi kOmukuluntu, oya nyolelwa omukulukadhi omuhogololwa noyana, mboka ndi ya hole unene. Nokuli hangame awike ndi mu hole, ihe ayehe mboka ya tseya oshili, oye mu hole. 2 Omolwoshili ndjoka ya kala mutse notayi ka kala pamwe natse sigo aluhe. 3 Kalunga Tate naJesus Kristus, Omuna gwaTate, naye tu pe esilohenda, olukeno nombili. Nayi kale natse moshili nomohole. 4 Ngame onda nyanyukwa mokumona kutya aakwanegongalo yamwe ohaa kala moshili, ngashika naanaa Tate e tu lombwele. 5 Onkee ano, egongalo alihe, otandi mu indile kutya tu kaleni tu holathane. Oshipango shika tandi shi mu nyolele, kashi shi oshipe, aawe, osho tuu shoka twa kala nasho okuza ketameko. 6 Ohole ndjoka tandi popi, otayi ti kutya tse otu na okukala tatu vulika kiipango yaKalunga. Oshipango osho shika ngaashi mwe shi uvu okuza ketameko: Amuhe kaleni mohole. 7 Aapukithi oyendji oya ya nuuyuni. Aantu ya tya ngaaka itaa hempulula nande kutya Jesus Kristus okwa ningi omuntu. Aantu mboka oyo aahongololi naakondjithi yaKristus! 8 Ikotokeleni ano, opo mwaa kanithe shoka mu na oku shi pewa, ihe mu mone ondjambi yeni ya gwana. 9 Shaa ngoka itaa kala melongo lyaKristus, ihe ota gwaya mo, oye ke na Kalunga. Ihe ngoka ta kala melongo ndika, oye oku na ayehe yaali: He nOmwana. 10 Ngele ku na ngoka te ya kune, ihe ite ya nelongo ndika, inamu mu taamba megumbo lyeni, ne inamu mu popitha nando okuli mu tye: “Ombili nayi kale nangoye.” 11 Oshoka shaa ngoka ta popitha omuntu a tya ngaaka, oye ota kwatathana niilonga iiwinayi mbyoka te yi longo. 12 Ngame ondi na oshindji oku mu lombwela, ihe inandi hala oku shi ninga nokunyola, ndele ondi na edhiladhilo oku mu talela po ngame mwene, opo tu popyeni kokana nokana, enyanyu lyetu opo li kale lya gwanenena pombanda. 13 Aakwanegongalo ooyakweni aaholike otaye mu kundile po.
18-24 NOVOMBA
OMALIKO OKUZA MOOHAPU DHAKALUNGA | EHOLOLO 1–3
“Iilonga yoye ondi yi shi”
(Ehololo 1:20) Efatululo lyoshiholekwa shoonyothi heyali ndhoka u dhi wete moshikaha shandje nolyiihukikwanyeka iheyali yoshingoli olyo ndika: oonyothi heyali odho aayengeli yomagongalo ngoka gaheyali, niihukikwanyeka iheyali oyo omagongalo gaheyali.”
Owu na ombepo ya tya ngiini?
8 Opo tu henuke ombepo ya tya ngaaka, natu dhimbulukwe kutya Jesus ota popiwa mOmbiimbeli pathaneko e na “oonyothi heyali moshikaha she shokolulyo.” “Oonyothi” otadhi thaneke aakuluntugongalo aagwayekwa, ihe shoka tashi popiwa kombinga yadho otashi vulu wo okuukithwa kaakuluntugongalo ayehe momagongalo. Jesus ota vulu okuukitha “oonyothi” moshikaha she dhi uke kombinga kehe hoka a hala. (Eh. 1:16, 20) Kungawo, e li Omutse gwegongalo lyopaKriste, olutu lwaakuluntugongalo olu li metonatelo lye. Ngele opu na omukuluntugongalo ngoka a pumbwa shili okukatukilwa onkatu, Jesus Ngoka e na ‘omeho ga fa oohandje dhomulilo’ ota ka sa oshimpwiyu shi ningwe pethimbo lyo opala nosho wo momukalo ngoka a hokwa. (Eh. 1:14) Ihe manga twa tegelela Jesus a katuke onkatu, otu na okukala netaloko ewanawa shi na ko nasha naamboka ya langekwa po kombepo ondjapuki. Paulus okwa nyola a ti: “Vulikeni kaawiliki yeni, [ne] mu landule omalombwelo gawo. Oyo ohaa tonatele oomwenyo dheni yaa na evululuko, oshoka otaa ke dhi pulwa kuKalunga. Ngele otamu vulika, nena otaa longo [iilonga] yawo nenyanyu, ihe ngele hasho, nena otaa longo neyeme, naashika itashi mú kwatha sha.” — Heb. 13:17.
(Ehololo 2:1, 2) “Nyolela omuyengeli gwegongalo lyomuEfeso, u tye: “ ‘Ngoka e na oonyothi heyali moshikaha she shokolulyo note ende pokati kiihukikwanyeka iheyali yoshingoli, ota ti: 2 “ ‘Iilonga yoye ondi yi shi; onda tseya, nkene wa longo nuudhiginini nowa kala nokwiidhidhimika. Onda tseya kutya iho mwenene aakolokoshi naamboka haa iti aayapostoli; owe ya konakona nowe ya dhimbulula kutya oyo aafundja.
Jehova ohe tu gamene tu ka mone ehupitho
11 Omukwaniilwa Jesus Kristus okwa li a konakona omagongalo gaheyali ngoka ga li muAsia eshona. Ehololo ontopolwa 2 no 3, otali popi emoniko ndyoka tali ulike nkene Kristus a li ta konenene oonkalo dhokondandalunde momagongalo ngoka. Okwa li a pandula omagongalo gamwe e ta pe gamwe omayele, nokwa li a tumbula aantu yamwe yomugo kondandalunde. Emoniko ndika otali ti shike? Omagongalo gaheyali otaga thaneke Aakriste aagwayekwa mboka ya li ko konima yo 1914. Nonando omayele ngoka Jesus a pe omagongalo gaheyali oga li ga pamba unene aagwayekwa, otaga longo wo nokomagongalo gaapiya yaKalunga muuyuni auhe kunena. Onkee ano, otatu vulu okuthika pehulithodhiladhilo kutya Jehova ota wilike oshigwana she pethimbo lyetu okupitila mOmwana. Ongiini tatu vulu okumona uuwanawa mewiliko ndyoka?
w01 2/1 ep. 14-15, okat. 20
Katukila pamwe nehangano lyaJehova
20 Okukatukila pamwe nehangano lyaJehova ndyoka tali ende tali humu komeho, otashi pula tu zimine iilonga mbyoka Kalunga a pa Jesus Kristus e li “omutse gwegongalo.” (Aaefeso 5:22, 23, NW) Shoka wo oshindhindhilikwedhi osho shika tatu lombwelwa muJesaja 55:4: “Tala, [Ngame Jehova] onda lenge David omuwiliki nondjayi yiigwana, nomuye onde yi ulukile oonkondo dhandje.” Osha yela kutya Jesus oku shi nkene e na okuwilika. Oku shi wo oonzi dhe nosho wo iilonga yadho. Dhoshili, sho a konakona omagongalo gaheyali muAsia eshona, okwa popya iikando itano ta ti: “Iilonga yoye ondi yi shi.” (Ehololo 2:2, 19; 3:1, 8, 15) Jesus oku shi wo oompumbwe dhetu, ngaashi naanaa He Jehova e dhi shi. Manga inaa gandja Oshiholelwa shegalikano, Jesus okwa ti: “Ho yeni oku shi shi nale shoka mwa pumbwa, manga inaamu mu indila.” — Mateus 6:8-13.
Konga omaliko mOmbiimbeli
(Ehololo 1:7) Tala, oye te ya te ende miikogo yokegulu! Kehe gumwe oku na oku mu mona, naambaka ye mu ulula noomboha. Aantu ayehe yokombanda yevi otaa ka lila, sho taye mu mono. Eeno shili! Amen.
Uukwaniilwa waKalunga tawu hanagula po aatondi yawo
10 Oonzi tadhi yoololwa miikombo. Opo nduno aatondi yUukwaniilwa waKalunga otaya ka mona oshiningwanima shoka tashi ke ya ehameka nayi. Jesus okwa ti: “Aantu otaa ka mona ihe Omuna gwOmuntu te ya te ende kiikogo yokegulu e na oonkondo odhindji neadhimo.” (Mark. 13:26) Oshilongankondo shika otashi ku ulika kutya Jesus okwe ya a pangule aantu. Mehunganeko omo tuu moka, Jesus okwa gandja uuyelele wa gwedhwa po kombinga yepangulo ndyoka. Uuyelele mbuka otatu wu adha meyele lyoonzi niikombo. (Lesha Mateus 25:31-33, 46.) Mboka ya gama kombinga yUukwaniilwa waKalunga otaya ka pangulwa ‘ongoonzi’ notaya ka ‘thikama yu ukilila, oshoka ehupitho lyawo olya thika popepi.’ (Luk. 21:28) Ashike aatondi yUukwaniilwa otaya ka pangulwa ‘ongiikombo’ notaya ka “lilagana,” oshoka otaya ka mona kutya ‘egeyelo lyaaluhe’ nenge ehanagulo lyaaluhe oli ya li popepi. — Mat. 24:30; Eh. 1:7.
(Ehololo 2:7) “ ‘Ngoka e na omakutsi, nu uve ko shoka Ombepo te shi lombwele omagongalo! “ ‘Aasindani otandi ke ya pitika okulya iiyimati yokomuti gwomwenyo gwa kala mOshikunino shaKalunga.’ ”
Omanenedhiladhilo okuza membo lyEhololo 1:1–12:17
2:7 (OB-1954) — ‘Oparadisa yaKalunga’ oshike? Molwaashoka oohapu ndhika otadhi lombwelwa Aakriste aagwayekwa, oparadisa ndjoka tayi popiwa mpaka otayi ulike kehala lyomegulu moka Kalunga ha kala, lya fa oparadisa. Aakriste aagwayekwa aadhiginini otaya ka pewa ondjambi ‘yokulya iiyimati yokomuti gwomwenyo.’ Otaya ka pewa omwenyo ihaagu si. — 1 Kor. 15:53.
Elesho lyOmbiimbeli
(Ehololo 1:1-11) Embo ndika olyo ehokololo lyiiningwanima mbyoka Jesus Kristus e yi holola. Kalunga okwe mu pe ehololo ndika e li hololele aapiya yaKalunga shoka shi na okuningwa mbala. Kristus okwa tseyithile omupiya gwe Johannes iinima mbika, sho a tumu omuyengeli gwe kuye, 2 Johannes nokwa hokolola ashihe shoka e shi mono. Ndika olyo ehokololo tali hokolola elaka lya za kuKalunga noshili ndjoka Jesus Kristus e yi holola. 3 Omunelago oongoka ta lesha embo ndika; eeno, aanelago oomboka taa pulakene oohapu dhomahunganeko gomembo ndika e taa vulika kushoka sha nyolelwa mo. Oshoka ethimbo olya thikana, uuna iinima mbika ayihe yi na oku ka gwanithwa. 4 Johannes ota kundu omagongalo gaheyali gomuAsia: Esilohenda nombili ya za kuKalunga, ngoka a li ko noku li ko note ya, nokoombepo heyali ndhoka dhi li poshipangelapundi she, 5 nokuJesus Kristus, omuhokololi omudhiginini, omutango mokuyumudhwa kuusi nomupangeli gwaakwaniilwa yokombanda yevi. Jesus oku tu hole nokwe tu mangulula mo moondjo dhetu omolweso lye, 6 e te tu ningi ombala yaayambi yokulongela Kalunga He. Jesus Kristus na simanekwe ye na pangele aluhe sigo aluhe! Amen. 7 Tala, oye te ya te ende miikogo yokegulu! Kehe gumwe oku na oku mu mona, naambaka ye mu ulula noomboha. Aantu ayehe yokombanda yevi otaa ka lila, sho taye mu mono. Eeno shili! Amen. 8 “Ongame Alfa naOmega,” Omuwa Kalunga, Omunankondoadhihe osho ta ti, oongoka e li ko nokwa li ko note ya. 9 Ongame Johannes omumwanyoko, nomokulandula Jesus, onda faathana nane mokuhumbata neidhidhimiko omahepeko ngoka tage ya kumboka yomOshilongo she. Onda tulwa kontuntu yaPatmos molwaasho ndu uvitha oohapu dhaKalunga nonda hokolola Jesus. 10 Mesiku lyOmuwa onda kwatwa kOmbepo nondu uvu ewi enene lya fa lyenkuma tali popi konima yandje 11 tali ti: “Ayihe mbyoka to yi mono, yi nyolela membo e to li tumine komagongalo ngaka gaheyali: Efeso, Smirna, Pergamo, Tiatira, Sarde, Filadelfia naLaodikea.”
25 NOVOMBA–1 DESEMBA
OMALIKO OKUZA MOOHAPU DHAKALUNGA | EHOLOLO 4–6
“Aakayili yuukambe yane”
(Ehololo 6:2) Ngame onda tala nonda mono ko okakambe okatokele. Omukayili gwako okwa li e na uutati nokwa pewa oshishani. Oye okwa yi, a ka sindane, oshoka oye omusindani.
Aakayili yuukambe yane oolye?
Omukayili gwokakambe okatokele olye? Okwa popiwa membo olyo tuu ndyoka lyEhololo, ndyoka lya ka popya omukayili nguka ta zi megulu e li “Ohapu yaKalunga.” (Ehololo 19:11-13) Jesus Kristus ohi ithanwa Ohapu, oshoka oye omupopikalelipo gwaKalunga. (Johannes 1:1, 14) Oti ithanwa wo “Omukwaniilwa gwaakwaniilwa nOmuwa gwaawa” nokwa popiwa e li “Omwiinekelwa nOmunashili.” (Ehololo 19:16) Osha yela kutya oku na oonkondopangelo dhokukala omukwaniilwa omusindani noiha longitha oonkondo dhe momukalo kaagu li pauyuuki nenge nonyanya. Nonando ongawo, opwa holoka omapulo.
wp17.3 ep. 4, okat. 5
Aakayili yuukambe yane oolye?
Aakayili yuukambe oya tameke oku wu londa uunake? Ndhindhilika kutya omukayili gwokakambe kotango okwe ka kayile, sho a pewa oshishani. (Ehololo 6:2) Jesus okwa langekwa po uunake e li Omukwaniilwa megulu? Ina langekwa po konima yeso lye, sho a shuna megulu. Ombiimbeli oyu ulika kutya sho a shuna megulu, okwa kala a tegelela uule wethimbo. (Aahebeli 10:12, 13) Jesus okwa pe aalanduli ye endhindhiliko, ya dhimbulule mo kutya ethimbo ndyoka a kala a tegelela, olya hula nonokutya okwa tameka okupangela megulu. Okwa ti kutya petameko lyokupangela kwe, oonkalo dhuuyuni otadhi ka nayipala. Otaku ka kala iita, ondjala nomalega. (Mateus 24:3, 7; Lukas 21:10, 11) Nziya konima yIita yoTango yUuyuni mbyoka ya holoka mo 1914, osha li sha yela kutya aantu oya thika methimbo lyomaudhigu kombanda yevi, ndyoka Ombiimbeli ye li ithana ‘omasiku gahugunina.’ — 2 Timoteus 3:1-5.
(Ehololo 6:4-6) Okakambe okakwawo okatiligane oka holoka. Omukayili gwako okwa pewa oonkondo dhokuhomonena evi alihe iita, aantu oya tameke okudhipagathana. Oye nokwa pewa egonga enene. 5 Nena Onzigona okwa matula oshihako oshititatu; nondu uvu oshinamwenyo oshititatu sha ti: “Ila!” Onda tala nonda mono ko okakambe okaluudhe. Omukayili gwako okwa li e na oshiviha moshikaha she. 6 Ngame ondu uvu ewi lya zi mokati kiinamwenyo mbyoka ine lya ti: “Okatungwa kiilyawala oke thike pondjambi yomesiku nosho wo uutungwa utatu womahangu. Ihe omagadhi nomaviinu ino ga etela oshiponga.”
Aakayili yuukambe yane oolye?
Omukayili gwokakambe haka ota thaneke iita. Ndhindhilika kutya ota kutha po ombili kevi alihe, ihe hamiigwana yimwepo. Iita yoTango yUuyuni oya holoka mo 1914, shoka shi li oshikando shotango mondjokonona. Oya landulwa kIita Iitiyali yUuyuni, mbyoka ya li ye eta ehanagulo enene. Okwa tengenekwa kutya okuza mo 1914, aantu ye vulithe poomiliyona ethele oya sa, omolwiita nomaipumomumwe gaantu ya homata. Aantu yalwe oyendji oya li ye ehamekwa noonkondo.
wp17.3 ep. 5, okat. 4-5
Aakayili yuukambe yane oolye?
Emoniko olya tsikile ko ishewe ngeyi: “Nena Onzigona okwa matula oshihako oshititatu; nondu uvu oshinamwenyo oshititatu sha ti: ‘Ila!’ Onda tala nonda mono ko okakambe okaluudhe. Omukayili gwako okwa li e na oshiviha moshikaha she. Ngame ondu uvu ewi lya zi mokati kiinamwenyo mbyoka ine lya ti: ‘Okatungwa kiilyawala oke thike pondjambi yomesiku nosho wo uutungwa utatu womahangu. Ihe omagadhi nomaviinu ino ga etela oshiponga.’” — Ehololo 6:5, 6.
Omukayili gwokakambe haka ota thaneke ondjala. Memoniko ndika otamu popiwa iikulya tayi vihwa, ihe oyi na ondilo noonkondo, oshoka omimvo 2 000 nasha dha ka pita, okatungwa kiilyawala (olita 1.08) oka li ke thike pondenari, ondjambi yesiku limwe. (Mateus 20:2) Oshimaliwa osho tuu shono, osha li tashi vulu okulanda uutungwa utatu womahangu (oolita 3.24), ngoka ga talika ko ge vulike kiilyawala. Mbela iikulya mbyoka otayi ka gwanena ngaa egumbo moka mu na aantu oyendji? Aantu oya londodhwa ya kale haya kwata nawa iikulya yesiku kehe, mbyoka tayi thanekwa kiikulya mbyoka ya li hayi liwa unene pethimbo lyonale nokomagadhi nomaviinu ngoka haga longithwa momuthigululwakalo.
(Ehololo 6:8) Ngame onda mono ko okakambe okakwaya. Omukayili gwako oye ngoka e na edhina Eso, Oshaasi noshe mu landula. Mbika iyali oya pewa oonkondo dhokupangela oshitine shevi nokudhipagitha aantu kiita, kondjala, komalega nokiilikama.
wp17.3 ep. 5-8, okat. 8-10
Aakayili yuukambe yane oolye?
Omukayili gwokakambe okatine ota thaneke eso ndyoka hali etithwa komalega nokiinima yilwe. Nziya konima yomumvo 1914, eshikisha lyaSpania olya dhipaga aantu omamiliyona omilongo. Otashi vulika aantu oomiliyona 500 ya li ya kwatwa kulyo. Konyala omuntu 1 maantu 3, okwa li e li na.
Eshikisha lyaSpania olya li owala etameko. Aatseyinawa oya tengeneka kutya aantu omamiliyona omathele oya sa koshikoloha (smallpox), momukokomoko gwomumvo 1901-2000. Sigo onena, onkalamwenyo yaantu oyendji oya fupipikwa ko-AIDS, ko-TB nokomalaria, nonando opwa ningwa omakonakono gopaunamiti ga kwata miiti.
Iita, ondjala nomalega ayihe ohayi eta eso. Oshaasi otashi gongele aantu pwaa na oluthuwo nokashi na etegameno.
Konga omaliko mOmbiimbeli
(Ehololo 4:4) nosha kundukidhwa kiipangelapundi iikwawo omilongo mbali niine, hoka kwa li kwa kuutumba aakuluntu omilongo mbali nayane ya zala oonguwo oontokele niishani yoshingoli komitse.
(Ehololo 4:6) Okwa li wo ku na sha shoka tashi monika sha fa efuta tali tayima ngekende lyokristali. Koombinga adhihe dhoshipangelapundi okwa li ku na iinamwenyo ine yi na omeho ogendji komeho nokonima.
re-E ep. 76-77, okat. 8
Oshipangelapundi shaJehova oshikumithi tashi adhima
8 Johannes okwa li e shi shi kutya opwa li hapu langekwa aayambi ya yakule metsalihangano lyonale. Onkee otashi vulika a li a kumwa sho a mono oshinima shimwe shono e shi hokolola a ti: “[Oshipangelapundi] nosha kundukidhwa kiipangelapundi iikwawo omilongo mbali niine, hoka kwa li kwa kuutumba aakuluntu omilongo mbali nayane ya zala oonguwo oontokele niishani yoshingoli komitse.” (Ehololo 4:4) Pehala lyaayambi, Johannes okwa mono aakuluntu 24 ya kuutumba kiipangelapundi noya zalekwa iishani ya fa aakwaniilwa. Aakuluntu mboka oolye? Aagwayekwa yomegongalo lyopaKriste, ya yumudhwa noya pewa ondondo yomegulu ndjoka yu uvanekelwa kuJehova. Otu shi shi ngiini?
re-E ep. 80, okat. 19
Oshipangelapundi shaJehova oshikumithi tashi adhima
19 Iinamwenyo mbika otayi thaneke shike? Emoniko lilwe ndyoka lya hokololwa komuhunganeki Hesekiel otali tu kwathele tu mone eyamukulo. Hesekiel okwa mono Jehova a kuutumba koshipangelapundi shi li kondunda nenge ketemba tali adhima niinamwenyo yi li ontega nalyo ya faathana naambyoka ya popiwa kuJohannes. (Hesekiel 1:5-11, 22-28) Konima, Hesekiel natango okwa ka mona etemba ndyoka pulyo pu na iinamwenyo. Ihe pompito ndjino iinamwenyo mbika okwe yi popi kutya aakerubi. (Hesekiel 10:9-15) Iinamwenyo ine mbyoka Johannes a mono oyi na okukala tayi thaneke aakerubi oyendji yaKalunga, ano iishitwa mbyoka yi li pondondo yopombanda mehangano Lye megulu. Johannes ka li a kumwa sho a mono aakerubi ye li popepyeelela naJehova, oshoka metsalihangano lyonale omwa li mu na aakerubi ya ningwa moshingoli ye li koshisiikilo shoshikethahangano, shoka sha li tashi thaneke oshipangelapundi shaJehova. Ewi lyaJehova olya li hali uvika tali zi pokati kaakerubi mboka, sho ta gandja oompango koshigwana shaIsraeli. — Eksodus 25:22; Episalomi 80:1.
(Ehololo 5:5) Nena gumwe gwomaakuluntu okwa lombwele ndje ta ti: “Ino lila! Tala, Onime yomezimo lyaJuda, omuvalwa gwomuDavid, okwa sindana nokwa gwana okupatulula iipatitho mbika iheyali nokupandja embo ndika.”
“Tala, Onime yomezimo lyaJuda”
5 Olundji onime ohayi longithwa okuulika uulaadhi. Mbela owa tsakanena ngaa nale oshipala noshipala nonime ondumentu? Ngele osho, otashi vulika ya li ye edhililwa molugumbo. Ihe nonando ongaaka, otashi vulika wa li to zi omahwilili. Okutala oshipala shoshilikama shoka oshinenenene noshinankondo oto mono kutya onime ihayi tila nando osha. Ombiimbeli otayi popi kutya ‘onime oyo omukwaniilwa mokati kiinamwenyo ndjoka ihaayi henukile sha.’ (Omayeletumbulo 30:30) Kristus naye oku na uulaadhi wa tya ngaaka.
6 Natu kundathaneni nkene Jesus u ulike uulaadhi wa fa wonime momikalo ndatu: mokupopila oshili, mokuhumitha komeho uuyuuki nomokukondjitha omapataneko. Otatu ka mona wo kutya atuheni otatu vulu okuholela uulaadhi we kutya nduno otwa valwa aalaadhi nenge hasho.
Elesho lyOmbiimbeli
(Ehololo 4:1-11) Ngame onda mono emoniko ekwawo, omweelo gwe eguluka megulu. Ngame nondu uvu ewi ndyoka lya popithile ndje nale, lya fa ewi lyenkuma lya ti: “Ila huka pombanda, ongame notandi ku ulukile shoka tashi ka landula konima yaashika.” 2 Mbalambala onda kwatwa kOmbepo. Megulu onda mono mo oshipangelapundi nagumwe a kuutumba ko. 3 Oshipala she sha adhima ongomamanya ge na ondilo gajaspes nakarneli. Oshipangelapundi osha li sha dhingolokwa kuutamvula wolwaala lwa fa emanya lyasmaragdi, 4 nosha kundukidhwa kiipangelapundi iikwawo omilongo mbali niine, hoka kwa li kwa kuutumba aakuluntu omilongo mbali nayane ya zala oonguwo oontokele niishani yoshingoli komitse. 5 Moshipangelapundi omwa li tamu zi oombadhi, omawi nomundundumo. Komeho goshipangelapundi okwa li ku na oonyeka heyali dha tema, odho oombepo heyali dhaKalunga. 6 Okwa li wo ku na sha shoka tashi monika sha fa efuta tali tayima ngekende lyokristali. Koombinga adhihe dhoshipangelapundi okwa li ku na iinamwenyo ine yi na omeho ogendji komeho nokonima. 7 Oshinamwenyo shotango osha li sha fa onime, oshitiyali osha fa ontana, oshititatu osha li shi na oshipala sha fa shomuntu noshitine osha li sha fa ontsa tayi tuka. 8 Kehe shimwe shomiinamwenyo mbika ine osha li shi na omawawa gahamano ge na omeho ogendji meni nokombanda. Oyo ohayi imbi uusiku nomutenya, yaa na ezimbuko tayi ti: “Omuyapuki, omuyapuki, omuyapuki, Omuwa Kalunga Omunankondoadhihe, ngoka a li ko noku li ko note ya.” 9 Shaa tuu iinamwenyo mbyoka ine tayi eta ehambelelo, esimano nepandulo kungoka a kuutumba koshipangelapundi e na omwenyo sigo aluhe, 10 nena aakuluntu omilongo mbali nayane otaa tsile wo oongolo ngoka ta kala e na omwenyo sigo aluhe. Oyo ohaa umbile iishani yawo poshipangelapundi e taa ti: 11 “Omuwa, Kalunga ketu! Owa gwana okusimanekwa omolweadhimo, esimano noonkondo, oshoka ongoye wa shiti iinima ayihe, nokehalo lyoye oyi li po noyi na omwenyo!”