OSHITSA 2

Popya paunshitwe

2 Aakorinto 2:17

SHOKA WU NA OKUNINGA: Popya paunshitwe notashi zi komutima. Ulika kutya owu na ko nasha naapulakeni yoye nonokutya shoka to popi owu shi uvitile ngiini.

NKENE WU NA OKU SHI NINGA:

Galikana nokwiilongekidha nawa. Galikana kuJehova e ku kwathele wu gandje eitulomo ketumwalaka ndyoka to ka gandja nowu sinde uumbanda woye. Kaleka momadhiladhilo iitsa ya simana mbyoka wa pumbwa oku ka yelithila aapulakeni. Popya niitya yoye mwene, pehala lyokulesha oshitya noshitya moshileshomwa.

Ngele oto ka lesha mOmbiimbeli nenge moshileshomwa shilwe, iyenditha po nawa, opo wu ka leshe iitya tayi kunguluka nawa. Ngele mpoka to lesha opu na oohapu dhaantu yalwe dha tothwa mo, dhi lesha nomaiyuvo, ihe shi ninga momukalo moka aantu haya popi.
Popya tashi zi komutima. Kaleka aapulakeni yoye momadhiladhilo. Dhiladhila kutya omolwashike ya pumbwa uuyelele mboka. Kungawo, omukalo moka to ka thikama, to ka ninga omaudhi nosho wo omainyengo gokoshipala, otagu ka holola omaiyuvo goye notagu ka ulika kutya owu na ko nasha nayo.

Okupopya paunshitwe itashi ti kutya otu na okupopya naantu nondhino. Shimwe ishewe, opo tu ulike kutya etumwalaka lyetu olya simana, otu na okupopya iinima ya yela nosho wo momuhingo moka elaka hali popiwa.
Popya to tala kaapulakeni yoye. Inashi pumbiwa tu kale nomeho omambanda. Ngele kashi shi uupyakadhi okupopya to tala kaapulakeni meputuko lyeni, shi ninga. Uuna to gandja oshipopiwa, tala komupulakeni gumwe poshikando, pehala lyokutala meendelelo ongundu ayihe poshikando ngoye to galula ko omeho.