OSHITSA 7

Popya iinima yi li paushili noyi shi okwiinekelwa

Lukas 1:3

SHOKA WU NA OKUNINGA: Gandja uumbangi wu shi okwiinekelwa, opo wu kwathele aapulakeni yoye ya thike pehulithodhiladhilo li li mondjila.

Kutha uuyelele woye moonzo dhi shi okwiinekelwa. Oohapu dhoye nadhi kale tadhi tsu kumwe naashoka sha popiwa mOmbiimbeli. Mpoka tashi vulika, lesha mOmbiimbeli mo mwene. Ngele oto popi oshinima shopaunongononi, tala ngele uuyelele mboka owu li pethimbo. Ngele oto longitha uuyelele mboka wa uva moonkundana nenge wa hokololwa nenge omaumbangi galwe, shilipaleka tango kutya owoshili.
Longitha uuyelele nawa. Yelitha Omanyolo metsokumwe naashoka sha kundathanwa mOmbiimbeli. Shoka to yelitha nashi kale wo metsokumwe niileshomwa mbyoka ya za ‘komupiya omudhiginini nomunandunge.’ (Mat. 24:45, NW) Ongiini ngele oto kutha uuyelele miileshomwa mbyoka kaayi shi yehangano lyetu? Ino lundulula uuyelele waantu nosho wo omadhiladhilo gomunyoli.

Ino gwedhela iinima nenge wu taandelithe omitotolombo. Oshinima shoka sha ningwa “kaantu yamwe,” ino tya osha ningwa “kaantu oyendji.” Shoka hashi ningwa “omalupita,” ino tya ohashi ningwa “aluhe” nongele okwa tiwa “ngiika ngaa,” ino tya “otashi vulika.”
Tompathana naapulakeni. Konima ngele wa lesha enyolo nenge wa totha sha okuza moshileshomwa shontumba, pula epulo tali opalele nenge wu popye sha shoka tashi kwathele aapulakeni ya kale ye na ethano lyoshikundathanwa shoka momadhiladhilo.