Ou li tuu omudiinini moinima aishe?

“Ou ha kala omudiinini moinini, ye omudiinini nomuei ihapu.” — Lukas 16:10.

1. Onghedi imwe oilipi omo Jehova e li omudiinini?

MBELA owa didilika ngoo nale osho hashi ningwa po shi na sha nomididimbe domiti momukokomoko wefiku? Omididimbe ohadi ende tadi lunduluka mounene nosho yo oko da taalela. Eenghendabala nomaudaneko ovanhu ohaa lunduluka luhapu, ngaashi ashike omudidimbe. Mepingafano naasho, Jehova Kalunga iha lunduluka nande mokweendela ko kwefimbo. Omuhongwa Jakob okwe mu popya e li ‘Xe yomauyelele,’ a ti: “Kuou pu he nomalunduluko [omudidimbe, NW].” (Jakob 1:17) Jehova iha lunduluka noku shii okulineekelwa, nokuli nomoinima oyo inini elela. Oye “Kalunga koudiinini.” — Deuteronomion 32:4.

2. (a) Omolwashike tu na okulikonakona tu tale ngeenge otu li ngoo ovadiinini? (b) Omapulo elipi e na sha noudiinini hatu ka konakoneni?

² Kalunga oha tale ko ngahelipi oulineekelwa wovalongeli vaye? Omonghedi omo David a li he u tale ko, oo a popya shi na sha navo a ti: “Omesho ange otaa tale ovadiinini vomoshilongo vo va kale puame; omweendi wondjila ya yuka, oye na kalele nge.” (Epsalme 101:6) Heeno, Jehova oha hokwa oudiinini wovapiya vaye. Onghee hano onetomheno liwa eshi omuyapostoli Paulus a shanga a ti: “Omalenga taa pulwa oudiinini.” (1 Ovakorinto 4:2) Okukala omudiinini okwa kwatela mo shike? Omoinima ilipi monghalamwenyo tu na okukala ovadiinini? Omanangeko noupuna elipi taa di ‘mokweenda mondjila ya yuka’?

Osho okukala omudiinini taku ti

3. Oshike hashi ulike kutya otu li ovadiinini?

³ Ovaheberi 3:5 otava ti: “Moses okwa li omudiinini.” Oshike sha ninga omuprofeti Moses a kale omudiinini? Eshi a li a tunga etwali, okwa “ninga ngaashi Omwene [e] mu lombwela. Osho ye a ninga.” (Exodus 40:16) Tu li ovalongeli vaJehova, ohatu ulike oudiinini mokudulika kuye eshi hatu mu longele. Osho osha kwatela mo filufilu okukanyatela kwetu oudiinini kuJehova nonande otu li moudjuu ile hatu shakeneke omayeleko a kwata moiti. Ndele okupondola omayeleko manene hasho ashike tashi ulike kutya otu li ovadiinini. Jesus okwa ti: “Ou ha kala omudiinini moinini, ye omudiinini nomuei ihapu, ndele ou ke fi omuyuki moinima inini, ye ke fi omuyuki nomuei ihapu yo.” (Lukas 16:10) Otu na okukala ovadiinini nokuli nomoinima oyo tai monika inini.

4, 5. Oudiinini wetu “moinima inini” otau holola shike?

⁴ Okudulika “moinima inini” efiku keshe okwa fimana omolwomatomheno avali. Lotete, otaku holola osho tu udite kombinga younamapangelo waJehova. Diladila keyeleko loudiinini olo la li la yelekwa nalo ovalihomboli votete, Adam naEva. Kasha li oshiteelelwa shidjuu kuvo. Ova li tava dulu okulya omaludi aeshe oikulya moshikunino shaEden, kakele ashike koiimati yomuti umwe — ‘omuti wokushiiva ouwa nowii.’ (Genesis 2:16, 17) Oudiinini wavo mokudulika koshipango osho sha li shi he fi shidjuu, okwa li tau ka ulika kutya ovalihomboli votete ova li tava yambidida epangelo laJehova. Okulandula omalombwelo aJehova monghalamwenyo yetu yakeshe efiku otaku ulike kutya ohatu yambidida ounamapangelo waye.

⁵ Oshitivali, elihumbato letu “moinima inini” otali nwefa mo onghedi omo hatu ke linyenga ‘mwaai ihapu,’ sha hala okutya, nghee hatu ke linyenga komayeleko manene monghalamwenyo. Shi na sha naasho, konakona osho sha li sha ningilwa Daniel nookaume kaye vatatu Ovaheberi ovadiinini —  Hananja, Misael naAsarja. Ova li va twalwa moukwatwa muBabilon mo 617 K.O.P. Ofimbo va li ovanyasha, tashi dulika va li ve na omido omulongo nasha, ovanyasha ovo vane ova li va twalwa mombala yohamba Nebukadnesar. Ova li va pitikilwa “va pewe efiku keshe eendya domeendya dohamba nomaviinyu aa haa nuwa kohamba. Osho ngaha ve nokutekulwa omido nhatu, opo va shiive okulongela ohamba omido odo ngenge da pita po.” — Daniel 1:3-5.

6. Daniel nookaume kaye vatatu Ovaheberi ova li va shakeneka eyeleko lilipi mombala yaBabilon?

⁶ Ndele eendja dohamba yaBabilon oda li eshongo kovanyasha Ovaheberi vane. Otashi dulika meendja dohamba mwa li mwa kwatelwa eendja odo da dilikwa kOmhango yaMoses. (Deuteronomion 14:3-20) Oinamwenyo oyo ya li hai dipawa otashi dulika ya li ihai kufwa ohonde, nokulya ombelela ya tya ngaho osha li tashi ka nyona Omhango yaKalunga. (Deuteronomion 12:23-25) Eendja otashi dulika yo da li hadi kala da yambelwa oikalunga, molwaashi osha li onghedindjikilile mokati kovailikani Ovababilon fimbo inava lya ouvalelo wekwatakanifo.

7. Okudulika kwaDaniel nosho yo ookaume kaye vatatu okwa ulika shike?

⁷ Ovakali mombala yohamba yaBabilon kava li va tala ko okulidilika oikulya ku li oshinima sha fimanenena. Ndele Daniel nookaume kaye ova li va tokola toko momitima davo ve he linyateke mokulya oikulya oyo ya dilikwa mOmhango yaKalunga oyo ya li ya pewa Ovaisrael. Osho osha li sha kuma oudiinini wavo kuKalunga. Onghee ova li va pula va pewe oikwambidi nomeva, naasho osho va li va ningilwa. (Daniel 1:9-14) Osho ovalumenhu ovo ovanyasha vane va ninga otashi dulika ovanhu vahapu ve shi tale ko inashi fimana. Ndelenee okudulika kwavo kuKalunga okwa ulika kutya ova li va ama peni shi na sha nomhata younamapangelo waye.

8. (a) Eyeleko loudiinini la kwata moiti lilipi Ovaheberi vatatu va li va shakeneka? (b) Oidjemo yeyeleko olo oya li ngahelipi, notai ulike shike?

⁸ Okukala ovadiinini mwaasho tashi monika sha fa inashi fimana, okwa li kwa longekida ookaume kaDaniel vatatu opo va ka pondole meyeleko linene. Pandja ketukulwa eti-3 lembo lOmbibeli laDaniel, ndele to lileshele eshi Ovaheberi ovo vatatu va li va tokolelwa efyo omolwokwaanya okwiilikana oshitelekwafano shoshingoli osho sha li sha dikwa po kohamba Nebukadnesar. Eshi va li va twalwa koshipala shohamba, ova li va popya nelineekelo etokolotoko lavo, va ti: “Ngaashi Kalunga ketu ou hatu mu longele, ta dulu oku tu xupifa. Oye te ke tu xupifa mo mediko lomundilo nomomake oye, ohamba, ndele ngenge hasho, kala u shi shii, ohamba, fye itatu longele ookalunga koye, noshitelekwafano oshingoldo eshi wa dika, fye itatu shi ilikana.” (Daniel 3:17, 18) Mbela Jehova okwa li e va xupifa? Ovakwaita ovo va li va ekela ovalumenhu ovo ovanyasha mediko lomundilo ova fya, ndele Ovaheberi ovo vatatu ovadiinini ova dja mo ve na omwenyo —  inava vavwa nokuli nokoupyu wediko. Oudiinini wavo oo va kala nao, owe va kwafela va kale yo ovadiinini meyeleko olo la li la kwata moiti. Mbela osho itashi ulike efimano lokukala ovadiinini moinima inini?

Natu kale ovadiinini shi na sha “nemona li he li pauyuki”

9. Etukulwa omo mwa dja eendjovo daJesus odo da shangwa muLukas 16:10, otali popi kombinga yashike?

⁹ Fimbo Jesus ina tonga efinamhango olo kutya oo e li omudiinini moinima oyo tai monika inini oku li yo omudiinini moinima oyo ya fimana, okwa li a ladipika ovapwilikini vaye a ti: “Likongeleni nemona [li he li pauyuki, NW] ookaume, olo ngenge tali xulu po, opo ve mu tambule momaumbo aalushe.” Okwa landulifa ko eendjovo di na sha noudiinini moinima inini. Opo nee okwa ti: “Ndele ngenge ihamu kala ovadiinini nemona [li he li pauyuki, NW], olyelye te mu pe ei yoshili? . . . Kape nomukaleli ta dulu okulongela oovene vavali, osheshi oha kala nokutonda umwe nokuhola omukwao, ile ta hokwa ou ndee ta dini mukwao. Kamu dulu okukalela Kalunga nemona.” — Lukas 16:9-13.

10. Ongahelipi hatu dulu okuulika oudiinini mokulongifa kwetu ‘emona li he li pauyuki’?

¹⁰ Eshi Jesus a popya eendjovo odo di li muLukas 16:10, okwa li ta popi shi na sha nokulongifa ‘emona li he li pauyuki,’ sha hala okutya, oiniwe yetu yopamaliko. Otali popiwa li he li pauyuki molwaashi oupuna wopamaliko —  unene tuu oimaliwa  — ou li mewiliko lovanhu inava wanenena. Kakele kaasho, okukala wa hala okulimonena oupuna otaku dulu okutwala moilonga i he li pauyuki. Ohatu ulike oudiinini mokulongifa ounongo monghedi oyo hatu longifa oiniwe yetu yopamaliko. Ponhele yoku i longifa omolwomalalakano okulihola mwene, otwa hala oku i longifa mokuxumifa komesho oinima yOuhamba nokukwafela ovo ve na omhumbwe. Mokukala ovadiinini monghedi oyo, ohatu pange oukaume naJehova Kalunga nosho yo naJesus Kristus, ovo ve na ‘omaumbo aalushe.’ Otave ke tu tambula meenhele omo, tave ke tu pa omwenyo waalushe kutya nee omeulu ile omOparadisa kombada yedu.

11. Omolwashike tu na okuyelifila ovaneumbo moukalele kutya ohatu tambula omayambidido e na sha noilonga oyo tai longwa kEendombwedi daJehova mounyuni aushe?

¹¹ Diladila yo kwaasho hatu pula ovanhu va ninge ngeenge twe va pa Eembibeli ile oishangomwa ye likolelela kOmbibeli, eshi hatu udifa etumwalaka lOuhamba noku va yelifila kutya ohatu tambula ko omayambidido okuyambidida oilonga yomounyuni aushe oyo tai longwa koshiwana shaJehova. Mbela kungaha itatu va pe omhito va longife nawa oiniwe yavo? Nonande eendjovo odo di li muLukas 16:10 otadi popi kondadalunde shi na sha nokulongifa oiniwe yopamaliko, efinamhango olo li li mo otali dulu yo okutulwa moilonga shi na sha noinima imwe i lili monghalamwenyo.

Ouyuki owa fimanenena

12, 13. Omeenghedi dilipi hatu dulu okuulika ouyuki?

¹² Omuyapostoli Paulus okwa shanga a ti: “Fye otu shi shii shili, otu nomaliudo mawa, eshi twa hala okweenda [nouyuki, OB-1954] moinima aishe.” (Ovaheberi 13:18) ‘Oinima aishe’ oya kwatela mo oinima i na sha nokulongifa oimaliwa. Ohatu futu eengele detu noifendela yetu pefimbo nopauyuki. Omolwashike mbela? Ohatu shi ningi omolweliudo letu nosho yo osho sha fimanenena omolwohole yetu yokuhola Kalunga nokudulika komalombwelo aye. (Ovaroma 13:5, 6) Ohatu linyenge ngahelipi ngeenge twa toola sha osho shi he fi shetu? Ohatu kendabala oku shi shunifa kumwene washo. Osho ihashi yandje tuu oundombwedi muwa ngeenge hatu yelifa osho she tu linyengifa tu shunife oshinima osho kumwene washo!

¹³ Okukala ovadiinini novayuki moinima aishe otaku pula okukala ovayuki koilonga. Okukala ovayuki meenghedi detu dokulonga ohashi fimanekifa Kalunga oo tu lile po. Ihatu “vake” efimbo mokulonga noundede. Ponhele yaasho, ohatu longo noudiinini, twa fa hatu shi ningile Jehova. (Ovaefeso 4:28; Ovakolossi 3:23) Okwa tengenekwa kutya moshilongo shimwe shomuEuropa, oshititatu shovanailonga ovo hava pula omikanda defudo dandokotola molwouvela, ohave shi ningi tava kengelele. Ovapiya vaKalunga vashili ihava kongo omalipopilo okuhenuka okuya koilonga. Omafimbo amwe, Eendombwedi daJehova ohadi lengwa moilonga, molwaashi ovayandji voilonga vado ohava kala ve wete kutya ohadi longo pauyuki nonoudiinini. — Omayeletumbulo 10:4.

Oudiinini moukalele wetu wopaKriste

14, 15. Omeenghedi dimwe dilipi hatu dulu okuulika kutya otu li ovadiinini moukalele wopaKriste?

¹⁴ Ohatu ulike ngahelipi oudiinini moukalele oo twe lineekelelwa? Ombibeli otai ti: “Natu eteleni Kalunga alushe omahambeleloyambo nokutya, oshiimati shomilungu edi tadi pandula edina laye.” (Ovaheberi 13:15) Onghedi ya fimanenena omo hatu ulike oudiinini moukalele oyo okukufa ombinga muo pandjikilile. Ngeenge osho shi li ngaho, omolwashike tu na okweefa pa pite omwedi inatu yandja oundombwedi u na sha naJehova nosho yo omalalakano aye? Okukufa ombinga kwetu pandjikilile moilonga yokuudifa otaku tu kwafele yo tu xwepopaleke ounghulungu wetu nokupondola kwetu.

¹⁵ Onghedi ikwao iwa i na sha nokuulika oudiinini moilonga yomomapya oyo okulongifa omaetepo oo hatu hange mOshungonangelo nosho yo mokafo Uukalele wetu wUukwaniilwa. Ngeenge hatu lilongekida nokulongifa omatwalemo oo a yandjwa ile amwe e lili nokwa yeleka, mbela ihatu mono oukalele wetu tau pondola neenghono? Ngeenge twa shakeneke umwe oo ta ulike kutya oku na ohokwe metumwalaka lOuhamba, mbela ohatu ningi elishuneko diva opo tu kulike ohokwe yaye? Ongahelipi shi na sha nomakonakonombibeli opeumbo oo tashi dulika twa hovela novanhu ovo ve na ohokwe? Mbela otu shii okulineekelwa notu li ovadiinini moku a ninga? Okuulika kwetu oudiinini moukalele otaku dulu okuxupifa eemwenyo detu nosho yo daavo tave tu pwilikine. — 1 Timoteus 4:15, 16.

Natu kale twa yooloka ko kounyuni

16, 17. Omeenghedi dilipi hatu dulu okuulika kutya otwa yooloka ko kounyuni?

¹⁶ Eshi Jesus a li ta ilikana kuKalunga, okwa popya shi na sha novashikuli vaye a ti: “Ame onde va pa eendjovo doye, nounyuni otau va tondo, osheshi vo kave fi vomounyuni ou, ngaashi Ame ndi he fi womounyuni ou. Ihandi indile u va kufe mo mounyuni ou, ndele u va amene kowii. Vo kave fi vomounyuni, ngaashi Ame ndi he fi womounyuni.” (Johannes 17:14-16) Otashi dulika tu kale twa tokola toko okukala twa yooloka ko kounyuni moinima inene, ngaashi shi na sha nokuhenombinga, omafudo neenghedindjikilile dopalongelokalunga nosho yo oluhaelo. Ndele ongahelipi shi na sha noinima oyo inini? Mbela otashi dulika twa nwefwa mo keenghedi dounyuni noinatu shi didilika? Pashihopaenenwa, ngeenge inatu lungama, onghedi yetu yokudjala otai dulu okuxutuka noupu nokukala inai wapala. Okukala ovadiinini otaku pula ‘elixupipiko nomadiladilo mawa’ shi na sha nokudjala nokuliwapeka. (1 Timoteus 2:9, 10, NW) Heeno, “itatu pe omunhu omhito okudina moshinima nande shimwe, oshilongayakulo shetu shi ha shekwe, ndelenee moinima aishe ohatu liholola ofye ovayakuli vaKalunga.” — 2 Ovakorinto 6:3, 4.

¹⁷ Molwaashi otwa hala okufimaneka Jehova, ohatu djala monghedi yefimaneko ngeenge hatu i kokwoongala. Naasho osho hatu ningi yo ngeenge hatu ongala tu vahapu poyoongalele inini naai ya kula. Omidjalo detu odi na okukala tadi wapalele notadi monika nawa. Osho ohashi yandje oundombwedi kuvamwe ovo have tu mono. Nokuli novaengeli ove wete oilonga yetu, ngaashi naanaa va li ve wete oilonga yaPaulus nOvakriste vakwao. (1 Ovakorinto 4:9, NW) Doshili, otu na alushe okudjala nawa. Oudiinini mokuhoolola oikutu otashi dulika u talike ko kuvamwe u li oshinima shinini, ndele owa fimana momesho aKalunga.

Omanangeko noupuna omolwoudiinini

18, 19. Omanangeko noupuna elipi haa di moudiinini?

¹⁸ Ovakriste vashili ova popiwa ve li “omalenga mawa efilonghenda lopahapu yaKalunga.” Nomolwaasho ove likolelela ‘keenghono tave di pewa kuKalunga.’ (1 Petrus 4:10, 11) Kakele kaasho, tu li omalenga, otwe lineekelelwa osho shi he fi shetu —  omauliko efilonghenda laKalunga, mwa kwatelwa oukalele wetu. Mokuulika kutya otu li omalenga mawa, ohatu lineekele meenghono odo hadi yandjwa kuKalunga, “eenghono di dule odo dopaushitwe.” (2 Ovakorinto 4:7, NW) Kali fi tuu edeulo liwa oku tu kwafela tu pondole omayeleko keshe oo tashi dulika tu shakeneke monakwiiwa!

¹⁹ Omupsalme okwa imba a ti: “Kaleni mu hole Omwene, ovakoshoki nye amushe! Ava tava diinine, Omwene ote va amene.” (Epsalme 31:24) Natu kale twa tokola toko okuulika kutya otu li ovadiinini, tu na elineekelo filufilu kutya Jehova oye “Omukulili wovanhu aveshe, ndele unene tuu [wovadiinini, NW].” — 1 Timoteus 4:10.

Oto dimbuluka?

• Omolwashike tu na okukala ‘ovadiinini moinima inini’?

• Ongahelipi hatu dulu okuulika kutya otu li ovadiinini shi na sha:

nokukala ovayuki?

noukalele wetu?

nokukala twa yooloka ko kounyuni?

[Efano pepandja 13]

Oo e li omudiinini moinima inini, oku li yo omudiinini nomwaai ihapu

[Efano pepandja 16]

‘Enda nouyuki moinima aishe’

[Efano pepandja 16]

Onghedi iwa omo hatu dulu okuulika oudiinini oyo okulilongekidila nawa oukalele

[Efano pepandja 17]

Natu djale nokuliwapeka nelixupipiko

[Efano pepandja 17]