Delphine okwa kwathelwa kOmbiimbeli sho a li muudhigu. Shoka ye mu ningile oshindhindhilikwedhi. Ngaashi iitopolwa itatu ya landula ko tayi ke shi ulika, aantu yalwe oya mona wo kutya Ombiimbeli oye ya kwathela sho ya tula omayele gayo miilonga, opo ya kandule po omaupyakadhi gawo. Oyu uvite kutya Ombiimbeli oyi li ngaashi oshikulunima shoka sha hokololwa petameko. Yo inayi fa omambo ogendjigendji ngoka haga kulupa nokungushuluka. Mbela Ombiimbeli oya yooloka ko kugo, molwaashoka oohapu dhayo dhi ili? Mbela oyi na omadhiladhilo gaKalunga, ihe hagaantu? — 1 Aatessalonika 2:13.

Otashi vulika nangoye wa mona kutya onkalamwenyo ofupi noyu udha omaupyakadhi. Uuna wa gwililwa po komaupyakadhi oho kongo peni ehekeleko, eyambidhidho nomayele ge shi okwiinekelwa?

Natu taleni omikalo ndatu dha simana moka Ombiimbeli tayi vulu oku ku kwathela monkalamwenyo. Otayi vulu oku ku longa nkene wu na

1. okuyanda omaupyakadhi mpoka tashi wapa.

2. okukandula po uudhigu ngele wa holoka po.

3. okwiidhidhimikila oonkalo ndhoka itoo vulu okulundulula.

Iitopolwa tayi landula otayi ka kundathana omikalo ndhoka ndatu.

UUNAMITI

NONANDO OMBIIMBELI KAYI SHI EMBO LYUUNAMITI, OYI NA OMAKOTAMPANGO GE LI PETHIMBO KOMBINGA YUUKOLELE.

Okwiikalekela mboka taye ehama.

Ompango yaMoses oya popya kutya mboka ye na uuvu woshilundu naya kalekwe kokule naantu yalwe. Ihe oondohotola odha ka tula owala miilonga ekotampango ndyoka, sho omikithi ndhoka hadhi taandele dhi indjipala pokati komumvo 401-1500. Ano ekotampango ndyoka otali longo natango. — Levitikus ontopolwa 13 no 14.

Okwiiyoga koonyala konima yokuguma omudhimba.

Omimvo 150 lwaampono dha ka pita, olundji oondohotola odha li hadhi gumu omidhimba, dho tadhi ka panga aavu, inaadhi iyoga koonyala. Oshinima shika osha dhipaga aantu oyendji. Ihe Ompango yaMoses oya popya kutya kehe ngoka ta gumu omudhimba ota kala inaa yogoka uule wethimbo lyontumba. Oya popi wo kutya omuntu oku na okwiiyoga, opo a kale a yogoka. Omikalondjigilile ndhika dhopalongelokalunga odha li lela dha kaleke po uukolele waantu. — Numeri 19:11, 19.

Okufumvika onyata.

Omumvo kehe, aanona ye vulithe 500 000 ohaya si koshimela, unene tuu molwaashoka ya kwathathana nonyata yaantu ndjoka inaayi fumvikwa. Ompango yaMoses oya ti kutya oonyata odhi na okufumvikwa kokule naantu. — Deuteronomium 23:13.

Ethimbo lyokukenkwa.

Ompango yaKalunga oya tile kutya okanona okamati oke na okukenkwa sho ke na omasiku gahetatu. (Levitikus 12:3) Ombinzi yuuhanona ohayi vulu owala okuhekela nawa konima yoshiwike. Pethimbo lyOmbiimbeli, manga epango lyopaunamiti inaali huma komeho, okutegelela pu pite oshiwike manga okanona inaaka kenkwa osha li egameno lela.

Ekwatathano pokati kuukolele wopamadhiladhilo nowopalutu.

Aakonakoni yopaunamiti naanongononi ohaya ti kutya omaiyuvo omawanawa ngaashi enyanyu, etegameno, olupandu nehalo lyokudhimina po ohayi kwathele omuntu a kale e na uukolele. Ombiimbeli otayi ti: “Omutima gwa nyanyukwa otagu eta uundjangandjele, ihe omwenyo gwa nyanyagulwa otagu thipula omasipa.” — Omayeletumbulo 17:22.