Aakuluntugongalo, omu uvitile ngiini oshinakugwanithwa shokudheula yalwe?

1, 2. Aatonatelishikandjo oya koneka shike momagongalo ogendji?

OMUTONATELISHIKANDJO okwa li a gongala naakuluntugongalo yomapipi ga yoolokathana, yamwe oye eleka okukala nokuli oohe. Okwa li shili e ya hole, molwaashoka ohaya longo nuudhiginini. Nonando okwa li e li pokuhulitha po okugongala kwe, opwa li natango oshinima shilwe sha simana shoka a li ti ipula nasho. Okwe ya pula epulo a ti: “Aamwatate, omwa ninga po shike, opo mu dheule yalwe ya pewe iinakugwanithwa megongalo?” Aamwatate otaya dhimbulukwa nawa kutya omutonatelishikandjo okwa li e ya ladhipike petalelopo lya zi ko ya kale haya kongo ethimbo lyokudheula yalwe. Pehulilo omukuluntugongalo gumwe okwa popi oshinima shoka aakuluntugongalo ayehe ya tsu kumwe nasho a ti: “Inatu ninga po sha naanaa.”

² Ngele nangoye omukuluntugongalo, otashi vulika wu gandje eyamukulo lya fa ndyoka. Aatonatelishikandjo oya koneka kutya aakuluntugongalo oya pumbwa okukonga ethimbo lyokudheula aamwatate ya kale haya kwathele momagongalo, kutya nduno aagundjuka nenge aakokele. Ihe kashi shi oshipu. Omolwashike mbela?

3. (a) Ombiimbeli otayi ulike ngiini kutya okudheula yalwe okwa simana, nomolwashike atuheni tu na okukala tu na ohokwe medheulo ndika? (Tala enyolo lyopevi.) (b) Omolwashike tashi vulika shi kale oshidhigu kaakuluntugongalo yamwe ya dheule yalwe?

³ Ngele ngoye omukuluntugongalo, otashi vulika wu shi shi kutya osha simana okudheula aamwatate.a Owa tseya nawa kutya aamwatate oyendji oya pumbiwa, opo ya kwathele omagongalo ga kale ga kola ngashingeyi noya kwathele momagongalo ngoka taga ka totwa po monakuyiwa. (Lesha Jesaja 60:22.) Ombiimbeli otayi ti kutya owa pumbwa ‘okulonga yalwe.’ (Lesha 2 Timoteus 2:2.) Ihe nonando ongawo, otashi vulika shi kale oshidhigu okumona ethimbo wu shi ninge, molwaashoka owu na iinakugwanithwa oyindji. Owu na okusila oshimpwiyu aanegumbo lyoye nosho wo okulonga iilonga yomboloto. Owa pumbwa wo okugwanitha po iinakugwanithwa yegongalo niinima yilwe ya simana. Natu kundathaneni kutya omolwashike sha simanenena wu kale ho kongo ethimbo wu dheule yalwe.

OKUDHEULA YALWE OKWA SIMANENENA

4. Omolwashike omathimbo gamwe aakuluntugongalo ihaaya dheula aamwatate megongalo?

⁴ Omolwashike hashi kala oshidhigu okukonga ethimbo lyokudheula aamwatate megongalo? Yamwe ohaya ti: ‘Iinakugwanithwa yilwe yegongalo oyo ya simanenena noya pumbwa okulongwa tango. Ngele inandi dheula gumwe ngashingeyi, egongalo itali kala li na uupyakadhi washa.’ Mbela edhiladhilo ndyono oli li ngaa mondjila? Megongalo omu na shili iinakugwanithwa yilwe mbyoka ya pumbwa okulongwa meendelelo. Ihe ngele owa kala inoo dheula aamwatate megongalo, oto vulu okutula egongalo moshiponga.

5, 6. Oshike tatu ilongo methaneko lyankene omuhingi ha sile ohauto ye oshimpwiyu? Ongiini tatu vulu oku shi yelekanitha nedheulo ndyoka aakuluntugongalo ye na okugandja megongalo?

⁵ Natu taleni kethaneko ndika. Ngele omuhingi okwa hala osheenditho she shi kale monkalo ombwanawa, oku na okukutha mo omahooli ngoka ga kulupa moindjina. Ihe otashi vulika a kale e wete kutya osha simana okutula mo tango omahooli motenga, oshoka ngele ine shi ninga, ita vulu okuhinga. Otashi vulika a dhiladhile kutya molwaashoka okwi ipyakidhila unene, omahooli omakulu inga e ga kutha mo nale moindjina, oshoka ohauto otayi vulu okweenda natango. Ihe okuninga ngawo okwa nika oshiponga. Ngele omuhingi okwa kala inaa kutha mo omahooli omakulu moindjina uuna sha pumbiwa, mokweendela ko kwethimbo ohauto otayi ka yonuka. Konima yethimbo, ota ka pumbwa a longithe ethimbo olindji niimaliwa oyindji, opo yi pangelwe. Oshike tatu ilongo mo methaneko ndika?

⁶ Otatu ilongo mo kutya aakuluntugongalo oye na okuninga tango iinima mbyoka ya simanenena. Ngele itaye yi ningi, otashi ka tula egongalo moshiponga. Ngaashi omuhingi e na okukala ha tula aluhe omahooli motenga, aakuluntugongalo oye na okukala ye shi ‘okuyoolola iinima mbyoka yi na oshilonga.’ (Fil. 1:10) Ihe aakuluntugongalo yamwe otashi vulika ya kale yi ipyakidhila unene niinima yilwe ya simana, e taya kala kaaye na we ethimbo lyokudheula yalwe. Shika osha faathana nomuhingi ngoka ihaa tula omahooli moindjina. Ngele aakuluntugongalo oya kala ihaaya dheula aamwatate, mokweendela ko kwethimbo egongalo otali ka kala kaali na aamwatate ya dheulwa ya gwana, opo ya gwanithe po iinakugwanithwa ayihe yegongalo.

7. Otu na okutala ko ngiini aakuluntugongalo mboka haya dheula yalwe?

⁷ Ano aakuluntugongalo kaye na okudhiladhila kutya edheulo inali simana. Aakuluntugongalo mboka haya kutha ethimbo ya dheule yalwe otaya dhiladhila konakuyiwa yegongalo naanandunge. Aamwatate otaya ka kala ye ya lenga. (Lesha 1 Petrus 4:10.) Egongalo ohali likola mo shike medheulo ndyoka?

LONGITHENI NAWA ETHIMBO

8. (a) Omolwashike aakuluntugongalo ye na okudheula yalwe? (b) Aakuluntugongalo mboka haya longo momahala moka mu na ompumbwe onene, oye na oshinakugwanithwa shashike sha simana? (Tala okampungu “Oshilonga sha simanenena.”)

⁸ Aakuluntugongalo ayehe, mwa kwatelwa naamboka ya pyokoka, oye na okuzimina neifupipiko noye na okukala ye shi kutya sho taye ende taya koko itaya ka vula we okulonga iilonga ayihe mbyoka ya li haya longo sho ya li aagundjuka. (Mika 6:8) Oye na wo okutseya kutya “ethimbo niiningwanima inaayi tegelelwa” (NW) otayi vulu yi shi ningithe oshidhigu okugwanitha po iinakugwanithwa yawo. (Omuuv. 9:11, 12; Jak. 4:13, 14) Molwaashoka aakuluntugongalo oye hole oshigwana shaJehova noye na ko nasha nasho, ohaya kambadhala ya mana mo, opo uunongo mboka yi ilonga muule woomvula ye wu taambekidhe kaamwatate aagundjuka. —  Lesha Episalomi 71:17, 18.

9. Oshiningwanima shini tashi ka ningwa monakuyiwa tashi ningitha edheulo li kale lya pumbiwa?

⁹ Aakuluntugongalo mboka haya dheula yalwe oya lengwa wo kaamwatate, oshoka oonkambadhala dhawo otadhi koleke egongalo. Edheulo ndyoka ohali kwathele aamwatate ya vule okukwathela egongalo li kale lya hangana noli inekela muKalunga. Shika osha simana unene tuu momasiku ngaka gahugunina. Notashi ka kala sha simanenena wo pethimbo lyuudhigu uunene. (Hes. 38:10-12; Mika 5:5, 6) Onkee ano, okuza nena, aakuluntugongalo kaleni hamu kongo ethimbo lyokudheula yalwe.   

10. Aakuluntugongalo otashi vulika ya pumbwa okuninga shike, opo ya kale ye na ethimbo lyokudheula yalwe?

¹⁰ Otu shi kutya otamu tsu nondhikwa, molwaashoka otamu longo nale iilonga yegongalo mbyoka ya simana. Onkee ano, otashi vulika mwa pumbwa okulongitha ethimbo ndyoka hamu longitha okulonga iilonga mbyoka, opo mu li longithe okudheula yalwe. (Omuuv. 3:1) Shika otashi ka kwathela egongalo mokweendela ko kwethimbo.

KONGENI OMPITO TAYI OPALELE

11. (a) Otatu ilongo mo shike meyamukulo lyaakuluntugongalo mboka ya dheula yalwe miilongo yi ili noyi ili? (b) Pahapu dhOmayeletumbulo 15:22, omolwashike sha simana tu kundathaneni omayele ngoka ga gandjwa kaakuluntugongalo yokiilongo yi ili noyi ili?

¹¹ Aakuluntugongalo yamwe mboka ya dheula aamwatate momagongalo oya pulilwe ya popye nkene ye shi ende.b Ayehe oya gandjele omayele ga faathana, nonando oya za kiilongo ya yoolokathana. Shika otashi tu longo shike? Otashi tu longo kutya aamwatate ‘momagongalo agehe’ oya pumbwa okudheulwa edheulo lya kankamena kOmbiimbeli. (1 Kor. 4:17) Moshitopolwa shika nomwaashoka tashi landula otatu ka kundathana gamwe gomomayele ngoka. —  Omayel. 15:22.

12. Omudheuli oku na okukonga shike, nomolwashike?

¹² Tango, omudheuli oku na okukonga ompito tayi opalele. Omolwashike shoka sha simana? Omuntu ngele okwa hala okukuna oshikunino, tango evi oku na oku li longa, opo a kune nawa oombuto dhe. Sha faathana, omudheuli oku na tango okulongekidha omutima gwomumwatate ngoka a hala okudheula. Ongiini ngoka ta dheula ta vulu okukonga ompito tayi opalele? Ota vulu okulandula oshiholelwa shomupolofeti Samuel, ngoka a li e na uunkulungu wokudheula.

13-15. (a) Jehova okwa lombwele Samuel a ninge shike? (b) Samuel okwa kwathele ngiini Saul a kale i ilongekidhila oshinakugwanithwa she oshipe? (Tala kethano lyopetameko.) (c) Omolwashike ehokololo lyaSamuel tali kwathele aakuluntugongalo pethimbo ndika?

¹³ Oomvula 3 000 dha ka pita, Jehova okwa li a lombwele Samuel, omupolofeti omukokele, a ti: “Ngula pethimbo ngaandika otandi ke ku tumina omulumentu a za mezimo lyaBenjamin. Mu gwayeka, a ninge omuleli gwaantu yandje Aaisraeli.” (1 Sam. 9:15, 16) Jehova okwa nothele ko Samuel kutya haye we ta ka wilika oshigwana shaIsraeli. Okwa li a hala Samuel a gwayeke omuleli omupe. Opo Samuel a kwathele omuleli ngoka a kale i ilongekidhila oshinakugwanithwa she oshipe, okwa kongo po ondunge e te yi tula miilonga.

¹⁴ Esiku lya landula Samuel okwa tsakanene naSaul. Jehova okwa lombwele omupolofeti, a ti: “Omulumentu oye naanaa nguka.” Okuza mpoka, Samuel okwa tula ondunge ye miilonga. Okwa kongo ompito ombwanawa, opo a popye naSaul. Samuel okwa hiya Saul nomupiya gwe ya ka lye pamwe naye. Okwe ya kuutumbike puuwanawa e ta pe Saul ontumba ombwanawa yonyama. Samuel okwa ti: “Onde yi ku hupithile, u yi lye pethimbo ndika.” Konima sho ya li, Samuel okwa hiya Saul kegumbo lye. Naasho ye li mondjila oye ende taya hapula. Sho ya thiki kegumbo lyaSamuel, “oya yi kontala yongulu e taya kala taya popi” (NW) sigo ethimbo lyoku ka lala. Ongula sho kwa shi, Samuel okwa gwayeke Saul a ninge omukwaniilwa e te mu thipi komilungu. Okuza mpoka okwe mu pe ishewe omayele galwe. Saul okwa zi po i ilongekidhila shoka sha li tashi ka ningwa po. —  1 Sam. 9:17-27; 10:1.

¹⁵ Shoka Samuel a li ta dheulile Saul inashi fa oshilonga shuukuluntugongalo nenge shuukwathelikokolindjila shoka aamwatate ye na okudheulilwa. Samuel okwa li ta dheulile Saul oshilonga shokuninga omuleli gwoshigwana. Ihe nando ongaaka, aakuluntugongalo otaya vulu okwiilonga oshindji kunkene Samuel a longekidha omutima gwaSaul. Natu taleni kiinima iyali.

KALA KUUME KAWO OMUWANAWA NOWU NA EHALO LYOKU YA DHEULA

16. (a) Samuel okwa li u uvite ngiini sho Aaisraeli ya pula ya pewe omukwaniilwa? (b) Samuel okwi inyenge ngiini sho Jehova e mu lombwele a gwayeke Saul a ninge omukwaniilwa?

¹⁶ Kala wu na ehalo lyokudheula yalwe, ngoye ino kwatakwata. Tango sho Samuel u uvu kutya Aaisraeli oya hala omukwaniilwa gwopantu, okwa li a ninga omwenyo omwiinayi nokwa li u uvite inaa halika. (1 Sam. 8:4-8) Jehova okwa li e na okulombwela Samuel lwiikando itatu kutya na pe aantu shoka taye mu pula, oshoka ka li a hala okulangeka po omukwaniilwa. (1 Sam. 8:7, 9, 22) Nonando Samuel osho a li u uvite ngaaka, ina tsa ondumbo nenge a geele omulumentu ngoka a li te ke mu pingena po. Sho Jehova e mu lombwele a gwayeke Saul a ninge omukwaniilwa, Samuel ina kwatakwata. Okwa vulika nehalo ewanawa. Hamolwaashoka owala a li kee na nkene, ihe omolwaashoka a li e hole Jehova.

17. Aakuluntugongalo ohaya landula ngiini oshiholelwa shaSamuel, noshike hashi ya nyanyudha?

¹⁷ Nena oku na aakuluntugongalo oyendji ya pyokoka mboka ya dheula nawa aamwatate, ngaashi Samuel a li a ningi. (1 Pet. 5:2) Aakuluntugongalo mbaka aanahole oye na ehalo okudheula yalwe noinaya tila okugandja po iinakugwanithwa yawo yimwe kwaamboka taya dheula. Pehala lyaashono, oye wete kutya aamwatate mbaka ‘aalongi pamwe nayo’ mboka taye ke ya kwathela ya sile egongalo oshimpwiyu. (2 Kor. 1:24; Heb. 13:16) Aakuluntugongalo mbaka kaye na ombepo yokwiihola mwene. Onkene ohaya nyanyukilwa okumona aamwatate mboka taya dheula taya tula miilonga shoka ye ya longa, opo ya kwathele oshigwana shaJehova. —  Iil. 20:35.

18, 19. Omukuluntugongalo ota vulu ngiini okulongekidha omutima gwaangoka ta dheula, opo a kale a gwana okudheulwa, nomolwashike oshinima shoka sha simana?

¹⁸ Kala kuume omuwanawa, ino kala owala omudheuli. Sho omupolofeti Samuel a tsakanene naSaul, okwa li ta vulu okuthikila ta pimpile ohanga yomagadhi komutse gwe, e te mu gwayeke a ninge omukwaniilwa. Ihe pehala lyaashoka, Samuel okwa kongo ompito a longekidhe omutima gwaSaul, opo a vule okugwanitha po oshinakugwanithwa she oshipe. Ando Samuel okwa thikilile te mu gwayeke, ando Saul ina kala i ilongekidha okuwilika oshigwana shaKalunga. Ihe manga inee mu gwayeka okwe ende pamwe naye taya kundathana nokuthuwa po. Samuel okwa tegelele a mone ompito ombwanawa, opo e mu gwayeke.

¹⁹ Nonena aakuluntugongalo osho taya vulu okuninga. Manga inaa dheula omumwatate, omukuluntugongalo oku na okukambadhala a pange uukuume naye. Shoka omukuluntugongalo e na okuninga, opo ngoka ta dheula a kale e mu mangulukila oshi ikolelela koonkalo nokeputuko lyawo. Ihe kutya nduno ngoka to dheula ogwomeputuko lini, ngele owa kongo ethimbo lyokukala naye ota ka mona kutya owu na ko nasha naye. (Lesha Aaroma 12:10.) Osha yela kutya ota ka kala e ku pandula.

20, 21. (a) Omulongi omuwanawa oku na okukala e li ngiini? (b) Oshike tatu ka kundathaneni moshitopolwa tashi landula?

²⁰ Omudheuli omuwanawa oku na okukala e hole okudheula yalwe. Ihe oku na wo okukala e hole omuntu ngoka ta dheula. (Yelekanitha Johannes 5:20.) Omolwashike sha simana? Osha simana, oshoka ngele omuntu ngoka to dheula okwa mono kutya owu na ko nasha naye ota ka kala a hala wu mu dheule. Onkene aakuluntugongalo kamu na owala okudheula aamwatate, omu na wo okukambadhala okupanga uukuume nayo. —  Omayel. 17:17; Joh. 15:15.

²¹ Omukuluntugongalo ota vulu okutameka nedheulo, shampa a longekidha omutima gwaangoka a hala okudheula. Omikalo dhini e na okulongitha? Shoka otashi ka kundathanwa moshitopolwa tashi landula.