Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
3-9 JANUALI
OMALIKO OKUZA MOOHAPU DHAKALUNGA | AATOKOLIHAPU 15–16
“Okukengelela oshinima oshiwinayi noonkondo!”
Uukengeleledhi owa lunda pethimbo lyetu
4 Tango natu taleni koshiholelwa shaDelila ngoka a li a kengelele omuholike gwe, Simson. Simson oye a li e na okumangulula oshigwana shaKalunga miikaha yAafilisti. Ihe aakwaniilwa yatano Aafilisti oya li ya hala oku mu dhipaga. Oya pe Delila iimaliwa oyindji e mu pule okanaku kutya oonkondo dhe oonene ohadhi zi peni. Otashi vulika ya li ye shi kutya Delila ke hole naanaa Simson. Delila okwa li a taamba iimaliwa mbyoka, ihe nonando ongaaka, oonkambadhala dhe odha li dha ponyo iikando itatu. Delila okwa tsikile noku mu pula te mu thiminike ‘esiku nesiku.’ Lwahugunina, “Simson okwa vulwa okutsitsimikwa.” Onkee ano, okwe mu lombwele kutya shi valelwe a kululwe momutse, nongele osha ningwa ota kanitha oonkondo dhe. Delila sho e shi uvu, okwa kotheke Simson mekolo lye e ta kululitha ko omafufu ge. Konima yaashono, okwe mu gandja kaatondi ye ye mu ningile shoka ya hala. (Aatok. 16:4, 5, 15-21) Delila okwa li a ningi oshinima oshiwinayi noonkondo. Omolwolwiho, Delila okwa li e ende mevi omuholike gwe.
Omanenedhiladhilo okuza membo lyAatokolihapu
14:16, 17; 16:16. Okuthininika gumwe mokulila nokutsitsimika otaku vulu okuyona po ekwatathano. — Omayeletumbulo 19:13; 21:19.
Uukengeleledhi owa lunda pethimbo lyetu
15 Mboka ye li mondjokana otaya vulu ngiini okukala aadhiginini kookuume kawo? Oohapu dhaKalunga otadhi ti: ‘Nyanyukilwa omukulukadhi gwoye nenge omusamane gwoye wa za naye kuufuko.’ Otadhi ti wo: “Nyanyukilwa omwenyo gwoye namukadhoye [nenge nomusamane gwoye] ngoka u mu holelele.” (Omayel. 5:18; Omuuv. 9:9) Sho aaihokani taye ende taya kulupa, oye na ‘okukala pamwe aluhe,’ palutu nopamaiyuvo. Shoka otashi ti kutya oye na okukala haya pulakenathana, haya kala pamwe ethimbo ele nokukala ye holathane lela. Oye na okukambadhala okukaleka po ondjokana yawo nokukala ye na ekwatathano ewanawa naJehova. Oya pumbwa okukonakona Ombiimbeli pamwe, okulonga pamwe muukalele nokugalikana pamwe, opo Jehova e ya yambeke.
KALA OMUDHIGININI KUJEHOVA
16 Yamwe mboka ya li ya yona omayono ga kwata miiti megongalo oya li ya ‘gandwa, opo ya taambe eitaalo lyu uka.’ (Tit. 1:13) Yo yamwe oya li ya kondwa omolweihumbato lyawo ewinayi. “Mboka ya putudhwa kegeelo ndyoka,” oya li ya kwathelwa ya kale ye na ekwatathano ewanawa naKalunga. (Heb. 12:11) Ongiini ngele omupambele gwetu nenge kuume ketu kopothingo okwa kondwa? Otu na okukala aadhiginini kuKalunga, ihe hakomuntu ngoka. Jehova ohe tu tala ngele otatu vulika ngaa kelombwelo lye ndyoka tali ti kutya katu na okukala nekwatathano nakehe ngoka a kondwa. — Lesha 1 Aakorinto 5:11-13.
Omaliko gomOmbiimbeli
Simson okwa pondola kekwatho lyaJehova!
Simson okwa li e na elalakano limwe li na ko nasha nokukondjitha Aafilisti. Sho a li a kala megumbo lyohonda moshilando Gaza, elalakano lye olya li okukondjitha aatondi yaKalunga. Simson okwa li a pumbwa ehala lyokulala moshilando shaatondi, nokwa li owala a vulu oku li mona megumbo lyohonda. Ka li e na elalakano lyokuya miihulo. Megumbo lyohonda okwa li a zi mo mokati kuusiku, e ta kwata iikulo yomweelo gwoshilando e te yi nakula mo, iipatitho naayihe. Okwe yi itsike komapepe e ta yi nayo ayihe, sigo okondungu yondundu ya talathana naHebron, ndjoka ya li kokule ookilometa 60 lwaampono. Shika osha li sha vulu okuningwa kekwatho lyaKalunga nokoonkondo dhe. — Aatokolihapu 16:1-3, yelekanitha OB-1954.
10-16 JANUALI
OMALIKO OKUZA MOOHAPU DHAKALUNGA | AATOKOLIHAPU 17–19
“Okwaavulika kOmpango yaKalunga ohaku etitha omaupyakadhi”
Mika
1. Mika okwa li omulumentu gwomevi lyokoondundu dhaEfraim. Okwa li a pogola oshipango oshitihetatu shomIipango Omulongo yaKalunga (Eks 20:15), molwaashoka okwa li a yaka po iimaliwa iisiliveli 1 100 yayina. Sho Mika e shi zimine nokushunitha iimaliwa mbyoka, yina okwa ti: “Opo ndi hulithe po ethingo lyokweetela omumwandje oshipwe, iisiliveli mbika otandi yi yoololele Omuwa. Otayi ka longithwa okuhonga oshimenka shoshiti sha tulwa oshisha shoshisiliveli. Onkee otandi ku galulile iisiliveli.” Opo nduno yina okwa kutha iisiliveli 200 e te yi gandja komukwaanga, ngoka a hongo “oshimenka shoshiti e te shi kolongitha oshisiliveli,” shoka lwanima sha ka tulwa maandjaMika. Mika ngoka a li e na “eha lye mwene lyelongelokalunga,” okwa li a hambulitha iimenka yimwe nokwa hondjitha omapepenguwo nokuninga omwanamati gwe gumwe omuyambi gwe. Nonando elongekidho ndika, olya li tali monika tali simanekitha Jehova, kalya li nandonando lyu uka, molwaashoka olya li ompinge noshipango shoka shi indika iikalunga (Eks 20:4-6) nolya li lya taaguluka omilandu dhaJehova dhi na ko nasha netsalihangano nosho wo nuuyambi. (Aatok 17:1-6; Deut 12:1-14) Lwanima, Mika okwa kutha Jonatan yaGersom, omutekulu gwaMoses, e te mu eta megumbo lye nokuninga omugundjuka ngoka Omulevi, omuyambi gwe. (Aatok 18:4, 30) Nonando okwa li a puka thiluthilu, Mika okwa li u uvite e shi mana, e ta ti: “Ngashingeyi . . . ondi shi shi kutya Omuwa otu ukitha iinima yandje ayihe nawa.” (Aatok 17:7-13) Ihe Jonatan ka li gwomezimo lyaAaron noka li nokuli a gwana okulonga iilonga yuuyambi, shoka sha gwedha ko owala kepuko lyaMika. — Num 3:10.
Mika
Nziya konima yethimbo, Mika naashiinda she oya li ya landula Aadan. Sho ye ya adha, oya li ya pulwa kaalumentu Aadan kutya otaya kongo shike. Opo nduno Mika okwa ti: “Otamu dhiladhila ngiini, sho tamu ti: Oshike ano? One mwa kutha po omuyambi gwandje niikalunga mbyoka nda hongo nomwa yi nayo. Nena onda kala po ihe nashike?” Opo ihe, oyanamati yaDan oya londodha Mika kutya otashi vulika ye mu dhenge, ngele okwa tsikile oku ya landula noku ya igidha. Sho Mika a dhimbulula kutya oye mu vule oonkondo, okwa piluka e ta shuna kegumbo. (Aatok 18:22-26) Lwanima aalumentu Aadan oya matukile Lajish noya dhipaga aakalimo e taa fike po oshilando. Oye shi tungulula, e taye shi lukulula Dan. Jonatan noyanamati oya li ya ningi aayambi yezimo lyaDan, ndyoka ‘lya dhike po oshimenka shaMika shoka sha kala ko ethimbo alihe, otenda yokusimanekela mo Kalunga sho ya li muShilo.’ — Aatok 18:27-31.
Omaliko gomOmbiimbeli
Taya toloka Oohapu dhaKalunga ndhoka dhi na omwenyo
6 Kunena, opu na uumbangi owundji mboka tawu ulike kutya otu na okulongitha edhina lyaJehova. MOmbiimbeli yo-New World Translation yomo 2013, oli li mo lwiikando 7 216. Sha hala okutya olya gwedhwa mo luhamano. Edhina ndika olya gwedhwa mo iikando itano, oshoka oli li moondhingambo ndhoka dha adhikile pEfuta Lya Sa. Iikando mbika itano oli li mu 1 Samuel 2:25; 6:3; 10:26; 23:14, 16. Omanga oshikando oshitihamano lya gwedhwa mo mAatokolihapu 19:18, sho kwa konakonwa nawa oondhingambo dhilwe oonkulu.
17-23 JANUALI
OMALIKO OKUZA MOOHAPU DHAKALUNGA | AATOKOLIHAPU 20–21
“Tsikila okupula Jehova”
Mbela ito vulu okukala ngaashi Pinehas uuna wa taalela omashongo?
Konima sho omukiintu gwopomunkulo gwomulumentu gwomezimo lyaLevi a kwatwa onkonga nokudhipagwa eso linyanyalitha kaalumentu Aagibea, mboka ya li yomezimo lyaBenjamen, omazimo galwe gaIsraeli oga yi ga ka kondjithe Aabenjamen. (Aatok. 20:1-11) Omazimo ngoka oga li ga galikana kuJehova e ga kwathele omanga inaaga ka kondja, ihe oga li ga sindwa iikando ayihe iyali, naakwiita yago oyendji oya li ya dhipagwa. (Aatok. 20:14-25) Mbela shoka osha hala okutya omagalikano gago inaga uvika? Mbela Jehova okwa li ngaa a hokwa lela omazimo ngoka sho taga kondjitha Aabenjamen omolwuuwinayi mboka ya ninga?
Mbela ito vulu okukala ngaashi Pinehas uuna wa taalela omashongo?
Oshike tatu ilongo moshinima shika? Omaupyakadhi gamwe megongalo ohaga tsikile nokonima sho aakuluntugongalo ya ninga oonkambadhala dha mana mo, nokupula ekwatho kuKalunga megalikano. Ngele shika osha ningwa, oshi li nawa aakuluntugongalo ya dhimbulukwe oohapu dhaJesus ndhoka tadhi ti: “Indileni [nenge galikaneni], e tamu pewa; kongeni, e tamu mono; konkoleni, e tamu egululwa.” (Luk. 11:9) Nonando egalikano oli kale inaali yamukulwa nziya, aakuluntugongalo oye na okukala nuushili kutya Jehova ota ka yamukula pethimbo lye.
Omaliko gomOmbiimbeli
Owe shi tseya ngaa?
Oshuumbitho osha li hashi longithwa ngiini miita pethimbo lyonale?
Oshuumbitho, oshilongitho shoka sha li sha longithwa kuDavid a dhipage omutongolume Goliat. David otashi vulika a li i ilongo okulongitha oshuumbitho pethimbo a li okamatyona, sho a li omusita gwiimuna. — 1 Samuel 17:40-50.
Pethimbo lyonale, Aaegipiti nosho wo Aayassur oya li haya longitha oshuumbitho shomamanya. Oshuumbitho shoka osha li shi na iikwatitho iyali nokapa ke na ombululu pokati. Omuumbi okwa li ha tula po emanya li na oosendimeta 5 sigo 7.5, li na ondjundo yoograma 250. Opo nduno okwa li he shi dhugadhuga, e ta etha oshikwatitho shokombinga yimwe, opo emanya li ze ko oshikuti nolya ukilila oshoodhekwa.
Aalafululi yomUuzilo woPokati oya kala nokugongela iiyumbitho yomamanya oyindji, mbyoka ya li hayi longithwa miita pethimbo lyonale. Aakwiita ya pyokoka otashi vulika ya li haya vulu okuumba omamanya uule woshinano shookilometa 160 sigo 240 mowili. Aalongwantu itaya tsu kumwe kombinga yoshuumbitho shomamanya kutya osha li hashi vulu okuumba uule woshinano shi thike pwaamboka wuutati, ihe Ombiimbeli oye shi popya sha yela. — Aatokolihapu 20:16.
24-30 JANUALI
OMALIKO OKUZA MOOHAPU DHAKALUNGA | RUT 1–2
“Lalakanena ohole yomuule”
Holela ookuume kopothingo yaJehova
5Rut Omumoab, nomo mwa li ezimo lye. Okwa li ta vulu okushuna kaakwanezimo lye, oyo ye ke mu sile oshimpwiyu. Okwa li e shi nawa elaka, omuthigululwakalo nosho wo aantu yomuMoab. Mbela Rut okwa li e shi elaka, omuthigululwakalo naantu yokuBetlehem hono yu uka naNaemi? Aawe. Shimwe ishewe, Naemi okwa li a tila kutya Rut ita ka mona ko omusamane nenge egumbo kuBetlehem. Onkee ano, Naemi okwa li a ladhipike Rut a shune koshilongo shawo. Ngaashi twe shi mono, Orpa “okwa yi koyaandjawo nokookalunga ke.” (Rut 1:9-15) Mbela Rut naye okwa li a tokola a shune koyaandjawo nokiikalunga mbyoka hayi longelwa koshilonga shawo? Hasho nando.
Holela ookuume kopothingo yaJehova
6 Otashi vulika Rut a li a longwa kombinga yaJehova komusamane gwe nenge kuyinamweno, Naemi. Rut okwi ilongo kutya Jehova ina fa iikalunga yAamoab. Okwa li e hole Jehova, nokwa li e shi kutya oye e na okulongela. Shono osha kwathele Rut a ninge etokolo lyopandunge. Okwa lombwele Naemi a ti: “Aangandjoye otaa ka ninga aangandjetu, ngaashika Kalunga koye ota ka kala Kalunga kandje wo.” (Rut 1:16) Uuna tatu dhiladhila kohole ndjoka Rut a li e nine Naemi ohashi gumu omitima dhetu. Ihe shoka sha mana oompata, ohole yokuhola Jehova ndjoka Rut a li e na. Oshinima shoka osha li wo sha kumitha Boas, ngoka konima yethimbo a tanga Rut sho ‘e ya okukonga egameno kuJehova.’ (Lesha Rut 2:12.) Oohapu dhaBoas otadhi tu ningitha tu dhiladhile kombinga yankene uudhilona hawu kongo egameno kohi yomawawa gooyina. (Episalomi 36:7; 91:1-4) Jehova okwa li a ningile Rut oshinima sha faathana. Okwa li e mu gamene e te mu pe ondjambi omolweitaalo lye. Rut ka li nando i ipe uusama omolwetokolo lye ndyoka a ninga.
Omaliko gomOmbiimbeli
Omanenedhiladhilo okuza membo lyaRut
1:13, 21 — Mbela Jehova okwa li a ninga onkalamwenyo yaNaemi yinikitha oluhodhi e te mu etele omaupyakadhi? Aawe, Naemi ina pa Kalunga ombedhi ongaa ngoka a ninga sha sha puka. Ihe mokutala kwaashihe shoka sha li she mu ningilwa, okwa li a dhiladhila kutya Jehova ine mu hokwa. Okwa li u uvite nayi nokwa li a yemata. Kakele kaashono, pethimbo ndyoka oluvalo lwela olwa li lwa talika ko lu li eyambeko lyaKalunga nuuntimbe owa li ethingo. Naemi otashi vulika a li e wete shi li mondjila okudhiladhila kutya Jehova okwe mu shundula, molwashoka oyanamati oya sa inaaye mu valela aatekulu.
31 JANUALI–6 FEBULUALI
OMALIKO OKUZA MOOHAPU DHAKALUNGA | RUT 3–4
“Iningila edhina ewanawa noku li kaleka po”
“Omukiintu e li nawa noonkondo”
Osha yela kutya omukalo gwombili moka Boas a li a popi naRut ogwa li gwa hekeleke Rut. Boas okwa ti: “OMUWA ne ku yambeke, mumwandje. Mushoka wa ningi ngashingeyi, owa holola ohole yuunezimo shi vule shoka wa ningile nyokomweno, sho inoo lambalala aalumentu aagundjuka, aayamba nenge oohepele.” (Rut 3:10) Uutumbulilo “shoka wa ningile” nyokomweno mboka wa longithwa kuBoas otawu popi kombinga yohole yuudhiginini yaRut sho e ya pamwe naNaemi kuIsraeli e ta kala te mu sile oshimpwiyu. Uutumbulilo “mushoka wa ningi ngashingeyi” otawu popi konkatu ndjoka a katuka u ulike kutya oku na ehalo okuhokanwa komukokele Boas. Boas okwa li a mono kutya omukiintu nguka omugundjuka, Rut, okwa li ta vulu okumona nuupu omusamane omugundjuka lela, kutya nduno omuyamba nenge ohepele. Ihe pehala lyaashono, Rut okwa li a hala okuningila Naemi nosho wo omusamane gwe, Elimelek, ngoka a sa uuwanawa, opo a kaleke po edhina lyomusamane ngoka. Kashi shi oshidhigu okumona kutya omolwashike Boas a li i inyengithwa kokwaaihola mwene kwomukiintu nguka omugundjuka.
“Omukiintu e li nawa noonkondo”
Rut ka li tuu a nyanyukwa sho ta dhiladhila kwaashoka a lombwelwa kuBoas, kutya okwa tseyika nawa kaantu ayehe kutya ye “omukiintu e li nawa noonkondo”! Osha yela kutya edhina ewanawa okwe li mono sho a li a halelela okutseya Jehova noku mu longela. Okwa li wo u ulukile Naemi noshigwana she olukeno nohenda, sho a taamba ko nehalo ewanawa omikalo nomithigululwakalo ndhoka a li kee shi nale. Opo tu holele eitaalo lyaRut, otu na okukala hatu simaneke yalwe nosho wo omithigululwakalo dhawo. Ngele otwe shi ningi, natse otatu ki iyadha tu na edhina ewanawa.
“Omukiintu e li nawa noonkondo”
Boas osho a ka hokana Rut. Konima yaashono Ombiimbeli otayi ti: “OMUWA okwe mu yambeke e ta ningi omusimba nokwa vala okamati.” Aakiintu yomuBetlehem oya pandula Naemi noya tanga Rut sho e vulile Naemi paamati yaheyali. Konima omwanamati gwaRut okwa ka ninga hekulululwa yomukwaniilwa a simana, David. (Rut 4:11-22) Ye David oye nduno a ka ninga hekulululwa yaJesus Kristus. — Mat. 1:1.
Omaliko gomOmbiimbeli
Omanenedhiladhilo okuza membo lyaRut
4:6 — Omomukalo guni ngoka omukulilwa ta vulu ‘okweekelahi’ uuthiga we mokuninga omukulilwa? Tango, ngele ngoka a ningi ohepele okwa landitha po epya lye ndyoka lya li uuthiga we, omukulili gweyana okwa li e na okulongitha iimaliwa yokulanda epya ndyoka kondando ndjoka ya li hayi uthwa kuule woomvula ndhoka dha hupu ko sigo omOndigolomumvo tayi landula. (Levitikus 25:25-27) Oku shi ninga okwa li haku shunitha pevi ongushu yiiniwe ye. Kakele kaashono, ando Rut okwa li a mona okanona okamati, ando epya ndyoka lya kulilwa otali ka thigululwa kokamati hoka, ihe hakomupambele gumwe gwolela gwomukulili gweyana ngoka.
7-13 FEBULUALI
OMALIKO OKUZA MOOHAPU DHAKALUNGA | 1 SAMUEL 1–2
“Mbumbulila Jehova omutima gwoye okupitila megalikano”
Okwa galikana Kalunga tashi zi komutima
12 Kungawo Hanna okwa tulile po aapiya yaKalunga oshiholelwa shi na ko nasha negalikano. Jehova ota hiya aapiya ye ayehe ya popye naye ya manguluka, taye mu lombwele omaudhigu gawo ngaashi okanona taka popi nomuvali gwako ke mu inekela. (Lesha Episalomi 62:8; 1 Aatessalonika 5:17.) Omuyapostoli Petrus okwa li a nwethwa mo a nyole oohapu ndhika tadhi hekeleke kombinga yokupopya naJehova megalikano a ti: “Mu tsikeni iimpwiyu yeni ayihe, oshoka oye omusilishimpwiyu gweni.” — 1 Pet. 5:7.
Okwa galikana Kalunga tashi zi komutima
Hanna okwa li u uvite ngiini konima sho a mbumbulile Jehova omutima gwe noku mu galikana ketsalihangano lye? Ehokololo otali ti: “Nena okwa zi po e ta li ye ina sa we oluhodhi.” (1 Sam. 1:18) O-The Jerusalem Bible, movelise oyo tuu ndjoka, oya ti: “Ka li we a yemata.” Hanna okwa li u uvite a pepelelwa. Okwa li a fa a tsikulula ko omutenge komapepe ge noku gu tsika komapepe gaHe yomegulu ngoka e na oonkondo e mu vule. (Lesha Episalomi 55:22.) Mbela opu na ngaa uupyakadhi Jehova itaa vulu oku wu humbata? Nandonando!
Omaliko gomOmbiimbeli
Omanenedhiladhilo okuza membo lyaSamuel gwotango
2:10 — Omolwashike Hanna a li a galikana opo Jehova a ‘pe omukwaniilwa gwe oonkondo’ sho pwa li kaapu na omukwaniilwa gwopantu ta pangele Israeli? Kutya Aaisraeli oya li taya ka kala ye na omukwaniilwa gwopantu, osha li sha hunganekwa mOmpango yaMoses. (Deuteronomium 17:14-18) Mehunganeko lye ndyoka a hunganeka sho a li e li pokusa, Jakob okwa ti: “Ondhimbo yuukwaniilwa [endhindhiliko lyoonkondo dhopaukwaniilwa] itayi zi mo muJuda.” (Genesis 49:10) Kakele kaashono, Jehova okwa li a popi kombinga yaSara — yinakulululwa yAaisraeli — a ti: ‘Moluvalo lwe otamu ka za aakwaniilwa.’ (Genesis 17:16) Osha yela ano kutya Hanna okwa li a galikana kombinga yomukwaniilwa gwomonakuyiwa.
14-20 FEBULUALI
OMALIKO OKUZA MOOHAPU DHAKALUNGA | 1 SAMUEL 3–5
“Jehova oku na ondjaalela”
Jehova Omunankondoadhihe, ihe oku na ondjaalela
3 Samuel okwa tameke ta “longele Omuwa” ketsalihangano, sho omushona lela. (1 Sam. 3:1) Uusiku wumwe manga Samuel a li a kotha, oku uvu oshinima shoka inaa uva nale. (Lesha 1 Samuel 3:2-10.) Oku uvu ewi tali ithana edhina lye. Molwaashono okwa li ta dhiladhila kutya Omuyambimukuluntu, Eli, oye te mu ithana, Samuel okwa matukile kuye, e ta ti: “Ongame nguka wi ithana.” Eli okwe mu lombwele kutya ine mu ithana. Sho Samuel a uvu ishewe ewi tali mu ithana iikando iyali, Eli okwa dhimbulula kutya Kalunga oye ti ithana Samuel. Onkene okwa lombwele Samuel nkene e na okuyamukula, na Samuel okwe shi ningi. Omolwashike Jehova inaa lombwela Samuel kutya oye te mu ithana, oshikando shotango e mu ihololele okupitila momuyengeli? Ombiimbeli inayi shi popya, ihe omukalo moka iiningwanima ya hololwa, otagu ulike kutya osha li sha simana Jehova a yaalele omugundjuka Samuel. Ngiini mbela?
Jehova Omunankondoadhihe, ihe oku na ondjaalela
4 Lesha 1 Samuel 3:11-18. Ompango yaJehova otayi lombwele aanona ya simaneke aakuluntu, unene tuu omuleli gwoshilongo. (Eks. 22:28; Lev. 19:32) Mbela oto dhiladhila kutya Samuel ka li a tila sho a yi kuEli ongula onene, e te mu lombwele nuulaadhi etumwalaka lyaKalunga lyepangulo? Hasho nando! Ehokololo otali tu lombwele kutya Samuel “okwa li a tila okuhokololela Eli emoniko ndyoka.” Nonando ongawo, oku ulukile Eli sha yela kutya oye a li ti ithana Samuel. Onkee ano, Eli okwa pula Samuel e mu hokololele emoniko ndyoka. Eli okwa ti: “Hokololele ndje adhihe ndhoka a ti.” Opo nduno, Samuel “okwe mu lombwele adhihe.”
Omaliko gomOmbiimbeli
Omanenedhiladhilo okuza membo lyaSamuel gwotango
3:3 — Mbela Samuel okwa li a kothela shili mUuyapukilela? Aawe, hasho. Samuel okwa li Omulevi gwomezimo kaali shi lyaasaaseri lyAakehat. (1 Ondjalulo 6:33-38) Omolwaashoka ka li a pitikwa a ‘ye mo a tale iinima iiyapuki.’ (Numeri 4:17-20) Oshitopolwa awike shuuyapuki shoka Samuel a li e na uuthemba okulongitha, osha li ehale lyetsali. Moka omo a li a lala. Osha yela kutya Eli okwa li wo ha lala pehala lyontumba mehale. Uutumbulilo “moka mwa li oshikethahangano oshiyapuki,” osha yela kutya otau ulike kehala moka mwa li etsalihangano.
21-27 FEBULUALI
OMALIKO OKUZA MOOHAPU DHAKALUNGA | 1 SAMUEL 6–8
“Olye omukwaniilwa gwoye?”
Uukwaniilwa waKalunga
Taya pula omukwaniilwa gwopantu. Omimvo 400 lwaampoka okuza sho Aaisraeli ya tembuka mo muEgipiti nosho wo konima yomimvo 800 okuza sho Kalunga a ningi ehangano naAbraham, Aaisraeli oya li ya pula ya pewe omukwaniilwa gwopantu oye e ya wilike, ngaashi iigwana yilwe yi na aakwaniilwa yopantu. Sho ya pula ya pewe omukwaniilwa, kungawo oya li ya tindi Jehova a kale omukwaniilwa gwawo. (1Sam 8:4-8) Odhoshili kutya aantu oya li ya tegelela uukwaniilwa wu dhikwe po kuKalunga metsokumwe neuvaneko lye ndyoka a adhika nale u uvanekela Abraham naJakob. Oya adhika nale ye na einekelo meuvaneko ndyoka Jakob a li u uvaneka, sho a li pokusa li na ko nasha naJuda (Gen 49:8-10), moohapu dhaJehova ndhoka a li a lombwele Israeli konima sho ya zi muEgitipi (Eks 19:3-6), mehangano lyOmpango (Deut 17:14, 15) nosho wo nokuli moshitopolwa shetumwalaka ndyoka Kalunga a lombwele Bileam a popye (Num 24:2-7, 17). Yina yaSamuel, Hanna ngoka a li omudhiginini, naye okwa li a popi etegameno ndyoka megalikano lye. (1Sam 2:7-10) Nonando ongawo, Jehova ka li naanaa a holola “oshiholekwa” she shi na ko nasha nUukwaniilwa noka li u ulike kutya otawu ka dhikwa po uunake, otawu ka thikama po ngiini nopeni, ngele okombanda yevi nenge omegulu. Onkee ano, oshigwana shoka osha li shi inenepeke, sho sha li tashi pula omukwaniilwa gwopantu.
Okwa li i idhidhimike nonando okwa li ta yematekwa
Ndhindhilika nkene Jehova a li a yamukula Samuel sho a galikana kuye. Okwa ti: “Pulakena kwaashihe shoka aantu taye ku lombwele. Hangoye ya tindi; ongame ya tindi, ndaa kale we omukwaniilwa gwawo.” Oohapu ndhika kadha li tuu tadhi hekeleke kuSamuel! Ihe ondhino oyi thike peni ndjoka oshigwana sha li tashi ulukile Kalunga Omunankondoadhihe! Jehova okwa li a lombwele omupolofeti gwe a londodhe Aaisraeli kutya omukwaniilwa gwopantu ote ke ya pula oshindji. Sho Samuel e shi ya lombwele, oye mu kondjitha ya ti: “Aawe! Tse otwa hala omukwaniilwa.” Molwaashoka okwa li ha vulika kuKalunga, Samuel okwa yi e ta gwayeke omukwaniilwa ngoka Jehova a hogolola. — 1 Sam. 8:7-19.
Omukalo gwaJehova gwokupangela ogwa yukipalithwa
9 Ondjokonona oyu ulike uushili womalondodho gaJehova. Okupangelwa komukwaniilwa gwopantu okwa li kwe etele oshigwana shaIsraeli uupyakadhi wa kwata miiti, unene tuu sho omukwaniilwa a kala kee shi we omudhiginini. Ngele otwa tala koshiholelwa shoka shAaisraeli, itashi kumitha sho momukokomoko gwoomvula epangelo ndyoka li li momake gaantu mboka kaaye shi Jehova inaaye shi pondola mokweetela aantu uuwanawa tawu kalelele. Dhoshili, aanapolotika yamwe ohaya kongo okulalekwa nuuyamba kuKalunga moonkambadhala dhawo dhokukonga ombili negameno, ihe ongiini Kalunga ta ka laleka nuuyamba mboka inaaya taamba ko omukalo gwe gwokupangela? — Eps. 2:10-12.
Omaliko gomOmbiimbeli
Omolwashike wu na okuninginithwa?
13 Opo wu ninge Onzapo yaJehova, tango owu na okwiitedhulula nokuninginithwa. Eitedhululo onkatu ndjoka yi na okuningwa nehalo ewanawa kwaangoka a ninga etokolo nomutima gwe aguhe, a landule Kristus Jesus. Aantu mboka haya ningi ngawo, ohaya etha iilonga yawo iiwinayi mbyoka ya li haya ningi nale, e taya tokola okuninga shoka shu uka momeho gaKalunga. MOmanyolo, iityalonga yOshihebeli noyOshigreka yi na ko nasha neitedhululo, oyi na eityo lyokugaluka nenge okutanauka. Okukatuka onkatu ndjoka otashi ti okwiigaluluka nokuthiga po ondjila ya puka, e to galukile kuKalunga. (1 Aakwaniilwa 8:33, 34) Eitedhululo otali pula ‘iilonga mbyoka tayi holola kutya owi itedhulula.’ (Iilonga 26:20) Otashi tu pula tu thige po elongelokalunga liifundja nokukatuka metsokumwe niipango yaKalunga nosho wo oku mu igandjela oye awike. (Deuteronomium 30:2, 8-10; 1 Samuel 7:3) Eitedhululo ohali eta elunduluko mokudhiladhila kwetu, momalalakano getu nomiikala yetu. (Hesekiel 18:31) Ohatu ‘igaluluka,’ sho tatu pingene po omaukwatya ngoka kaage shi gopakalunga nomuntu gwetu omupe. — Iilonga 3:19; Aaefeso 4:20-24; Aakolossa 3:5-14.
28 FEBULUALI–6 MAALITSA
OMALIKO OKUZA MOOHAPU DHAKALUNGA | 1 SAMUEL 9–11
“Petameko Saul okwa li omwiifupipiki noku na ondjele”
Kala muukumwe nomeifupipiko naKalunga koye
11 Dhiladhila kwaashoka sha li sha ningilwa omukwaniilwa Saul. Sho a li omugundjuka, okwa li e na eifupipiko. Okwa li e shi omangambeko ge nokwa li nokuli a kakadhala okutaamba ko iinakugwanithwa ya gwedhwa po. (1 Sam. 9:21; 10:20-22) Ihe mokweendela ko kwethimbo, Saul okwa tameke okuninga iinima mbyoka inaa pitikwa e yi ninge. Okwa tameke okuulika iikala mbyoka iiwinayi, nziya sho a ningi omukwaniilwa. Pompito yimwe sho a li a tegelela omuhunganeki Samuel, ka li i idhidhimike. Pehala lyokwiinekela Jehova neifupipiko, oye a hupithe oshigwana she peuthwathimbo lye, Saul okwa yamba efikiloyambo, nonando ka li e na uuthemba woku shi ninga. Oshilanduliko? Saul ka li we a hokiwa kuJehova nomokweendela ko kwethimbo, okwe mu kutha uuthemba wokukala omukwaniilwa. (1 Sam. 13:8-14) Otashi ka kala pandunge ngele otwi ilongo sha koshiholelwa shika tashi londodha nokuyanda okuninga iinima mbyoka inaatu pitikwa oku yi ninga.
Shoka tashi tu kwathele kaatu kanithe ombepo yeiyambo
8 Omukwaniilwa Saul oku li oshiholelwa kutse shankene okwiihola mwene taku vulu okukutha po ombepo yetu yeiyambo. Saul okwa li a tameke okupangela kwe e na eifupipiko. (1 Sam. 9:21) Okwa li a tindi okugeela Aaisraeli mboka ya li ye li ompinge nuukwaniilwa we, nokuli nando okwa li ta vulu okukala u uvite kutya oshi li pauyuuki okupopila ondondo ye ndjoka a pewa kuKalunga. (1 Sam. 10:27) Omukwaniilwa Saul okwa li a taamba ko ewiliko lyombepo yaKalunga mokukwatela komeho Israeli molugodhi moka ya li ya sindi Aayammoni. Konima okwa li u ulike neifupipiko kutya oya sindana omolwaJehova. — 1 Sam. 11:6, 11-13.
w95-E 12/15 ep. 10, okat. 1
Aayammoni — Aantu mboka ya li ya galulile uuwanawa nuuwinayi
Aayammoni pehala lyokupandula olukeno ndoka yu ulukilwa kuJehova, oya li ya galulile oshigwana she uuwinayi. Jehova ka li i idhidhimikile iihuna mbyoka. Ombiimbeli otayi ti: “Saul sho e shi uvu, ombepo yaKalunga oye ya muye, nokwa geye noonkondo.” Kohi yewiliko lyombepo yaKalunga, Saul okwa gongele etangakwiita lyaantu 330 000 e taya ponokele Aayammoni. Mboka ya li ya ‘hupu po oya li ya thigwa ya halakana, nashaa ngoka okwi iyukile.’ — 1 Samuel 11:6, 11.
Omaliko gomOmbiimbeli
Omanenedhiladhilo okuza membo lyaSamuel gwotango
9:9 — Uutumbulilo “ngoka ti ithanwa ngashingeyi omuhunganeki, okwa li hi ithanwa shito omumonikokule” otau ti shike? Oohapu ndhoka otashi vulika tadhi ulike kutya sho aahunganeki ya ningi ya simana pethimbo lyaSamuel nopethimbo lyaakwaniilwa muIsraeli, oshitya “omumoni” osha li sha pingenwa po koshitya “omuhunganeki.” Samuel okwa talika ko oye gwotango gwomezimo lyaahunganeki. — Iilonga 3:24.