Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
2-8 MEI
OMALIKO OKUZA MOOHAPU DHAKALUNGA | 1 SAMUEL 27–29
“Ondungedhiladhilo yaDavid yomiita”
7 Sho David a zi muNob, okwa li a yi ontuku kuGat shomuFilisti, hoka kwa li haku kala nale Goliat. Oshilando shoka osha li ookilometa 40 lwaapono kuuninginino waNob. David okwa li a ka konga uuholameno kuAkish, omukwaniilwa gwaGat, oshoka otashi vulika a li ta dhiladhila kutya itashi ka kala oshipu kuSaul e ye ko e mu konge. Ihe aapiya yomukwaniilwa gwaGat oya li ye mu dhimbulula mo nziya. Sho David e shi mono mo kutya oye mu dhimbulula, okwa li a “tila omukwaniilwa Akish noonkondo.” — 1 Samuel 21:10-12
8 Sho Aafilisti ya dhimbulula mo David, oya li ye mu kwata po noku mu fala komukwaniilwa Akish. Otashi vulika pethimbo mpoka opo David a li a toto episalomi moka a li i indile Jehova tashi zi komutima, a ti: “Omahodhi gandje owe ga pungula.” (Episalomi 56:8 nosho wo enyolo lyopombanda) Kungawo, okwa li a holola einekelo lye kutya Jehova ite ke mu dhimbwa nando moluhodhi lwe, ihe ote ke mu gamena noku mu sila oshimpwiyu pahole. David okwa li wo a kotokele omukwaniilwa gwaFilisti, mokwiifethitha a fa omuyanankwengu. Sho David a etwa pomukwaniilwa Akish, omukwaniilwa ngoka okwa li a ganda aapiya ye, molwaashono okwa li ta dhiladhila kutya oye mu etela “omuyanankwengu.” David okwa li a tidhwa mo muGat, nokungawo okwa li a hupu meso. Osha yela kutya Jehova okwa li a yambeke ondungedhiladhilo yaDavid. — 1 Samuel 21:13-15.
Aalumentu aagundjuka, ongiini tamu vulu okukala mwi inekelwa kuyalwe?
8 Natu taleni keshongo lilwe ndyoka David a li a taalele. Konima sho a gwayekwa a ninge omukwaniilwa, David okwa li e na okutegelela omimvo odhindji manga inaa langekwa po pambelewa e li omukwaniilwa gwaJuda. (1 Sam. 16:13; 2 Sam. 2:3, 4) Sho a li a tegelela a langekwe po, oshike sha li she mu kwathele i idhidhimike? Pehala lyokukala a teka omukumo, David okwa kala ta gandja eitulomo kwaashoka ta vulu okuninga. Pashiholelwa, sho a li ontauki moshitopolwa shAafilisti, David okwa kala i ipyakidhila nokukondjitha aatondi yaIsraeli. Mokuninga ngawo, okwa li a gamene oongamba dhoshitopolwa shaJudea. — 1 Sam. 27:1-12.
it-2-E ep. 245, okat. 6
Iifundja
Nonando Ombiimbeli itayi popile iifundja, shoka itashi ti kutya omuntu oku na okupopya uuyelele womondjila kaantu mboka inaaya pumbwa oku wu tseya. Jesus Kristus okwa gandja omayele taga ti: “Shoka oshiyapuki inamu shi gandja koombwa, opo dhaa ka galuke e tadhi mu ponokele. Iimona yeni inamu yi umbila iingulu, opo yaa ke yi lyatagule nomakondo gayo.” (Mat 7:6) Nomolwaashono Jesus poompito dhimwe ka li ha gandja uuyelele awuhe nenge omayamukulo gu ukilila, uuna e wete kutya otashi vulika shi mu fale moshiponga. (Mat 15:1-6; 21:23-27; Joh 7:3-10) Sha faathana, Abraham, Isak, Rahab naElisha nayo poompito dhimwe kaya li ya gandja uuyelele awuhe kwaamboka kaaye shi aalongeli yaJehova, opo ya yande oshiponga. — Gen 12:10-19; ontop 20; 26:1-10; Jos 2:1-6; Jak 2:25; 2Aak 6:11-23.
Omaliko gomOmbiimbeli
Mbela oonakusa otaya vulu okukwathela aantu mboka ye na omwenyo?
Dhiladhila kombinga yaashoka. Ombiimbeli oya popya kutya peso omuntu oha ‘shuna montsi moka a zile’ nosho wo kutya ‘oompangela dhe ohadhi hulu po.’ (Episalomi 146:4) Saul naSamuel ayehe oya li ye shi shi kutya Kalunga okwa pangula okukala nekwatathano noompulile. Osho molwaashoka, Saul oye a li nale a kwatele komeho iilonga yokutidha mo oonganga noompulile adhihe moshilongo. — Levitikus 19:31.
Dhiladhila nawa kombinga yoshinima shoka. Ando Samuel omudhiginini oko a li natango ihe molupe lwombepo, mbela ita ka yona ompango yaKalunga nokulongela kumwe noompulile opo a ka tsakaneke Saul? Jehova okwa li a tindi okupopya naSaul. Mbela ompulile ndjoka oya li ya kondjitha Kalunga Omunankondoadhihe a kwatathane naSaul okupitila muSamuel ngoka a sa nale? Aawe. Osha yela kutya omuntu ngoka kwa li taku tiwa kutya anuwa oSamuel ka li nando omupolofeti omudhiginini gwaKalunga. Okwa li ombepo ombwiinayi yoompwidhuli, ndjoka ya li tayi iningitha ya fa Samuel ngoka a li a sa.
9-15 MEI
OMALIKO OKUZA MOOHAPU DHAKALUNGA | 1 SAMUEL 30–31
“Etha Jehova Kalunga koye e ku kumike”
Tila Jehova, opo wu kale omunelago!
12 Etilokalunga lyaDavid kalya li owala lye mu kwathela a yande okulonga shoka inaashi uka, ihe olya li wo lye mu koleka a katuke oonkatu noku ninge omatokolo gopandunge, nonando okwa li moonkalo oondhigu. Uule womumvo noomwedhi ne, David naakwiita ye oya li ya yi ontuku Saul noku ka konga uuholameno muZiklag, oshitopolwa shAafilisti shokomikunda. (1 Samuel 27:5-7) Pompito yimwe, sho David naakwiita ye ya li ya yi pehala lyontumba, Aayamaleki oya li ya ponokele oshilando shoka nokukwata po aakiintu, aanona nosho wo iimuna yawo, e taye shi fike po. Sho David naakwiita ye ya galuka nokumona shoka sha ningwa po, oya lili. Nziya aakwiita yaDavid, oya li ye mu yematela noya li ya hala oku mu dhipaga nomamanya. Nonando shoka osha li shu uvitithe David uudhigu, ka li a teka omukumo. (Omayeletumbulo 24:10) Etilokalunga lye olya li lye mu inyengitha a ‘kumikwe kOmuwa’ okupitila megalikano. Kekwatho lyaKalunga, David naakwiita ye oya li ya landula Aayamaleki, e taya kutha ko iinima yawo ayihe nosho wo aantu yawo mboka ya li ya kwatwa po. — 1 Samuel 30:1-20.
Jehova ohe tu gamene tu ka mone ehupitho
14 David okwa pita muudhigu oundji monkalamwenyo ye. (1 Sam. 30:3-6) Ombiimbeli otayi popi kutya Jehova okwa li e wete shoka David e li musho. (Lesha Episalomi 34:18; 56:8.) Kalunga oku shi wo nawa omaiyuvo getu. Uuna twa “dhengwa pevi” nenge twa “kanitha etegameno,” Jehova oha hedha popepi natse. Oshinima shoka otashi tu pe etegameno. David okwi imbi a ti: “Otandi nyanyukwa nokutanta omolwesilohenda lyoye. Ou wete okuhepekwa kwandje nowa tseya uudhigu wandje.” (Eps. 31:7) Kakele kokukala owala e shi uudhigu wetu, Jehova ohe tu kwathele wo. Ohe tu hekeleke noku tu tsa omukumo. Omukalo gumwe moka he shi ningi okupitila mokugongala kwopaKriste.
Omaliko gomOmbiimbeli
Omanenedhiladhilo okuza membo lyaSamuel gwotango
30:23, 24. Etokolo ndyoka tali popiwa moka lya kankamena kuNumeri 31:27, otali ulike kutya Jehova okwa yalula mboka taya longo iilonga yokukwathela megongalo. Ano kutya nduno oshike tatu longo, natu shi ‘longe nomwenyo aguhe ongaamboka itaatu longele aantu, ihe Omuwa ye mwene.’ — Aakolossa 3:23.
16-22 MEI
OMALIKO OKUZA MOOHAPU DHAKALUNGA | 2 SAMUEL 1–3
“Oshike tatu ilongo ‘montakumandjimbo’?”
w00 7/1 ep. 9, okat. 9
Simanekeni mboka haye mu pangele
9 David mbela okwa li a lindimana sho a li ta ningwa nayi? ‘Aayugi ya hala omwenyo gwandje’ David osho i igidha kuJehova. (Epsalmi 54:5) Okwa popi kuJehova tashi zi komutima gwe ta ti: “Kalunga kandje, hupitha ndje maatondi yandje . . . Aanankondo ya ngundumanene ndje, nando ndaa na oondjo, ngaye ine ninga sha, Omuwa. Oyo taa matuka yi ilongekidha ngaye inandi yona sha, penduka, u tsakaneke ndje, ngu u tale mo!” (Epsalmi 59:2-5) Owa kala nale mbela wu uvite sha faathana — kutya ino ningila sha sha puka omuntu ngoka e na oonkondopangelo, ihe okwa tsikile noku ku pa uupyakadhi? David ina etha okusimaneka Saul. Peso lyaSaul, David pehala lyokuligola a nyanyukwa, okwa toto eimbilo lyokunika uuthiga tali ti: “Saul naJonatan, aaholike mbo noonakuhokwa nomokukala ye nomwenyo . . . Oyo ya li ye na oontuku dhi vule dhoontsa, noonkondo dhi vule dhoonime. One aafuko yaIsrael — lileni Saul.” (2 Samuel 1:23, 24) Oshiholelwa shokusimaneka kwashili omugwayekwa gwaJehova kashi shi tuu oshiwanawa, nokuli nando David oye kwa li a ningwa nayi kuSaul!
Uukengeleledhi owa lunda pethimbo lyetu
8 Ombiimbeli oya popya iiholelwa oyindji yoohandimwe mboka ya li aadhiginini. Natu taleni iyali yomuyo, nokutala kutya otatu ilongo mo shike. Shotango oshaJonatan, omulumentu ngoka a li omudhiginini kuDavid. Jonatan osheeli shomukwaniilwa Saul, okwa li e na ompito yokulandula he muukwaniilwa. Ihe okwa li e shi shi nawa kutya Jehova okwa hogolola David a ninge omukwaniilwa gwaIsraeli. Jonatan okwa li a simaneka etokolo lyaJehova ‘nokwa panga uukuume wa kola naDavid.’ Pehala lyoku mu tala ko e li omutondi, Jonatan okwa li u uvaneke kutya ota ka longela kumwe naye. Okwa pe David iinima ye ngaashi, elwaakani, egongamwele, uutati nekwamo, naashoka osha li euliko kutya okwa gandja uukwaniilwa kuye. (1 Sam. 18:1-4) Jonatan okwa li a ‘tsu David omukumo.’ Okwa li a hupula nokuli omwenyo gwe sho a li ta popile David koshipala shahe Saul. Molwaashoka Jonatan okwa li omudhiginini, okwa lombwele David a ti: “Ngoye oto ka ninga omukwaniilwa gwaIsraeli nangame ote kala elenga lyoye lyotango.” (1 Sam. 20:30-34; 23:16, 17) Sho Jonatan a si, David okwa li a nika uuthigwa noonkondo nokwe mu imbile ontakumandjimbo molwaashoka okwa li e mu hole. — 2 Sam. 1:17, 26.
Omaliko gomOmbiimbeli
it-1-E ep. 369, okat. 2
Omumwameme nenge mentu gwameme
Oshitya “mentu gwameme” nenge omumwameme, oshu ukitha wo kwaamboka ye li ookuume ketu notu na elalakano limwe. Pashiholelwa, omukwaniilwa Hiram gwaTiro okwa li ithana omukwaniilwa Salomo, omukwawo, ihe hamolwaashoka andola ya li oombushe miilonga noye na ondondo yi thike pamwe. Ihe otashi vulika omolwomapindikathano ge na ko nasha nomiti dhomisedeli nosho wo iinima yilwe yotempeli. (1Aak 9:13; 5:1-12) David okwa nyola a ti: “Osho opala sho opalelela aantu ayehe ngele taa kala ye holathane ngaashi aamwayinathana.” Shoka oshe tu kwathela tu mone kutya aantu yahe yimwe nenge yayina yimwe, hayo owala haya vulu okukala ye na ombili nuukumwe. (Eps 133:1) Onkee, David okwa li i ithana Jonatan mentu gwameme, omoluukuume mboka ya li ye na nosho wo elalakano limwe, ihe hamolwaashoka ando ya li aamwayinathana panyama. (2Sam 1:26) Ookuume mboka ye na omaukwatya niikala ya faathana kutya nduno iiwinayi, ohaya vulu okwiithanwa aamwayina. — Omayel 18:9.
23-29 MEI
OMALIKO OKUZA MOOHAPU DHAKALUNGA | 2 SAMUEL 4–6
“Kala wu na uumbanda wokuyemateka Jehova”
Omanenedhiladhilo okuza membo lyaSamuel omutiyali
6:1-7. Nonando David okwa li e na elalakano ewanawa, onkambadhala ye okutembudha oshikethahangano e shi enditha metemba oya li ya yono ompango yaKalunga, noshizemo osha li oshiwinayi. (Eksodus 25:13, 14; Numeri 4:15, 19; 7:7-9) Okukwata Oshikethahangano kwaUsa okwa li ku ulike kutya omalalakano omawanawa ihaga lundulula shoka Kalunga ta pula.
Jehova oha longo aluhe shoka shu uka
20 Kaleka momadhiladhilo kutya Ussa okwa li e na okukala e shi Ompango nawa. Oshikethahangano okwa li tashi thaneke okukala po kwaJehova. Ompango oya li ya popya kutya kasha li shi na okukwatwa kwaamboka inaaya pewa uuthemba woku shi ninga, nelondodho ndyoka olya li lya yela kutya aayoni otaya ka geelwa neso. (Numeri 4:18-20; 7:89) Onkee ano, okutembudhwa kwoshiketha oshiyapuki kakwa li ku na okutalwa ko osima yowala. Osha yela kutya Ussa okwa li Omulevi (nonando ka li omuyambi); onkee okwa li e na okukala e shi Ompango nawa. Kakele kaashono, omimvo dha pita Oshikethahangano osha li sha lundululilwa kegumbo lyahe, omolwegameno. (1 Samuel 6:20–7:1) Hoka osha kala ko omimvo 70, sigo David a tokola oku shi tembudha ko. Onkee okuza kuunona, Ussa okwa li e shi oompango dhi na ko nasha nOshikethahangano.
Jehova oha longo aluhe shoka shu uka
21 Ngaashi sha tumbulwa nale, Jehova oha tala momutima. Molwaashono Oohapu dhe otadhi ti kutya Ussa okwa katuka, “moluusama we,” Jehova otashi vulika a mona iikala yokwiihola mwene mbyoka inayi hololwa mehokololo ndyoka. Mbela otashi vulika Ussa a li e na uuntsa, sha hala okutya, e na egamo lyokutaaguluuka omangambeko gu uka? (Omayeletumbulo 11:2) Mbela okuwilika montaneho Oshikethahangano, shoka sha kala sha pungulwa maandjawo, okwa li she mu ningitha i itumbaleke? (Omayeletumbulo 8:13) Mbela Ussa okwa li kee na eitaalo opo a dhiladhile kutya oshikaha shaJehova oshifupi noitashi vulu okukankamitha oshiketha oshiyapuki, shoka sha li tashi thaneke okukala po kwe? Kutya nduno okwa li ta dhiladhila shike, otatu vulu okukala nuushili kutya shoka Jehova a ningi, osha li shu uka. Otashi vulika a li a mono mo sha momutima gwaUssa, shoka she mu ningitha a tokole meendelelo. — Omayeletumbulo 21:2.
Omaliko gomOmbiimbeli
w96 4/1 ep. 30, okat. 1
Omutenge Gwoye Gu Umbila Aluhe kuJehova
David e li omukwaniilwa naye okwa li e na okuhumbata oshinakugwanithwa shaashika. Einyengo lye otali ulike kutya nokuli mboka ye na ekwatathano ewanawa naJehova omathimbo gamwe otaya vulu yi inyenge nayi koonkalo dhimwe oondhigu. Tango David okwa geye. Opo nduno okwa kala a tililila. (2 Samuel 6:8, 9, OB-1986) Ekwatathano lye naJehova oku mu inekela olya li lya makelwa unene. Mpaka opwa li pu na ompito sho sha li tashi monika sha fa a nyengwa okuumbila omutenge gwe kuJehova, sho a li inaa landula omalombwelo ge. Mbela omathimbo gamwe otashi vulika osho hashi kala ngeyi kutse? Ohatu pe mbela Jehova ondjo molwomaupyakadhi ngoka taga holoka po molwaashoka inatu pulakena komalombwelo ge? — Omayeletumbulo 19:3.
30 MEI–5 JUNI
OMALIKO OKUZA MOOHAPU DHAKALUNGA | 2 SAMUEL 7–8
“Jehova okwa li a ningi ehangano naDavid”
w10-E 4/1 ep. 20, okat. 3
‘Uukwaniilwa woye otawu ka kala sigo aluhe’
Shoka David a li a halelela okuninga, osha li sha gumu Jehova. Kalunga okwa li a ningi ehangano naDavid ngoka a li he mu longele nuudhiginini kutya mezimo lye omwa li tamu ka za gumwe ngoka ta ka lela sigo aluhe, naashoka osha li metsokumwe nehunganeko. Natan okwa li a lombwele David euvaneko lyaKalunga, ndyoka tali ti: “Oto kala u na oluvalo aluhe, notii ka kalekela po oshilongo shoye sigo aluhe. Ezimo lyoye itali hulu po.” (Ovelise 16) Olye ta kala Omuthigululi gwaaluhe gwehangano ndika, ano ngoka ta ka pangela sigo aluhe? — Episalomi 89:20, 29, 34-36.
w10-E 4/1 ep. 20, okat. 4
‘Uukwaniilwa woye otawu ka kala sigo aluhe’
Jesus Omunasareti, okwa li gwomezi lyaDavid. Omuyengeli okwa li a tseyitha okuvalwa kwaJesus a ti: “Omuwa Kalunga ote mu ningi omukwaniilwa ongaashi he David. Oye ta ningi omukwaniilwa gwoluvalo lwaJakob sigo aluhe; nuukwaniilwa we kau na mpoka tau ka hula po.” (Lukas 1:32, 33) Onkee ano, ehangano ndyoka Jehova a li a ningi naDavid, olya li lya gwanithilwa Jesus Kristus. Nonando ongawo, Jesus ka li a hogololwa kaantu a ninge omupangeli, ihe okwa hogololwa kuKalunga okupitilila meuvaneko ndyoka lye mu pe uuthemba wokupangela sigo aluhe. Otu na okudhimbulukwa kutya omauvaneko gaKalunga ohaga gwanithwa po aluhe. — Jesaja 55:10, 11.
Kala wu na eitaalo lya kola mUukwaniilwa waKalunga
14 Jehova okwa li u uvanekele omukwaniilwa David gwaIsraeli shonale oshinima shontumba. Euvaneko nyoka okwe li ningi okupitila mehangano naDavid. (Lesha 2 Samuel 7:12, 16.) Jehova okwa ningi ehangano ndika naDavid pethimbo lyelelo lye muJerusalem, sho e mu uvanekele kutya Mesiasa ota ka za moluvalo lwe. (Luk. 1:30-33) Kungeyi Jehova okwa gandja uuyelele wokondandalunde kombinga yoluvalo nokukoleka kutya omwana gwaDavid oye ‘ngoka a hogololwa’ a ka kuutumbe koshipangelapundi shUukwaniilwa wopaMesiasa. (Hes. 21:25-27) Uukwaniilwa waDavid ‘otawu kala’ sigo aluhe kohi yelelo lyaJesus. David ‘ota ka kala aluhe e na oluvalo, nepangelo lye otali ka kala ko, manga etango li li ko tali minikile.’ (Eps. 89:34-37) Epangelo lyopaMesiasa itali ka longa nando uulingilingi, niilonga yalyo otayi ka kalelela.
Omaliko gomOmbiimbeli
it-2-E ep. 206, okat. 2
Omasiku gahugunina
Ehunganeko lyaBileam. Manga Aaisraeli inaa ya mevi lyeuvaneko, omuhunganeki Bileam okwa li a lombwele Balak, omukwaniilwa gwAamoabi a ti: “Ihe manga inaandi ya, otandi ku lombwele shoka Aaisraeli taa ka ningila aantu yoye monakuyiwa. . . . Onyothi otayi piti muJakob, ondhimbo yuukwaniilwa otayi yeluka mulsrael. Oye ta nyanyagula po aawiliki yaMoab, nota kombo po oluvalo aluhe lwaSet.” (Num 24:14-17) Egwanitho lyotango lyehunganeko, “onyothi” otayi thaneke omukwaniilwa David, ngoka a sindi Aamoabi. (2Sam 8:2) Onkee ano, shoka otashi ulike kutya megwanitho lyehunganeko ndyoka, “monakuyiwa” nenge tu tye pehulilo lyomasiku, oga tameke naDavid ta ningi omukwaniilwa. Molwaashoka David okwa li ta thaneke Jesus e li Omukwaniilwa gwopaMesiasa, ehunganeko ndika olyu ukitha wo kuJesus pethimbo ta ka sinda aatondi ye. — Jes 9:7; Eps 2:8, 9.
6-12 JUNI
OMALIKO OKUZA MOOHAPU DHAKALUNGA | 2 SAMUEL 9–10
“David okwa li u ulike ohole yomuule”
w06-E 6/15 ep. 14, okat. 6
Odhoshili kutya oto vulu okukala wa nyanyukwa
David okwa nyola a ti: “Aanelago oomboka ye na oshimpwiyu noohepele.” Okwa tsikile ko a ti: “Omuwa ote ya kwatha, uuna ye li muudhigu. Omuwa ote ya gamene e te ya shigi kiiponga; ote ya kaleke nawa.” (Episalomi 41:1, 2) Ohole ndjoka David a li u ulukile Mefiboshet, ngoka a li oshilema nokwa li omwanamati gwaJonatan kuume kaDavid, oyi li oshiholelwa oshiwanawa shokuulukila oohepele olukeno. — 2 Samuel 9:1-13.
Omanenedhiladhilo okuza membo lyaSamuel omutiyali
9:1, 6, 7. David okwa li a gwanitha po omauvaneko ge. Natse otu na okukambadhala okugwanitha po shoka tu uvaneka okuninga.
w02 3/1 ep. 10, okat. 10
Oya li yi idhidhimikile okwega monyama yawo
10 Konima yomimvo dhontumba, omukwaniilwa David okwa li a sile Mefiboshet ohenda, molwaashoka David okwa li e hole unene Jonatan. David okwe mu pe iinima ayihe yaSaul nokwa li a lombwele Ziba, omupiya gwaSaul, a sile oshimpwiyu epya. David okwa li wo a lombwele Mefiboshet a ti: “[Oto] ka lya aluhe koshililo shandje.” (2 Samuel 9:6-10) Osha yela kutya ohole nosho wo olukeno lwaDavid, oya li ya hekeleke Mefiboshet noku mu kwathela a kale a pepelelwa kuuwehame we. Shoka kashi shi tuu oshiilongomwa oshiwanawa! Natse otu na okusila ohenda mboka taya kondjo nokwega monyama.
Omaliko gomOmbiimbeli
it-1-E ep. 266
Oombenzi
Aantu oyendji yopethimbo lyonale, mboka ya li ya gama kombinga yokUuzilo, mwa kwatelwa Aaisraeli, oya li ya lenga oombenzi noye dhi tala ko dhi li oshinima sha simana kaalumentu. Ompango yaKalunga ndjoka a li a pa Aaisraeli, oya li yi indika aantu kaaya kulule omazamutse gawo noombezi dhawo “omapulu” nokaaye dhi kulule ko dha pwa ko. (Lev 19:27; 21:5) Shika osha li shi indikwa, molwaashoka osha li omukalo gwopalongelokalunga kaapagani yamwe.
13-19 JUNI
OMALIKO OKUZA MOOHAPU DHAKALUNGA | 2 SAMUEL 11–12
“Ino etha omahalo omawinayi ge ku pangele”
Oto vulu okuyanda okuyulwa koomwigo dhaSatana!
10 Olwiho olwa ningitha omukwaniilwa David a dhimbwe shoka Jehova e mu pa, mwa kwatelwa uuyamba, esimano noku sinde aatondi ye oyendji. David okwa li a zimine kutya omagano nenge uuwanawa mboka a ningilwa kuKalunga “owundji unene!” (Eps. 40:5) Ihe pompito yimwe, David okwa li a dhimbwa ashihe shoka Jehova e mu ningila. Shoka oshe mu ningitha a kale inaa gwanenwa we kwaashoka e na, e ta kala a hala oshindji shi vulithe pwaashoka Jehova e mu pa. Nonando David okwa li e na aakulukadhi ya konda pugumwe, okwa tameke okukala a hala omukulukadhi gwomulumentu gulwe. Omukulukadhi ngoka oBatseba, nomulumentu gwe okwa li Uria, Omuheti. David okwa yi momilalo naBatseba, e ta ningi etegelelo. Shoka David a ningi osha li oshiwinayi, ihe okwa ningi oshinima shilwe oshiwinayi shi vulithe mpoka sho a dhipagitha Uria. (2 Sam. 11:2-15) Mbela David okwa li ta dhiladhila shike? Mbela okwa li ta dhiladhila kutya Jehova ke mu wete? Nonando David okwa kala nokulongela Jehova uule womimvo odhindji, okwe etha okwiihola mwene nolwiho ku mu ningithe a yone, shoka she ke eta iilanduliko iiwinayi. Shinyanyudha, mokweendela ko kwethimbo David okwa zimine kutya okwa yona, e ti iyele ombedhi. Ka li tuu a pandula sho Jehova e mu dhimine po! — 2 Sam. 12:7-13.
Omolwashike nongiini twa pumbwa okukala tu na ehalo lyokuvulika kuJehova?
15 Jehova ka li owala a tula po David a kale omutse gwegumbo lye mwene, ihe nogwoshigwana ashihe shaIsraeli. E li omukwaniilwa, David okwa li e na oonkondopangelo odhindji. Omathimbo gamwe, okwa li a longitha nayi oonkondopangelo ndhoka, e ta ningi omapuko ga kwata miiti. (2 Sam. 11:14, 15) Ihe okwa li a vulika kuJehova, mokutaamba ko epukululo lye. Okwa li a mbumbulile Jehova omutima gwe megalikano. Okwa ningi ngaashi ta vulu a vulike komayele gaJehova. (Eps. 51:1-4) Shimwe ishewe, ka li owala i ifupipike a taambe ko omayele omawanawa gaalumentu, ihe nogaakiintu wo. (1 Sam. 19:11, 12; 25:32, 33) David okwa li i ilongo komapuko ge, nokwa ningi okulongela kwe Jehova oshinima sha simanenena monkalamwenyo ye.
Etha oompango nomakotampango gaKalunga ga dheule eiyuvo lyoye
7 Inatu pumbwa okumona iihuna omolwiilanduliko yokupogola oompango dhaKalunga, opo tu ilonge omupetuko. Otatu vulu okwiilonga sha komapuko gayalwe ngoka ga nyolwa mOmbiimbeli. Omayeletumbulo 1:5 otayi ti: “Omayeletumbulo ngaka otaga gwedhele kontseyo yaanongo nokugandja ewiliko kaanandunge.” Eeno, ohatu mono omayele omawanawa okuza kuKalunga, uuna tatu lesha nokutedhatedha komahokololo gaantu mboka ya popiwa mOmbiimbeli. Pashiholelwa, dhiladhila kiihuna mbyoka omukwaniilwa David a li i iyetele, konima sho a taaguluka oshipango shaKalunga, e ta hondele naBatseba. (2 Sam. 12:7-14) Uuna tatu lesha nokutedhatedha kehokololo ndika, otashi vulika tu ipule ngeyi: ‘Omukwaniilwa David okwa li ta vulu okuninga po shike, opo a yande uupyakadhi mboka i iyetele, sho a hondele naBatseba?’ Ando ongame nda li nda taalelwa keshongo ndyoka, andola onda ningi po shike? Mbela ando onda fadhuka po ngaashi Josef nenge ando ondi igandja ngaashi David? (Gen. 39:11-15) Okutedhatedha kiilanduliko iiwinayi mbyoka hayi zi mokuyona, otaku ke tu kwathela tu ‘tonde uuwinayi, nokuhola uuyuuki.’
Omaliko gomOmbiimbeli
it-1-E ep. 590, okat. 1
David
Jehova okwa li a mono ashihe shoka sha li sha ningwa po. Ando Jehova okwe ethele eyono lyaDavid naBatseba li ungaungiwe nalyo kaapanguli yopantu kohi yOmpango yaMoses, ando ayehe yaali oya dhipagwa. Shimwe ishewe, ando okanona kawo komoluhondelo hoka ka adhika inaaka valwa, ando nako oka si pamwe nayina. (Deut 5:18; 22:22) Nonando ongawo, Jehova oye mwene a li a ungaunga neyono ndyoka nokwa li a sile David ohenda, omolwehangano lyUukwaniilwa. (2Sam 7:11-16) Osha yela kutya okwa li e shi ningi wo, molwaashoka David naye okwa li u ulukile yalwe olukeno (1Sam 24:4-7; yelekanitha Jak 2:13) nosho wo kutya Kalunga okwa li a mono eitedhululo lye. (Eps 51:1-4) Nonando ongawo, oya li ya mono iilanduliko yontumba. Jehova okwa li a popi okupitila momuhunganeki Natan a ti: “Otandi ku ganene kutya otandi ka pendutha gumwe gwomegumbo lyoye mwene, ngoka te ke ku etela uudhigu.” — 2Sam 12:1-12.
20-26 JUNI
OMALIKO OKUZA MOOHAPU DHAKALUNGA | 2 SAMUEL 13–14
“Okwiiholamwene kwaAmnon okwe mu fala moshiponga”
it-1-E ep. 32
Absalom
Okudhipagwa kwaAmnon. Molwaashoka omumwayinakadhona gwaAbsalom, Tamar, okwa li e na ondjelo ombwanawa, osha li sha ningitha Amnon a pwile mohole naye. Amnon okwi ifethitha ta alukwa, e ta tumu Tamar a ka talwe e ye e mu telekele nokwa li e mu kwata onkonga. Lwanima, ohole onene ndjoka a li e hole Tamar, oya shituka uutondwe nokwe mu tidhi po puye. Okuza mpono, Tamar okwa tuula onguwo ye ndjoka ya li hayi mu ndhindhilikitha mo e li omukadhoneelela omwana gwomukwaniilwa nokwi igundu omutoko momutse, sigo a tsakanekwa kuAbsalom. Absalom okwa li e shi mono mo nziya kutya Tamar okwa piyaganekwa, tashi vulika komumwayina Amnon ngoka a kala e mu hala. Nonando ongawo, Absalom okwa li a lombwele omumwayinakadhona Tamar kaa tamaneke Amnon, nokwa li e mu fala kegumbo lye. — 2Sam 13:1-20.
Kala wu na eipangelo
11 MOmbiimbeli omu na iiholelwa tayi londodha, yaantu mboka kaaya li ye na eipangelo shi na ko nasha nomilalo. Oya popya wo kombinga yiilanduliko yinikitha oluhodhi, mbyoka hayi etithwa kokwaaneipangelo. Kehe gumwe e li monkalo ya fa yaKim, onawa a dhiladhile kombinga yomulumentu omugundjuka egoya, ngoka a popiwa mOmayeletumbulo ontopolwa 7. Dhiladhila wo kwaashoka Amnon a ningi, niilanduliko iiwinayi mbyoka ye etithwa keihumbato lye. (2 Sam. 13:1, 2, 10-15, 28-32) Aavali otaya vulu okukwathela aanona yawo ya kale ye na eipangelo nuunongo shi na ko nasha nekwatathano lyopaihole. Otaya vulu oku shi ninga pelongelokalunga lyawo lyuukwanegumbo, taya longitha iiholelwa yomOmbiimbeli.
it-1-E ep. 33, okat. 1
Absalom
Konima yomimvo mbali, ethimbo lyokukulula oonzi osho lya thiki, na Absalom okwa li a unganeke oshituthi muBaal Hazor, shoka sha li ookilometa 22 muumbangalantuzilo waJerusalem. Okwa li a hiya oyanamati yomukwaniilwa nosho wo David ye mwene. Sho he David a tindi ko, Absalom okwe mu thiminike opo a pitike Amnon, osheeli she, a ye pamwe naye. (Omayel 10:18) Manga ye li pomatelekela, Absalom okwa lombwele aapiya ye kutya ngele oya mono Amnon “a kolwa,” naye mu dhipage. Oyanamati yalwe yaDavid oya shuna kuJerusalem, omanga Absalom okwa fadhuka po pamwe nahekulu Omusiria, e taya yi komukwaniilwa gwaGeshur, kuuzilo wefuta lyaGalilea. (2Sam 13:23-38) Kungawo, egongamwele ndyoka lya popiwa komuhunganeki Natana, olya li lye ya ‘mezimo’ lyaDavid nolya tsikile okukala moka sigo okusa kwe. — 2Sam 12:10.
Omaliko gomOmbiimbeli
g04-E 12/22 ep. 8-9
Eopalo ndyoka lya simanenena
Mepingathano naashono, natu kundathaneni kombinga yaAbsalom, omwanamati gwaDavid. Nonando Absalom okwa li a shitika, lwanima okwa ka kala e na omaukwatya omawinayi. Ombiimbeli oye mu popi tayi ti: “MuIsrael kamwa li nando omuntu a simana a shitika ngaashi Absalom; ka li e na oshipwe okuza komutse sigo ompadhi.” (2 Samuel 14:25) Nonando ongawo, esimano lyaAbsalom olya li lye mu ningitha a tukulile he oshipotha nokwa li a hala okwiininga omukwaniilwa pehala lyahe. Okwa li nokuli a lala noohonda dhahe. Oshizemo, Absalom okwa li a geelwa kuKalunga nokwa li a si eso enyanyalithi. — 2 Samuel 15:10-14; 16:13-22; 17:14; 18:9, 15.
Mbela owa panda shoka Absalom a ninga? Hasho nando. Komeho gaayihe, okwa li a ningi oshinima oshitondithi. Nonando okwa li a shitika, shoka kasha li she mu keelele a kale e na uuntsa, a kale kee shi omudhiginini nenge kaa se. Mepingathano naashono, mOmbiimbeli omu na iiholelwa oyindji yaantu mboka ya li ye na oondunge nosho wo omaukwatya omawanawa, nonando inaya popiwa kutya oya li ye na ondjelo ya tya ngiini. Shika otashi tu ulukile kutya shoka sha li sha simanenena, uuntu wawo womeni.
27 JUNI–3 JULI
OMALIKO OKUZA MOOHAPU DHAKALUNGA | 2 SAMUEL 15–17
“Absalom okwa li a tukula oshipotha, omoluuntsa”
it-1-E ep. 860
Aatetekeli
Osha li omukalondjigilile omatembakwiita gomukwaniilwa ga tetekelwe kaathindikili, opo ya longekidhe nokutseyitha okuya komukwaniilwa noku mu kwathela mukehe shimwe. (1Sam 8:11) Absalom naAdonia oya li ya holele omukalo ngoka gwesimaneko, mokwiimonena omatembakwiita gopaumwene nosho wo ongundu yaathindikili 50. — 2Sam 15:1; 1Aak 1:5; tala AATHINDIKILI.
Longela Kalunga kemanguluko
5 MOmbiimbeli omu na iiholelwa yaantu oyendji mboka ya li ye na enwethomo ewinayi. Gumwe gwomuyo oAbsalom, omwanamati gwomukwaniilwa David. Absalom okwa li e na ondjelo ombwanawa. Ihe konima yethimbo okwa li a kwatwa kolwiho lwa fa lwaSatana. Absalom okwa li a hala okuyuga ko uukwaniilwa kuhe, oshinima shoka a li inaa pewa. Okwa li te shi ningi momukalo gwiineya, sho iningi a fa e na ko nasha nAaisraeli nongo a hala oku ya kwathela, nokwa kunu muyo omadhiladhilo kutya he, omukwaniilwa David, ke na nayo. Absalom okwa li a lundile he, nokwi iningi a fa e hole oshigwana. Okwa ningi naanaa shoka sha li sha ningwa kOndiaboli moshikunino shaEden. — 2 Sam. 15:1-5.
it-1-E ep. 1083-1084
Hebron
Konima yomimvo dhontumba, omwanamati gwaDavid, Absalom, okwa li a galukile kuHebron nokwa li a ningi oompangela dhokukwata ko uukwaniilwa wahe. (2Sam 15:7-10) Otashi vulika e ya muHebron, omolwondjokonona yasho ya simana sho sha li oshilandopangelo shaJuda. Otashi vulika wo a li e shi hogolola omo a tamekele uukwaniilwa we, molwaashoka moshilando moka omo a valelwa. Lwanima, omutekulu gwaDavid, omukwaniilwa Rehoboam, okwa li a tungulula oshilando Hebron. (2Ondjal 11:5-10) Konima sho Juda sha hanagulwa po kAababilonia naasho Aajuda ya galuka muupongekwa, Aajuda yamwe oya li ya kala muHebron (Kiriatarba). — Neh 11:25.
Omaliko gomOmbiimbeli
Mbela owu na uushili awuhe?
11 Natse pauhandimwe otashi vulika tu ningilwe okwaanuuyuuki, omolwaantu mboka taya taandelitha omahokololo kombinga yetu, ngoka kaage na uuyelele wi ihwa po. Natu taleni koshiholelwa shomukwaniilwa David naMefiboshet. David okwa li a ulukile Mefiboshet olukeno nokwe mu pe omapya agehe gahekulu, Saul. (2 Sam. 9:6, 7) Konima yaashono, David oku uvu ehokololo lyiifundja kombinga yaMefiboshet. Pehala lyokutala ngele shoka u uvu oshoshili, David okwa tokola a kuthe Mefiboshet iinima ye ayihe. (2 Sam. 16:1-4) Hugunina, sho David a ka popya naMefiboshet, David okwa mono kutya epuko olye nokwa galulile Mefiboshet iinima ye. (2 Sam. 19:24-29) Andola David okwa li tango a kutha ethimbo a konge uuyelele, opo a tale ngele ehokololo ndyoka olyoshili, ando Mefiboshet ina ningilwa okwaanuuyuuki hoka.