Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
© 2022 Christian Congregation of Jehovah’s Witnesses
2-8 JANUALI
OMALIKO OKUZA MOOHAPU DHAKALUNGA | 2 AAKWANIILWA 22–23
“Omolwashike twa pumbwa okukala aaifupipiki?”
Josia okwa li e hole Ompango yaKalunga
Omuyambi omukuluntu Hilkia okwa li a adha ondhingambo yOmpango yaJehova motempeli. Otashi vulika Ompango ndjoka oyo ndji ya li ya nyolwa kuMoses. Amushanga gwomukwaniilwa Josia, Shafan, okwe eta ondhingambo ndjoka yOmpango kuJosia. Shafan okwe yi lesha mokule. Sho Josia u uvu Ompango tayi leshwa, okwe shi mono kutya nani oshigwana osha kala itaashi vulika kuJehova uule womimvo odhindji. Omukwaniilwa Josia okwa lombwele Hilkia a ti: ‘Jehova okwe tu geela unene. Indeni mu ke mu pule kutya natu ninge shike.’ Jehova okwa yamukula okupitila momuhunganeki omukiintu, edhina lye Hulda a ti: ‘Aajuda oye ekelehi ndje. Otandi ke ya geela, ihe hapethimbo sho Josia e li omukwaniilwa, molwaashoka ye okwi ishonopeke.’
Kala wu na uulaadhi nongulu yaJehova
20 Pethimbo lyiilonga yokwoopalekulula otempeli ndjoka ya li ya unganekwa komukwaniilwa Josia, omuyambi omukuluntu Hilkia okwa li a “mono embo lyompango yOmuwa, ndjoka Omuwa a gandjele kuMoses.” Embo ndyoka okwa li e li pe Shafan, amushanga gwomukwaniilwa, e te li leshele omukwaniilwa Josia. (Lesha 2 Ondjalulo 34:14-18.) Mbela shoka osha li sha etitha iizemo yini? Nziya omukwaniilwa okwa li a tuula oonguwo dhe, molwaashoka okwa li a nika oluhodhi nokwa li a lombwele aalumentu ya galikane kuJehova. Jehova okwa li a yamukula egalikano ndyoka okupitila momuhunganeki omukiintu gwedhina Hulda, a ti kutya okwa pangula oonkatu dhimwe dhopalongelokalunga dhAajuda. Josia okwa li a ningi oonkambadhala dha mana mo, opo a hulithe po elongelo lyiikalunga, na Jehova okwa li a hokwa Josia nonando okwa li a hunganeka kutya oshigwana ashihe osha li tashi ka adhika kiilanduliko yinikitha oluhodhi. (2 Ondjal. 34:19-28) Oshike tatu ilongo moshinima shika? Nopwaa na omalimbililo, otwa hala okulandula oshiholelwa shaJosia. Otu na okukala hatu katuka nziya metsokumwe newiliko lyaJehova, notu na okudhiladhila twa mana mo koshiholelwa tashi londodha shi na ko nasha naashoka tashi vulu okuningwa po, ngele otwa etha uushunimonima nosho wo okwaanuudhiginini yi imbwange mumwe nelongelokalunga lyetu. Onkee ano, otatu vulu okukala nuushili kutya Jehova ita ka dhimbwa uulaadhi wetu wu na ko nasha nelongelokalunga lyashili, ngaashi owala a li e shi ningile Josia.
Omaliko gomOmbiimbeli
w01-E 4/15 ep. 26, okat. 3-4
Oto vulu okupondola kutya nduno eputuko lyoye olya li ngiini
Nonando Josia okwa li a piti moonkalo dhiyemateka pethimbo a li okanona, okwa li a tsikile okulonga shoka sha uka momeho gaJehova. Onkee ano, Ombiimbeli oya popi okupondola kwe mokupangela, ya ti: “Kakwa li omukwaniilwa e mu tetekela e mu fa, ngoka a longele Omuwa nomutima gwe aguhe noondunge dhe adhihe noonkondo dhe adhihe nokuvulika kompango ayihe yaMoses, noinaku landula we omukwaniilwa e mu fa.” — 2 Aakwaniilwa 23:19-25.
Oshiholelwa shaJosia itashi tsu tuu omukumo mboka tashi vulika ya li yi idhidhimikile omaupyakadhi, pethimbo ya li aanona! Oshike tatu ilongo koshiholelwa she? Oshike sha li sha kwathele Josia a hogolole ondjila ya uka noku yi dhiginina?
9-15 JANUALI
OMALIKO OKUZA MOOHAPU DHAKALUNGA | 2 AAKWANIILWA 24–25
“Kala wa kotokela ethimbo ndika tu li”
w01 3/1 ep. 3, okat. 2
Esiku lyaJehova lyepangulo oli li popepi!
2 Kapu na omalimbililo kutya okuhunganeka kwaSefania okwa li kwa koleke ontseyo yomugundjuka Josia yokutseya kutya elongelokalunga inaali yogoka oli na okukuthwa mo muJuda. Ihe oonkatu dhomukwaniilwa mokuyogola oshilongo kelongelokalunga lyiifundja inadhi komba po uukolokoshi awuhe mokati koshigwana nenge dhi dhime po ngaa nee nando omayono gahekulululwa, omukwaniilwa Manasse, ngoka a li a ‘dhipagitha aantu kaaye na ndjo.’ (2 Aakwaniilwa 24:3, 4; 2 Ondjalulo 34:3) Onkene, esiku lyaJehova lyepangulo olya li tali ke ya shili.
Omanenedhiladhilo okuza membo lyaJeremia
Omumvo 607 K.E.N. ogwa li omumvo omuti-11 gwokupangela kwaSedekia. Omukwaniilwa gwaBabilonia, Nebukadnezzar, okwa li a kondeke Jerusalem uule woomwedhi 18. Mesiku etiheyali lyomwedhi omutitano, momumvo omuti-19 gwokupangela kwaNebukadnezzar, Nebusaradan, ondjayi yomatanga gaalangeli, oya li ye “ya” nenge tu tye ya thiki kuJerusalem. (2 Aakwaniilwa 25:8) Nebusaradan otashi vulika a li a konakona onkalo nokuninga ompangela yokuya meni lyaJerusalem, manga a li montanda ndjoka ya li ya unga kondje yaJerusalem. Konima yomasiku gatatu, momwedhi ogwo tuu ngoka, okwe “ya” kuJerusalem nenge tu tye okwa yi meni lyoshilando. Opo nduno, okwe shi fike po nomulilo. — Jeremia 52:12, 13.
Omaliko gomOmbiimbeli
Omanenedhiladhilo okuza membo lyAakwaniilwa aatiyali
24:3, 4. Omolwondjo yombinzi yaManasse Jehova “ina vula nando okukuthila po” Aajuda. Kalunga oha simaneke ombinzi yaamboka yaa na ondjo. Otatu vulu okukala neinekelo kutya Jehova ota ka katuka onkatu okuhanagula po mboka haya tilehi ombinzi yaa na ondjo. — Episalomi 37:9-11; 145:20.
16-22 JANUALI
OMALIKO OKUZA MOOHAPU DHAKALUNGA | 1 ONDJALULO 1–3
“Ombiimbeli — Embo li li paushili, ihe kali shi lyoongano”
w09-E 9/1 ep. 14, okat. 1
Mbela Adam naEva aantu ya li ko shili?
Tala pashiholelwa kondjokonona yomazimo gAajuda, ndjoka yi li mOndjalulo yotango ontopolwa 1 sigo 9 nosho wo mEvaangeli lyaLukas ontopolwa 3. Uuyelele mbuka uundhindhilikwedhi owa kwatela mo omusholondondo gwomazimo gepipi eti-48 nosho wo eti-75. MuLukas omwa nyolwa ezimo lyaJesus Kristus, omanga mOndjalulo mwa nyolwa ezimo lyaakwaniilwa naayambi yoshigwana shaIsraeli. Omisholondondo adhihe mbali odha kwatela mo omadhina gaamboka ya tseyika nawa, ngaashi Salomo, David, Jakob, Isak, Abraham, Noa naAdam. Omadhina agehe ngoka ge li mo, ogaantu ya li ko shili. Onkee naAdam ngoka a popiwa momisholondondo adhihe ndhoka mbali, okwa li omuntu a li ko shili.
Noowa nEyelu ehokololo lyoshili
Omahokololo gaali gomOmbiimbeli ngoka taga gandja omusholondondo gwomazimo otagu ulike kutya Noowa oko a li shili. (1 Ondjalulo 1:4; Lukas 3:36) Esra naLukas mboka ya nyola omisholondondo ndhoka oya li ya pyokoka mokukonga uuyelele. Lukas okwa li a landula omusholondondo gwezimo lyaJesus sigo opuNoowa.
w09-E 9/1 ep. 14-15
Mbela Adam naEva aantu ya li ko shili?
Pashiholelwa, tala kelongo limwe lyOmbiimbeli ndyoka li holike unene kwaamboka ye hole okuya kongeleka, ano ekuliloyambo. Shi ikolelela kelongo ndika, Jesus Kristus okwa gandja omwenyo gwe gwa gwanenena gu ninge iikulila, opo aantu ya hupithwe muulunde wawo. (Mateus 20:28; Johannes 3:16) Ngaashi tu shi shi, ekulilo oli li ofuto ndjoka ya eleka okufutila po shoka sha kanithwa. Nomolwaashono Ombiimbeli ya popya Jesus e li ‘iikulila ya gwana.’ (1 Timoteus 2:6, yelekanitha NW) Otashi vulika tu ipule tatu ti, ya gwana shike? Ombiimbeli oya yamukula tayi ti: “Ngaashi aantu ayehe ye na okusa omoluukumwe wawo naAdam, osho wo aantu ayehe otaa ka yumudhwa omolwuukumwe wawo naKristus.” (1 Aakorinto 15:22) Omwenyo gwa gwanenena ngoka Jesus a yamba po, opo a mangulule aantu mboka haya vulika, ogwa gwana okufutila po omwenyo gwa gwanenena ngoka gwa kanithwa kuAdam, ngoka a yono moshikunino shaEden. (Aaroma 5:12) Osha yela kutya ando Adam ka li ko shili, ando ekuliloyambo lyaKristus osima yowala.
Omaliko gomOmbiimbeli
it-1-E ep. 911, okat. 3-4
Omusholondondo gwomazimo
Omadhina gaakiintu. Poompito dhimwe, omadhina gaakiintu oga li haga nyolelwa mondjalulo yomazimo, uuna pu na etompelo lyopandjokonona lyoku shi ninga. MuGenesis 11:29, 30, omwa popiwa Sarai (Sara) netompelo ndyoka kutya oluvalo ndoka lu uvanekwa olwa li talu ka za muye, ihe hamomukulukadhi gulwe gwaAbraham. Milka otashi vulika edhina lye lya popiwa moovelise ndhoka, molwaashono okwa li yinakulu yaRebekka, omukulukadhi gwaIsak. Shoka osha ulike kutya ezimo moka mwa za Rebekka olya pambathana naAbraham, molwaashoka Isak ka li ta vulu okuhokana omukulukadhi a za miigwana yilwe. (Gen 22:20-23; 24:2-4) MuGenesis 25:1, omwa popiwa edhina Ketura ngoka lwanima a ka ninga omukulukadhi gwaAbraham. Shino otashi ulike kutya Abraham okwa ka hokana ishewe konima sho Sara a si, nonokutya okwa kala natango e na oonkondo dholuvalo uule womimvo dhi vulithe po 40, konima sho ya ningilwa oshikumithalonga kuJehova. (Rom 4:19; Gen 24:67; 25:20) Otashi ulike wo ekwatathano lyAamidia nosho wo lyomihoko dhi ili nodhi ili dhAarabia muIsraeli.
Lea, Rakel nosho wo aadhike yaJakob pamwe noyanamati, nayo oya popiwa mOmbiimbeli. (Gen 35:21-26) Shika oshe tu kwathela tu uve ko nkene Kalunga a li a ungaunga noyanamati mboka. Omolwomatompelo ga faathana, momusholondondo gwomadhina gomazimo otatu a dhamo wo omadhina gaakiintu yalwe. Uuna aakiintu ya pumbwa okuthigulula sha, omadhina gawo oga li wo haga kwatelwa mo. (Num 26:33) Odhoshili kutya Tamar, Rahab naRut oye li aakiintu ya tongomana. Kombinga yaakiintu ayehe mboka yatatu, opu na oshinima oshindhindhilikwedhi kombinga yankene ye ya mo mezimo lyoohekulululwa yaMesiasa, Jesus Kristus. (Gen 38; Rut 1:3-5; 4:13-15; Mat 1:1-5) Omadhina gamwe gaakiintu mboka ya popiwa momusholondondo gwomazimo, otaga adhika mOndjalulo yotango 2:35, 48, 49; 3:1-3, 5.
23-29 JANUALI
OMALIKO OKUZA MOOHAPU DHAKALUNGA | 1 ONDJALULO 4–6
“Omagalikano gandje ohaga holola shike kombinga yandje?”
w10-E 10/1 ep. 23, okat. 3-7
“Ongoye nguka ho uvu omagalikano”
Jabez okwa li omulumentu e hole okugalikana. Okwa li a tameke okugalikana ta pula Kalunga e mu yambeke. Opo nduno, okwa pula iinima itatu mbyoka ya holola kutya oku na lela eitaalo.
Tango, Jabez okwa li i indile Kalunga a ti: “Pe ndje evi enene.” (Ovelise 10) Omulumentu ngoka a simana ka li ha yugu ko omavi gaantu, mokukala ando e na olwiho lwiinima mbyoka yi niwe kuyalwe. Shoka a li i indile tashi zi komutima, otashi vulika shi na ko nasha unene naantu pehala lyevi. Otashi vulika a kala nokupula Jehova moshitopolwa she mu kale mu na ombili, opo yi nanene aantu oyendji ya longele Kalunga kashili.
Oshitiyali, Jabez okwa li i indile ‘oshikaha’ shaKalunga shi kale pamwe naye. Oshikaha shaKalunga otashi thaneke oonkondo dhe, ndhoka ha longitha opo a kwathele aalongeli ye. (1 Ondjalulo 29:12) Opo a mone shoka i indila, Jabez okwa li a tala kuKalunga ngoka ihaa nyengwa okukwathela mboka ye na eitaalo muye. — Jesaja 59:1.
Oshititatu, Jabez okwa li a galikana a ti: “Gamene ndje kuuwinayi auhe mboka tau vulu okweetela ndje uuwehame.” Uutumbulilo “okweetela ndje uuwehame” otashi vulika tawu gandja edhiladhilo kutya Jabez ka li a galikana ando a yande uupyakadhi, ihe okwe shi ningi opo kaa kale we a nika oluhodhi nenge kaa sindwe kuuwinayi.
Egalikano lyaJabez olya li lya ulike kutya okwa li ti ipula nelongelokalunga lyashili noku na eitaalo nosho wo einekelo mOmuuvi gwomagalikano. Jehova okwa li i inyenge ngiini? Ehokololo ndyoka li li paufupi olya hulitha noohapu tadhi ti: “Kalunga okwe mu pe shoka i indile.”
Omaliko gomOmbiimbeli
Omanenedhiladhilo okuza membo lyOndjalulo yotango
5:10, 18-22. Pethimbo lyomukwaniilwa Saul, omazimo ngoka ga li ga gama kuuzilo waJordan, oga li ga sindi Aahagari, nonando omazimo ngoka oga li ge vulike lwaali momuyalu kAahagari. Osho sha li ngaaka, oshoka aalumentu aalaadhi yomazimo ngoka oya kala yi inekela muJehova nokukonga ekwatho kuye. Natu kale tu na einekelo thiluthilu muJehova, sho tatu tsikile okukondja molugodhi lwetu lwopambepo, mokukondjitha oongundu ndhoka dhi tu vule momuyalu. — Aaefeso 6:10-17.
30 JANUALI–5 FEBULUALI
OMALIKO OKUZA MOOHAPU DHAKALUNGA | 1 ONDJALULO 7–9
“Oto vulu okugwanitha po iinakugwanithwa mbyoka iidhigu kekwatho lyaJehova”
Omanenedhiladhilo okuza membo lyOndjalulo yotango
9:26, 27. Aalangeli yopomiyelo Aalevi, oya li ya pewa oshinakugwanithwa sha kwata miiti. Oya li ya pewa iipatululo yopomiyelo dhokuya mehala eyapuki lyotempeli. Oya li ye shi okwiinekelwa mokweegulula omiyelo esiku kehe. Natse otwa inekelelwa oshinakugwanithwa shokuya kaantu miitopolwa yetu noku ya kwathela ye ye ya longele Jehova. Mbela katu na okuulika kutya otu shi okwiinekelwa ngaashi aalangeli yopomiyelo Aalevi?
Mbela ito vulu okukala ngaashi Pinehas uuna wa taalela omashongo?
Pinehas okwa li e na oshinakugwanithwa oshidhigu komapepe ge muIsraeli shonale, ihe okwa li e shi pondola moonkalo oondhigu omolwuulaadhi we, uunongo nosho wo okukala i inekela muKalunga. Jehova okwa li a hokwa Pinehas omolwoonkambadhala dhe ndhoka a li a ningi opo a sile egongalo lyaKalunga oshimpwiyu. Konima yomimvo 1 000 lwaampono, Esra okwa li a nwethwa mo a nyole ta ti: “Pinehas yaEleasar — OMUWA na kale pamwe naye — okwa li nale omukuluntu gwawo.” (1 Ondjal. 9:20) Oohapu ndhoka nadhi gwanithilwe ayehe mboka taya wilike oshigwana shaKalunga kunena nosho wo Aakriste ayehe mboka haye mu longele nuudhiginini.
Omaliko gomOmbiimbeli
Natu imbileni Jehova!
6 Eeno, okupitila maapolofeti ye, Jehova okwa li a lombwele aalongeli ye ye mu hambelele nomaimbilo. Aaimbi yomezimo lyaasaaseri oya li nokuli ya kuthwa mo miilonga mbyoka Aalevi yalwe ya li ye na okulonga opo ya vule okukala ye na ethimbo lya gwana oku ga tota, nuunene tuu ethimbo lyokwiiyenditha po. — 1 Ondjal. 9:33.
6-12 FEBULUALI
OMALIKO OKUZA MOOHAPU DHAKALUNGA | 1 ONDJALULO 10–12
“Koleka ehalo lyoye lyokuvulika kuJehova”
“Longa ndje okugwanitha ehalo lyoye”
12 David okwa li e hole omakotampango ngoka ge li momanyolo nokukala metsokumwe nago. Okwe tu tulila po wo oshiholelwa oshiwanawa moshinima shoka. Tala kwaashoka sha li sha ningwa po sho David a li a hala “omeya gokunwa ga za momuthima gwoposheelo shaBetlehem.” Aakwiita ye yatatu oya li ya tula oomwenyo dhawo moshiponga sho ya taakana moshilando shoka sha li sha kwatwa ko kAafilisti noya li ye mu etele omeya okuza momuthima ngoka. Ihe ‘David ka li a hala oku ga nwa, okwe ga tile owala koshipala shOMUWA omayambo.’ Omolwashike David a li inaa hala oku ga nwa? Okwa popi a ti: “Itandi vulu oku ga nwa, ote ningi ndi nwe ombinzi yaamboka ya li ya hupula oomwenyo dhawo.” — 1 Ondjal. 11:15-19.
13 David okwa li e shi shoka sha nyolwa mOmpango kutya ombinzi oyi na okuyambelwa Jehova, ihe kayi na okuliwa. Okwa li wo e shi kutya omolwashike shi na okuningwa. David okwa li e shi kutya “omwenyo gwomomayulu ogwa kala mombinzi.” Shoka a li e etelwa kashi shi ombinzi, ihe omeya. Omolwashike nduno David a li a tindi oku ga nwa? Okwa li e shi nawa ekotampango ndyoka Kalunga a tula po. Omeya ngoka David okwa li e ga tala ko ga fa ombinzi yi na ondilo yaakwiita mboka yatatu. Onkee ano, okwa li a tindilile oku ga nwa nokwe ga tilehi pevi. — Lev. 17:11; Deut. 12:23, 24.
Etha oompango nomakotampango gaKalunga ga dheule eiyuvo lyoye
5 Opo tu mone uuwanawa moompango dhaKalunga, otwa pumbwa okuninga oshindji kaashi shi owala oku dhi lesha noku dhi tseya. Otwa pumbwa okukala tu dhi hole noku dhi simaneka. Ombiimbeli otayi ti: “Tondeni uuwinayi, holeni uuyuuki.” (Amos 5:15) Ongiini tatu vulu oku shi ninga? Shoka sha simana, otwa pumbwa okwiilonga okutala ko iinima ngaashi Jehova he yi tala ko. Pashiholelwa, natu tye ando iho kotha nawa. Ye ndohotola te ku lombwele wu lye iikulya yontumba, wu ninge omadhewo nowu ninge omalunduluko galwe monkalamwenyo. Konima sho we shi ningi, owa mono kutya oshe ku kwathela. Oto ka kala wu uvite ngiini? Odhoshili kutya oto ka pandula ndohotola ngoka, sho e ku kwathele.
6 Momukalo gwa faathana, Omushiti okwe tu pa oompango ndhoka tadhi vulu oku tu gamena kiilanduliko mbyoka hayi zi mokuyona notu hwepopaleke onkalamwenyo yetu. Dhiladhila owala kuuwanawa mboka hatu mono, uuna tatu landula oompango dhOmbiimbeli. Otadhi tu lombwele tu yande okufundja, okukengelela, okuyaka, oluhondelo, elongithonkondo nuumpulile. (Lesha Omayeletumbulo 6:16-19; Eh. 21:8) Uuna tatu mono omayambeko ngoka haga zi mokulonga shoka Jehova a hokwa, ohatu mu pandula, nohole yetu yoku mu hola noyokuhola oompango dhe, ohayi koko.
Omaliko gomOmbiimbeli
it-1-E ep. 1058, okat. 5-6
Omutima
Longela Jehova “nomutima aguhe.” Omutima gwo gwenegwene aguhe ohagu pumbwa okukala gu li monkalo ombwanawa, opo gu longe nawa, ihe omuntu ota vulu okukala e na omitima mbali pathaneko. David okwa li a galikana a ti: “Longa ndje, ndi ku simaneke nomwenyo aguhe,” shoka tashi ulike kutya omuntu ota vulu okukala itaa longele Jehova nomutima aguhe. (Eps 86:11) Kungawo omuntu ota li “oompanda mbali” nota longele Kalunga nokayenye okashona. (Eps 119:113; Eh 3:16) Omuntu ota vulu wo okukala e na “omitima mbali” (NW), kokutya ta kambadhala okulongela aawa yaali nenge tu tye ta popi iifundja ye pethimbo opo tuu mpoka ota dhiladhila oshinima shilwe. (1Ondjal 12:33; Eps 12:2) Jesus okwa li a aneka pomutenya thiluthilu mboka ye na omitima mbali, ano aafudhime. — Mat 15:7, 8.
Omuntu ngoka a hala okunyanyudha Kalunga ke na okukala ta li oompanda mbali nenge e na omitima mbali, ihe oku na oku mu longela nomutima aguhe. (1Ondjal 28:9) Shika otashi pula oonkambadhala dha mana mo, oshoka omutima omunamakoto nomuntu oku na egamo lyokudhiladhila uuwinayi. (Jer 17:9, 10; Gen 8:21) Iinima mbyoka tayi tu kwathele tu tsikile okulongela Jehova nomutima aguhe, ongaashi: okugalikana tashi zi komutima (Eps 119:145; Oontak 3:41), okukonakona pandjigilile Oohapu dhaKalunga (Esra 7:10; Omayel 15:28), okukutha ombinga nuulaadhi miilonga yokuuvitha (yelekanitha Jer 20:9) nosho wo okweendathana naamboka haya longele Jehova nomutima aguhe. — Yelekanitha 2Aak 10:15, 16.
13-19 FEBULUALI
OMALIKO OKUZA MOOHAPU DHAKALUNGA | 1 ONDJALULO 13–16
“Okulandula omalombwelo gaJehova, ohashi tu kwathele tu pondole”
w03 5/1 ep. 19, okat. 12
Oho pula mbela to ti: “Jehova oku li peni?”
12 Konima sho ompungulilo yehangano ya shunithwa kuIsrael noya kala ya pungulwa oomvula odhindji kuKiriat-Jearim, omukwaniilwa David okwa li a hala e yi fale kuJerusalem. Okwa pula omayele kaakuluntu yoshigwana nokwa ti kutya ‘ngele she yo opalela, nOmuwa Kalunga kwe shi uvanene,’ Ompungulilo nayi tembudhwe. Ihe ina konga sha gwana opo a mone ehalo lyaJehova moshinima moka. Ando okwe shi ningile, ando Ompungulilo inayi londekwa metemba. Oya li yi na okuhumbatwa kAalevi Aakahat ye yi inda komapepe, ngaashi Kalunga e ya lombwela sha yela. Nonando David olundji okwa kala ha pula Jehova, okwa li a ponyo oku shi ninga pamukalo gu uka pompito ndjino. Oshilanduliko osha li oshiponga oshinene. David konima yethimbo okwe shi zimine ta ti: “Omuwa, Kalunga ketu, okwe tu tuula omusa, oshoka [inatu mu konga ngaashi sho opala, KB].” — 1 Ondjalulahokololo 13:1-3; 15:11-13; Numeri 4:4-6, 15; 7:1-9.
w03 5/1 ep. 19, okat. 13
Oho pula mbela to ti: “Jehova oku li peni?”
13 Sho Ompungulilo hugunina ya li ya humbatwa kAalevi okuza kegumbo lyaObed-Edom tayi falwa kuJerusalem, opwa li tapu imbwa eimbilo lya totwa kuDavid. Olya li lya kwatela mo edhimbulukitho tali zi komutima tali ti: “Puleni Jehova noonkondo dhe, naaluhe kongeni oshipala she. Dhimbulukweni iilonga ye iinyengandunge, kwe yi longo, noondhimbulutho dhe nomautho gomokana ke.” — 1 Ondjalulahokololo 16:11, 12.
Omaliko gomOmbiimbeli
Longela Jehova, Omukwaniilwa gwaaluhe
14 David okwa li e eta oshikethahangano oshiyapuki kuJerusalem. Pethimbo lyoshiningwanima shika shinyanyudha, Aalevi oya li yi imbi eimbilo lyehambelelo ndyoka li na oohapu oondhindhilikwedhi, dha nyolwa mOndjalulo yotango 16:31, tadhi ti: “Hokololeleni iigwana kutya OMUWA [“okwa ninga,” NW] omukwaniilwa.” Omuntu otashi vulika nduno wi ipule to ti: ‘Ngele nani Jehova oye Omukwaniilwa gwaaluhe, oshe ende ishewe ngiini a ninge Omukwaniilwa pethimbo mpoka?’ Jehova oha ningi Omukwaniilwa uuna ta holola oonkondopangelo dhe nenge uuna ta tula po omukalelipo gwe pethimbo lyontumba nenge uuna tu u ungaunga nonkalo yontumba. Oshinima shika shi na ko nasha noonkondopangelo dhaJehova, oshi na eityo lela. Manga David inaa sa, Jehova okwa li e mu uvanekele kutya epangelo lye olya li tali ka kala sigo aluhe, sho a ti: “Otii ka kwaniileka gumwe gwomaamwoyemati a ninge omukwaniilwa omunene omunankondo.” (2 Sam. 7:12, 13) Pehulilo ‘omwanamati’ nguka gwaDavid okwa ka holoka konima yoomvula dha konda pe 1 000. Omwanamati nguka okwa li lye, nokwa li ta ka ninga Omukwaniilwa uunake?
20-26 FEBULUALI
OMALIKO OKUZA MOOHAPU DHAKALUNGA | 1 ONDJALULO 17–19
“Kaleka po enyanyu lyoye, nonando oto yematekwa”
Tala kuuwanawa wehangano lyaJehova
DAVID gwomuIsraeli shonale oku li gumwe gwomaantu mboka ya tongomana noonkondo, mboka ya hokololwa mOmanyolo gOshihebeli. Okwa kala i inekela thiluthilu Jehova Kalunga, manga a li omusita gwiimuna, omuhiki gwokaharpa naasho a ka ningi omuhunganeki nomukwaniilwa. Ohole ye onene yokuhola Jehova, oya li ye mu inyengitha a kale a hala oku mu tungila otempeli. Otempeli ndjoka oya li tayi ka kala ondingandinga yelongelokalunga lyashili muIsraeli. Okwa li wo e shi kutya otempeli nosho wo iilonga mbyoka ya li tayi ka longwa mo, oya li tayi ka etela oshigwana shaKalunga enyanyu nosho wo omayambeko. Nomolwaashono a imbile Jehova ta ti: “Aanelago oomboka we ya hogolola nowe ya kaleke muuyapuki woye. Otatu ka kuta kuuwanawa womegumbo lyoye, otempeli yoye ondjapuki.” — Episalomi 65:4.
Nyanyukilwa shoka to vulu okulongela Jehova
11 Sha faathana, natse otatu vulu okukala twa nyanyukwa noonkondo ngele otwa kala hatu longo nuudhiginini mukehe shoka tatu longele Jehova. Natu kale twi “ipyakidhila ethimbo alihe” miilonga yokuuvitha, e tatu kala hatu longo nuudhiginini megongalo. (Iil. 18:5; Heb. 10:24, 25) Kala ho ilongekidhile nawa okugongala, opo wu ka gandje omayamukulo taga tungu. Kala wa tala ko iipopiwa mbyoka ho pewa pokugongala kwomokati koshiwike ya simana. Ngele owa pulwa wu ninge sha megongalo, kala ho shi ningi pethimbo nokuulika kutya owu shi okwiinekelwa. Ino kala wa dhina iinakugwanithwa mbyoka to pewa e to kala inoo yi ilongekidhila nawa nonethimbo. Kala ho ningi oonkambadhala wu hwepopale moshilonga kehe to pewa. (Omayel. 22:29) Ngele owa kala to gandja eitulomo kiinakugwanithwa mbyoka wu na ngashingeyi, otashi ke ku kwathela wu hume komeho nowu kale wa nyanyukwa shi vulithe nale. (Gal. 6:4) Otashi ka kala wo oshipu kungoye wu kale wa nyanyukwa uuna gumwe a pewa oshinakugwanithwa shoka wa li wa hala. — Rom. 12:15; Gal. 5:26.
Omaliko gomOmbiimbeli
w20.02 ep. 12, oshimpungu
Tate yetu, Jehova, otu mu hole noonkondo
Mbela Jehova oku wete ndje?
Mbela owi ipulile nale to ti, ‘Maantu omabiliyona kombanda yevi, omolwashike Jehova ha kala e wete ndje?’ Ngele osho, hangoye awike. Omukwaniilwa David okwa nyola a ti: “Omuwa, omuntu omushike, sho ho mu dhimbulukwa? Ke shi sha, nando u na oshimpwiyu naye.” (Eps. 144:3) David okwa li e na einekelo kutya oku shiwike nawa kuJehova. (1 Ondjal. 17:16-18) Okupitila mOohapu dhe nomehangano lye, Jehova okwe ku shilipaleka kutya oha kala e wete ohole ndjoka to mu ulukile. Natu taleni komautumbulilo gamwe gomOohapu dhaKalunga, ngoka taga vulu oku ku kwathela wu kale wu na uushili mwaashoka:
• Jehova okwa kala e ku wete nokuli manga inoo valwa. — Eps. 139:16.
• Jehova oku shi shoka shi li momutima gwoye noha kala e shi shoka to dhiladhila. — 1 Ondjal. 28:9.
• Jehova oha pulakene komagalikano goye agehe. — Eps. 65:2.
• Iilonga yoye ohayi uvitha Jehova nawa nenge nayi. — Omayel. 27:11.
• Jehova oye mwene e ku nanena kuye. — Joh. 6:44.
• Jehova oku ku shi nawa, nongele owa si, ota ka vula oku ku yumudha. Ota ka shitulula olutu lwoye nomadhiladhilo goye ga kale ga fa lela ngoka wu na ngashingeyi. Oto ka kala wu na omaukwatya ngoka wu na noho dhimbulukwa naanaa iinima momukalo ngoka ho shi ningi ngashingeyi. — Joh. 11:21-26, 39-44; Iil. 24:15.
27 FEBULUALI–5 MAALITSA
OMALIKO OKUZA MOOHAPU DHAKALUNGA | 1 ONDJALULO 20–22
“Kwathela aagundjuka ya pondole”
‘Oohapu ndhoka dhi gandja kaantu ye shi kwiinekelwa’
8 Lesha 1 Ondjalulo 22:5. David otashi vulika a li a thiki pehulithodhiladhilo kutya Salomo ita vulu okutonatela iilonga ya simana yi thike mpoka. Kakele kaashono, otempeli oya li yi na ‘okukala onene noya simana,’ na Salomo ethimbo ndyono okwa li “omunona noke na ontseyo.” Ihe nonando ongaaka, David okwa li e shi kutya Jehova ota ka kwathela Salomo a vule okuungaunga niilonga mbyoka e mu pa. Onkee ano, David okwa li u ukitha eitulomo kwaashoka ta vulu okuninga a kwathele noku longekidhe iitungitho ya gwana.
‘Oohapu ndhoka dhi gandja kaantu ye shi kwiinekelwa’
7 David ka li e etha okuyambidhidha iilonga yokutungila Jehova otempeli, noina kala ti ipula shi na ko nasha nesimano lyaangoka te ke yi tungitha. Ano osha li sha tseyika kutya otempeli oya tungithwa kuSalomo, ihe hakuDavid. Nonando David okwa li a yemata sho haaye we ta tungitha otempeli ngaashi a li a hala, okwa kala ta yambidhidha iilonga yoku yi tunga. David oku unganeke oongundu dhoku yi tunga nokwa longekidha iitenda, iikushu, iisiliveli, oshingoli nosho wo omiti dhomisedeli. Niishewe, okwa li a ladhipike Salomo a ti: “Mentu gwandje, Omuwa, Kalunga koye, na kale ano nangoye ye na dhiginine euvaneko lye, e ku lagopaleke moku mu tungila otempeli.” — 1 Ondjal. 22:11, 14-16.
Aavali, mbela otamu kwathele ngaa aanona yeni ya hume komeho sigo ya ninginithwa?
14 Aakuluntugongalo, mboka ye li aasita yoshigunda shaKalunga, otaya vulu okwaambidhidha oonkambadhala dhaavali, mokupopya nayo nawa kombinga yomalalakano gopambepo. Omumwameme gumwe, ngoka a kala ta kokola ondjila uule womimvo dhi vulithe po 70, ota dhimbulukwa oonkundathana ndhoka ya li ye na nomumwatate Charles T. Russell, pethimbo e na omimvo hamano. Okwa ti: “Okwa li a kundathana nangame kombinga yomalalakano gopambepo, uule wominute 15.” Eeno, oohapu oombwanawa nosho wo etsomukumo, otayi vulu okuguma onkalamwenyo yomuntu ayihe. (Omayel. 25:11) Aakuluntugongalo otaya vulu wo okukwatela mo aavali noyana mooproyeka dhOshinyanga shUukwaniilwa. Otaya vulu natango okupa aagundjuka iinakugwanithwa shi ikolelela komimvo dhawo nopokuvula kwawo.
15 Iilyo yegongalo otayi vulu okukwathela, mokuulika kutya oyi na ko nasha naagundjuka. Shika osha kwatela mo oku ya kwathela ya hume komeho pambepo. Mbela aagundjuka ohaya gandja ngaa omatyokosha omawanawa taga zi komutima nohaya kutha ngaa ombinga pokugongala kwomokati koshiwike? Mbela uuna taya makelwa ohayu ulike ngaa uudhiginini wawo, nohayu uvithile yakwawo kosikola? Kala ho ya pandula nziya. Shi ninga wo omukalondjigilile okupopya nayo manga okugongala inaaku tameka nokonima ngele kwa piti mo, wu ulike kutya owu na ko nasha nayo. Omikalo ndhika nadhilwe, otadhi vulu okukwathela aagundjuka ya mone kutya oye li oshitopolwa ‘shegongalo enene.’ — Eps. 35:18.
Omaliko gomOmbiimbeli
Omanenedhiladhilo okuza membo lyOndjalulo yotango
21:13-15. Jehova okwa li a lombwele omuyengeli a hulithe po uuvu wolutapo, molwaashoka okwa li a yaalele okumona iihuna kwoshigwana She. Odhoshili kutya Jehova oye “omunahenda.”