1-3. Aantu ohayi ipula omapulo geni kombinga yeso, noongeleka dhimwe ohadhi yamukula ngiini omapulo ngoka?

OMBIIMBELI oyu uvaneka kutya masiku ‘itaku ka kala we eso.’ (Ehololo 21:4) MOntopolwa 5 otwi ilonga mo kutya omolwekulilo, otu na ompito yoku ka kala nomwenyo sigo aluhe. Sigo okunena aantu onkene ngaa taya si. (Omuuvithi 9:5) Epulo lya simana ndyoka hatu ipula olundji olyo kutya ohatu yi peni, ngele twa si?

² Ohatu kala twa hala eyamukulo kepulo ndyoka, unene tuu ngele otwa silwa. Otashi vulika hatu kala tatu ipula kutya: ‘Mbela nakusa okwa ya peni? Mbela oku tu wete? Ota vulu ngaa oku tu kwatha? Mbela opu esiku natu ke mu mone?’

³ Oongeleka ohadhi yamukula omapulo ngoka momikalo dhi ili nodhi ili. Dhimwe ohadhi longo aantu kutya ngele owa longa uuwanawa, oto yi megulu. Ngele owa longa uuwinayi, oto yi moheli. Dhimwe ohadhi longo aantu kutya ngele owa si oto shituka, e to ka kala pamwe naamboka ya sa nale. Omanga dhilwe hadhi ti kutya ngele owa si, e to pangulwa, oto ka valululwa nenge wu yumuke wu li omuntu gulwe nenge oshinamwenyo.

4. Edhiladhilo lya faathana lini oongeleka hadhi longo aantu kombinga yeso?

⁴ Oongeleka otadhi monika dha fa tadhi longo aantu iinima ya yoolokathana. Nonando ongawo, konyala adhihe otadhi longo aantu edhiladhilo lya faathana. Otadhi longo kutya opu na sha shoka hashi tsikile okukala nomwenyo, ngele omuntu a si. Mbela shoka oshoshili?

OONAKUSA OYE LI MONKALO YA TYA NGIINI?

5, 6. Oonakusa ohaya kala monkalo ya tya ngiini?

⁵ Jehova oku shi shi kutya ohatu yi peni uuna twa si. Okwe tu lombwela kutya ngele omuntu a si, oha hulu po. Onkee ano, ngele omuntu a si, iha kala u uvite sha noiha vulu we okudhiladhila.a Uuna twa si ihatu mono ko, ihatu uvu ko noihatu dhiladhila sha.

⁶ Omukwaniilwa Salomo okwa nyola a ti: ‘Aasi inaa tseya sha nando.’ Mboka ya sa itaya vulu okukala ye tu hole nenge ye tu tonde, oshoka Ombiimbeli oya ti: “Kaku na iilonga, ompangela, uunongo nenge owino moshaasi.” (Lesha Omuuvithi 9:5, 6, 10.) Ombiimbeli oya popya wo mEpisalomi 146:4 kutya ngele omuntu okwa si, “oompangela” dhe ohadhi hulu po.

JESUS OKWA FAATHANITHA ESO NASHIKE?

7. Jesus okwa faathanitha eso nashike?

⁷ Sho kuume ke Lasarus a si, Jesus okwa li a lombwele aalongwa ye ta ti: “Kuume ketu Lasarus okwa kotha.” Sho Jesus a ti ngawo, kali ta ti kutya Lasarus ota thuwa po. Okwa ka tya: “Lasarus okwa sa.” (Johannes 11:11-14) Jesus okwa faathanitha eso noomposi. Ina popya nando kutya Lasarus okwa ya megulu nenge kutya okwa ka kala naamboka ya sa nale. Ina popya nando kutya Lasarus okwa ya moheli nenge kutya okwa shituka, a ninga omuntu nenge oshinamwenyo. Okwa ti kutya Lasarus okwa fa a kotha oomposi oondhigu. Opu na wo omanyolo galwe taga faathanitha eso noomposi oondhigu. Pashiholelwa, Ombiimbeli oya ti kutya sho Stefanus a dhipagwa, “okwa kotha po.” (Iilonga 7:60, OB-1954) Omuyapostoli Paulus okwa nyola wo a ti kutya Aakriste yamwe ‘oya kotha.’ — 1 Aakorinto 15:6, OB-1954.

8. Otu shi shi ngiini kutya Kalunga ina shita aantu ya kale haya si?

⁸ Mbela Kalunga okwa li a shiti Adam naEva nelalakano ya ka se? Aawe. Jehova okwa li e ya shita ya kale taya nyanyukilwa onkalamwenyo sigo aluhe ye na uukolele. Sho Jehova a shiti aantu, okwe ya shiti ye na ehalo lyokukala nomwenyo sigo aluhe. (Omuuvithi 3:11) Aavali ihaya kala yu uvite nawa okumona oyana taya ehama nenge taya si. Jehova naye iha kala e shi uvitile ombili. Okwe tu shita tu kale nomwenyo sigo aluhe. Mbela omolwashike hatu si?

OMOLWASHIKE HATU SI?

9. Omolwashike kaasha li oshidhigu kuAdam naEva okuvulika koshipango shoka ya li ya pewa?

⁹ Jehova okwa li a lombwele Adam moshikunino shaEden a ti: “Lya komuti kehe meyana, kakele komuti gwokutseya uuwanawa nuuwinayi. Iiyimati yomuti ngoka ino yi lya; ngele oto shi ningi, oto si shili.” (Genesis 2:9, 16, 17) Oshipango shoka osha li sha yela nokasha li oshidhigu okuvulika kusho. Jehova okwa li e na uuthemba woku ya lombwela shoka shi li mondjila naashoka sha puka. Ando oya vulikile kuJehova, ando oyu ulike kutya oya simaneka oonkondopangelo dhe. Oya li wo taye ku ulika kutya oya pandula ashihe shoka Jehova e ya pa.

10, 11. (a) Satana okwa pukitha ngiini Adam naEva? (b) Omolwashike Adam naEva kaaya li taya vulu okwiipopila, sho ya yono?

¹⁰ Adam naEva, inaya vulika kuJehova. Satana okwa li a pula Eva ta ti: “Kalunga okwe mu lombwele shili, mwaa lye komiti adhihe dhomeyana?” Eva okwa yamukula ta ti: “Ohatu li iiyimati yomiti adhihe dhomeyana. Iiyimati yomuti ngoka gu li pokati kalyo, Kalunga okwe tu lombwele, twaaye yi lye tse twaa gume omuti; ngele tatu shi ningi, otatu ka sa.” — Genesis 3:1-3.

¹¹ Satana okwa ti: “Itamu si shili. Oshoka Kalunga okwa tseya kutya uuna tamu li ko, omeho geni otaga tonata, one notamu fe Kalunga mokutseya uuwanawa nuuwinayi.” (Genesis 3:4-6) Satana okwa li a hala Eva a dhiladhile kutya ota vulu okuhogolola ye mwene shoka shi li mondjila naashoka sha puka. Okwa li wo e mu fundju kutya ita ka sa shili, ngele okwa kala inaa vulika. Shika osha ningitha Eva a lye oshiyimati nokwa pe wo omulume. Adam naEva oya li ye shi kutya Jehova okwe ya lombwela kaaya lye oshiyimati shoka. Sho ye shi li, inaya vulika koshipango oshipu shoka ya pewa. Pehala lyaashono, oyu ulike kutya inaya simaneka He gwomegulu, ngoka e ya hole. Onkee ano, kaya li taya vulu nando okwiipopila.

12. Jehova okwa li u uvite ngiini sho Adam naEva inaaya vulika kuye?

¹² Mbela Omushiti okwa li u uvite ngiini sho Adam naEva inaaye mu simaneka? Okwa li a yemata noonkondo. Olundji omuvali oha ningi ngaashi ta vulu, opo a putudhe oyana. Mbela oto ka kala wu uvite ngiini ngele aamwoye oya ka kala ihaaya vulika kungoye? Mbela ito ka kala wa yemata?

13. Jehova okwa li a hala okutya ngiini sho a ti Adam oku “na okushuna mevi”?

¹³ Sho Adam naEva inaaya vulika, oya hunutha ompito yokukala nomwenyo sigo aluhe. Jehova okwa lombwele Adam a ti: “Owa kuthilwe mevi nou na okushuna mevi.” (Lesha Genesis 3:19.) Shika osha hala okutya Adam okwa li ta ka shituka ontsi yevi, ngaashi a li manga inaa shitwa. (Genesis 2:7) Konima sho a yono, okwa si nokali we e na omwenyo pehala lilwe.

14. Omolwashike hatu si?

¹⁴ Andola Adam naEva oya vulikile kuKalunga, ando oye na omwenyo sigo onena. Sho inaaya vulika, oya yono nokonima oya si. Otwa thigulula uulunde kuyo. Uulunde mboka owa fa omukithi gwolutapo. Atuheni ohatu si, oshoka otwa valwa aalunde. (Aaroma 5:12) Shoka kasha li elalakano lyaKalunga li na ko nasha naantu. Kalunga ka li a hala tu kale hatu si. Ombiimbeli otayi ithana eso “omutondi.” — 1 Aakorinto 15:26.

OSHILI OYE TU MANGULULA

15. Oshili kombinga yeso oye tu mangulula ngiini?

¹⁵ Oshili kombinga yeso oye tu mangulula ko komalongo ogendji giifundja. Ombiimbeli oye tu longa kutya oonakusa ihaya kala yu uvite nayi nenge ya yemata. Itatu vulu okupopya nayo, nenge ya popye natse. Itatu vulu oku ya kwathela, nenge ye tu kwathele. Katu na okukala twe ya tila, molwaashoka itaya vulu oku tu etela oshiponga. Oongeleka odhindji ohadhi longo aantu kutya oonakusa oye na natango omwenyo pehala lilwe. Ohadhi longo wo kutya otatu vulu okukwathela oonakusa mokukala hatu gandja iimaliwa kaasita, opo ya yapule omudhimba. Kakele tse ihatu pukithwa kiifundja mbyoka, oshoka otu shi oshili kombinga yeso.

16. Oongeleka odhindji ohadhi longo aantu iifundja yini kombinga yoonakusa?

¹⁶ Satana oha longitha omalongelokalunga giifundja ge tu pukithe, noge tu dhiladhilithe kutya oonakusa oye na omwenyo natango. Pashiholelwa, oongeleka dhimwe ohadhi longo kutya ngele otwa si, opu na sha shoka hashi tsikile okukala nomwenyo pehala lilwe. Mbela nangoye kongeleka yeni osho hamu longwa ngawo? Mbela ohamu longwa shoka Ombiimbeli tayi ti kombinga yoonakusa? Sigo onena Satana ota fundju aantu, opo kaaya longele Jehova.

17. Omolwashike elongo lyoheli hali ehameke Jehova?

¹⁷ Shoka oongeleka odhindji hadhi longo aantu, oshikumithi shili. Pashiholelwa, dhimwe ohadhi longo kutya aakolokoshi otaya ka pya moheli sigo aluhe. Mbyoka iifundja yo yeneyene, notayi ehameke nokuli Jehova. Kapu na nando esiku a ka hepeke aantu momukalo gwa tya ngaaka. (Lesha 1 Johannes 4:8.) Mbela oto ku uvila ngiini omuvali ngoka ha fike okamwana koonyala, uuna ka yona sha? Oto ke shi zimina kutya omuvali ngoka oku na onyanya lela. Ito ka kala nokuli wa hala oku mu tseya. Satana osho naanaa a hala tu kale tu uvitile Jehova ngawo!

18. Omolwashike kaatu na okutila oonakusa?

¹⁸ Oongeleka dhimwe ohadhi longo aantu kutya ngele oya si, ohaya ningi aakwampungu nenge aathithi. Oongeleka ndhoka ohadhi ti nokuli kutya aantu oye na oku ya simaneka, nokukala haye ya tila. Oye na oku shi ninga, oshoka aniwa aathithi otaya vulu okukala ookuume kawo nenge aatondi yawo. Aantu oyendji oyi itaala iifundja mbyoka. Ohaya kala ya tila oonakusa nohaye ya galikana, pehala lyokugalikana Jehova. Dhimbulukwa kutya oonakusa ihaya uvu ko, yo ihaya mono ko. Katu na nando okukala twe ya tila. Jehova oye Omushiti gwetu noye Kalunga kashili. Oye awike tu na okugalikana. — Ehololo 4:11.

19. Okutseya oshili kombinga yeso, oshe tu kwathela ngiini?

¹⁹ Uuna twa tseya oshili kombinga yeso, otatu ka manguluka ko kiifundja mbyoka hayi longwa koongeleka muuyuni. Oshili ndjoka otayi tu kwathele tu uve ko shoka Jehova e tu uvanekela, kombinga yonakuyiwa yetu.

20. Oshike tatu ki ilonga montopolwa tayi landula?

²⁰ Omupiya gwaKalunga Job, okwa pulile ta ti: “Omuntu ngele okwa si, ota kala ishewe e na omwenyo?” (Job 14:14) Shoka Kalunga te tu lombwele mOmbiimbeli, otashi hokitha noonkondo. Mbela omuntu ngoka a sa, otashi vulika ngaa a ka yumuke? Eeno. Otatu ke shi ilonga montopolwa tayi landula.

1-3. Atuheni otwa taalelwa koshike, naJehova ote ke tu mangulula ngiini?

NATU tye ando owa tokolelwa ondholongo yonkalamwenyo ayihe, molwoshinima shoka inoo ninga. Onkalamwenyo yoye otayi monika ya fa yaa na we ekwatho lyasha, noku na sho to vulu okuninga po. Ohaluka, opwe ya omuntu ngoka a hala oku ku mangulula. Oto ka kala wu uvite ngiini?

² Atuheni otwa taalelwa keso. Kashi na nduno mbudhi kutya otu ninge shike, itatu vulu oku li henuka. Jehova oye awike e na oonkondo dhoku tu mangulula. Oku uvaneka kutya “omutondi gwahugunina e na okusindwa, oye eso.” — 1 Aakorinto 15:26.

³ Mbela ito ka kala tuu wa pepelelwa, sho itoo ki ipula we neso? Jehova ita ka kutha po owala eso, ihe ota ka yumudha wo oonakusa. Mbela shono itashi ke ku nyanyudha tuu? Oku uvaneka kutya “mboka ya sa nale” otaya ka kala ishewe nomwenyo. (Jesaja 26:19) Shika osho tashi popiwa mOmbiimbeli shi li eyumuko.

UUNA WA SILWA

4. (a) Ngele omukwanezimo nenge kuume ketu a hulitha, oshike tashi vulu oku tu hekeleka? (b) Oolye ya li ookuume kaJesus kopothingo?

⁴ Uuna omukwanezimo nenge kuume ketu a hulitha, ohatu kala twa nika oluhodhi noonkondo. Ohatu kala twa teka omukumo, ihe katu na shoka tatu vulu okuninga po, tu mu galulile momwenyo. Ombiimbeli otayi tu pe ehekeleko lyashili. (Lesha 2 Aakorinto 1:3, 4.) Natu taleni oshiholelwa shimwe shoka tashi ulike kutya Jehova naJesus oya hala okuyumudha aaholike yetu. Sho Jesus a li kombanda yevi, okwa li aluhe ha talele po Lasarus naamwayina ye, Marta naMaria. Ayehe oya li ookuume kaJesus kopothingo. Ombiimbeli otayi ti: “Jesus okwa li e hole Marta, Maria naLasarus.” — Johannes 11:3-5.

5, 6. (a) Jesus okwa li i inyenge ngiini, sho a mono aakwanezimo nookuume kaLasarus ya nika oluhodhi? (b) Omolwashike tashi hekeleke okutseya nkene Jesus ha kala u uvitile eso?

⁵ Sho Lasarus a si, Jesus okwa yi a ka hekeleke Marta naMaria. Marta sho u uvu kutya Jesus ote ya kuyo, okwa yi e ke mu tsakaneke. Okwa li a nyanyukwa sho a mono Jesus, ihe okwa ti kuye: “Omuwa, ando owa li po, ando omumwameme ina sa.” Marta okwa li u uvite kutya Jesus ita vulu okukwathela Lasarus. Konima yaashono, Jesus okwa mono Maria ta lili. Sho a mono nkene ya nika oluhodhi okwa hendwa komwenyo, e ta lili. (Johannes 11:21, 33, 35) Okwa li a nika oluhodhi ngaashi naanaa hatu kala tu uvite, uuna twa silwa.

⁶ Ohashi tu hekeleke okukala tu shi kutya Jesus naye oha kala u uvite ngaashi naanaa hatu kala tu uvite, uuna twa silwa. Okwa fa He, Jehova, ngoka naye ha kala u uvite ngawo. (Johannes 14:9) Jehova oku na oonkondo dhokuhulitha po eso sigo aluhe, note ke shi ninga masiku.

“LASARUS, ZA MO!”

7, 8. Omolwashike Marta a li inaa hala emanya li kuthwe po pombila yaLasarus, ihe Jesus okwa li a ningi po shike?

⁷ Sho Jesus a thiki pombila yaLasarus, posheelo opwa li pwe edhilwa nemanya enene. Jesus okwa lombwele aantu ta ti: “Kuthii po emanya!” Marta ka li a hala aantu ye shi ninge, oshoka Lasarus okwa adhika a ninga omasiku gane a sa. (Johannes 11:39) Ka li e shi kutya Jesus okwa hala okuninga po sha, a kwathele omumwayina.

⁸ Jesus okwa ti kuLasarus: “Za mo!” Marta naMaria oya li ya kuminwa shoka ya mono. “Lasarus, ngoka a li a sa, okwa zi mo. Oompadhi dhe nomaako ge oya li ya mangwa nomalapi.” (Johannes 11:43, 44) Lasarus okwa li a yumudhwa! Okwa li ishewe e li pamwe naakwanezimo ye nookuume ke. Oya li taya popi naye, yo taye mu minike noku mu papatela. Shino osha li oshikumithalonga sho Jesus a yumudha Lasarus!

“MUKADHONA, OTANDI KU LOMBWELE, PENDUKA PO!”

9, 10. (a) Olye a pe Jesus oonkondo dhokuyumudha aantu? (b) Omolwashike o2345mahokololo gaamboka ya yumudhwa ge na oshilonga kutse?

⁹ Mbela Jesus okwa li ha yumudha aantu koonkondo dhe mwene? Aawe. Manga inaa yumudha Lasarus, okwa li a galikana kuJehova. Jehova okwe mu pe oonkondo dhoku shi ninga. (Lesha Johannes 11:41, 42.) Lasarus haye awike a li a yumudhwa. Ombiimbeli otayi popi kombinga yokakadhona komimvo 12 hoka ka li epona, noka li taka ehamenene. He ya ko Jairus, okwa li a lulilwa, nokwi indile Jesus e ka aludhe. Manga ta popi naJesus, opwe ya aalumentu yamwe noya ti: “Okamwoye okakadhona ka mana oondjenda. Oto monithile we shike Muhongi iihuna?” Jesus okwa ti kuJairus: “Ino tila, itaala owala.” Okuza mpono, oya yi pamwe kegumbo lyaJairus. Sho ye li pokuthika, Jesus okwa li e wete noku uvite aantu sho taya lili. Okwe ya lombwele a ti: “Inamu lila, omukadhona ina sa, ihe okwa kotha.” Otashi vulika aavali yokanona ya li tayi ipula kutya Jesus okwa hala okutya ngiini. Jesus okwa lombwele aantu ya ye pondje, nokwa yi pamwe naavali mondunda moka mwa lala okanona. Okwa kwata okanona koshikaha, e ta ti: “Mukadhona, otandi ku lombwele, penduka po!” Aavali yokanona oya li ya nyanyukwa sho ka thikama e taka tameke okweenda. Jesus okwa li a yumudha okanona kawo. (Markus 5:22-24, 35-42; Lukas 8:49-56) Okuza kesiku ndyoka, oya kala haya dhimbulukwa shoka Jehova e ya ningila okupitila muJesus, uuna taya tala okamwanakadhona kawo.a

¹⁰ Aantu mboka ya li ya yumudhwa kuJesus, oya ka sa ishewe. Omahokololo ngoka hatu lesha kombinga yawo oge na oshilonga, oshoka otage tu pe etegameno. Jehova okwa hala oku ka yumudha aantu, note ke shi ninga.

OSHIKE TATU ILONGO MOMAHOKOLOLO GAAMBOKA YA YUMUDHWA?

11. Omuuvithi 9:5 otayi tu longo shike kombinga yonkalo moka mwa li Lasarus?

¹¹ Ombiimbeli otayi tu lombwele kutya ‘aasi inaa tseya sha nando.’ Lasarus sho a si, omo a li monkalo ndjoka. (Omuuvithi 9:5) Ngaashi naanaa Jesus a popi, Lasarus okwa li a fa a kotha. (Johannes 11:11) Sho Lasarus a li mombila, ka li a “tseya sha nando.”

12. Otu shi shi ngiini kutya Lasarus okwa li a yumudhwa shili?

¹² Aantu oyendji oya li ya mono, sho Jesus ta yumudha Lasarus. Aatondi yaJesus nayo oya li ye mu mono, sho a longo oshikumithalonga shoka. Lasarus okwa li e na omwenyo, naashoka oshu ulike kutya okwa li a yumudhwa shili. (Johannes 11:47) Aantu oyendji oya li wo ye ya okutalela po Lasarus. Shoka oshe ya ningitha yi itaale kutya Jesus okwa tumwa shili kuKalunga, ihe aatondi yaJesus kaya li ye shi panda. Onkee ano, oya ningi ompangela ya dhipage Jesus naLasarus. — Johannes 11:53; 12:9-11.

13. Omolwashike tatu vulu okukala nuushili kutya Jehova ota ka yumudha oonakusa?

¹³ Jesus okwa ti kutya “oonakusa ayehe mboka ye li moombila” otaa ka yumuka. (Johannes 5:28) Shino otashi ti kutya ayehe mboka Jehova ta ka dhimbulukwa, ote ke ya yumudha. Opo Jehova a yumudhe omuntu, oku na okudhimbulukwa okanima kehe kombinga ye. Mbela ota vulu ngaa oku shi ninga shili? Eeno. Ngele tatu tala kegulu, oku na oonyothi omabiliyona ogendji. Ombiimbeli otayi ti kutya Jehova oonyothi adhihe oku dhi shi komadhina. (Lesha Jesaja 40:26.) Ngele ota vulu okudhimbulukwa edhina lyonyothi kehe, mbela otashi ka kala ngaa oshidhigu kuye okudhimbulukwa aantu mboka ta ka yumudha? Jehova oye Omushiti gwiinima ayihe. Onkee ano, otu shi shi nawa kutya ota vulu okuyumudha aantu.

14, 15. Oohapu dhaJob otadhi tu ulukile kutya Jehova okwa halelela okuninga shike?

¹⁴ Omupiya omudhiginini Job, okwa li itaala meyumuko. Okwa li a pula kutya “omuntu ngele okwa si, ota kala ishewe e na omwenyo?” Okwa li a lombwele Jehova a ti: “Oto ka ithana ndje notandi ku itaale; oto ka yuulukwa omushitwa gwoye.” Job okwa li e shi shi kutya Jehova okwa halelela oku ka yumudha oonakusa. — Job 14:13-15.

¹⁵ Oho kala wu uvitile ngiini etegameno lyeyumuko? Otashi vulika wi ipule kutya ‘mbela aakwanezimo yandje nookuume kandje mboka ya sa, otaya ka yumuka ngaa?’ Otashi tu hekeleke shili okukala tu shi kutya Jehova okwa halelela okuyumudha oonakusa. Natu taleni shoka Ombiimbeli tayi ti kombinga yaamboka taya ka yumudhwa naampoka taya ka kala.

OTAYA KA ‘UVA EWI LYE, NOTAA KA ZA MO’

16. Mboka taya ka yumudhilwa kombanda yevi, otaya ka nyanyukilwa onkalamwenyo ya tya ngiini?

¹⁶ Mboka ya yumuka nale, oya li pamwe naanegumbo nookuume kawo kombanda yevi. Shika otashi ka ningwa wo nomonakuyiwa, ihe otashi ka kala oshiwanawa unene shi vulithe po. Omolwashike mbela? Mboka taya ka yumudhwa, otaya ka kala ye na ompito yokukala nomwenyo sigo aluhe kombanda yevi, itaaya si we. Otaya ka kala nokuli muuyuni uupe mboka inaawu fa mbuka tu li. Itamu ka kala iita, omiyonena naantu itaye ke ehama we.

17. Oolye taya ka yumudhwa?

¹⁷ Oolye taya ka yumudhwa? Jesus okwa ti: ‘Ayehe mboka ye li moombila, otaa ka uva ewi lye. Yo notaa ka za mo moombila dhawo.’ (Johannes 5:28, 29) Ehololo 20:13 otayi ti: “Efuta olya gandja aasi mboka ya sile mulyo. Eso noshaasi oya gandja wo aasi mboka ya li mo.” Shika otashi ulike kutya aantu omabiliyona otaya ka kala nomwenyo. Omuyapostoli Paulus okwa popi wo kutya aantu ayehe ‘aayuuki naalunde,’ otaya ka yumudhwa. (Lesha Iilonga 24:15, OB-1954.) Mbela shino osha hala okutya ngiini?

18. ‘Aayuuki’ mboka taya ka yumudhwa oyeni?

¹⁸ ‘Aayuuki’ oya kwatela mo aapiya yaJehova aadhiginini mboka ya li ko manga Jesus inee ya kombanda yevi. Aantu ngaashi Noa, Abraham, Sara, Moses, Rut naEster otaya ka yumudhwa ya ka kale nomwenyo kombanda yevi. Oto vulu okulesha kombinga ya yamwe yomuyo mAahebeli ontopolwa 11. Ongiini kombinga yaapiya yaJehova aadhiginini mboka taya si pethimbo lyetu? Nayo wo ‘aayuuki,’ onkee ano, otaya ka yumuka.

19. ‘Aalunde’ oyo olye? Jehova ote ke ya pa ompito yashike?

¹⁹ ‘Aalunde’ oya kwatela mo aantu omabiliyona mboka ya sa inaaya mona ompito yokutseya Jehova. Nonando oya sa, Jehova ine ya dhimbwa. Ote ke ya yumudha, opo ya mone ompito yokulongwa, yo ye mu tseye noku mu longela.

20. Mbela kehe gumwe ngoka a sa ota ka yumuka?

²⁰ Mbela shino osha hala okutya kehe gumwe ngoka a sa ota ka yumuka? Hasho nando. Jesus okwa ti kutya aantu yamwe itaya ka yumuka. (Lukas 12:5) Olye ta ka tokola ngele omuntu gwontumba ota ka yumuka nenge hasho? Jehova oye Omupanguli omunene, ihe ota ka langeka po Jesus “a ninge omupanguli gwaanamwenyo naasi.” (Iilonga 10:42) Omukolokoshi kehe inaa hala okulundulula, uuna a si ita ka yumudhwa. — Tala eyelitho eti-19.

MBOKA TAYA KA YUMUDHWA YA KA KALE MEGULU

21, 22. (a) Mboka taya ka yumudhwa ya ka kale megulu, otaya ka kala ye na omalutu ga tya ngiini? (b) Olye omuntu gwotango a yumudhwa a ka kale nomwenyo megulu?

²¹ Ombiimbeli otayi tu lombwele wo kutya aantu yamwe otaya ka kala megulu. Mboka taya ka yumudhwa ya ka kale megulu, itaya ka kala ye na omalutu gopanyama. Otaya ka yumudhwa ye li iishitwa yopambepo.

²² Jesus oye omuntu gwotango a yumudhwa a ka kale megulu. (Johannes 3:13) Konima yomasiku gatatu sho Jesus a dhipagwa, Jehova okwe mu yumudha. (Episalomi 16:10; Iilonga 13:34, 35) Jesus ka li a yumudhwa nolutu lwopanyama. Omuyapostoli Petrus okwa popi kutya Jesus “okwa dhipagwa palutu nokwa tulwa omwenyo pambepo.” (1 Petrus 3:18) Jesus okwa li a yumudhwa e li omushitwa gwopambepo omunankondo. (1 Aakorinto 15:3-6) Ombiimbeli oya ti kutya haye awike a li ta ka yumudhwa nolutu lwopambepo.

23, 24. Oolye ye li “oshigunda oshishona,” noye li yangapi?

²³ Manga Jesus inaa sa, okwa li a lombwele aalongwa ye aadhiginini a ti: “Otandi ke mu longekidhila ehala.” (Johannes 14:2) Shino otashi ti kutya yamwe yomaalongwa ye otaya ka yumudhwa ya ka kale megulu. Mbela oye li yangapi? Jesus okwa ti kutya oye li omwaalu omushona, ano “oshigunda oshishona.” (Lukas 12:32) Omuyapostoli Johannes okwa popi omwaalu gwawo sho a mono Jesus a thikama kondundu yaSion megulu. Okwa ti: “Pamwe nOnzigona okwa li aantu 144 000.” — Ehololo 14:1.

²⁴ Aantu mboka 144 000, otaya ka yumudhwa uunake? Ombiimbeli oye tu lombwela kutya shika otashi ka ningwa ngele Kristus a tameke okupangela megulu. (1 Aakorinto 15:23) Ngashingeyi Jesus ota pangele nale, noyendji yomaantu 144 000, oya yumudhwa nale ya ka kale megulu. Mboka ye li natango kombanda yevi naamboka taya si pethimbo lyetu, ohaya yumudhwa yu ukilila megulu pethimbo mpoka. Aantu oyendji mboka taya ka yumudhwa monakuyiwa, otaya ka kala mOparadisa kombanda yevi.

25. Oshike tatu ki ilonga montopolwa tayi landula?

²⁵ Masiku Jehova ota ka mangulula aantu muupika weso, neso otali ka hanagulwa po sigo aluhe. (Lesha Jesaja 25:8.) Mbela mboka taya yi megulu otaya ka ninga mo shike? Ombiimbeli oya popya kutya otaya ka pangela pamwe naJesus mUukwaniilwa waKalunga. Otatu ki ilonga oshindji kombinga yUukwaniilwa mboka montopolwa tayi landula.