Kala omunashili miinima ayihe

Kehe gumwe okwa hala ookuume aanashili. Jehova naye okwa hala ookuume ke ya kale aanashili. Ihe shoka kashi shi oshipu muuyuni mbuka, oshoka aantu oyendji kaye shi aanashili. Uuwanawa wuni hawu zi mokukala omunashili miinima ayihe?

1. Omolwetompelo lini lya simanenena tu na okukala aanashili?

Ngele ohatu lombwele yalwe oshili, otatu ulike kutya otu hole Jehova notwe mu simaneka. Tala kwaashika: Jehova oha kala e wete shoka tatu dhiladhila notatu ningi. (Aahebeli 4:13) Ngele tse aanashili, ohe shi mono nohashi mu nyanyudha. Oohapu dhe otadhi ti: “Omugoyoki oye iihuna koshipala shOmuwa, ihe Omuwa okwi inekela aayuuki.” — Omayeletumbulo 3:32.

2. Omiinima yini tu na okukala aanashili?

Jehova okwa hala tu kale hatu “hokololelathaneni oshili.” (Sakaria 8:16, 17) Shoka osha kwatela mo shike? Kutya nduno otatu popi noyaandjetu, naaniilonga pamwe natse, naamwatate naamwameme, nenge naakwanepangelo, ihatu ya lombwele iifundja nenge tu ya pe uuyelele wa penga. Aantu aanashili ihaya yaka po iinima yayakwawo nenge ye ya kengelele. (Lesha Omayeletumbulo 24:28 nosho wo Aaefeso 4:28.) Ohaya futu wo iifendela ayihe mbyoka ye na okufuta. (Aaroma 13:5-7) Miinima mbyono nomuyilwe, ohatu ‘longo aluhe shoka shi li mondjila,’ sha hala okutya, ohatu kala aanashili miinima ayihe. — Aahebeli 13:18.

3. Uuwanawa wuni hawu zi mokukala omunashili?

Ngele otu shiwike hatu popi oshili, yalwe ohaya kala ye tu inekela. Ohatu ningitha kehe gumwe megongalo a kale e uvite a gamenwa, ngaashi aantu ye li megumbo moka mu na ohole. Ohatu kala wo tu na eiyuvo lya yela. Okukala aanashili ohaku simanekitha “elongo ndyoka tali popi Kalunga, Omuhupithi gwetu,” nohaku nanene aantu kelongelokalunga lyashili. — Titus 2:10.

ILONGA OSHINDJI

4. Okukala omunashili ohaku nyanyudha Jehova

Lesha Episalomi 44:21 nosho wo Maleaki 3:16, e tamu kundathana omapulo taga landula:

• Sho to tala, omolwashike kaatu na okwiifundjaleka kutya otatu vulu okuholeka oshili?

• Sho to dhiladhila, Jehova oha kala e uvite ngiini ngele otwa popi oshili, nonando otashi vulika shi kale oshidhigu?

5. Kala omunashili ethimbo alihe

OKAVIDIO: Oshike hashi etele omuntu enyanyu? — Eiyuvo lya yela (2:32)

Lesha Aahebeli 13:18, e tamu kundathana nkene tu na okukala aanashili . . .

• megumbo.

• kiilonga nenge kosikola.

• moonkalo dhilwe.

6. Okukala aanashili ohaku tu etele uuwanawa

Omathimbo gamwe, aantu ohaya dhiladhila kutya ngele owa kala omunashili, oto ifala muupyakadhi. Ihe ngele owa kala omunashili, oto ka mona kutya oshi li oshinima sha dhenga mbanda. Lesha Episalomi 34:12-16, e tamu kundathana epulo tali landula:

• Okukala omunashili ohaku ningitha ngiini onkalamwenyo yoye yi kale yi li nawa?

1. Aasamane naakulukadhi mboka haya lombwelathana oshili, ohaya koleke ondjokana yawo

2. Aaniilonga mboka aanashili, ohaya kala yi inekelwa kaahona yawo

3. Aakwashigwana mboka aanashili, ohaya popilwa muuwanawa kaakwanepangelo

OWI ILONGO SHIKE?

Jehova okwa hala ookuume ke ya kale aanashili mwaashihe shoka taya popi notaya ningi.

Omapulo geendululo

• Omoonkalo dhini tu na okukala aanashili?

• Omolwashike kaashi li pandunge okudhiladhila kutya otatu vulu okuholeka oshili?

• Omolwashike wa hala okukala omunashili ethimbo kehe?

UUYELELE WA GWEDHWA PO

Ongiini aavali taya vulu okulonga oyana ya kale aanashili?

Popya oshili (1:44)

Uuwanawa wuni hawu zi mokugwanitha po shoka tu uvaneka?

Gwanitha po omauvaneko goye, wu yambekwe (9:09)

Lesha oshitopolwa shika wu uve ngele otu na okufuta iifendela, nonando oyi kale tayi longithwa nayi.

“Mbela otu na ngaa okufuta iifendela?” (Oshungolangelo, 1 Septemba 2011)

Oshike shi inyengitha omulumentu gumwe ngoka a li kee shi omunashili, a lundulule onkalamwenyo ye, e ta tameke okukala omunashili?

“Ondi ilonga kutya Jehova omunahenda noha dhimine po” (Oshungolangelo, 1 Juli 2015)