Ulika kutya owa pandula omagano gomwenyo

Opu na iinima mbyoka iiwanawa hatu vulu okuninga noku yi nyanyukilwa, molwaashoka tu na omwenyo. Nonando otu na omaupyakadhi, ohatu vulu oku yi nyanyukilwa. Ongiini tatu vulu okuulika kutya otwa pandula omagano gomwenyo? Omolwetompelo lini lya simanenena tu na oku shi ninga?

1. Omolwashike twa pumbwa okukala twa lenga omwenyo?

Otu na okukala twa lenga omwenyo, oshoka ogu li omagano ga za kuTate yetu omunahole, Jehova. Oye “oluthithiya lwomwenyo,” oshoka oye a shita iinima ayihe mbyoka yi na omwenyo. (Episalomi 36:9) “Oye mwene ha pe aantu ayehe omwenyo nomufudho niinima ayihe.” (Iilonga 17:25, 28) Jehova ohe tu pe shoka twa pumbwa, opo tu kale nomwenyo. Ohe shi ningitha wo tashi wapa, opo tu kale twa nyanyukwa monkalamwenyo. — Lesha Iilonga 14:17.

2. Ongiini tatu vulu okuulika kutya otwa pandula Jehova, omolwomagano gomwenyo ngoka e tu pa?

Okuza ngaa sho wa tameke okushitwa mela lyameme gwoye, Jehova okwa kala nale e na ko nasha nangoye. Omupiya gwaKalunga gumwe, David, okwa nwethwa mo a popye ta ti: “Owa mono ndje, manga inaandi valwa.” (Episalomi 139:16) Jehova okwa lenga noonkondo omwenyo gwoye. (Lesha Mateus 10:29-31.) Ohashi mu uvitha nayi noonkondo, uuna wa kutha omuntu omwenyo nenge e gwi ikutha ye mwene.a (Eksodus 20:13) Ohashi mu uvitha wo nayi, uuna tatu tula omwenyo gwetu moshiponga miinima yowala nenge inaatu londodha yalwe yi igamene. Uuna tu na ko nasha nomwenyo gwetu notwa simaneka oomwenyo dhayalwe, otatu ulike kutya otwa pandula omagano ga dhenga mbanda gomwenyo.

ILONGA OSHINDJI

3. Kaleka po uukolele woye

Aakriste mboka yi iyapulila Jehova, ohaya longitha onkalamwenyo yawo ayihe ye mu longele. Kungawo, oya fa ya gandja omalutu gawo ge li eyambo kuKalunga. Lesha Aaroma 12:1, 2, e tamu kundathana omapulo taga landula:

• Oshike shi na oku ku inyengitha wu kaleke po uukolele woye?

• Omomikalo dhini to vulu oku shi ninga?

4. Kala wa kotoka kuu etele omuntu oshiponga nenge eso

Ombiimbeli otayi tu ladhipike tu yande iinima mbyoka tayi vulu okweeta oshiponga. Dhana OKAVIDIO, wu mone iinima yimwe mbyoka to vulu okuninga, opo wu igamene.

OKAVIDIO: Kala aluhe wu na ko nasha negameno (8:34)

Lesha Omayeletumbulo 22:3, e tamu kundathana nkene omuntu to vulu okwiigamena nosho wo yalwe . . .

• maandjeni.

• kiilonga.

• uuna to kutha ombinga momaudhano.

• uuna to hingi ongoye awike nenge pamwe nayalwe.

5. Simaneka omwenyo gwokanona hoka inaaka valwa

David okwa li a yelitha kutya Jehova oha kala e wete okanona sho taka koko mela lyayina. Lesha Episalomi 139:13-17, e tamu kundathana epulo tali landula:

• Momeho gaJehova, mbela omuntu oha tameke okukala e na omwenyo sho ta valwa nenge ongele omukiintu a ningi etegelelo?

Oompango dhaJehova muIsraeli shonale, odha li hadhi gamene aakiintu mboka ye li momategelelo naanona mboka inaaya valwa natango. Lesha Eksodus 21:22, 23, e tamu kundathana omapulo taga landula:

• Jehova okwa li a tala ko ngiini omuntu ngoka a dhipaga okanona inaaka valwa natango, ihe ine shi ningila owina?

• Oha kala e uvite ngiini ngele omuntu okwe shi ningile owina?b

• Owu uvitile ngiini etaloko lyaKalunga?

Dhana OKAVIDIO.

OKAVIDIO: Kala wa lenga omwenyo ngaashi Kalunga (5:00)

Omukiintu ngoka a lenga omwenyo, naye otashi vulika a kale e uvite kutya okukutha mo ela oko owala ehogololo e na. Lesha Jesaja 41:10, e tamu kundathana omapulo taga landula:

• Ngele omukulukadhi ota thiminikwa a kuthe mo ela, okulye e na okupula ekwatho? Omolwashike to tile ngawo?

OWI ILONGO SHIKE?

Ombiimbeli otayi tu longo tu kale tu hole, twa simaneka nokukala hatu gamene omagano gomwenyo ngoka Jehova e tu pa. Shika osha kwatela mo oomwenyo dhetu nosho wo dhayalwe.

Omapulo geendululo

• Omolwashike omwenyo gwomuntu gu na ongushu kuJehova?

• Jehova oha kala e uvite ngiini, uuna gumwe a kutha omuntu omukwawo omwenyo e shi ningile owina?

• Omolwashike wa pandula omagano gomwenyo?

UUYELELE WA GWEDHA PO

Ongiini tatu vulu okupandula Jehova omolwomagano gomwenyo?

Eimbilo 141 — Omwenyo ogu li omagano gopashikumithalonga (2:41)

Mona eyamukulo kepulo ndika: Mbela Kalunga ota vulu ngaa okudhimina po omukiintu ngoka i ikuthile ela?

“Ombiimbeli otayi ti ngiini kombinga yokwiikutha ela?” (Oshitopolwa shi li kepandja lyetu lyokointaneta)

Ilonga nkene etaloko lyaKalunga tali vulu oku tu kwathela tu hogolole omainyanyudho ngoka itaaga tula omwenyo gwetu moshiponga.

“Mbela owu na okukutha ombinga momaudhano ngoka ‘ga nika oshiponga’?” (Penduka mo! 8 Kotoba 2000)

Ongiini ngele omuntu oku na omadhiladhilo gokwiidhipaga? Tala nkene Ombiimbeli tayi vulu oku mu kwathela.

“Onda hala okusa — Mbela Ombiimbeli otayi vulu okukwathela ndje, uuna ndi na omadhiladhilo gokwiikutha omwenyo?” (Oshitopolwa shi li kepandja lyetu lyokointaneta)