Omapulo a dja kovaleshi
Omuyapostoli Paulus okwa popya shi na sha “nomatenheko omake” monhumwafo yaye oyo a li a shangela Ovaheberi. Mbela okwa li ta popi kombinga yokunangekwa po kwovakulunhuongalo ile okombinga yoshinima shimwe shi lili? — Heb. 6:2.
Itatu dulu okupopya kutya osho shi li lela ngaho kondadalunde, ndele Paulus pomhito oyo otashi dulika a li ta popi kombinga yokutenhekwa omake ta ulike kokuyandjwa kweeshali domhepo.
Ombibeli oya popya oihopaenenwa yavamwe ovo va li va tenhekwa omake eshi va li va nangekwa po pauteokratika. Pashihopaenenwa, Moses okwa li a ‘tenheka Josua omake’ eshi a li e mu nangeka po a ninge omukwatelikomesho woshiwana. (Deut. 34:9) Meongalo lopaKriste, ovalumenhu vamwe ovo va wana ova li va tenhekwa omake eshi va nangekwa po. (Oil. 6:6; 1 Tim. 4:14) Paulus okwa li a londwela shi na sha nokuhatenheka vamwe omake meendelelo. — 1 Tim. 5:22.
Paulus okwa li a ladipika Ovakriste Ovaheberi va efe po ‘omahovelohongo’ nova ‘lalakanenene ewaneneno’ ile tu tye, oukulunhu wopamhepo. Opo nee okwa li a tumbula oinima ngaashi ‘elidilululo koilonga ya fya noleitavelo okwiitavela Kalunga, nehongo leninginifo nomatenheko omake nenyumuko lovafi netokolo laalushe.’ (Heb. 6:1, 2, yelekanifa NW.) Mbela okunangekwa po kwovakulunhuongalo oku na okukala oshinima shotete ile shopehovelo osho Ovakriste ve na okulalakanena? Hasho nandenande! Ovamwatate ovo va hala okuninga ovakulunhuongalo ove na tete okuninga exumokomesho opo va kale va pyokoka pamhepo. — 1 Tim. 3:1.
Ndele okutenhekwa kwomake okwa li kwa longifwa monghedi vali imwe. Mefelemudo lotete, Jehova okwa li a ekelashi Israel shopambelela nokwa li e shi pingena po naIsrael shopamhepo, eongalo lOvakriste ovavaekwa. (Mat. 21:43; Oil. 15:14; Gal. 6:16) Okwa li a yandja eeshali domhepo kuIsrael shopamhepo pashikumwifilonga, ngaashi okupopya omalaka, ku li oumbangi kutya okwe shi hokwa. (1 Kor. 12:4-11) Eshi Kornelius noukwaneumbo waye va li va ninga ovaitaveli, ova li va pewa omhepo iyapuki, naasho osha li she limonikila mo eshi va li va hovela ‘okupopya omalaka.’ — Oil. 10:44-46.
Omafimbo amwe, ovanhu ova li hava pewa eeshali domhepo pashikumwifilonga okupitila mokutenhekwa omake. Ovanhu vahapu ova li va ninginifwa eshi Filippus a li a udifila onghundana iwa muSamaria, naasho osha li sha ningifa Olutuwiliki li tumine ko omuyapostoli Petrus naJohannes. Omolwashike mbela? Ombibeli otai ti: ‘Ndele ava [vavali] eshi ve va tenheka omake avo [ovo opo va ninginifwa], vo ova pewa omhepo iyapuki.’ Osho osha li shi liwetikile kutya ova pewa eeshali domhepo okupitila moilonga oyo va li tava longo. Osho otu shi shii, molwaashi eshi Simon, oo a li omhulile a mona nghee omhepo ya li tai longo movanhu, okwa li a kwatwa kolwisho nokwa li a hala okulanda omhepo iyapuki a dule okutenheka vamwe omake va longe oikumwifilonga. (Oil. 8:5-20) Lwanima, ovanhu 12 ova li va ninginifwa muEfeso. Ombibeli otai ti: “Paulus eshi e va tenheka omake aye, Omhepo Iyapuki ye uya muvo, vo ova popya omalaka ndee tava xunganeke.” — Oil. 19:1-7; yelekanifa na 2 Timoteus 1:6.
Onghee hano, eshi Paulus a popya kombinga yokutenhekwa omake mOvaheberi 6:2, otashi dulika a li ta popi shi na sha novaitaveli vape ovo va li va pewa eeshali domhepo.