Oohapu dhaJehova odhi na omwenyo
Omanenedhiladhilo okuza moontumwafo dha nyolelwa Titus, Filemon nAahebeli
KONIMA yethimbo sho omuyapostoli Paulus a li a mangululwa lwotango muukwatwa we muRoma mo 61 E.N., okwa li a talele po ontuntu yaKreta. Okwa li a thigi Titus muKreta sho a li a ndhindhilike kutya egongalo ndyoka olya pumbwa okuladhipikwa pambepo. Konima yethimbo manga a li muMakedonia, Paulus okwa li a nyolele Titus ontumwafo opo e mu pe omayele miinakugwanithwa ye nokuulika kutya okwe mu pa oonkondopangelo dhokulonga iilonga mbyoka.
Kuyele manga omuyapostoli Paulus inaa mangululwa mondholongo mo 61 E.N., okwa li a nyolele omumwahe Omukriste ngoka a li muKolossa ontumwafo. Muyo okwa li a ningi eindilo lyopaumwene kukuume ke Filemon.
Mo 61 E.N. lwaampono, Paulus okwa li a nyolele wo ooitaali Aahebeli muJudea ontumwafo, ndjoka ya li yu ulike esimano lyelongelokalunga lyopaKriste pehala lyonkalelo yOshijuda. Oontumwafo adhihe ndatu odhi na omayele ge na ongushu kutse.—Heb. 4:12.
KALENI MWA ALUKA MEITAALO
Konima yokugandja uuyelele kombinga ‘yokuhogolola aakuluntu yegongalo momukunda kehe,’ Paulus okwa li a gandja omayele kuTitus ‘a kale nokuganda aapopyagani opo ya kale ya aluka meitaalo.’ Okwa li a kumagidha ayehe momagongalo gomuKreta ‘ye ethe okudhina Kalunga nuuhalu wuuyuni noyi ikwate nawa.’—Tit. 1:5, 10-13; 2:12.
Paulus okwa li a gandja ishewe omayele opo a kwathele aamwatate mboka ya li muKreta ya kale ye na eitaalo lyu uka. Okwa li a lombwele Titus a “yande ihe omapulapulo guugoya . . . nomaludhi okuludhika ompango.”—Tit. 3:9, OB-1954.
Omapulo gopamanyolo taga yamukulwa:
1:15—Ongiini “kehe shimwe” sha “yogoka kwaamboka ya yogoka,” ihe osha nyata “kwaamboka ya nyata muyo yene noyaa shi ooitaali”? Opo tu tseye eyamukulo, otwa pumbwa okuuva ko shoka Paulus a li a hala okutya sho a ti “kehe shimwe.” Ka li ta popi kombinga yiinima mbyoka yi indikwa mOohapu dhaKalunga, ihe okombinga yiinima mbyoka omwiitaali e na okuninga etokolo shi ikolelela keiyuvo lye. Komuntu ngoka ha dhiladhila metsokumwe nomithikampango dhaKalunga, iinima mbyoka oya yogoka. Ihe kwaangoka omadhiladhilo ge ga goyoka naangoka eiyuvo lye lya nyata iinima mbyoka oya nyata.a
3:5, OB-1954—Ongiini Aakriste aagwayekwa ya ‘hupithwa keyogo lyevalululo’ noya ‘shitululwa kOmbepo Ondjapuki’? Oya ‘hupithwa keyogo lyevalululo,’ meityo ndyoka kutya Kalunga okwe ya yoga nombinzi yaJesus pakankameno lyongushu yekuliloyambo. Oya ‘shitululwa kOmbepo Ondjapuki’ molwaashoka oya ninga “omushitwa omupe” ye li oyana yaKalunga ya gwayekwa nombepo.—2 Kor. 5:17.
Iiyilongomwa kutse:
1:10-13; 2:15. Aakuluntugongalo oye na okukala aalaadhi uuna taya gandja epukululo megongalo.
2:3-5. Aamwameme mboka aakokele kunena oye na okukala ya fa mboka yomethelemumvo lyotango, ‘ya kale nokukalamwenyo kwa yapuka. Kaye na okukala ookaalekopoondjila nenge oombwiyi dhiikolitha.’ Momukalo ngoka otaya vulu okulonga paumwene “aakiintu aagundjuka” megongalo.
3:8, 14. Okulongitha ethimbo lyetu “mokulonga uuwanawa” oshi li ‘oshiwanawa notashi tu kwatha’ tu imike iiyimati miilonga yaKalunga noku tu yoolola ko kuuyuni mbuka wa yonuka.
KUMAGIDHA ‘PAHOLE’
Filemon ota pandulwa okukala e li oshiholelwa oshiwanawa ‘shohole neitaalo.’ Okukala ha talaleke Aakriste ooyakwawo osha li she etele Paulus “enyanyu olindji nomukumo.”—Filem. 4, 5, 7.
Paulus okwa tulila po aakuluntugongalo ayehe oshiholelwa sho a li a pongolola po oshikumungu shaOnesimus noku mu kumagidha ‘pahole.’ Okwa li a lombwele Filemon a ti: “Otandi nyola ndi inekela kutya oto ka ninga shoka tandi ku indile, nonda tseya kutya oto ka ninga oshindji shi vule mpoka.”—Filem. 8, 9, 21.
Omapulo gopamanyolo taga yamukulwa:
10, 11, 18—Ongiini Onesimus a li e na “oshilonga” nonando okwa li nale ‘kee na ekwatho lyasha’? Onesimus okwa li a yi ontuku okuza maandjaFilemon muKolossa e ta yi kuRoma molwaashoka ka li a hala okukala omupika. Otashi vulika Onesimus a li a yaka po iimaliwa yamwene gwe opo a vule okuya molweendo ndoka lu na ookilometa 1 400. Dhoshili, ka li e na ekwatho lyasha kuFilemon. Ihe muRoma Onesimus okwa li a kwathelwa kuPaulus a ninge Omukriste. Konima sho omupika nguka a li ‘kee na ekwatho lyasha’ a ningi omumwatate gwopambepo, okwa kala e na “oshilonga.”
15, 16—Omolwashike Paulus a li inaa pula Filemon a mangulule Onesimus? Paulus okwa li a halelela okukala i itula mo moshilonga she ‘shokuuvitha Uukwaniilwa waKalunga nokulonga aantu nokuhokolola Omuwa Jesus Kristus.’ Onkee ano, ka li a kutha ombinga miinima yopankalathano ngaashi mbyoka yi na ko nasha nuupika.—Iil. 28:31, KB.
Iiyilongomwa kutse:
2. MaandjaFilemon omwa li hamu ningilwa okugongala kwopaKriste. Oshi li uuthembahenda ngele elongekidho lyiilonga yomomapya ohali ningilwa megumbo lyetu.—Rom. 16:5; Kol. 4:15.
4-7. Otu na okukala hatu pandula ooitaali ooyakwetu mboka ye li iiholelwa iiwanawa yeitaalo noyohole.
15, 16. Katu na okweetha iinima iiwinayi mbyoka hayi ya po monkalamwenyo yi tu teye omukumo. Otashi vulika yi ke ete iizemo iiwanawa, ngaashi moshinima shaOnesimus.
21. Paulus okwa li a tegelela Filemon a dhimine po Onesimus. Natse wo otu na okudhimina po omumwatate ngoka e tu uvitha nayi.—Mat. 6:14.
“LALAKANENENI UUKULUNTU”
(Heb. 1:1–13:25)
Opo Paulus u ulike kutya eitaalo meyambo lyaJesus oli vule kokule iilonga yOmpango, okwa li a tsu omuthindo esimano lyOmutotipo gwUukriste, uusaaseri we, eyambo lye nosho wo ehangano epe. (Heb. 3:1-3; 7:1-3, 22; 8:6; 9:11-14, 25, 26) Osha yela kutya ontseyo ndjika oya li ya kwathele Aakriste Aahebeli opo yi idhidhimikile omahepeko ngoka ya li ya ningilwa kAajuda. Paulus okwa li a ladhipike ooitaali Aahebeli ya ‘lalakanene uukuluntu.’—Heb. 6:1.
Mbela osha simana shi thike peni kOmukriste a kale e na eitaalo? Paulus okwa nyola a ti: “Kape na ngoka ta hokiwa kuKalunga ngele ke na eitaalo.” Okwa ladhipike Aahebeli a ti: “Natu matukeni twa mana mo methigathano ndyoka li li komeho getu,” tatu shi ningi meitaalo.—Heb. 11:6; 12:1.
Omapulo gopamanyolo taga yamukulwa:
2:14, 15—Sho Satana oye “he eta eso,” mbela otashi ti kutya ota vulu okweetitha mbala eso lyakehe ngoka a hala? Aawe, hasho nando. Ihe okuza sho Satana a tameke nondjila yuuwinayi muEden, iifundja ye oye eta eso molwaashoka Adam okwa yono nokutaandelitha uulunde neso maantu ayehe. (Rom. 5:12) Natango, aakalelipo yaSatana yokombanda yevi oya kala nokuhepeka aapiya yaKalunga sigo omeso, ngaashi owala ya li ya ningile Jesus. Ihe shoka inashi hala okutya Satana oku na oonkondo inaadhi ngambekwa okudhipaga ngoka a hala. Andola okwa li e na oonkondo inaadhi ngambekwa, ando okwa dhipaga po nale aalongeli yaJehova ayehe. Jehova oha gamene oshigwana she ashihe noiha etha Satana e shi hulithe po. Nonando Kalunga oku ethe yamwe yomutse tu se omolwomaponokelo gaSatana, ota ka kutha po thiluthilu uuwinayi auhe mboka Satana e tu etela.
4:9-11—Ongiini hatu ‘yi mevululuko lyaKalunga’? Kalunga okwa li a vululukwa kiilonga ye konima yomasiku gahamano e na einekelo kutya elalakano lye li na ko nasha nevi nosho wo aantu otali ka gwanithwa. (Gen. 1:28; 2:2, 3) Ohatu ‘yi mevululuko ndyoka’ mokuhenuka iilonga yokwiiyukipalitha tse yene nokutaamba ekuliloyambo ndyoka Kalunga e tu pe omolwehupitho lyetu. Ngele otu na eitaalo tali longo muJehova nokuvulika kOmwana pehala lyokulalakanena iinima yopaumwene, otatu ka nyanyukilwa omalaleko nuuyamba taga talaleke notaga vululukitha esiku kehe.—Mat. 11:28-30.
9:16—“Omuuvaneki” gweuvaneko nenge gwehangano epe olye? Jehova oye Omutotipo gwehangano epe omanga Jesus oye “omuuvaneki.” Jesus oye Omupokati gwehangano ndyoka naashika okwe shi koleke okupitila meso lye sho a gandja eyambo ndyoka lya li lya pumbiwa.—Luk. 22:20; Heb. 9:15.
11:10, 13-16—Abraham okwa li a tegelela “oshilando” shini? Shika kasha li oshilando lelalela, ihe osha li shopathaneko. Abraham okwa li a tegelela ‘Jerusalem shomegulu’ shoka sha thikama po muKristus Jesus naapangeli pamwe naye 144 000. Aapangeli mboka otaya popiwa wo ye li meadhimo lyawo lyomegulu ya fa “Oshilando oshiyapuki, Jerusalem oshipe.” (Heb. 12:22; Eh. 14:1; 21:2) Abraham okwa li a tegelela nondjuulukwe okukala nomwenyo kohi yepangelo lyUukwaniilwa waKalunga.
12:2 (Yelekanitha NW.)—‘Enyanyu ndyoka lya li lya tegelela Jesus’ sho a li ‘idhidhimikile komuti gwomahepeko’ olya li shike? Olya li enyanyu okumona shoka uukalele we wa li tawu ka tompola, mwa kwatelwa okuyapulitha edhina lyaJehova, okuyukipalitha uunamapangelo waKalunga nosho wo okuhupitha aantu meso okupitila mokuyamba omwenyo gwe. Jesus okwa li wo a tegelela ondjambi yoku ka pangela e li Omukwaniilwa nOmusaaseri omukuluntu e etele aantu uuwanawa.
13:20—Omolwashike ehangano epe tali popiwa lyi li “lyaaluhe”? Opu na omatompelo gatatu: (1) Itali ka pingenwa po nando, (2) shoka lya gwanithwa po otashi kalelele (3) ‘noonzi dhilwe’ otadhi ka tsikila okumona uuwanawa melongekidho lyehangano konima yaArmagedon.—Joh. 10:16, OB-1954.
Iiyilongomwa kutse:
5:14. Otu na okukala aakonakoni aalaadhi yOohapu dhaKalunga, Ombiimbeli nokutula miilonga shoka tatu ilongo mo. Nguka ogo owala omukalo moka tatu vulu “okuyoolola shoka shu uka nenge sha puka.”—1 Kor. 2:10.
6:17-19. Ngele etegameno lyetu olya kankamena lela komauvaneko gaKalunga nosho wo kegano lye otashi ke tu kwathela twaaha penge mo mondjila yoshili.
12:3, 4, OB-1954. Pehala lyokukala ‘twa loloka noomwenyo dhetu dha sa uunye’ omolwomamakelo ga nathangwa nenge omapataneko ngoka hage tu adha, otu na okuhuma komeho mokulalakanena uukuluntu nokuhwepopaleka okuvula kwetu okwiidhidhimikila omamakelo. Otu na okukala twa tokola toko tu kondje ‘sigo omeso.’—Heb. 10:36-39.
12:13-15. Katu na nando okupitika “oshimeno oshilulu” nenge gumwe ngoka ha kala ta gandja uusama kunkene iinima tayi ningwa megongalo e tu imbe tu ‘ende moondjila dhu ukilila.’
12:26-28. “Iishitwa” sha hala kutya, iinima mbyoka ya ningwa kaantu, mwa kwatelwa onkalelo ayihe yiinima yaSatana nosho wo ‘egulu’ ndyoka lya yonuka otayi ka kakamithwa nokuhulithwa po. Uuna shoka tashi ka ningwa, oombyoka owala ‘itaayi kakamithwa,’ sha hala okutya, Uukwaniilwa naayambidhidhi yawo, otaya ka hupa po. Inashi simanenena tuu tu kale hatu uvitha nuulaadhi kombinga yUukwaniilwa nokukala metsokumwe nomakotampango gawo!
13:7, 17. Okukaleka ekumagidho ndika momadhiladhilo nokuvulika kaakuluntugongalo otashi ke tu kwathela tu kale nombepo yelongelokumwe.
[Enyolo lyopevi]
a Tala Oshungonangelo ye 1 Novomba 2007, epandja 18-19.