Ino piyaganekwa kusha pethimbo ndika ‘lyonkundana ombwanawa’

AANASHILUNDU yane oya li tayi ipula kombinga yaashoka taya vulu okuninga. Kapu na ngoka a li e ya pe iikwatha yasha moshilando Samaria. Aasiria oya li ye shi kondeka noinaya pitika mu etwe iikulya opo aantu ya se ondjala. Kasha li shi na ekwatho lyasha okuya musho, molwaashoka iikulya oya li yi na ondilo unene. Omolwondjala yamwe oya tameka okulya onyama yaantu ooyakwawo.—2 Aak. 6:24-29.

Aanashilundu oya ti: ‘Omolwashike itatu yi kontanda yAasiria? Otashi vulika ye tu hupithe.’ Sho kwa wiwile nokapwa li pu na ngoka e ya wete, oya yi molweendo. Sho ya thiki pontanda yAasiria, opwa li pwa mwena nokapwa li aalangeli. Oya adha po owala uukambe nuusino, ihe kapwa li aakwiita. Aanashilundu yane oya li yo ontamene montanda. Kamwa li omuntu, ihe iikulya niikunwa oya li mo oyindji. Oya tameke okulya nokunwa. Aanashilundu oya li wo ya mono iingoli, iisiliveli, oonguwo niinima yilwe yi na ongushu. Oya kutha mo iinima mbyoka e taye ke yi holeka noya galuka ishewe. Ontanda ayihe oya li ya thigwa amwasha. Jehova okwa li u uvitha Aasiria pashikumithalonga oshihomo shaakwiita oyendjiyendji. Aasiria oya li ya fadhuka po, molwaashoka oya li taya dhiladhila kutya otaya ponokelwa. Oya thigi po iinima yawo ayihe.

Aanashilundu oya li ya kutha po iinima oyindji yongushu. Ihe oya li ya tameke okwiipa uusama sho ya dhiladhila kombinga yaantu yomuSamaria mboka taya si ondjala. Oya lombwelathana taya ti: “Otatu ningi nayi. Otu na onkundana ombwanawa nokatu vulu oku yi mwenena.” Aanashilundu oya matukile kuSamaria nokulombwela aantu onkundana ombwanawa yaashoka ya mono.—2 Aak. 7:1-11.

Natse wo otu li pethimbo ‘lyonkundana ombwanawa.’ Jesus okwa popi kombinga ‘yendhindhiliko lyehulilo lyuuyuni’ a ti: “[Onkundana ombwanawa yUukwaniilwa otayi] ka uvithilwa aantu ayehe, [yi] ningile iigwana ayihe onzapo; notaku ya ihe ehulilo.” (Mat. 24:3, 14, yelekanitha KB.) Oshinima shika oshi na oku tu guma ngiini?

Iimpwiyu yopaumwene otayi vulu oku tu luudhika

Molwaashoka aanashilundu oya li ya nyanyukwa kwaashoka ya mono, oya li ya dhimbwa Aasamaria pakathimbo. Oya li yi itula unene momaliko ngoka ya mono. Mbela natse otatu vulu okuninga sha faathana? “Oondjala” odhi li oshitopolwa shimwe shendhindhiliko shoka tashi ulike kutya ehulilo lyuuyuni oli li popepi. (Luk. 21:7, 11) Jesus okwa londodha aalongwa ye a ti: “Ikotokeleni ne yene! Inamu etha, omadhiladhilo geni ga luudhikwe kiituthi nokuunkolwi nokiimpwiyu [yopauyuni], opo esiku ndyoka lyaaye mú adhe ombadhilila.” (Luk. 21:34) Tu li Aakriste, katu na okupitika iimpwiyu yopaumwene yakehe siku yi tu posipaleke tu dhimbwe kutya otu li pethimbo ‘lyonkundana ombwanawa.’

Omumwameme gwedhina Blessing ina pitika nando iimpwiyu yopaumwene yi mu luudhike. Omanga a li kokolindji ti ilongele uulongi, okwa li wo omukokolindjila. Konima sho a mana, okwa hokanwa kOmubetel nongashingeyi ye nomusamane gwe oye li iilyo yuukwanegumbo waBetel moBenin. Blessing okwa ti: “Ohandi opaleke moBetel nondi hole unene oshilonga shandje.” Ngashingeyi oku uvite nawa sho a longa omimvo 12 miilonga yethimbo lyu udha noku na olupandu sho inaa dhimbwa kutya otu li pethimbo ‘lyonkundana ombwanawa.’

Kotokele iinima mbyoka hayi hepitha ethimbo

Sho Jesus a tumu aalongwa ye 70, okwe ya lombwele a ti: “Iilya oyi li po oyindji, ihe aalongi oyo aashona. Galikaneni ano mwene gwiilya, a tume aalongi keteyo lye.” (Luk. 10:2) Ngaashi owala iilya hayi hepa ngele omunepya ina teya pethimbo, natse ngele ihatu uvitha, oomwenyo otadhi vulu okukana. Jesus okwa gwedha ko a ti: “Inamu mana po ethimbo nokukunda aantu mondjila.” (Luk. 10:4) Oshitya ‘okukunda’ mOshihebeli osha kwatela mo oshindji kashi shi owala okutya “ongiini” nenge “mu uhala po.” Osha kwatela mo wo okwiipapatela nokupopya oohapu itaadhi hulu, shoka hashi ningwa uuna wa tsakaneke kuume koye. Jesus okwa li a lombwele aalongwa ye ya longithe ethimbo lyawo nawa noyaahe li hepithe miinima inaayi pumbiwa. Onkundana ndjoka ya li ye na okuuvitha oya li ye endelela.

Tala nkene iinima yowala tayi vulu okuhepitha ethimbo lyoye. Miitopolwa oyindji o-TV, oyo unene hayi mana po ethimbo. Ongiini kombinga yoongodhi dhopeke nookompiuta? Sho aakalimo aakuluntu muBritania 1 000 ya pulwa, oya ti kutya ‘ohaya longitha ominute 88 kehe esiku okupopya mongodhi yokopaala, ominute 62 okupopya mongodhi yopeke, ominute 53 okutuma o-email nominute 22 okutuma omatumwalaka.’ Ethimbo ndyoka haya longitha oli vule lwiikando iyali pwaandyoka aakokolindjila haya longo muukalele esiku kehe. Oho longitha ethimbo li thike peni miinima yoludhi ndoka?

Ernst Selinger nomukulukadhi gwe Hildegard oya li ya kotoka mokulongitha ethimbo lyawo. Ayehe yaali oya li ya kala uule womimvo dha konda po 40 oonkwatwa mookamba dhAanazi nomoondholongo dhomapangelo gUukomonisi. Konima sho ya mangululwa, oya longo ye li aakokolindjila sigo okeso lyawo.

Aantu oyendji oya li ya hala okukala hayi inyolele nayo. Oya li taya vulu okukala haya longitha ethimbo lyawo olindji mokulesha nokugalula ombapila ndhoka ya nyolelwa, ihe oya li ya lenga unene iilonga yuukalele monkalamwenyo yawo.

Kehe gumwe gomutse oku hole okuninga omakwatathano gopambapila nogopangodhi naamboka e hole, noshinima shoka inashi puka. Oshi li nawa okuninga iinima ya yoolokathana monkalamwenyo yetu yakehe siku. Ihe nonando ongaaka, otu na okukala twa kotokela iinima mbyoka tayi mana po ethimbo lyetu pethimbo ndika lyokuuvitha onkundana ombwanawa.

Uvitha wa mana mo onkundana ombwanawa

Inatu lalekwa tuu nuuyamba sho tu li pethimbo ‘lyonkundana ombwanawa!’ Inatu yi dhimbwa ngaashi aanashilundu yane ya li ya ningi petameko. Dhimbulukwa kutya oya lombwelathana ya ti: “Otatu ningi nayi.” Sha faathana, otatu ningi nayi ngele tatu etha iimpwiyu yopaumwene nenge iinima mbyoka hayi mana po ethimbo yi tu imbe tu kuthe ombinga pakuudha muukalele.

Moshinima shika, otu na oshiholelwa sha dhenga mbanda. Konima sho omuyapostoli Paulus a longo uule womimvo 20 muukalele we, okwa nyola a ti: “Ondu uvitha nda mana mo elaka etoye tali popi Kristus.” (Rom. 15:19) Paulus ina pitika sha shi ye moshipala uulaadhi we. Ngaashi ye, natse natu uvithe nuulaadhi etumwalaka lyUukwaniilwa methimbo ndika ‘lyonkundana ombwanawa.’

[Ethano pepandja 31]

Blessing ina pitika iinima yopaumwene yi mu imbe a ye miilonga yethimbo lyu udha

[Ethano pepandja 32]

Ernst Seliger nomukulukadhi gwe oya li ya longitha ethimbo lyawo nawa