Elongo eti-4: Kalunga omukwatatu
Mbela elongo ndika olya tamekela peni? “Edhiladhilo kutya elongo lyUukwatatu olya tameke lwopehulilo lyethelemumvo eti-4 oli li mondjila. Oshinima shoka oshoshili . . . Elongo kutya ‘Kalunga katatu gumwe’ kalya li lyi itaalwa naanaa komeho yethelemumvo eti-4, nAakriste kaya li ye li taamba ko monkalamwenyo yawo nomeitaalo lyawo.’—Embo eti-14 lyo-New Catholic Encyclopedia (1967), epandja 299.
‘Olaata yomuNicaea oya li ya gongala mo 20 Mei 325 [E.N.]. Constantine oye a li a kwatele komeho oonkundathana nokwa ningi eetopo lye mwene kolaata ndjoka kombinga yankene Kristus naKalunga ya pambathana mokulonga kutya “oye li omuntu gumwe naHe.” Kakele kaabisofi yaali, yakwawo ayehe oya li ya zimine eitaalo ndyoka molwaashoka oya li ya tila omupangeli, nonando oyendji yomuyo oya li ompinge nalyo.’—Embo eti-6 lyo-Encyclopædia Britannica (1970), epandja 386.
Ombiimbeli otayi ti ngiini? “Stefanus, ngoka a li u udha Ombepo Ondjapuki, okwa ligamene pombanda kegulu nokwa mono ko eadhimo lyaKalunga naJesus a thikama kolulyo lwaKalunga. Okwa ti: ‘Taleni, ondi wete egulu lye eguluka nOmuna gwOmuntu a thikama kolulyo lwaKalunga.’”—Iilonga 7:55, 56.
Emoniko ndika otali holola shike? Stefanus sho u udhithwa oonkondo dhombepo yaKalunga tadhi longo, okwa mono Jesus a “thikama kolulyo lwaKalunga.” Osha yela kutya Jesus ina ninga Kalunga konima sho a yumudhilwa omwenyo gwomegulu, ihe pehala lyaashono okwa kala oshishitwa shopambepo shi ili. Mehokololo ndika inamu popiwa omuntu omutitatu a li pooha dhaKalunga. Nonando omupristeli Marie-Émile Boismard okwa kambadhala okumona oovelise mOmanyolo ndhoka tadhi ambidhidha elongo lyUukwatatu, okwa nyola membo lye kombinga yonzo yomalongo gUukwakriste a ti: “Epopyo kutya Kalunga katatu gumwe . . . itali adhika mo nando mEtestamendi Epe.”
Constantine okwa li a dhiladhila okuhulitha po ehilathano ndyoka lya li mongeleka methelemumvo eti-4, sho a toto po elongo ndyoka. Ihe elongo ndyoka olya pendutha ishewe epulo ekwawo kutya: Mbela Maria ngoka a vala Jesus, oye “yina yaKalunga”?
Yelekanitha oovelise dhOmbiimbeli ndhika: Mateus 26:39; Johannes 14:28; 1 Aakorinto 15:27, 28; Aakolossa 1:15, 16
OSHILI OYO:
Elongo lyUukwatatu olya tameke owala lwopehulilo lyethelemumvo eti-4
[Ethano pepandja 7]
[Edhina lyomuthaneki gwethano pepandja 7]
Museo Bardini, Florence