Elongo eti-6: Kalunga okwa panda elongitho lyiimenka megalikano
Mbela elongo ndika olya tamekela peni? “Aakriste yotango kaya li haya galikana okupitila miimenka . . . Iimenka oya li ya tamekwa okulongithwa mongeleka methelemumvo eti-4 neti-5 nedhiladhilo kutya aantu mboka kayu uvite ko lela Uukwakriste otaya vulu oku wu ilonga hwepo okupitila miimenka shi vulithe melongelokalunga nenge momambo.”—Embo eti-4 lyo-Cyclopedia of Biblical, Theological, and Ecclesiastical Literature, lya nyolwa kuMcClintock naStrong, epandja 503 no 504.
Ombiimbeli otayi ti ngiini? “Ino ihongela oshiyelekela nenge efano lyashaa shoka megulu nenge kombanda yevi nenge momeya kohi yevi. Ino yi inyongamena nenge u yi simaneke.” (Eksodus 20:4, 5) Omuyapostoli Johannes okwa li a nyolele Aakriste yomethelemumvo lyotango a ti: “Aamwandje, yandeni iikalunga.”—1 Johannes 5:21.
Mbela iimenka oyi li owala uupitilo okusimaneka Kalunga, ngaashi oongeleka hadhi ti? Embo The Encyclopedia of Religion otali ti: “Petameko iimenka otashi vulika ya li hayi longithwa nelalakano opo yi nongeke aantu nomolwokumonikitha nawa omahala, shoka sha li aniwa etompelo molwaashoka ye yi longitha. Ihe oya li ya tameke okulongithwa megalikano konima yokathimbo. Shika osha li shi iwetikile unene tuu miimenka mbyoka ya li ya simanekwa [mUukwakriste wokUuzilo waEuropa].” Ihe omupolofeti Jesaja oku li mondjila sho a pula a ti: “Kalunga ota yelekwa nalye? Otamu mu faathanitha nashike?”—Jesaja 40:18.
Yelekanitha oovelise dhOmbiimbeli ndhika: Jesaja 44:13-19; Iilonga 10:25, 26; 17:29; 2 Aakorinto 5:7
OSHILI OYO:
Kalunga ina panda elongitho lyiimenka
EKELAHI OMALONGO GIIFUNDJA E TO KANYATELE OSHILI
Otatu vulu okuthika pehulithodhiladhilo lini sho twa lesha kombinga yomalongo giifundja ngoka haga longwa koongeleka odhindji? Iinima mbyoka oyi li “oongano [mOshigreka, mythosi] dha tungwa nomakoto” ndhoka itadhi vulu okuyelekanithwa nooshili dhOmbiimbeli ndhoka tadhi hekeleke.—2 Petrus 1:16, OB-1954.
Onkee ano, ino kakadhala okuyelekanitha shoka wa longwa nale naashoka shi li mOohapu dhaKalunga ndhoka dhi li onzo yoshili. (Johannes 17:17) Opo nduno, euvaneko ndika tali landula otali ka kala lyoshili kungoye: “One otamu ka tseya ihe oshili, noshili otayi ke mú mangulula.”—Johannes 8:32.
[Ethano pepandja 9]
[Uuyelele wu na sha nethano pepandja 9]
Pictorial Archive (Near Eastern History) Est.