Omulumentu ngoka a nwetha mo uuyuni auhe
Kombanda yevi okwa li aantu omabiliyona noyendji yomuyo kaye ko we. Oyendji yomuyo inaya longa sha oshindhindhilikwedhi. Ihe aashona yowala ya thiga po ondjokonona ndjoka tashi vulika ya guma onkalamwenyo yoye yakehe siku.
NGELE to penduka ongula onene wu ilongekidhe okuya kiilonga, oho tema olamba yi ku minikile. Oho vulu okulesha embo nenge oshifo. Oho nu omiti noopela ndhoka hadhi kondjitha uuvu mboka hawu etwa kombakiteli. Sho owala to penduka oho mono omauwanawa ogendji miinima mbyoka ya ningwa kaantu mboka ya li ko nale.
Gumwe gwomuyo oMichael Faraday Omulumentu Omwiingilisa a valwa mo 1791 nokwa li omunongononi gwiinima yopaunshitwe ngoka a nduluka eshina lyokuninga olusheno. Shoka a ninga po osha kwathela aantu ya kale taya longitha olusheno sigo okunena.
Omukwawo oTs’ai Lun Omulumentu ngoka a li e na ondondo ya simana mepangelo lyaKiina noye a tota po eshina lyokuninga oombapila momumvo 105 E.N., shoka sha ningitha opo oombapila odhindji dhi vule okuningwa poshikando.
Gumwe oJohannes Gutenberg Omulementu Omundowishi ngoka oye a tota po eshina lyokunyanyangidha iileshomwa momumvo 1450 lwaampono. Aantu oya li taya vulu okumona iileshomwa nuupu kondando yopevi opo ya leshe uuyelele owundji.
Gumwe ishewe oAlexander Fleming Omulumentu Omuskoto ngoka a valwa mo 1928 noye gwotango okumona openisilini ndjoka hayi longithwa okupanga omikithi ndhoka hadhi etwa koombakiteli.
Osha yela kutya aantu omabiliyona ogendji ohaya mono omauwanawa gontumba nenge epango omolwiinima mbyoka ya ndulukwa noya totwa po kaantu mboka ya li ko nale.
Ihe opu na omulumentu gumwe ngoka e vule aalumentu ayehe mboka twa zi nokupopya. Ina tseyika nawa molwaashoka a li omunongononi nenge molwaashoka a nduluka omiti dhokupanga omikithi. Etumwalaka noohapu dhe otadhi pe aantu etegameno noku ya hekeleka, nonando kombanda yevi okwa li ko nale konima yomimvo 2 000 dha ka pita. Ngele owa tala kutya etumwalaka lye olya nwetha mo onkalamwenyo yaantu ye thike peni muuyuni auhe, oto ke shi mona shili kutya oku na enwethomo enene.
Omulumentu ngoka oJesus Kristus. Etumwalaka lyashike a li a lombwele aantu? Ongiini etumwalaka ndyoka lya guma onkalamwenyo yoye?