Omapulo ga za kaaleshi

Omeityo lini eso lyaapiya yaKalunga aadhiginini ‘li na ondilo momeho ge’?

▪ Omupisalomi okwa nwethwa mo a nyole ta ti: “Momeho gaJehova eso lyaapiya ye aadhiginini oli na ondilo.” (Eps. 116:15, NW) Jehova okwa lenga omwenyo gwomupiya gwe kehe. Ihe oohapu ndhoka dhi li mEpisalomi ontopolwa 116 odha kwatela mo oshindji kaashi shi owala eso lyomuntu pauhandimwe.

Uuna gumwe ta gandja oshipopiwa peso lyOmukriste, inashi opala a longithe Episalomi 116:15 mokupopya nakusa, nonando okwa sa omudhiginini. Omolwashike mbela? Omolwaashoka oohapu dhEpisalomi odhi na eityo lya mbwalangandja. Otadhi ti kutya Kalunga ita ka pitika aapiya ye ayehe aadhiginini ye li ongundu ya se, molwaashoka okwe ya tala ko ye na ongushu.—Tala Episalomi 72:14; 116:8.

Episalomi 116:15 otali tu shilipaleke kutya Jehova ke na siku a pitike aapiya ye ayehe aadhiginini ya kombwe ko kombanda yevi. Ondjokonona yetu oye shi ulika kutya otwa kala nokwiidhidhimikila omamakelo nomahepeko shoka shi li euliko kutya Kalunga ita ka pitika nando tu hulithwe po.

Jehova ite ke etha tu hanagulwe po, molwaashoka ye omunankondoadhihe, lyo elalakano lye oli na okugwanithwa shili. Ngele okwa pitike oshinima sha tya ngaaka shi ningwe, nena ota ka kala a fa e vulike oonkondo kaatondi ye, oshinima shoka itaashi wapa nandonando. Elalakano lye evi li kaliwe kaantu aadhiginini oli na okugwanithwa lela. (Jes. 45:18; 55:10, 11) Ngele inali gwanithwa, nena okulongela Jehova iilonga iiyapuki otaku ka hula po kombanda yevi ngele kaku na aantu mboka taye mu longele mehale lyotempeli ye onene yopambepo. Ngele inali gwanithwa nena itapu ka kala we ‘evi epe,’ aantu aayuuki mboka taya ka wilikwa kepangelo epe lyomegulu, ndyoka tali ithanwa “egulu epe.” (Eh. 21:1) Shimwe ishewe, epangelo lyOmimvo Eyuvi lyaKristus itali ka kala lyoshili, nopwaana aapangelwa mboka taya ka kala kombanda yevi.—Eh. 20:4, 5.

Ngele Kalunga okwa pitike aantu ye ya kombwe po thiluthilu kombanda yevi kaatondi ye, otashi ka tulitha momalimbililo ondondo ye nesimano lye. Oshinima sha tya ngawo otashi ka dhinitha ondondo ye e li Omunamapangelo agehe. Natango ishewe, Jehova ita ka pitika aapiya ye ayehe ya kombwe po, molwaashoka okwi isimaneka ye mwene nosho wo edhina lye eyapuki. Ombiimbeli otayi ti: Kalunga ‘ke na uugoyoki’ onkee ano, ota ka gamena aapiya ye ye li ongundu mboka haye mu longele nuudhiginini. (Deut. 32:4; Gen. 18:25) Kakele kaashono, ngele okwe etha ongundu ayihe yaapiya ye yi hulithwe po, oshi li tashi kondjithathana nOohapu dhe ndhoka tadhi ti: “Omuwa omolwedhina lye enene aantu ye itee ya ekelehi.” (1 Sam. 12:22, OB-1954) Oshoshili kutya “OMUWA ite ekelehi aantu ye; ite etha po mboka ye.”—Eps. 94:14.

Itashi hekeleke tuu okutseya kutya aapiya yaJehova kaye na siku ya ka pwe ko kombanda yevi! Onkee ano, natu kale twa tokola shi vulithe nale notwi inekela meuvaneko lye ndyoka tali ti: “Oshikondjitho kehe tashi hambulwa shi ku kondjithe, itashi tompola sha. Nelaka kehe tali ku tamaneke, oto li tompele ondjo. Otandi ka popila aapiya yandje e tandi ya pe esindano.”—Jes. 54:17.

[Oohapu dha simana pepandja 22]

Kalunga ita ka pitika nando aapiya ye ayehe ya hulithwe po